Mə̀Hibrù 1 - Ikan feg

Ŋwiye ya ghàmà ina amad anìŋ anjìm Ŋwan məd

¹ À ya yaʼ mbègtog, Ŋwiye yaya ghàmà abə ìmba mə̀mbaʼ aneg anjìm bədkə̀n məd kwàʼ ane aghəm nɔʼ nɔʼ fɔrɔ ane mənɔnjì nɔʼ nɔʼ.

² Àsi inga ìwa nyùmə̀ gho̰ ne isəg we se nwìyḛ̀, wì ya se ghàmà ina anjìm Ŋwan Məd. À ya anjìm Ŋwan məd we ne Ŋwiye ya tangi isəg ijìm. Ŋwiye bə̀ chɔʼ aməd nɔ̀ŋì gha wì ya tùmbə̀ ighi ijìm.

³ Məd ya chwìye ighumni Ŋwiye ne zḛ njàndi njandi bə̀ yaʼ kwàʼ icheg Ŋwiye. Yeso bə̀ nyìmi isəg ijìm ane ìngam məd we ne beri ika. Anyumə̀ ne wì ya fə ghi Ŋwiye waʼ inug tibɔ̀ŋ bəd, wì ya si chùghi yi ikaŋ àbɔ̀ŋɔ aba abo jəghi abə Ŋwiye we ne beri ika ijìm.

Ŋwan Ŋwiye bèrì ika chè mbè angirə̀

⁴ Ŋwiye ya ghì Ŋwan Məd bèrì ika chè mbè angirə̀ kwàʼ icheg ne ikum we ne wì ya nàʼi ibo bə̀ chè ìwɔb.

⁵ Àkə angirə̀ iweg ne Ŋwiye ya kweʼì ghà ibo gha, “Àghò ya ìmə Ŋwan; Nɔ̀ʼ tèchɔ̀ŋ, mo fə si ìwe mbaʼ?” Kə̀ àkə angirə̀ iweg ne Ŋwiye ya gha imbə̀ʼ aməd gha, “Mə biri yaʼ mbaʼ məd, məd si yaʼ ìmə ŋwan?”

⁶ Anyumə̀ ne Ŋwiye yaya chà ìwi fɔd Ŋwan inga isəg, wì ya gha, “Mbè angirə̀ Ŋwiye məjìm mbe ghumni aməd.”

⁷ Wì ya ghàm imbə̀ʼ mbè angirə̀ gha, “Wì ya ghì gha, mbè angirə̀ məd yaʼ icheg ifə, bə̀ ghì gha bəd àfàʼì məd yaʼ icheg tinemi iywid.”

⁸ Àsi imbə̀ʼ Ŋwan Məd, Ŋwiye ya gha, “Ŋwiye, àghò biri chughi igun àze atən ifɔn kwàʼ ane ighə̀m imɔʼ. Àghò biri ya tùmbə̀ bəd inga àze anug ìfɔ̀n ane icheg ne koʼi.

⁹ Àghò kɔ̀ŋ inug ne koʼi bə̀ bàn inug tibɔ̀ŋ. Ane, Ŋwiye, ne yaʼi ìwe Ŋwiye fə chɔʼ awe nɔ̀ŋì igun ìmbe məfi icheg ne wì zɔ̀ʼi awe ghì àghò se gyènde.”

¹⁰ Ŋwiye ya ywìrì ghà imbə̀ʼ Ŋwan məd gha, “O Anɔŋisəg, àghò ya tangi isəg bə̀ tàngi ikaŋ àbɔ̀ŋɔ ane ìmbe ibo bɔŋ isəg ya se ko.

¹¹ Isəg fɔrɔ ikaŋ àbɔ̀ŋɔ biri ghum chè nim. Àsi awe, àghò biri tèn ane ighə̀m imɔʼ. Isəg fɔrɔ ikaŋ àbɔ̀ŋɔ biri chə̀ icheg ndwi.

¹² Àghò biri gwiʼi isəg fɔrɔ ikaŋ àbɔ̀ŋɔ chì waʼ icheg ne mbe gwìʼe ichəʼ ndwi. Isəg fɔrɔ àbɔ̀ŋɔ biri kɔpɔ icheg ne ndwi ze kɔ̀pɔ. Si ya gha, chəyi Àghò we kɔ̀pɔ. Àghò biri tèn kwàʼ ane ighə̀m imɔʼ.”

¹³ Àkə angirə̀ weg ne Ŋwiye ya kweʼì ghà ibo gha, “Àghò chughi ane àmə aba abo jəghi ghò pè ane nyùmə̀ ne mə̀ biri ghì ìmbe bəd ìpàb si yaʼ aghi ne àghò we nɔ̀ŋɔ̀ ighog igun?”

¹⁴ Ane, mbè angirə̀ kə ighə? Mbè angirə̀ ya izwighi ne Ŋwiye cha gha mbe yeʼe fàʼ ni ya wètè bəd mbe ne Ŋwiye biri pumni awɔb.