Rm 13 - Ikan feg

Mbə̀ ya zùgrə ìmbən itog bəd

¹ Wə̀d ijìm mənyìʼ ya zùgrə itog bəd mbe ne tùmbə̀ aben imbə̀ʼ icheg ne à ya Ŋwiye chɔ̀ʼi awɔb bə̀ nàʼ ika we inɔb.

² Ane, wə̀d ne kà atog abə bəd mbe ne tùmbə̀ aben, tengàŋ ya chɔ̀ʼrɔ yaʼ anug ne Ŋwiye nɔ̀ŋi. Bəd mbe ne ghìyə̀ ane ya zìyè isaʼi igun ìmbɔb itog.

³ À ya ane imbə̀ʼ icheg ne bəd mbe ne ghìyə̀ inug ne koʼi, chəyi mbɔb mbe bɔ itog bəd. Àmə chəyi mbə̀ kəbi ni ya bɔ itog bəd, mbə̀ ya ghìyə̀ inug ne koʼi. Mbə̰ mə̀ ghì ane, itog bəd mbe biri se ghùmnə awən.

⁴ Ŋwiye chà itog bəd ni wètì awən. Si ya gha, mbə̰ mə̀ ya ghìyə̀ inug tibɔ̀ŋ, mbə biri ya bɔ awɔb imbə̀ʼ icheg ne mbɔb biri ya chə awən. Mbɔb ya bəd àfàʼì Ŋwiye ne chə bəd mbe ne ghìyə̀ inug tibɔ̀ŋ.

⁵ Ane, à ya aton ne chəyi mbə̀ koʼi ni zugri itog bəd məyi imbə̀ʼ icheg ne mbe chə awən. Mbə̰ kòʼ ni ya zùgrə awɔb ni gha imbə̀ʼ ìtən fìŋ si ya sàʼa yi awən.

⁶ À ya bə̀ aton ne mbə̀ koʼi ni ya nàʼà mə̀tag imbə̀ʼ icheg ne itog bəd mbo̰ ya fàʼà abə Ŋwiye icheg ne mbe tùmbə̀ aben ane fìŋ ijìm.

⁷ Mbə̀ naʼa ighi bəd mbe ne mbə̰ mbe nyìme ìmbɔb ighi. Àmə yaʼ tag, mbə̀ naʼa, kə̀ àkə ikab, mbə̀ naʼa. Àmə yaʼ bəd mbe ne mbə̀ beri ni ghumni awɔb, mbə̀ ghumni.

Anug imbə̀ʼ àkɔ̀ŋì

⁸ Imbə̀ʼ mbə̰ bere awən anug tì wə̀d. Anug ne mbə̀ koʼi ni ghì ya məyi ne ya kɔ̀ŋɔ̀ ìtən nyàmnyɔd. À ya ane imbə̀ʼ icheg ne wə̀d ne kɔ̀ŋɔ̀ bəd ne yaʼi iban məd, tengàŋ ya fàʼà anug ze ne mə̀nɔ̀ʼɔ̀ Muse kəbi.

⁹ Mə̀nɔ̀ʼɔ̀ mbe ne gha, “Imbə̀ʼ àghò fana awe”, tì “Imbə̀ʼ àghò zwète awe wə̀d”, tì “Imbə̀ʼ àghò ji awe”, tì “Imbə̀ʼ àghò ghə̀ʼrə̀ awe aghi wə̀d” fɔrɔ mə̀nɔ̀ʼɔ̀ ndəŋ ndəŋ məjìm ya ghàmà məyi anug amɔʼ. Anug ze amɔʼ ya gha, “Àghò kɔŋɔ wə̀d ne yaʼi iban ine icheg ne àghò kɔ̀ŋi ìwe nyɔd.”

¹⁰ Àghò mə kɔ̀ŋ wə̀d, chəyi tì àghò ghì anug tibɔ̀ŋ abə tengàŋ. Ane, ni nɔ̀ŋì mə̀nɔ̀ʼɔ̀ Muse ya ni kɔ̀ŋ bəd.

¹¹ Àghò mənyìʼ ghì ane imbə̀ʼ icheg ne àghò kyèri gha nyumə̀ fə kòʼ ine ni nɔ̀ʼ angwḛ. À ya ane imbə̀ʼ icheg ne nyumə̀ we ne Ŋwiye biri pumni awa fə tinde. Nyumə̀ we fə tinde amad anìŋ chè icheg ne wì ya yaʼi anyumə̀ ne tì ya kiri bḛ Yeso Kristo bḛ.

¹² Ituʼ fə se chə̀ghə. Aneg feg fə se pè. Ane, tì waʼ inug tibɔ̀ŋ mbe ne bəd ne yaʼi inga afub mbe ghìyə̀ si niŋ ighi ibid. Ighi ibid mbe ya inug chɔm mbe ne bəd mbe ghìyə̀ inga ìzḛzḛ.

¹³ Tì ghiyə ìwa ikuchèg we yaʼ icheg ìwi bəd ne yaʼi inga ìzḛzḛ tesiʼ. Imbə̀ʼ tì ghò awa ane isiŋi inug ne bəd mbe no be se ghìyə̀ izṵ inug tì inug ka ka. Imbə̀ʼ tì nyìme awa anug ni no be kə̀ àfànì kə̀ anug ni nɔ̀kì mə̀yi kə̀ mbaŋà abu abu kə̀ ìdɔ̀b kə̀ àzɔ̀ŋì.

¹⁴ Mbə̀ ghiyə gha Anɔŋisəg Yeso Kristo ya tùmbə̀ awən. Imbə̀ʼ mbə̰ nɔŋɔ awən ìtən fìŋ igun ighi mbe ne nyàmnyɔd ze ghə̀ʼrə̀.