Tayitùs 3 - Ikan feg

Ikuchèg ne bəd Kristo beri ni chughi

¹ Àghò Tayitùs, àghò wendi abə bəd Kristo mbe a Kred gha mbe ya zùgrə itog bəd Kristo mbe ne tùmbə̀ awɔb bə̀ zùgrə bəd Kristo mbe ne beri ika igun inɔb. Imbə̀ʼ mbi ya ghìyə̀ awɔb tìzughə̀ inɔb. Mbe chuʼri ìwɔb nyɔd ni ya zàmbà ghìyə̀ inug chɔm.

² Imbə̀ʼ mbi gha awɔb anug tibɔ̀ŋ igun wə̀d. Mbe chughi ane àbɔrɔ̀bɔd bə̀ ya ghìyə̀ ìchɔ̀mì abə bəd bə̀ bɔ̀tɔ ane fìŋ tì bəd məjìm.

³ Mba ina ya bə̀ kweʼì ghì inug anen bə̀ kweʼì ghì tìzughə̀. Mbi ya kweʼì tàmbi awa, tì febè. Mbi ya kweʼì ghì tì bḛ ìbòʼì abə tiku inug ijìm mbe ne nyàmnyɔd ze ghə̀ʼrə̀ bə̀ kɔ̀ŋɔ̀. Tì yaya ghìyə̀ inug izəg igun bəd. Tì yaya bə̀ ghìyə̀ àdeg. Bəd yaya bà̰ awa. Tì yaya bə̀ bà̰ ìwa nyɔd mba mba.

⁴ Si ya gha, Ŋwiye we ne ya pumni awa ya ghì ìchɔ̀mì ina bə̀ chwi icheg ne wì kɔ̀ŋi awa,

⁵ chì awa inga ngəʼ. Wì ya chì awa inga ngəʼ imbə̀ʼ icheg ne wì beri àsɔ̀mnəfiŋ igun ina, kayi imbə̀ʼ inug chɔm ne tì ya ghi. Wì ya pumni awa icheg ne Azwighi Ŋwiye ya sò awa tì zen bə̀ bə̀ŋì awa tì si yaʼ icheg bɔn bɔd. Azwighi Ŋwiye ya bə̀ nàʼ ìtḛ̀ feg ina.

⁶ Ŋwiye ya chè anjìm Yeso Kristo ne pùmnə awa nàʼ àzi Azwighi ina abu abu.

⁷ Wì ya nàʼ ane ni ghì gha tì we tì tì che anjìm ìchɔ̀mì we təm kòʼ ibo imbìghè bə̀ jəg ìtḛ̀ ighə̀m imɔʼ we ne tì nɔŋi ikɔndi ni ghɔ̀m.

⁸ Aŋa ya ajiʼi anug ne tì beri ni niŋ. Mə kə̀b gha àghò gha inug mbo̰ abə bəd ywìrì kɔ̀mbì ni ghì gha bəd mbe ne bḛ Ŋwiye mbe we awɔb bə̀ ya ghìyə̀ inug chɔm. Inug mbo̰ ya inug chɔm bə̀ yaʼ inug ne biri weti bəd məjìm.

⁹ Imbə̀ʼ àghò bere awe anug mɔ̀ʼɔ ni ghì tì inug anen mbe ne bəd mbe tàŋà, anug ni ghàm imbə̀ʼ tiwaŋ bəd ne chəyi ìnwḭ tì anug ni ya chɔ̀bɔ bə̀ zɔ̀ŋɔ̀ imbə̀ʼ mə̀nɔ̀ʼɔ̀ Muse. Chəyi chùd mɔ̀ʼɔ ane inug mbo̰. Chəyi inug mbo̰ mbe bə̀ wètè wə̀d mɔ̀ʼɔ.

¹⁰ Àghò pati wə̀d ne zìyè àghàpì inga bəd ighə̀m imɔʼ kə̀ aghəm abe. Wì mə chè imbìghè ni zì àghàpì, imbə̀ʼ àghò ywirì bere awe anug mɔ̀ʼɔ ni ghì tì məd.

¹¹ Àghò kyeri gha iku wə̀d we fə to̰ yi tesiʼ bə̀ se ghìyə̀ yaʼi inug tibɔ̀ŋ. Wì fə sɔb ìwi isaʼi zìye.

Tikə ne si nwḭ̀yḛ̀

¹² Anyumə̀ ne mə̀ biri chà Atemàs kə̀ Tichikùs abɔ̀ʼ ine, àghò kirə ika ni zàmbi yeʼe abɔ̀ʼ inum a Nìkopolìs. Zàmba yèʼe imbə̀ʼ icheg ne mə fə nɔ̀ŋì ni chughi angu ane nyùmə̀ we ne ifə we taŋ ko.

¹³ Àghò kirə ika ijìm ni chà Àpolòs tì Zenàs we ne yaʼi wə̀d mə̀nɔ̀ʼɔ̀. Àghò ghiyə mbɔb bere ighi ijìm mbe ne mbɔb koʼi ni bèrì inɔnjì icheg mbe yèʼe.

¹⁴ Ìmba bəd mənyìʼ nàni icheg ni ya zìyè atog ghìyə̀ inug chɔm. Mbɔb mə̀ ya ghìyə̀ ane mbɔb biri wètì bəd ndəŋ. Ane, chəyi mbɔb biri yaʼ icheg bəd ne chəyi aghi niŋi ane inɔb.

¹⁵ Bəd məjìm mbe ne yaʼi aŋa abɔ̀ʼ inum mbe chàʼrà awe. Àghò chaʼra bəd Kristo məjìm mbe ne kɔŋi awa. Ŋwiye ghiyə ìchɔ̀mì inən mbə̰ məjìm.