Matìyò 15 - Ikan feg

Aghi ne chìkə̀ wə̀d

¹ Mə̀Farìsi tì mə̀chwitì mə̀nɔ̀ʼɔ̀ mɔ̀ʼɔ ya nɔ̀ʼ a Jèrusalèm ghò abə Yeso pè bìri ibo gha,

² “Aton ne chəyi ìmbe mə̀mə̀nənùg ya nɔ̀ŋɔ̀ mə̀nɔ̀ʼɔ̀ aben ne ìmba itog bəd inga aben ya nɔŋi àkə imbə̀ʼ aghə? Chəyi mbɔb mbe sò ibo bɔŋ se jə̀ghə icheg ne ìmba mə̀nɔ̀ʼɔ̀ chwi.”

³ Yeso ya ywìtì inɔb gha, “Aton ne chəyi mbə̰ mbe nɔ̀ŋɔ̀ mə̀nɔ̀ʼɔ̀ Ŋwiye məyi imbə̀ʼ icheg ne mbə̰ mbe nɔ̀ŋɔ̀ yaʼ mə̀nɔ̀ʼɔ̀ aben mbe ne ìmbən mə̀mbaʼ ya nɔŋi àkə gha?

⁴ Ŋwiye gha, ‹Ghumni ìwe mbaʼ tì ìwe ngɔb.› Wì bə̀ ywìrì gha, ‹Wə̀d ne zɔ̀mbi ìwi mbaʼ kə̀ ìwi ngɔb, mbe zweti aməd.›

⁵ Si ya gha, mbə̰ mbe gha, Wə̀d mə ghà abə ìwi mbaʼ kə̀ abə ìwi ngɔb gha, ‹Aghi ze ne mə beri ni wètì awe angu, mə fə nàʼ abə Ŋwiye.›

⁶ Ane, chəyi aton ne tì wì ywirì ghùmni ìwi mbaʼ tì ìwi ngɔb. Àzo̰ ze chwìye icheg ne mbə̰ mbe kə̀nə̀ Ìngam Ŋwiye məyi ni nɔ̀ŋì ìmbən mə̀nɔ̀ʼɔ̀ aben.

⁷ Mbə̰ ya kwàʼ bəd ne bèmnè inug! Wə̀dkə̀n Ŋwiye Àzayà ya ghà inug ne koʼi imbə̀ʼ awən icheg ne wì ya gha,

⁸ ‹Bəd mbo̰ mbe ghùmnə amə ane ikye ichug, si ya gha, ìtɔb fìŋ te agha se.

⁹ Mbɔb mbe ghùmnə amə atog ako. Mbɔb mbe chwìte mə̀nɔ̀ʼɔ̀ bəd icheg ni gha à ya ìmbum mə̀nɔ̀ʼɔ̀.› ”

Ighi mbe ne ghìyə̀ gha imbə̀ʼ wə̀d zḛ yi

¹⁰ Yeso ya kàrì inɔ̰ bəd wi ghò abɔ̀ʼ məd, wì ghà inɔb gha, “Mbə̀ zug ìmbən itog zen:

¹¹ Kayi aghi ne nyḭ̀yḛ inga ichug abə wə̀d ze ghìyə̀ gha imbə̀ʼ tengàŋ zḛ yi. Aghi ne ghìyə̀ gha imbə̀ʼ wə̀d zḛ yi ya aghi ne dùwə̀ inga ichug abə wə̀d.”

¹² Mə̀mə̀nənùg mbe ya ghò abɔ̀ʼ məd pè bìri ibo gha, “Àghò kyèri gha anug ze ne àghò kə̀ gha kə̀ chìkì fìŋ ìti mə̀Farìsi?”

¹³ Wì ya ywìtì inɔb gha, “Mbi biri chɔʼri ighi ijìm mbe ne kayi ìmə Mbaʼ ikaŋ kòndi.

¹⁴ Mbə̀ saŋa awɔb! Mbɔb ya məfəg ni nyimi ibo abə məfəg ndəŋ ni chwi inɔnjì inɔb. Ifəg mə̀ nyìmi abo abə ifəg ndəŋ, mbɔb mbe mə̀be biri fen inga ibighi.”

¹⁵ Pità ya ghà ibo gha, “Tòʼro ìngam məgri gho̰ ina.”

¹⁶ Ane, Yeso ya biri inɔb gha, “Chəyi ìmbən itog bə kiri zḛ?

¹⁷ Chəyi mbə̀ zə̰ gha aghi ne nyḭ̀yḛ inga ichug abə wə̀d biri swiʼi ghò nyi inga fibum, chè dù ghò isəg?

¹⁸ Aghi ne dùwə̀ inga ichug abə wə̀d, ze nɔ̀ʼ inga fìŋ. À ya aghi ne ghìyə̀ gha imbə̀ʼ wə̀d zḛ yi ya aze.

¹⁹ À ya ane imbə̀ʼ icheg ne tikɔndi tibɔ̀ŋ ya dùwə̀ inga fìŋ wə̀d. Tikɔndi tibɔ̀ŋ te ya inug icheg: anug ni zweti wə̀d, tì anug ni nɔ̀kì iweg wə̀d kə̀ nɔ̀kì inɔm wə̀d, tì anug ni nɔ̀kì àyi kə̀ nɔ̀kì mbaŋà abu abu, tì anug ni ji, tì anug ni bḛ anug ako igun wə̀d, fɔrɔ anug ni chìkì ikum wə̀d.

²⁰ Aŋa ya inug mbe ne ghìyə̀ gha imbə̀ʼ wə̀d zḛ yi, kayi anug ni jəg witì sò ibo.”

Ibḛfiŋ ìwi àyi mɔ̀ʼɔ a Kanàn

²¹ Yeso ya nɔ̀ʼ a Gènesarèd ghò aba aben ze a Tayì fɔrɔ a Sidòn.

²² Àyi mɔ̀ʼɔ a Kanàn ne yaya chùghə aba aben ze ya ghò iban Yeso pè kyen ane gì ka ka gha, “Masà! Ŋwan ifɔn Dèvid, dìgre igun inum! Azwighi tibɔ̀ŋ fə nyi inga ìmə ŋwan ne ya ŋwan àyi. Azwighi ze ze chə aməd kwàʼ ako.”

²³ Chəyi Yeso ya ywìti anug mɔ̀ʼɔ ibo. Mə̀mə̀nənùg ya ghò boʼ ibo abə Yeso gha, “Gha abə àyi gho̰ gha wì gho yi imbə̀ʼ icheg ne məd we yḛ̀ nè kyḛ ina anjìm.”

²⁴ Yeso ya ywìtì gha, “Ŋwiye tɔm amə məyi abə bəd inga inəbi Izre mbe ne yaʼi icheg njə̀g ne nimi.”

²⁵ Anyumə̀ ne wì ya ghà ane, àyi we ya ghò gɔ̀m itog inwḭ ibo imbìghè ghà ibo gha, “Masà, wète amə!”

²⁶ Yeso ya ywìtì ibo gha, “Chəyi ze bɔŋi gha mbe niŋ ighijəg bɔn nàʼ abə bog.”

²⁷ Àyi we ya bḛ gha, “À ya ane masà, si ya gha, ka bèyi bog, ti ya jə̀ghə ichəpi ighi mbe ne fènde aseg anyumə̀ ne ìmbɔb mə̀mbaʼ mbe jə̀ghə igun fiŋaŋi.”

²⁸ Yeso ya ywìtì ibo gha, “Àyi gho̰, ìwe ibḛfiŋ taŋ kà! Ane, aghi ne àghò kə̀bi, àghò biri bèrì.” Kwàʼ anyumə̀ we, azwighi tibɔ̀ŋ ze ya dù, nyɔd ŋwan àyi we bə mèg.

Yeso ghù bəd nɔʼ nɔʼ

²⁹ Yeso ya nɔ̀ʼ a Tayì tì Sidòn yèn chè iban atəŋ ze a Galìli. Wì ya ghò kɔʼ ikaŋ iwum pè chùghi aseg.

³⁰ Tinɔ̰ bəd ya ghò abɔ̀ʼ məd tì bəd ne ighog ya swèʼe tì məfəg tì bəd ne ya buʼrə tì bəd ne chəyi mbe ghàmà fɔrɔ bəd ne yaya ghɔ̰̀ aku aghɔn nɔʼ nɔʼ ndəŋ. Mbi ya pè nɔ̀ŋì bəd mbe ibo imbìghè, wì ghù awɔb mbɔb məjìm.

³¹ Bəd mbe ya yeti icheg ne mbɔb ya bàri gha bəd ne chəyi mbi yaya ghàmà yaya se ghàmà, bə̀ bàd gha bəd ne ighog ya swèʼe tì bəd ne ya buʼrə yaya se yḛ̀ icheg chɔm, bə̀ bàd gha məfəg yaya se bàrà isiŋi. Ane, mbɔb yaya se ghùmnə Ŋwiye mə̀Izre.

Yeso jə mbaŋà chuʼ ikwè

³² Yeso ya kàrì ìmbi mə̀mə̀nənùg abɔ̀ʼ məd ghà inɔb gha, “Mə sɔ̀mnɔ̀ abə inɔ̰ bəd gho̰ imbə̀ʼ icheg ne mbi fə chughi tì inum ineg itad, ane chəyi mbi ywirì bèrì aghi mɔ̀ʼɔ ne tì mbi jəg. Chəyi mə̀ kəbi gha mbe nɔʼɔ aŋa inga njèg, nji mbi biri ni nə̀ŋə̀ inɔnjì gùg.”

³³ Mə̀mə̀nənùg məd ya biri ibo gha, “Tì kə ghi niŋ ngə̀ŋ ni kòʼi ayeg inga ibad zɔbi aŋa ni jə inɔ̰ bəd gho̰ angu?”

³⁴ Yeso ya biri inɔb gha, “Mbə bèrì chiŋ ngə̀ŋ tisə̀ʼə?” Mbɔb ya ywìtì gha, “Tì bèrì chiŋ ngə̀ŋ ìsàmbe tì su kwa kwa mɔ̀ʼɔ.”

³⁵ Yeso ya zug ane si ghà abə inɔ̰ bəd we gha mbe chughi aseg.

³⁶ Anyumə̀ ne mbi ya fə chughi aseg, wì ya niŋ chiŋ ngə̀ŋ te ìsàmbe bə̀ niŋ su te, chàʼra Ŋwiye, bə̀ʼri, nàʼ abə mə̀mə̀nənùg mbe gha mbe ghapa abə tinɔ̰ bəd te.

³⁷ Mbɔb məjìm ya jəg kɔd. Mə̀mə̀nənùg mbe ya si fèti ibəʼri mbe ne ya bùʼi, mbi sweg tiko ìsàmbe.

³⁸ Mbaŋà te ne ya jəghi ya yaʼ icheg mbɔb chuʼ ikwè, ne chəyi mbi taŋi mə̀yi fɔrɔ bɔn.

³⁹ Anyumə̀ ne wì ya fə cha tinɔ̰ bəd te ti ghò awɔb, wì ya nyi abaŋ igyi, ghò aba aben ze a Magadàn.