Matìyò 13 - Ikan feg

Tìngam məgri imbə̀ʼ wə̀d ne ya nwḭ fitam ngwèd

¹ Kwàʼ məyi aneg ze, Yeso ya dù inga nəb ghò chùghi iban atəŋ.

² Tinɔ̰ bəd ne ya fete iban məd ya taŋ nɔʼ ni gha wì ya si nyi inga abaŋ igyi chùghi inga, bəd mbe məjìm si təm iban atəŋ ze.

³ Wì ya mə̀tì inug nɔʼ nɔʼ inɔb inga tìngam məgri. Wì ya ghà inɔb gha: “Wə̀d mɔ̀ʼɔ ne fàʼà a mben ya dù ghò ni nwḭ̀ fitam ngwèd.

⁴ Icheg ne wì yaya nwḭ̀yḛ̀ fitam ngwèd fe, ìti mɔ̀ʼɔ ya fendi igun inɔnjì, tìnən yèʼe gwe mèrì.

⁵ Ìti mɔ̀ʼɔ tì fitam ya fendi igun igho ne chəyi ìseg ya nɔʼi. Ti ya gwed bə̀ kweg kwàʼ amad amad icheg ne chəyi ìseg ya nɔ̀ʼi igun igho we.

⁶ Si ya gha, anyumə̀ ne achwi ya zuʼi kà, ze ya tɔ̀n tighə te ti zɔmɔ imbə̀ʼ icheg ne chəyi ighaŋ ya taŋ nyi aseg.

⁷ Ìti mɔ̀ʼɔ tì fitam ya fendi inga agyen njəŋ, bə̀ kweg. Agyen njəŋ ze ya bə̀ kweg nàmà nìmni ighi mbe.

⁸ Fitam ngwèd mɔ̀ʼɔ ya fendi igun ìseg chɔm, kweg ko titam jəghi. Ìti mɔ̀ʼɔ ya ko achug iki, ìtin achug ìghum tìfughə, ìtin achug ìghum itad.

⁹ Wə̀d ne tì wì zug anug, wì zug.”

Aton ane tìngam məgri

¹⁰ Mə̀mə̀nənùg ya yèʼe ibo biri gha, “Aton ne àghò we ghàmà abə bəd inga tìngam məgri àkə gha?”

¹¹ Wì ya ywìtì gha, “Aton ya gha, Ŋwiye fə nàʼ iwe inən ni kyeri inug ne yaʼi inə̀mbi imbə̀ʼ anug ìfɔ̀n ikaŋ. Àsi abə mbin tì bəd, chəyi wi nàʼi iwe we inɔb.

¹² Ane, mbi biri nàʼ ighi ne taŋ nɔ̀ʼ abə wə̀d ne fə bi bèrì ighi mɔ̀ʼɔ, wì si ywìrì taŋ bèrì ighi ndan ndàn. Wə̀d ne chəyi wì beri ighi, ka bèyi iki piʼì we ne wì bèri, mbi biri niŋ ibo.

¹³ Aton ne mə ghàmà inɔb inga tìngam məgri ya ni gha: ‹Mbi biri nèn, si ya gha, chəyi mbi biri bàd. Mbi biri zweri, si ya gha, chəyi mbi biri zug.

¹⁴ Ze biri yaʼ anìŋ inɔb ni ghì gha anug ze ne wə̀dkə̀n Ŋwiye Àzayà ya gha ze duwə ane tesiʼ. Anug ze ya gha, Mbə̀ biri jiʼì zug, si ya gha chəyi ìmbən itog biri zen. Mbə̰ biri jiʼì nèn, si ya gha chəyi mbə̀ biri bàd.

¹⁵ À ya ane imbə̀ʼ icheg ne fìŋ abə bəd mbo̰ fə tu. Mbɔb fə bə̀ ghùpì ìmbɔb ìtɔ̀ŋi. Mbɔb fə bə̀ kùbri àzɔb aghə. Àkə aghi ne chəyi ze yaʼi ane, nji mbɔb biri nèn, bàd, zwèri zug bə̀ kyèri inga ìtɔb fìŋ, si bə̀ŋì fìŋ yèʼe inum, mə ghù awɔb.›

¹⁶ Ŋwiye zì àbɔrɔ̀bɔd igun inən imbə̀ʼ icheg ne mbə̰ mbe bàrà inug mbo̰ bə̀ zùghə kwàʼ mbə̰ mbə̰.

¹⁷ Mə gha tesiʼ inən gha, bədkə̀n Ŋwiye nɔʼ nɔʼ tì bəd nɔʼ nɔʼ ne ya təmi kòʼ imbìghè abə Ŋwiye ya taŋ kə̀b ni bàd inug mbo̰ ne mbə̰ mbe bàrà anìŋ, si ya gha, chəyi mbi ya bàri. Mbɔb ya bə̀ kə̀b ni zug inug mbo̰ ne mbə̰ mbe zùghə anìŋ, si ya gha, chəyi mbɔb ya zughi.”

Yeso tòʼrì ìngam məgri imbə̀ʼ wə̀d mben ne nwḭ̀yḛ̀ fitam

¹⁸ Yeso ya ghà abə mə̀mə̀nənùg məd gha, “Mbə̀ zug aton ane ìngam məgri imbə̀ʼ wə̀d mben we ne yaya nwḭ̀yḛ̀ fitam.

¹⁹ Anyumə̀ ne wə̀d zùghi ikən imbə̀ʼ anug ìfɔ̀n ikaŋ ne chəyi atog məd zḛ, Wə̀d Tibɔ̀ŋ biri yeʼe pàŋì aghi ne mbi nyɔʼi ibo inga fìŋ. Aŋa ya icheg fitam fe ne ya fendi igun inɔnjì.

²⁰ Fitam fe ne ya fendi igun igho ya bəd ne zùghə Ìngam Ŋwiye bə̀ bḛ kwàʼ ati ati ane igyendi.

²¹ Si ya gha, icheg ne chəyi ighaŋ fitam fe ya taŋ nyi aseg, fi ya kweg məyi ane iki nyumə̀. Anyumə̀ ne bəd ko ni chɔʼ ìmbɔb ibɔʼì ighog imbə̀ʼ ìngam we, mbɔb ya wàʼa ìwɔb ibḛfiŋ kwàʼ amad amad.

²² Fitam fe ne fendi inga agyen njəŋ ya mə̀tə̀ imbə̀ʼ wə̀d ne zùghə Ìngam Ŋwiye bə̀ bḛ, si ya gha, tikɔndi imbə̀ʼ ighi igun isəg fɔrɔ ikuchèg ne ighi igun isəg ya tàmba bəd biri nimni ìngam we. Wì biri si ku witì wì ko titam.

²³ Àsi fitam ngwèd fe ne fendi igun ìseg chɔm, à ya wə̀d ne zùghə Ìngam Ŋwiye, atog məd zḛ. À ya məd ne biri ko titam achug iki, kə̀ ìghum tìfughə kə̀ ìghum itad, chè inun fitam ngwèd ne mbi ya nwḭ.”

Ngam məgri imbə̀ʼ ifog inga mben kyì

²⁴ Yeso ya ywìrì ghàm ìngam məgri ndəŋ abə mə̀mə̀nənùg məd gha, “Anug ìfɔ̀n ikaŋ ya icheg wə̀d ne ya nyɔ̀ʼi ngwèd kyì chɔm ibo a mben.

²⁵ Aneg mɔ̀ʼɔ, anyumə̀ ne bəd məjìm yaya gwḛ, wə̀d ìpàb məd ya ghò nwḭ̀ ifog inga mben kyì ze nɔ̀ʼ ghò yi.

²⁶ Anyumə̀ ne kyì te ya màʼi tisaki se ko, bəd ya si bàd ifog we kyèri.

²⁷ Bəd mbe ne fàʼà inga mben ze ya pè bàd ifog we ane, si ghò bìri abə ìwɔb mbaʼ àfàʼì gha, ‹Masà, imbə̀ʼ àghò ya nyɔ̀ʼ ngwèd kyì chɔm ine inga mben? Ifog gho̰ kə si nɔ̀ʼ ayeg inga?›

²⁸ Wì ya ywìtì inɔb gha, ‹Aŋa ya àfàʼì ne wə̀d ìpàb fàʼi.› Bəd àfàʼì məd ya biri ibo gha, ‹Àghò kə̀b gha tì gho chɔ̀ʼri ifog we waʼ?›

²⁹ Wì ya ywìtì inɔb gha, ‹Indèʼ! Mbə̰ mə̀ ghò ni chɔʼri ifog, mbə̰ mbe tì mbə̰ chè chɔ̀ʼri tìtḭ kyì abɔ̀ʼ ifog.

³⁰ Mbə̀ saŋa mbe fɔrɔ kwèghe inɔn ghò pè ane nyumə̀ ne mbe mòʼò kyì. Anyumə̀ we, mə biri ghà abə bəd ne mòʼò kyì gha mbe fə bi chɔʼ ifog we fèti, kɔd abiŋ abiŋ, tɔ̀n, si mòʼ kyì ghò nɔ̀ŋì inga ìmə ngən.› ”

Ngam məgri imbə̀ʼ fitam azed mostàd

³¹ Yeso ya ywìrì ghàm ìngam məgri ndəŋ abə mə̀mə̀nənùg məd gha, “Anug ìfɔ̀n ikaŋ ya icheg fitam azed mostàd ne wə̀d mɔ̀ʼɔ ya niŋi ghò nyɔ̀ʼ ibo a mben.

³² Fitam azed mostàd ya jiʼì fitam ne taŋ kə chè titam tijìm, si ya gha, anyumə̀ ne fi kwere, fi ya kwèghe bə̀ŋə̀ ane ìtḭ azed ne faŋi chè ighi ndəŋ ijìm, tìnən se ghò kɔ̀rɔ ìtɔb kàn inga tìtab.”

Ngam məgri imbə̀ʼ àfòrì

³³ Yeso ya bə̀ ywìrì ghàm ìngam məgri ndəŋ abə mə̀mə̀nənùg məd gha, “Anug ìfɔ̀n ikaŋ ya icheg àfòrì ne àyi mɔ̀ʼɔ ya niŋi zì inga aburi ngə̀ŋ inga akaŋ kyen, si tad anene ze nyàmbà ghì ngə̀ŋ ze ijìm kɔʼ.”

Aton ne Yeso we ghàmà inga tìngam məgri

³⁴ Yeso ya ghà inug mbo̰ ijìm abə inɔ̰ bəd we inga tìngam məgri. Chəyi wì ya kweʼè ghàmà inɔb witì wì ghàm inga ìngam məgri.

³⁵ Wì ya ghì anìŋ ni gha anug ze ne wə̀dkə̀n Ŋwiye ya gha ze duwə ane tesiʼ. Anug ze ya gha: “Mə biri ghàm inɔb inga tìngam məgri. Mə biri mə̀tì inug inɔb ne yaʼi inə̀mbi nɔ̀ʼ ane nyumə̀ ne Ŋwiye ya tangi isəg.”

Yeso tòʼrì ìngam məgri imbə̀ʼ ifog inga mben kyì

³⁶ Anyumə̀ ne Yeso ya nɔ̀ʼi sàŋì inɔ̰ bəd we ghò inga nəb, mə̀mə̀nənùg məd ya si ghò ghà ibo gha wì toʼro aton ane ìngam məgri we ne wì ya ghàmi imbə̀ʼ ifog inga mben kyì.

³⁷ Wì ya ghà inɔb gha, “Wə̀d we ne ya nyɔ̀ʼi ngwèd kyì chɔm ze ya Ŋwan Wə̀d.

³⁸ Mben ze ya isəg. Ngwèd kyì chɔm ze ya bəd mbe ne yaʼi inga anug ìfɔ̀n ikaŋ. Ifog we ya bəd ìmbi Wə̀d Tibɔ̀ŋ.

³⁹ Wə̀d ìpàb we ne ya nyɔ̀ʼi ifog ya Debrə̀. Nyùmə̀ we ne mbe mòʼò kyì ya nyumə̀ we ne isəg biri nwḭ̀yḛ̀. Bəd mbe ne mòʼò kyì ya mbè angirə̀ Ŋwiye.

⁴⁰ Icheg ne mbe chɔ̀ʼɔ ifog tɔ̰̀ inga iywid, à ya bə̀ ane ne ze biri yaʼ ane nyumə̀ we ne isəg biri nwḭ̀yḛ̀.

⁴¹ Ŋwan Wə̀d biri chà ìmbi mbè angirə̀, mbi pè chɔ̀ʼri ighi ijìm mbe ne ghìyə̀ gha bəd ya ghìyə̀ inug tibɔ̀ŋ chì, bə̀ chì bəd məjìm ne ghìyə̀ inug tibɔ̀ŋ inga anug ìfɔ̀n məd.

⁴² Mbè angirə̀ biri màʼ awɔb inga iswəŋi iywid anam ka ka, asiŋi ne mbi biri se dèghè kùrə asɔŋ.

⁴³ Anyumə̀ we, bəd ne təmi kòʼ biri se zùʼə icheg achwi inga anug ìfɔ̀n ìwɔb Mbaʼ. Wə̀d ne tì wì zug anug, wì zug.”

Ngam məgri imbə̀ʼ aghi àka inun ne wə̀d mɔ̀ʼɔ ya nə̀mbi

⁴⁴ Yeso ya ywìrì ghàm ìngam məgri ndəŋ abə mə̀mə̀nənùg məd gha, “Anug ìfɔ̀n ikaŋ ya icheg aghi àka inun ne wə̀d mɔ̀ʼɔ ya nə̀mbi inga mben mɔ̀ʼɔ. Anyumə̀ ne wə̀d ndəŋ ya bàri aghi ze, wì ya ywìrì nə̀mbì aghi ze inga aseg inga mben ze. Wì ya si ghò fèndì ìmbi ighi ijìm ane igyendi, bə̀ndì ghò zon mben ze.”

Ngam məgri imbə̀ʼ pel

⁴⁵ Yeso ya bə̀ ywìrì gha, “Anug ìfɔ̀n ikaŋ ya icheg wə̀d iywin ne yaya yḛ̀ nè kə̀bə̀ mə̀pə chɔm.

⁴⁶ Anyumə̀ ne wì ya bàri pel mɔ̀ʼɔ ne taŋ bɔ̀ŋ chè mə̀pə ndəŋ məjìm, wì ya ghò fèndì ìmbi ighi ijìm, si ghò zon pel we.”

Ngam məgri imbə̀ʼ kyə̀

⁴⁷ Yeso ya bə̀ gha, “Anug ìfɔ̀n ikaŋ ya bə̀ icheg kyə̀ ne mbi ya màʼi inga atəŋ kyen, gwì aku su ajìm.”

⁴⁸ Anyumə̀ ne kyə̀ ze ya sweghi, bəd ne gwìyè su ya sìmì ghò pè iban igyi. Mbɔb ya chughi aseg tèti su chɔm zì inga mbì tìkaʼ, si waʼ ìti yi yi ne chəyi tì bəd kud.

⁴⁹ Aŋa ya icheg ne ze biri yaʼ anyumə̀ ne isəg biri nwḭ̀yḛ̀. Mbè angirə̀ biri yeʼe pè ghàpì bəd, chì bəd ne təmi kòʼ inga bəd ne ghìyə̀ inug tibɔ̀ŋ.

⁵⁰ Mbɔb biri màʼ bəd ne ghìyə̀ inug tibɔ̀ŋ inga iswəŋi iywid anam ka ka, asiŋi ne mbi biri se dèghè kùrə asɔŋ.

Ighi anun tì ighi feg

⁵¹ Yeso ya chè imbìghè bìri gha, “Ìmbən itog fə zen imbə̀ʼ tìngam məgri ìto̰ tijìm?” Mbɔb ya ywìtì gha, “E! Ìmba itog fə zen.”

⁵² Wì ya si ghà inɔb gha, “Icheg ne ze yaʼi anìŋ, àchwitì mə̀nɔ̀ʼɔ̀ ne bə̀ŋə ane àmə̀nənùg inga anug ìfɔ̀n ikaŋ ya icheg wə̀d ne nyi inga ìzi ngən, chì ighi anun ijìm tì ighi feg ijìm chà isəg.”

Chəyi mbe ghùmnə Wə̀dkə̀n Ŋwiye ibo inga aben

⁵³ Anyumə̀ ne Yeso ya màni ni ghàm tìngam məgri ìto̰, wì ya nɔ̀ʼ asiŋi ze jəg inɔnjì ibo aben.

⁵⁴ Anyumə̀ ne wì ya pe nyi inga aben məd, wì ya ko se chwìte inug abə bəd inɔb inga ichamì Ŋwiye. Anug ya chè awɔb, mbi se bìri gha, “Wə̀d gho̰ kə̀ nìŋi iku iwe gho̰ fɔrɔ ika ni fàʼ iyeti inug mbo̰ ayeg?

⁵⁵ Imbə̀ʼ aməd ya ŋwan kapindà? Ngɔb məd kə kayi Mèri? Imbə̀ʼ məfi məd ya Jem tì Jòseb tì Sayimùn fɔrɔ Judàs?

⁵⁶ Imbə̀ʼ njàbi məd tijìm te abɔ̀ʼ ina aŋa? Wə̀d gho̰ kə̀ si niŋ inug mbo̰ ijìm ayeg?”

⁵⁷ Mbi ya ghàm ane gaŋ, to̰ awɔb ni bḛ aməd. Si ya gha, Yeso ya ghà inɔb gha, “Bəd ya bḛ wə̀dkə̀n Ŋwiye inga isiŋi ijìm chèyi ibo inga aben fɔrɔ ibo inga achan.”

⁵⁸ Ane, chəyi wì ya fàʼi iyeti inug nɔʼ nɔʼ angu imbə̀ʼ icheg ne chəyi mbɔb ya beri ibḛfiŋ igun məd.