Kòlosè 1 - Ikan feg

Pɔl chàʼrì bəd Kristo mbe a Kòlosè

¹ À ya mo Pɔl, wə̀dtɔm Kristo ne Ŋwiye chɔ̀ʼi tì Timotì ìwa ifi, mba bəd Yeso Kristo tì ŋwàʼri àŋwàʼrì azo̰.

² Tì ya ŋwàʼrà anìŋ inən mbə̰ mbe ne yaʼi bəd Ŋwiye a Kòlosè ne bə̀ nɔ̀ŋì ìwən ibḛfiŋ igun Kristo. Mbə̰ mbe fàʼà inug ne mbə̀ beri ni fàʼ. Ŋwiye ne yaʼi ìwa Mbaʼ ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Pɔl chàʼra Ŋwiye bə̀ nàʼ məyakà ibo imbə̀ʼ bəd Kristo mbe a Kòlosè

³ Mà nyumə̀ ijìm ne te chàʼrà Ŋwiye ne yaʼi Mbaʼ abə ìwa Anɔŋisəg Yeso Kristo imbə̀ʼ awən, tì ya nàʼà məyakà ibo.

⁴ Tì ya nàʼà məyakà ibo ane imbə̀ʼ icheg ne tè zug icheg ne mbə̀ nɔŋi ìwən ibḛfiŋ igun Yeso Kristo fɔrɔ icheg ne mbə̰ mbe kɔ̀ŋɔ̀ bəd Ŋwiye məjìm.

⁵ Ìwən ibḛfiŋ fɔrɔ àzən àkɔ̀ŋì ya imbə̀ʼ icheg ne mbə̀ nɔŋi ikɔndi ni ghɔ̀m inug mbe ne Ŋwiye kàʼi ni nàʼ inən ikaŋ àbɔ̀ŋɔ. À ya inug mbe ne mbə̀ fə zughi inga ìngam tesiʼ we ne yaʼi ikən chɔm imbə̀ʼ Kristo.

⁶ Ikən chɔm gho̰ we kwèghe isiŋi ijìm bə̀ ghìyə̀ gha bəd se ghìyə̀ inug mbe ne Ŋwiye kə̀bi kwàʼ icheg mbə̰ mbe bə̀ ghìyə̀. Nɔ̀ʼ ane aneg mbègtog ne mbə̀ ya zughi bə̀ kyèri tesiʼ imbə̀ʼ ìchɔ̀mì Ŋwiye, mbə̰ ya ko ni se ghìyə̀ inug icheg ne Ŋwiye kə̀bi.

⁷ Mbə̰ ya zug anug imbə̀ʼ ìchɔ̀mì Ŋwiye abə Epafràs. Məd ya wə̀d àfàʼì icheg ina. Tè kɔ̀ŋ aməd. Məd ya fàʼà abə Kristo atog ina tì ìzi fìŋ ijìm.

⁸ Məd fə bə̀ ghì tì kyèri gha, Azwighi Ŋwiye fə nyi inga inən ghì mbə̰ se kɔ̀ŋɔ̀ ìmbən məfi ne mbə̀ yaʼi ane anug amɔʼ tì Kristo.

⁹ À ya aton ne, nɔ̀ʼ ane aneg ne Epafràs ya mə̀ti inug ina imbə̀ʼ ìwən ibḛfiŋ igun Kristo, chəyi tì kweʼì chughi witì ya chàʼrà Ŋwiye inən. Tì ya chàʼrà Ŋwiye gha, Ŋwiye ghiyə mbə̀ taŋ kyèri ikuchèg məd, Azwighi Ŋwiye naʼa iwe inən bə̀ ghì ìmbən itog taŋ zen.

¹⁰ Tì ya chàʼrà Ŋwiye anìŋ ni gha, ane mənɔnjì ijìm, mbə̀ chughi ane ikuchèg ne Anɔŋisəg kə̀bi bə̀ ya ghìyə̀ inug ni biri ghì fìŋ məd bɔ̀ŋ. Ane, ìwən ikuchèg biri ghì gha mbə̀ se ghìyə̀ inug chɔm bə̀ se chè imbìghè ni taŋ kyeri Ŋwiye.

¹¹ Ŋwiye we ne beri ika ne che tika ijìm fə ghì gha mbə̀ beri ika ne ya nyìʼè fìŋ inga nyùmə̀ ngəʼ. Wì fə bə̀ ghì gha, mbə̀ beri inyimbifiŋ, se gyènde,

¹² bə̀ nàʼà məyakà abə ìwa Mbaʼ. À ya məd fə ghi tì kòʼ ni jəg anug ìfɔ̀n ìzḛzḛ ze ne məd ya fə nɔŋi abə bəd Ŋwiye.

¹³ Məd fə chì awa ikye ibo abə tika afub, si nàʼ ati ina inga anug ìfɔ̀n Ŋwan məd ne wì kɔ̀ŋi.

¹⁴ À ya Ŋwan məd we ghi Ŋwiye zèri awa chì inga ngəʼ icheg ne wì waʼi ìmba inug tibɔ̀ŋ.

Yeso ya atog igun ighi ijìm

¹⁵ Kristo we ne mbə̀ bari ya kwàʼ icheg Ŋwiye we ne chəyi bəd mbe bàrà. Məd ya atog igun ighi ijìm ne Ŋwiye tàngi.

¹⁶ À ya Ŋwan məd we ne Ŋwiye ya nàʼi ika ibo wì tàngi ighi ijìm ne yaʼi ikaŋ àbɔ̀ŋɔ fɔrɔ igun isəg; Ighi ijìm ne te bàrà fɔrɔ ighi ne chəyi te bàrà: Kə̀ àkə mbè angirə̀, kə̀ izwighi tibɔ̀ŋ mbe ne tùmbə̀ ighi ne yaʼi igun isəg fɔrɔ ighi ne yaʼi aton àbɔ̀ŋɔ. Ighi ijìm ya Ŋwiye ya che anjìm məd tàngi ni gha mbe ghumni aməd.

¹⁷ Məd ya fə yaʼi yi bɔŋ Ŋwiye ya se tàngi ighi ijìm. À ya məd ghi gha ighi ijìm yaʼ icheg ne mbi yaʼi.

¹⁸ Məd ya Atog ane ifeti bəd Kristo. Ifeti bəd Kristo ya nyàmnyɔd məd. À ya məd ko anug ifeti bəd Kristo. Məd ya ŋwan mbègtog ne Ŋwiye zwemni ane iwu ni ghì gha wì bere ika igun ighi ijìm.

¹⁹ Ŋwiye ya kɔ̀ŋ ni ghì gha, Kristo ne ya Ŋwan məd wì yaʼ icheg məd ane inug ijìm.

²⁰ Ŋwiye ya bə̀ chè anjìm Kristo ni niŋ ighi ijìm ane ìwi nyɔd, kə̀ àkə ighi ne yaʼi igun isəg, kə̀ ighi ne yaʼi ikaŋ àbɔ̀ŋɔ. À ya anjìm anəm ze ne Ŋwan məd we ya ku igun azed abaʼri ne Ŋwiye mànì achɔb tì ighi ijìm.

²¹ Àsi awən, mbə̰ kyèri gha, à ya yaʼ anyumə̀ mɔ̀ʼɔ, chəyi mbə̀ ya yaʼi ane ifɔti tì Ŋwiye. Mbə̰ ya yaʼ bəd ìpàb Ŋwiye ne kɔ̀ndɔ inug tibɔ̀ŋ bə̀ ghìyə̀ inug tibɔ̀ŋ.

²² Amad anìŋ, Ŋwiye fə chè anjìm iwu we ne Yeso Kristo ya ku igun azed abaʼri ni mànì achɔb. Kristo ya ku ane ni chì ìmbən inug tibɔ̀ŋ bə̀ chì isaʼi igun inən, si ghì mbə̰ si yaʼ bəd ne təmi zen imbìghè abə Ŋwiye.

²³ Ane, mbə̀ chè imbìghè ni təm kà inga ìwən ibḛfiŋ ne chəyi mbə̀ chi ìwən ikɔndi igun inug mbe ne yaʼi inga ikən chɔm imbə̀ʼ Kristo. À ya ikən chɔm we ne mbə̀ ya zughi, ne mbe bə̀ chètè abə bəd isiŋi ijìm. À ya bə̀ ikən chɔm gho̰ ne Ŋwiye ya chɔʼi amə, mo Pɔl, ane wə̀d àfàʼì məd gha mə chete.

Inug ne Pɔl ya fàʼi abə ifeti bəd Kristo we a Kòlosè

²⁴ Mə we gyènde amad anìŋ imbə̀ʼ icheg ne Kristo ya zə̰ ngəʼ imbə̀ʼ awən. Mə ya zə̰ ngəʼ fàʼà anìŋ imbə̀ʼ icheg ne Kristo ya zə̰ ngəʼ imbə̀ʼ ìzi nyàmnyɔd, ni ghì gha zì kweg. Nyàmnyɔd məd ze ya ifeti bəd Kristo.

²⁵ Mo ya wə̀d àfàʼì abə ifeti bəd Kristo icheg ne Ŋwiye ya chɔʼi amə chà, gha mə̀ taŋ tòʼrì inug ijìm mbe ne yaʼi inga Ìngam Ŋwiye inən, mbə̀ taŋ kyèri.

²⁶ Ŋwiye ya fə nə̀m ìngam gho̰ abə bəd inga tikəri bəd tijìm te ne ya fə che. Àsi amad anìŋ, Ŋwiye fə gwàʼ ikən chɔm gho̰ asaŋ abə bəd Ŋwiye.

²⁷ Ŋwiye ya kə̀b gha bəd məd kyeri gha anug kyen ze ne yaʼi inə̀mbi ya fɔrɔ abə bəd mbe ne kayi mə̀Ju. Anug ze ya gha, Kristo we inga inən, mbə̰ mbe ne kayi mə̀Ju. Ane ya gha, mbə̰ biri bə nyi inga kə̀tə̀d məd.

²⁸ Tì ya chètè inug imbə̀ʼ Kristo abə wə̀d ijìm. Tì ya pàta awɔb gha imbə̀ʼ mbi nɔ̀ʼ sam kə̀tə̀d Ŋwiye. Tì ya bə̀ chwìte inug inɔb ane iwe ni ghì gha, tì we tì tì niŋ bəd məjìm ne yaʼi ane ifɔti tì Kristo ghò imbìghè abə Ŋwiye ne ìwɔb ibḛfiŋ fə taŋ kà.

²⁹ Mə we kìrə ika ghìyə̀ inug ijìm ni fàʼ anug azo̰ ane ika we ne Kristo nàʼi inum.