Rm 4 - Ikan feg

Abràham təm zen imbìghè abə Ŋwiye anjìm ibḛfiŋ

¹ Tè niŋ wə̀d icheg Abràham ìwa mbaʼ aneg. Aghi chɔm ne məd ya bàri inga anug azo̰ àkə aghə?

² Àmə yaʼ ni gha Abràham ya təm zen imbìghè abə Ŋwiye imbə̀ʼ inug chɔm ne məd ya ghi, nji məd we tì wì kɔm ìwi igo. Si ya gha, chəyi tì wì kɔm igo imbìghè abə Ŋwiye.

³ A ze inga Àŋwàʼrì Ŋwiye gha, “Abràham ya nɔ̀ŋì ibḛfiŋ igun Ŋwiye kwàʼ icheg chɔm. Ane, Ŋwiye ya niŋ aməd ane wə̀d ne təmi kòʼ ibo imbìghè.”

⁴ Wə̀d mə fàʼ, mbi ya nàʼà ikab àfàʼì məd icheg ne ze chwi. Ikab àfàʼì we ya kayi ineʼi.

⁵ Si ya gha, bəd ya tə̀mə zḛ imbìghè abə Ŋwiye anjìm ìwɔb ibḛfiŋ, kayi imbə̀ʼ ìmbɔb ìfàʼì. À ya Ŋwiye we ghìyə̀ gha bəd təm kòʼ ibo imbìghè.

⁶ À ya aghi ze ne Dèvid ya bə ghà imbə̀ʼ igyendi ne yaʼi inga fìŋ abə wə̀d we ne Ŋwiye nìŋi məd ane wə̀d ne təmi kòʼ ne kayi imbə̀ʼ ìfàʼì:

⁷ Àbɔrɔ̀bɔd ze igun bəd mbe ne Ŋwiye fə waʼi ìmbɔb inug tibɔ̀ŋ, bə̀ chì ìmbɔb inug tibɔ̀ŋ.

⁸ Àbɔrɔ̀bɔd ze igun wə̀d we ne Anɔŋisəg fə waʼi inug tibɔ̀ŋ məd ne chəyi wì biri ywiri nɔʼ wendi ka.

⁹ Àbɔrɔ̀bɔd Ŋwiye kə məyi abə mə̀Ju kə̀ ze ya fɔrɔ abə bəd ne kayi mə̀Ju? Anug ne te ghà ya gha, Ŋwiye ya niŋ Abràham ane wə̀d ne təmi kòʼ anjìm ibḛfiŋ məd.

¹⁰ Ibḛfiŋ məd kə ya wèti aməd iye? Ŋwiye kə̀ ya bḛ gha wè təm kòʼ anyumə̀ ne chəyi mbi ya kiri ŋweri aməd kə̀ anyumə̀ ne mbi fə ŋweri aməd? À ya anyumə̀ ne chəyi mbi ya kiri ŋweri aməd.

¹¹ Àŋwerì ze ya yaʼ aneni ni chwi gha Ŋwiye niŋ aməd ane wə̀d ne təmi kòʼ anjìm ibḛfiŋ məd anyumə̀ ne chəyi mbi ya kiri ŋweri aməd. Ane, Abràham ya mbaʼ mbègtog abə bəd mbe ne nɔŋi ibḛfiŋ igun Ŋwiye ne chəyi mbi ŋweri awɔb. Ze ya yaʼ ane ni ghì gha Ŋwiye bə niŋ awɔb ane bəd ne təmi kòʼ.

¹² Abràham ya bə̀ mbaʼ mbègtog fɔrɔ abə bəd mbe ne mbi ŋweri awɔb ne bə̀ ghìyə̀ inug anjìm icheg ne mbɔb nɔŋi ibḛfiŋ igun Ŋwiye icheg ne Abràham ya bə nɔ̀ŋì ibḛfiŋ igun Ŋwiye bɔŋ mbi se ŋwère məd.

Wə̀d ya nìŋə anug ze ne Ŋwiye kàʼi anjìm ìwi ibḛfiŋ

¹³ Kayi imbə̀ʼ icheg ne Abràham yaya nɔ̀ŋɔ̀ mə̀nɔ̀ʼɔ̀ Muse ne Ŋwiye ya kàʼi gha məd tì bɔn ane aghaŋ inəbi məd biri jəg ighi igun isəg. À ya anjìm ibḛfiŋ məd ne Ŋwiye ya niŋi aməd ane wə̀d ne təmi kòʼ.

¹⁴ Àmə yaʼ aghi ne Ŋwiye kàʼi aghi mɔ̀ʼɔ ni nàʼ abə bəd mbe ne nɔ̀ŋɔ̀ mə̀nɔ̀ʼɔ̀, nji anug ze ne Ŋwiye kàʼi ya ati ako. Nji chəyi bə̀ aton mɔ̀ʼɔ ane ibḛfiŋ.

¹⁵ À ya ane imbə̀ʼ icheg ne mə̀nɔ̀ʼɔ̀ yaya nɔ̀rɔ̀ agaŋ Ŋwiye. Chəyi wə̀d we gùghə̀ mə̀nɔ̀ʼɔ̀ asiŋi ne chəyi mə̀nɔ̀ʼɔ̀ yaʼi angu.

¹⁶ Anug ze ne Ŋwiye ya kàʼi ya yèʼe anjìm ibḛfiŋ ni chwi gha à ya Ŋwiye nàʼi ako abə bəd məjìm ane aghaŋ inəbi Abràham. Kayi məyi abə bəd mbe ne nɔ̀ŋɔ̀ mə̀nɔ̀ʼɔ̀, à ya fɔrɔ abə bəd mbe ne nɔŋi ibḛfiŋ igun Ŋwiye kwàʼ icheg Abràham. Abràham ya se mbaʼ mbègtog ina mba məjìm ne nɔŋi ibḛfiŋ igun Kristo.

¹⁷ A ze inga Àŋwàʼrì Ŋwiye gha; “Mə fə ghì gha àghò si yaʼ mbaʼ abə iben nɔʼ nɔʼ.” À ya Ŋwiye we ne Abràham ya nɔŋi ibḛfiŋ igun ne beri ika ni zwèmni iwu bəd nàʼ ìtḛ̀ inɔb. À ya məd bə bèrì ika ni ghì gha ighi ne chəyi angu mbe yaʼ.

¹⁸ Abràham ya nɔ̀ŋì ibḛfiŋ igun Ŋwiye bə̀ nɔ̀ŋì ikɔndi chɔm ni ghɔ̀m anug ze ne Ŋwiye ya kàʼi. Ka chəyi wì ya jiʼì bèrì aton mɔ̀ʼɔ ni nɔ̀ŋì ikɔndi ni ghɔ̀m, wì ya bə̀ kiri nɔŋi ibḛfiŋ igun Ŋwiye bə̀ nɔ̀ŋì ikɔndi se ghɔ̀mɔ̀ anug ze ne Ŋwiye ya kàʼi ibo. Abràham ya ghì ane, Ŋwiye ghi məd si yaʼ mbaʼ abə iben nɔʼ nɔʼ icheg ne Àŋwàʼrì Ŋwiye gha imbə̀ʼ aməd gha, “Bɔn ane àze aghaŋ inəbi biri nɔʼ icheg titəm iməg.”

¹⁹ Inga nyùmə̀ we, Abràham yaya se pè ane tituʼ iki, si ya gha, chəyi icheg ne wì ya fə taŋ nùn fɔrɔ icheg ne Sèra ya yaʼi kɔ̀m àyi ya ghi gha ibḛfiŋ məd bɔd.

²⁰ Chəyi ibḛfiŋ məd igun Ŋwiye ya bɔri. Chəyi wì ya bə jə̀m anug ne Ŋwiye ya kàʼi ibo. Məd ya chè imbìghè ni taŋ nɔ̀ŋì ibḛfiŋ igun Ŋwiye bə̀ ya ghùmnə Ŋwiye.

²¹ Wì ya nɔ̀ŋì ibḛfiŋ igun Ŋwiye bə̀ kyèri gha Ŋwiye we tì wì fàʼ anug ze ne wì ya kàʼi.

²² À ya ibḛfiŋ məd igun Ŋwiye ya ghi Ŋwiye niŋ aməd ane wə̀d ne təmi kòʼ.

²³ Ane, ìngam we ne gha, “Ŋwiye niŋ aməd ane wə̀d ne təmi kò,ʼ ” ya kayi məyi ibo.

²⁴ À ya fɔrɔ ina, mba mbe ne nɔŋi ibḛfiŋ igun məd we ne ya zwemne Yeso, ìwa Anɔŋisəg ane iwu.

²⁵ À ya məd Yeso, Anɔŋisəg we ne Ŋwiye ya cha, wì ku imbə̀ʼ ìmba inug tibɔ̀ŋ. Ŋwiye ya zwemni aməd ane iwu ni ghì gha tì təm kòʼ imbìghè abə Ŋwiye.