Tayitùs 2 - Ikan feg

Tikə ne Tayitùs beri ni chwiti

¹ Àsi àghò Tayitùs, àghò kə awɔb icheg chɔm gha mbe ya fàʼà inug kwàʼ məyi icheg ne tikə bəd Kristo chwiti.

² Àghò gha abə mbaŋà kyen gha mbe ya nyìmbe fìŋ bə̀ ghùmnə ìwɔb nyɔd bə̀ nyìmbe nyɔd ane ìtɔb tighi inug. Àghò bə̀ ghà inɔb gha mbe beri ibḛfiŋ igun Yeso Kristo bə̀ ya kɔ̀ŋɔ̀ mə̀mbin bə̀ ya nyìʼè fìŋ anyumə̀ ne mbɔb yaʼi ngəʼ.

³ Àghò bə ghà abə mə̀yi kyen gha mbe ya ghìyə̀ inug ne chwìye ìzḛzḛ. Imbə̀ʼ mbi ya chàpà awɔb tikum bəd. Imbə̀ʼ mbi naʼa awɔb ìwɔb nyɔd abə mənoʼ. Mbi ya chwìte yaʼ inug chɔm abə bəd.

⁴ Mbɔb mə̀ ghì ane, mbɔb biri chwiti abə kàŋ mə̀yi bɔd gha mbe ya kɔ̀ŋɔ̀ ìmbɔb mənɔm tì ìmbɔb bɔn.

⁵ Mbe ya bə̀ nyìmbe ìwɔb nyɔd bə̀ ya ghìyə̀ inug ìzḛzḛ, bə̀ chùghi icheg mə̀yi chɔm inga ìtɔb nəb, bə̀ ghùmni ìmbɔb mənɔm. Mbə̀ ya ghìyə̀ ane ni ghì gha imbə̀ʼ wə̀d mɔ̀ʼɔ chàpà yi Ìngam Ŋwiye ka.

⁶ Àghò bə kə mbaŋà bɔd gha mbe nyimbi ìwɔb nyɔd.

⁷ Àghò ine, ya ghìyə̀ yaʼ inug chɔm gha mbɔb bara, kɔ̀pi ìtɔb fìŋ. Àghò chwiti tesiʼ inɔb ane ìzi fìŋ ijìm.

⁸ Àghò ya ghàmà yaʼ ìngam chɔm ne chəyi tì wə̀d mɔ̀ʼɔ chàpì. Àze biri nàʼ tìnìrètog abə ìmbe bəd ìpàb icheg ne chəyi mbɔb biri ywiri bèrì anug tibɔ̀ŋ mɔ̀ʼɔ ni ghàm imbə̀ʼ awa.

⁹ Àghò gha abə məfeg gha mbe ya zùgrə ìmbɔb mə̀mbaʼ àfàʼì bə̀ ya ghìyə̀ yaʼ inug chɔm inɔb aghəm ajìm. Imbə̀ʼ mbi ya chɔ̀ʼrɔ awɔb ìngam abə ìmbɔb mə̀mbaʼ àfàʼì.

¹⁰ Imbə̀ʼ mbi ya jìye awɔb ighi abə ìmbɔb mə̀mbaʼ àfàʼì. Mbe ya ghìyə̀ məyi inug chɔm ne chəyi ìmbɔb mə̀mbaʼ àfàʼì biri ya bɔ awɔb. Àze biri ghì bəd se kɔ̀ŋɔ̀ ni zug ìngam chɔm we ne te ghà imbə̀ʼ ìwa Ŋwiye ne pùmnə bəd.

¹¹ Ze yaʼ ane imbə̀ʼ icheg ne, Ŋwiye fə chwi ìwi ìchɔ̀mì we ne pùmnə bəd abə bəd məjìm.

¹² Ìchɔ̀mì we fə chwi ina gha tì to̰ awa inug mbe ne chəyi mbe nàʼà ighumni abə Ŋwiye bə̀ chì adɔʼ ane ighi igun isəg bə̀ nyìmbi ìwa nyɔd se ghìyə̀ inug ne koʼi fɔrɔ inug ne ghùmnə Ŋwiye inga nyùmə̀ isəg gho̰.

¹³ Tè ghiyə ane icheg ne te ghɔ̀mɔ̀ aneg kyen ze ne tì nɔŋi ìta tikɔndi igun. À ya aneg ze ne ìwa Ŋwiye kyen ne pùmnə bəd ne ya Anɔŋisəg Yeso Kristo wì biri yeʼe inga ìzḛzḛ njandi njandi məd.

¹⁴ Wì ya nàʼ àze atog imbə̀ʼ awa ni zeri awa chì ane ìmba inug tibɔ̀ŋ ni ghì gha tì si yaʼ bəd ìzḛzḛ ne yaʼi kwàʼ ìmbi məd ne se kɔ̀ŋɔ̀ ni ghì məyi inug chɔm.

¹⁵ Aŋa ya inug ne àghò beri ni chwiti abə bəd. Àghò nəri ìmbe bəd bə̀ gaŋ abə bəd mbe ne kà atog məjìm ane ika we ne Kristo nàʼi ine. Imbə̀ʼ àghò bḛ awe gha wə̀d mɔ̀ʼɔ kənə awe.