Rm 8 - Ikan feg

Azwighi Ŋwiye ze ghìyə̀ tì chùghə ika

¹ Amad anìŋ, chəyi wə̀d mɔ̀ʼɔ ne tì wì sɔb isaʼi zì ngəʼ igun bəd mbe ne yaʼi ane ifɔti tì Yeso Kristo.

² À ya ane imbə̀ʼ icheg ne Azwighi Ŋwiye ze ne ghi gha tì jəg ìtḛ̀ icheg ne tì yaʼi ane ifɔti tì Yeso Kristo, ze fə pumni amə chì ane mə̀nɔ̀ʼɔ̀ mbe ne ghìyə̀ gha wə̀d ya ghìyə̀ inug tibɔ̀ŋ mbe ne zwète bəd.

³ Anug ne Ŋwiye fàʼi ya anug ne chəyi tì mə̀nɔ̀ʼɔ̀ ya fàʼ imbə̀ʼ icheg ne inug mbe ne wə̀d we ghə̀ʼrə̀ fə ghì wə̀d bɔd. Wì fə chì ika we ne inug tibɔ̀ŋ beri igun bəd icheg ne wì cha ìwi Ŋwan wì yèʼe igun isəg icheg wə̀d inug tibɔ̀ŋ pè nàʼ àzi atog ane aghi àfàtì imbə̀ʼ inug tibɔ̀ŋ bəd ndəŋ.

⁴ Ŋwiye ya fàʼ anìŋ ni ghì gha mba mbe ne chùghə icheg ne Azwighi Ŋwiye kəbi, ne chəyi te ghìyə̀ inug mbe ne ìta nyàmnyɔd te ghə̀ʼrə̀, tì təm kòʼ icheg ne mə̀nɔ̀ʼɔ̀ Muse chwi.

⁵ Bəd mbe ne chùghə ane ikuchèg we ne ìtɔb nyàmnyɔd kəbi, mbi ya nɔ̀ŋɔ̀ ìtɔb fìŋ yaʼ igun inug tibɔ̀ŋ mbe ne ìtɔb nyàmnyɔd te ghə̀ʼrə̀. Àsi bəd mbe ne chùghə icheg ne Azwighi Ŋwiye kəbi, mbi ya nɔ̀ŋɔ̀ ìtɔb fìŋ yaʼ igun inug mbe ne Azwighi Ŋwiye ze kə̀bə̀.

⁶ Wə̀d ne nɔ̀ŋɔ̀ fìŋ igun inug tibɔ̀ŋ mbe ne nyàmnyɔd ze ghə̀ʼrə̀, tengàŋ biri ku nim. Àsi wə̀d ne nɔ̀ŋɔ̀ fìŋ yaʼ igun inug mbe ne Azwighi Ŋwiye ze kə̀bə̀, tengàŋ biri jəg ìtḛ̀ bə̀ chùghi ane àbɔrɔ̀bɔd.

⁷ Bəd mbe ne nɔ̀ŋɔ̀ ìtɔb fìŋ igun inug tibɔ̀ŋ mbe ne ìtɔb nyàmnyɔd te ghə̀ʼrə̀, mbɔb ya bəd ìpàb Ŋwiye. À ya ane imbə̀ʼ icheg ne chəyi mbɔb mbe zùgrə Ŋwiye. Ane, chəyi tì mbɔb bə̀ zùgri mə̀nɔ̀ʼɔ̀ Ŋwiye.

⁸ Bəd mbe ne nɔŋi ìtɔb fìŋ igun inug mbe ne ìtɔb nyàmnyɔd te ghə̀ʼrə̀, chəyi Ŋwiye we gyènde tì inɔb.

⁹ Àsi mbə̰, Azwighi Ŋwiye mə yaʼ inga inən, chəyi mbə̀ koʼi ni ya ghìyə̀ inug tibɔ̀ŋ mbe ne ìtən nyàmnyɔd te ghə̀ʼrə̀. Mbə̰ kòʼ ni ya ghìyə̀ yaʼ inug mbe ne Azwighi Ŋwiye ze kə̀bə̀. Wə̀d ne chəyi Azwighi Kristo yaʼi inga məd, tengàŋ kayi wə̀d Kristo.

¹⁰ Ane, mbə̰ mə̀ yaʼ ane anug amɔʼ tì Kristo, ka ìtən nyàmnyɔd biri jiʼi ku imbə̀ʼ inug tibɔ̀ŋ, Azwighi Ŋwiye biri ghì mbə̰ jəg ìtḛ̀.

¹¹ Àmə yaʼ aghi ne Azwighi Ŋwiye ze ne ya zweme Yeso iwu ze yaʼi inga inən, nji məd we ne ya zwemne Kristo iwu, wì biri bə nàʼ ìtḛ̀ abə ìtən nyàmnyɔd te ne tì ti ku. Ŋwiye biri ghì ane anjìm Azwighi məd ze ne yaʼi inga inən.

¹² Ane, ìmbum məfi fɔrɔ ìtum njàbi, tè bèrì anug ne tì mənyìʼ fàʼ. Anug ze ya kayi ni ghì inug mbe ne ìta nyàmnyɔd te ghə̀ʼrə̀.

¹³ À ya ane imbə̀ʼ icheg ne wə̀d ne ghìyə̀ inug mbe ne nyàmnyɔd məd ze ghə̀ʼrə̀, tengàŋ biri ku nim. Àsi wə̀d ne Azwighi Ŋwiye chiki ika we ne inug tibɔ̀ŋ beri igun bəd chì inga məd, tengàŋ biri jəg ìtḛ̀.

¹⁴ Bəd mbe ne ghìyə̀ inug icheg ne Azwighi Ŋwiye ze nàʼà ika inɔb, mbɔb ya bɔn Ŋwiye.

¹⁵ Azwighi ze ne Ŋwiye fə nàʼi inən ya kayi ni ghì gha mbə̀ yaʼ ìbòʼì bə̀ ya bɔ. Azwighi ze ya ni ghì gha mbə̀ yaʼ bɔn Ŋwiye. À ya Azwighi ze ze bə̀ nàʼà ika ina tì kara Ŋwiye gha, “Ìwa Mbaʼ, Ìwa Mbaʼ.”

¹⁶ Azwighi Ŋwiye ze fɔ̀tɔ tì àza tì azwighi ni bḛ gha mba ya bɔn Ŋwiye.

¹⁷ Icheg ne tì yaʼi bɔn məd, tì biri jəg ighi mbe ne məd nɔŋi abə ìmbi bəd. Tì biri bə fɔti abɔ̀ʼ Kristo ni jəg ighi mbe ne Ŋwiye nɔŋi ibo. Tì mə zən ngəʼ abɔ̀ʼ Kristo, tì biri bə bèrì ighumni we ne Ŋwiye biri nàʼ ibo.

Ighumni we ne yèʼe

¹⁸ Mbə̀ kyeri gha, ighumni we ne Ŋwiye biri nàʼ ina we chè ngəʼ ìzo̰ ne te chè inga amad anìŋ.

¹⁹ Ighi ijìm mbe ne Ŋwiye tàngi mbe nyìʼè ghɔ̀mɔ̀ gha Ŋwiye ghiyə mbe kyèri bəd mbe ne ya kwàʼ bɔn məd.

²⁰ À ya ane imbə̀ʼ icheg ne ighi ijìm mbe ne Ŋwiye tàngi, mbi biri chè kwàʼ ako. Kayi gha ighi mbe ijìm kɔ̀ŋ ni chè ako. Ze biri yaʼ ane icheg ne Ŋwiye kə̀bi, si ya gha, ighi mbe ijìm mbe kiri nɔŋɔ ikɔndi ni ghɔ̀m anug ne Ŋwiye biri fàʼ.

²¹ Àze ghì gha chəyi ighi ijìm mbe ne Ŋwiye tàngi biri bɔb. Mbi biri pum bə bèrì ighumni we ne Ŋwiye nɔŋi abə ìmbi bɔn.

²² Tè kyèri gha, pè tèchɔ̀ŋ, ighi ijìm mbe ne Ŋwiye ya tàngi mbe kiri chwemè kwàʼ icheg ne àyi tì ibum ne se nɔ̀mbɔ.

²³ Ane, kayi məyi ighi mbe ne Ŋwiye ya tangi mbe chwèmè. Mba ina ne beri Azwighi Ŋwiye ne Ŋwiye nàʼi ina icheg ineʼi mbègtog, tì we bə̀ chwèmè. Tì ya chwèmè ane ghɔ̀mɔ̀ gha Ŋwiye ghiyə tì yaʼ bɔn məd bə̀ zèri awa chì inga ngəʼ ijìm.

²⁴ Icheg ne tì nɔŋi ikɔndi icheg gho̰ ni ghɔ̀m, Ŋwiye fə chì awa inga ngəʼ. Tesiʼ ya gha, ighi ne wə̀d fə beri, chəyi we ywìrè nɔ̀ŋɔ̀ ikɔndi ghɔ̀mɔ̀ ni bèrì mbiwən. Wə̀d abɔ̀ʼ inən ne tì wì nɔŋì ikɔndi ni ghɔ̀m aghi ne wì fə beri àkə we?

²⁵ Àmə yaʼ aghi ne tì nɔŋi ikɔndi ni ghɔ̀m aghi ne chəyi tì kiri beri, tì biri nyimbi fìŋ ni ghɔ̀m.

²⁶ À ya bə̀ ane ne Azwighi Ŋwiye ze wètè awa icheg ne tì bɔri. À ya ane imbə̀ʼ icheg ne chəyi tì kyeri icheg ne tì koʼi ni chàʼra Ŋwiye angu. À ya Azwighi Ŋwiye ze chàʼrà Ŋwiye atog ina. Ze ya chwèmè ghà inug ne chəyi tì tì gha.

²⁷ Ŋwiye we ne bàrà inug mbe ne yaʼi inga ìta fìŋ, à ya məd kyeri anug ne Azwighi Ŋwiye ze kɔ̀ndɔ. À ya ane imbə̀ʼ icheg ne Azwighi Ŋwiye ya bòʼo ibo abə Ŋwiye atog abə bəd Ŋwiye, ghà inug kwàʼ icheg ne Ŋwiye kə̀bi.

²⁸ Tè kyèri gha, inga inug ijìm, Ŋwiye we fàʼà gha bəd mbe ne kɔ̀ŋɔ̀ aməd, mbe bere ìchɔ̀mì. À ya bəd mbe ne wì ya chɔʼi icheg ne wì ya fə chuʼri nɔ̀ŋì.

²⁹ Bəd mbe ne wì ya fə chɔʼi, wì ya fə chì awɔb nɔ̀ŋì icha gha mbe yaʼ icheg Ŋwan məd. Ane ya ni ghì gha Ŋwan məd yaʼ ŋwan mbèg inga inəbi kyen.

³⁰ Bəd mbe ne Ŋwiye ya chì awɔb nɔ̀ŋì icha, wì ya kàrì awɔb gha mbe yaʼ ìmbi bəd. Mbɔb mbe ne wì ya kàri awɔb, wì ya ghì mbi təm kòʼ ibo imbìghè, bə̀ si nàʼ ighumni inɔb.

Ŋwiye chè anjìm Yeso Kristo chwi icheg ne wì kɔ̀ŋi awa

³¹ Inga inug mbo̰ ijìm, tì kə ywiri gha? Ŋwiye kə mə̀ yaʼ tì ina, wə̀d ne tì wì zɔŋ awa chè àkə we?

³² Ŋwiye kə mə̀ chəyi wì ya to̰ ni nàʼ Ŋwan məd gha wì yeʼe ku atog ina mba məjìm, mbə kɔ̀ndi gha chəyi wì biri kɔ̀ŋ ni nàʼ ighi ndəŋ ijìm ina?

³³ Wə̀d ne zìyè isaʼi igun bəd mbe ne Ŋwiye chɔ̀ʼi àkə we? Ŋwiye fə ghà kwàʼ zìye zìye gha chəyi mbi gughi anug.

³⁴ Wə̀d ne biri sɔb isaʼi igun inɔb gha mbe gùg anug àkə we? À wa kə Yeso Kristo? Indèʼ ka! Yeso ya ku atog inɔb, Ŋwiye zwèmni aməd ane iwu, si ghì wì chùghi iban məd ibo aba abo jəghi se bòʼo ibo abə Ŋwiye imbə̀ʼ awa.

³⁵ Wə̀d ne biri si ghì gha imbə̀ʼ Yeso chè yi imbìghè ni kɔ̀ŋ awa àkə we? Àkə ngəʼ, kə̀ àkə njèg, kə̀ àkə anug ne mbe chɔ̀ʼɔ ìmba ibɔʼì ighog, kə̀ àkə ifum, kə̀ àkə inug ne fàŋà awa, kə̀ àkə anug ni təm ichug iwu?

³⁶ Àŋwàʼrì Ŋwiye gha, “À ya imbə̀ʼ awe ne tì yaʼi ichug iwu mà nyumə̀ ijìm. Mbi ya nìŋə awa icheg njə̀g ne mbe ghò ni kyemi.”

³⁷ Si ya gha, inga inug mbo̰ ijìm, tì ya icheg bəd ne màʼi ibid chè anjìm Yeso Kristo ne kɔ̀ŋi awa.

³⁸ Mə kyèri kwàʼ tesiʼ gha, chəyi aghi mɔ̀ʼɔ ne tì ze ghì gha imbə̀ʼ aməd si ywiri kɔ̀ŋɔ̀ yi awa, kə̀ àkə iwu, kə̀ àkə ìtḛ̀, kə̀ àkə mbè angirə̀, kə̀ àkə tika afub te ne yaʼi ikaŋ, kə̀ àkə inug mbe ne yaʼi inga nyùmə̀ isəg gho̰, kə̀ àkə mbe ne biri ghum yeʼe,

³⁹ ka à ya bè tika te ne yaʼi ikaŋ kə̀ tika te ne yaʼi aseg, chəyi aghi mɔ̀ʼɔ inga ighi ijìm mbo̰ ne Ŋwiye tàngi ne tì ze ghì gha imbə̀ʼ Ŋwiye ywiri chè yi imbìghè ni kɔ̀ŋ awa anjìm Yeso Kristo ne yaʼi ìwa Anɔŋisəg.