Filemɔ̀n 1 - Ikan feg

Ichaʼri

¹ À ya mo Pɔl, ne mə̀ yaʼi wə̀d ndəŋ anjìm Yeso Kristo fɔrɔ ìwa ifi Timotì tì ŋwàʼri àŋwàʼrì azo̰. Tì ŋwàʼrì anìŋ ine àghò Filemɔ̀n, ne yaʼi ìwa ìsə̀ʼ ne tì kɔŋi bə̀ ywìrì yaʼ wə̀d àfàʼì Kristo abɔ̀ʼ ina.

² Tè bə̀ ŋwàʼrì àŋwàʼrì azo̰ anìŋ ine àghò Afìyà ne yaʼi ìza njàbi fɔrɔ abə Akipùs ne yaʼi wə̀d àfàʼì Kristo ne kìrə ika icheg ina. Tè bə̀ ŋwàʼrì àŋwàʼrì azo̰ anìŋ abə ifeti bəd Kristo we ne nyḭ̀yḛ inga àze achan, àghò Filemɔ̀n.

³ Ŋwiye ne yaʼi ìwa Mbaʼ fɔrɔ ìwa Anɔŋisəg Yeso Kristo ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Pɔl nàʼ məyakà bə̀ chàʼra Ŋwiye

⁴ Ìmə ifi Filemɔ̀n, mà nyumə̀ ijìm ne mə chàʼrà Ŋwiye, mə ya wènde awe, nàʼà məyakà abə Ŋwiye.

⁵ Mə ya wènde awe ane imbə̀ʼ icheg ne mə we zùghə icheg ne àghò nɔŋi ìwe ibḛfiŋ igun Anɔŋisəg Yeso Kristo bə̀ zùghə icheg ne àghò we kɔ̀ŋɔ̀ bəd Ŋwiye məjìm.

⁶ Mə we chàʼrà Ŋwiye gha, àghò təm kà icheg ne àghò nɔŋi ìwe ibḛfiŋ igun Kristo icheg ina. Ane, Ŋwiye ghiyə àghò taŋ kyèri inug chɔm chɔm ijìm mbe ne tì beri icheg ne tì yaʼi ane ifɔti tì Kristo.

⁷ Ìmə ifi, icheg ne àghò we kɔ̀ŋɔ̀ bəd Kristo angu fə nəri ìmə fìŋ bə̀ ghì mə se gyènde. Mə ya gyènde imbə̀ʼ icheg ne àghò fə ghì fìŋ abə bəd Ŋwiye zùtì.

Pɔl boʼ ibo abə Filemɔ̀n imbə̀ʼ Ònèsimùs

⁸ Ane, mə we tì mə bèrì fìŋ ne ka icheg ne mə̀ yaʼi ane ifɔti tì Kristo ni ghà ine gha àghò ghiyə anug ne àghò koʼi ni ghì.

⁹ Si ya gha, icheg ne mə̀ kɔ̀ŋi awe, mə kə̀b yaʼ ni boʼ ibo ine gha àghò ghiyə. À ya mo Pɔl, ne mbi zi amə inga nəb ndəŋ imbə̀ʼ icheg ne mə təmi ane ikum Yeso Kristo.

¹⁰ Mə boʼ ibo ine imbə̀ʼ ìmə ŋwan, Ònèsimùs, ne ya yaʼi ìmə ŋwan inga anug Ŋwiye icheg ne mə̀ yaʼi inga nəb ndəŋ .

¹¹ À ya yaʼ mbègtog, ikuchèg məd ya chwi gha chəyi wì ya beri àfàʼì ine. Àsi amad anìŋ, wì fə bèrì àfàʼì ine bə̀ bèrì àfàʼì inum.

¹² Mə ya anìŋ ywìrè chà aməd ine. Ìmə fìŋ ijìm ze igun məd.

¹³ Mə kə̀ taŋ kɔ̀ŋ ni nɔ̀ŋì aməd aŋa tì inum imbə̀ʼ icheg ne məd we tì wì fàʼ inum ane àze ati icheg ne mə̀ yaʼi inga nəb ndəŋ imbə̀ʼ ikən chɔm we ne mə ghà.

¹⁴ Si ya gha, chəyi mə̀ kɔŋi ni ghì anug mɔ̀ʼɔ ne chəyi àghò bḛ. Chəyi mə̀ kə̀bi ni nyə̀ŋì anug mɔ̀ʼɔ igun ine. Mə kə̀b gha àghò ghiyə aghi ne àghò kə̀bi ni ghì kwàʼ àghò àghò.

¹⁵ Ighəm mɔ̀ʼɔ, à ya aton ne wì ya sàŋì awe ane iki nyumə̀, ni gha wì mə ywìrì bə̀ndi yeʼe abɔ̀ʼ ine, wì si pè chùghi ane ighə̀m imɔʼ.

¹⁶ Ane, chəyi àghò biri ywiri niŋ aməd icheg ifeg. Àghò biri si niŋ aməd icheg wə̀d ne beri ati chè ifeg. Məd ya ìwa ifi chɔm inga Kristo. Məd bèrì àfàʼì ne tì wì wete amə. Si ya gha, mə kyèri gha məd biri bèrì àfàʼì ne tì wì wete awe chè icheg ne məd we wètè amə. Məd biri yaʼ ine icheg wə̀d àfàʼì fɔrɔ icheg ifi ne tì yaʼi ane ifɔti tì Anɔŋisəg.

¹⁷ Ane, àghò mə kyèri gha mo ya bə̀ wə̀d àfàʼì Kristo icheg ine, àghò ywiri niŋ aməd kwàʼ icheg ne nji àghò kə̀ niŋ amə.

¹⁸ Àmə yaʼ aghi ne, məd ya gùghi anug mɔ̀ʼɔ ine, kə̀ nyìmi njo mɔ̀ʼɔ ine, àghò ziye igun inum.

¹⁹ À ya mo, Pɔl, ŋwàʼri ìwaŋ ìngam gho̰ kwàʼ ane àmə abo. Mə biri ywìtì njo ze ine. Chəyi mə̀ beri ni ywìri wendi ine gha à ya mo ya ghi àghò yaʼ wə̀d Kristo.

²⁰ Ane, ìmə ifi, mə boʼ ibo ine gha àghò zugri amə, fàʼ anug azo̰ ne mə ghà icheg ne tì yaʼi ane ifɔti tì Anɔŋisəg. Àghò nəri ìmə fìŋ icheg wə̀d Kristo ìywin.

²¹ Mə kyèri gha icheg ne mə ŋwàʼrà anìŋ, àghò biri fàʼ kwàʼ icheg ne mə̀ kəbi, bì fàʼ chè.

²² Anug ndəŋ ne mə̀ kəbi gha àghò ghiyə inum ya gha, àghò nɔŋɔ atog nəb afibì inum imbə̀ʼ icheg ne mə̀ kyèri gha Ŋwiye biri zug àzən àdìghì, ywìrì chà amə inən.

Tichaʼri ne si nwḭ̀yḛ̀

²³ Epafràs ne ya bə̀ wə̀d ndəŋ icheg inum anjìm Yeso Kristo we chàʼrà awe.

²⁴ Mag tì Àristakùs tì Demàs fɔrɔ Lug ne yaʼi bəd àfàʼì Kristo icheg inum mbe bə̀ chàʼrà awe.

²⁵ Anɔŋisəg Yeso Kristo ghiyə ìchɔ̀mì inən mbə̰ məjìm.