1 Bitǝrus 5 - Maləmce Məfele mala Ɓakuli: Kurcau Məbəshe

Akwarkiru ace aɓwana-mǝgule andǝ alo-aɓwana

¹ Mǝ nda rǝ ɓakɓabum aɓwana-mǝgule mǝnana aɓalǝ wun ngga kǝla ɓi'wun ɓwamǝgule. Ən sǝn nutanni mala Kǝrǝsti nǝ amǝsǝam, sǝ mim gbal ka, mǝ nǝ kum kāmbe mem aɓa ɓoarɓwa male, yi mǝnana ɓǝ̀ yi pusǝna rǝì aban ɓanza ka.

² Wu yal domwan mala Ɓakuli mǝnana tsǝk wun a yale ka. Wu tsǝk mǝsǝ wun a rǝì nǝ eare ma'wun, kǝla mǝnana Ɓakuli earce ka, pa kǝla à tsǝk wun púp ɗang. Wu pak ture sǝ wu kǝa tsǝk ɓalǝ wun arǝ gir mǝnana wu nǝ̀ kumo a ɓalǝi ka ɗang, wu pe acemǝnana wu ndanǝ rǝɓǝla mala pakki Ɓakuli turo ka.

³ Aɓwana mǝnana à tsǝk wun amuria ama wu ɗenyi nǝia ka, wu kǝa lǝmndǝia wia rǝcandǝa ɗang, wu duk girkani abania.

⁴ Sǝ ɓǝ̀ Gbani mala ayalgir yi pusǝna rǝì ka, wu nǝ̀ kum mbulan-gulo mǝɓoarne mǝnana pà nǝ̀ è raka.

⁵ Sǝ wun alo-ɓwa gbal ka, wu kǝ nongsǝ mur wun aɓata aɓwana-mǝgule. Wun kat ka, wu do nǝ nyesǝmuru a rǝarǝ wun, acemǝnana Malǝmce na ama: “Ɓakuli kǝ mgbali amǝ'gusǝlǝ-muru, sǝ kǝ lǝmndǝì amǝ nyesǝ muru ɓwamuru.”

⁶ Ace mani ka, wu nyesǝ mur wun aɓata rǝcandǝa mǝgule mala Ɓakuli, sǝ ɓǝ̀ pwari male karǝ ka, nǝ̀ loasǝ wun a kuli.

⁷ Gir mǝnana kat kǝ pisǝ bum wun ngga, wu nyinggi Ɓakuli a bui, acemǝnana yì ka, kǝ ɗenyi nǝ wun.

⁸ Wu do aɓa gilǝrǝu, sǝ wu tsǝk kir wun. Ɓi wun mǝbura, yi Shetan ngga, nda rǝ galiki arǝ aban kǝla im mǝnana nzala kǝ wali ka, aban alta ɓwa mǝnana nǝ̀ bwal ka.

⁹ Wu tamsǝ kusǝ wun kàngkàng aɓa paɓamuru ma'wun, wu ɓinǝi wi. Wu sǝlǝ ama aɓi wun amǝkwaɗi aɓa ɓanza kat ka, à nda ban nu ulang tanni ma'wun.

¹⁰ Ɓakuli ka nda mǝtala ɓwamuru kat. Yì nda mana tunǝ wun aɓa gulo male mǝnana málá male pà kàm raka, aɓa Kǝrǝsti Yesu. Anzǝm mǝnana wu nuna tanni aɓalǝ apwari bǝti ka, nǝ̀ nyesǝ wun aban came mǝɓoarne, nǝ̀ pa'wun gbasha, andǝ rǝcandǝa. Ɗǝm ngga nǝ̀ dumsǝ wun aɓa lidǝmbǝa mana pà wu nǝ̀ dǝurǝ raka.

¹¹ Rǝcandǝa kat ka, abani sǝ pa, málá male pà kàm ɗang. Amin.

Masǝlǝata makkun mala Bitǝrus

¹² Nǝ́ bu Silas mǝnana ǝn earnǝi kǝla mǝ'eamrǝarǝu mǝ'mǝsǝcau nì ka, sǝ ǝn nggǝ gilǝa wun mǝnia yì cau gbǝlǝm ngga. Ən nggǝ earce mǝ ɓak ɓabum wun, sǝ mǝ na wun ama, mǝnia yì gir wu nda ɓālǝi ado ka, ɓwamuru mala Ɓakuli na kat ace wun. Wu cam kàngkàng a ɓalǝi.

¹³ Ikǝlisiya kani a Babila, mǝnana Ɓakuli tár wun wunǝia ɓe wu duk amale ka, kǝ makka wun kun. Sǝ munem, yì Markus ka, kǝ makka wun kun gbal.

¹⁴ Wu makki arǝ wun kun nǝ earcearǝu mala amǝkwaɗi. Ɓǝ̀ rǝpwala do ata wun kat, wun aɓwana mǝnana wu nda aɓa Kǝrǝsti ka.