Rm 10 - Ikan feg

¹ Ìmbum məfi fɔrɔ ìtum njàbi, anug ne mə̀ taŋ kɔ̀ŋ, ya gha, Ŋwiye pumni mə̀Izre məjìm, ane, mə we bə̀ chàʼrà Ŋwiye inɔb.

² Mə kyèri gha mbɔb kɔ̀ŋ ni fàʼ abə Ŋwiye ane fìŋ ifibì, si ya gha, chəyi mbi taŋ kyèri inɔnjì nì fàʼ ibo.

³ Icheg ne chəyi mbi kyeri inɔnjì ne Ŋwiye we ghìyə̀ bəd təmə kòʼò ibo imbìghè, mbi ya se zɔ̀ŋɔ̀ ni tangi ìtɔb tikuchèg ni təm kòʼ. Ane, chəyi mbɔb ya bḛ icheg ne Ŋwiye we ghìyə̀ bəd təmə kòʼò.

⁴ Mə̀nɔ̀ʼɔ̀ Muse fə nwḭ̀yḛ̀ igun Kristo, ni ghì gha wə̀d ijìm ne beri ibḛfiŋ igun Kristo, wì fə təm kòʼ imbìghè abə Ŋwiye.

Anug ni pum ya abə wə̀d ijìm

⁵ Muse ya ŋwàʼrì inga mə̀nɔ̀ʼɔ̀ ghà anug imbə̀ʼ icheg ne Ŋwiye we nìŋə bəd gha mbe təm kòʼ ze gha, “Wə̀d ijìm ne fàʼà inug mbe ne mə̀nɔ̀ʼɔ̀ gha, wì fə bə chùghi icheg ne mə̀nɔ̀ʼɔ̀ mbe kə̀bə̀.”

⁶ Ikuchèg ni təm kòʼ imbìghè abə Ŋwiye anjìm ibḛfiŋ ya gha: “Imbə̀ʼ àghò gha awe inga ìze fìŋ gha, ‹Wə̀d ne biri kɔʼ ghò ikaŋ àbɔ̀ŋɔ àkə we?› Ane ya ni ghì gha Kristo swiʼi yèʼe.

⁷ Kə̀ ‹Wə̀d ne biri swiʼi ghò inga aben iwu bəd àkə we?› Ane ya ni ghì ghà Yeso kɔʼ yèʼe.”

⁸ Anug ne Ìngam Ŋwiye we ghà ya gha, “Ìngam Ŋwiye fə tinde iban ine. Àghò we ghàmà ìngam we. Ìngam we, we bə̀ ine inga fìŋ.” À ya ìngam ne te ghàmà inən imbə̀ʼ ibḛfiŋ.

⁹ Àmə yaʼ ane àghò fìʼì ìwe ichug ghà gha, Yeso ya Anɔŋisəg bə̀ bḛ inga ìze fìŋ gha Ŋwiye ya zwemni aməd ane iwu, àghò biri pum.

¹⁰ À ya anjìm ibḛfiŋ ne wə̀d we tə̀mə kòʼò imbìghè abə Ŋwiye. Wə̀d mə bə̀ ghà ane ìwi ichug gha zìye bḛ, tengàŋ biri pum.

¹¹ Àŋwàʼrì Ŋwiye ze ghà gha, “Wə̀d ne nɔŋi ìwi ibḛfiŋ igun məd, chəyi tengàŋ biri bèrì tìnìrètog.”

¹² Aton ya gha, chəyi icha mɔ̀ʼɔ inga mə̀Ju tì bəd ne kayi mə̀Ju. Anɔŋisəg ya məyi imɔʼ igun bəd məjìm. Məd we tùwə̀ àbɔrɔ̀bɔd igun wə̀d ijìm ne kàrà aməd.

¹³ Àŋwàʼrì Ŋwiye ze ghà gha, “Wə̀d ijìm ne kàrà ikum Anɔŋisəg, wì biri pum”.

¹⁴ Si ya gha, mbi kə ghi chè iye ni kàrì aməd gha wì pumnə awɔb ne chəyi mbi nɔŋi ibḛfiŋ igun məd? Mbi kə bə̀ nɔŋi ibḛfiŋ igun məd iye ne chəyi mbi ya kweʼì zug anug mɔ̀ʼɔ imbə̀ʼ aməd? Mbi kə ghi chè iye ni zug anug mɔ̀ʼɔ imbə̀ʼ aməd ne chəyi wə̀d mɔ̀ʼɔ ne ya ghò chètì ikən chɔm inɔb imbə̀ʼ aməd?

¹⁵ Ane, bədtɔm kə ghi ghò iye ni chètì ikən chɔm we abə bəd ne chəyi Ŋwiye chà awɔb? A ze inga Àŋwàʼrì Ŋwiye gha, “À ya kwàʼ anug chɔm gha bəd mbe ne chètè ikən chɔm mbe yèʼe.”

¹⁶ Si ya gha, chəyi məIzre məjìm mbe bḛ ikən chɔm we. Wə̀dkə̀n Ŋwiye Àzayà ya gha, “Anɔŋisəg, àkə we bḛ ikən chɔm we ne te ghà?”

¹⁷ Ane, bəd ya nɔ̀ŋɔ̀ ibḛfiŋ igun Yeso Kristo anyumə̀ ne mbi ya zughi ikən chɔm imbə̀ʼ aməd. Bəd biri zug ikən chɔm gho̰ abə bəd mbe ne biri ya chètè ikən chɔm imbə̀ʼ Kristo.

¹⁸ Si ya gha, mə̀ ya anìŋ bìre gha: Àkə chəyi mbi ya zughi ikən chɔm gho̰? A ze inga Àŋwàʼrì Ŋwiye gha: “Mbi ya zug kwàʼ icheg chɔm. Mbi ya zug abə bəd mbe ne yaya chètè ikən chɔm we, ghò pè ane tibug ijìm igun isəg.”

¹⁹ Si mə ywiri bìri inən, àkə chəyi məIzre ya taŋ kyèri ikən chɔm we? Mbɔb ya kyeri imbə̀ʼ icheg ne Muse ya wə̀d mbègtog ne ya gha, “Ŋwiye we ghà gha zìye biri zì àbɔrɔ̀bɔd igun bəd mbe ne kayi aben kyen, ni ghì gha mbə̀ se ghìyə̀ ìdɔ̀b igun inɔb. Mbə̰ biri se gàŋa imbə̀ʼ icheg ne mə̀ biri zì àbɔrɔ̀bɔd igun bəd ne kayi mə̀Ju, ne mbə̰ mbe kɔ̀ndɔ gha à ya inen.”

²⁰ Wə̀dkə̀n Ŋwiye Àzayà ya ghàm kwàʼ witì bɔ gha, “Bəd ne chəyi mbi yaya kə̀bə̀ amə, mbɔb mbo̰ fə bàri amə. Mə ya chwi ìmə nyɔd abə bəd ne chəyi mbi yaya kə̀bə̀ amə?”

²¹ Àzayà ya si ghà imbə̀ʼ mə̀Izre gha, “Ŋwiye ya ghà gha, ni ko isusu ghò pè ikwikwiri mə fìʼì ìmbum ibo ni niŋ bəd ne kà atog bə̀ tàŋà inug.”