Ɨnû 16 - Ikan feg

Anatì njə̀m imbə̀ʼ ikaŋ ìsàmbe ne agaŋ Ŋwiye yaʼi inga

¹ Mə ya zug gì ka ka ne ya yaʼi inga mbàn Ŋwiye. Gì ze yaya ghà abə mbè angirə̀ mbe ìsàmbe gha, “Mbə̀ niŋ ikaŋ mbe ìsàmbe ne agaŋ Ŋwiye yaʼi inga ghò Kwèbi igun isəg.”

² Angirə̀ mbègtog ya ghò kwèbi agaŋ Ŋwiye ze ne ya yaʼi inga akaŋ məd igun isəg. Anyumə̀ ne wì ya kwebi ane, ìfìʼì ne ya fangi bə̀ se chè ati ya dù igun bəd mbe ne mbi ya zi aneni nyam kyen ze igun inɔb. À ya bəd mbe ne ya bə ghùmni aghi-ŋwiye àzi nyam kyen ze.

³ Angirə̀ we ne pè ane ibe ya kwebi agaŋ Ŋwiye ze ne ya yaʼi inga akaŋ məd inga igyi tìbà. Anyumə̀ ne wì ya kwebi ane, igyi tìbà we ya bə̀ŋə̀ si kə̀mnə icheg anəm awu wə̀d. Ighi izɔm ijìm mbe ne ya yaʼi inga tìbà ya ku.

⁴ Angirə̀ we ne pè ane itad ya kwebi agaŋ Ŋwiye ze ne ya yaʼi inga akaŋ məd inga tigyi kyen fɔrɔ inga ìdùrì. Məgyi kyen mbe tì ìdùrì mbe ya bə̀ŋə̀ ane anəm.

⁵ Mə ya zug angirə̀ we ne ya beri ika igun mənib wì gha, “Àghò Wə̀d Ìzḛzḛ, àghò we ne yaʼi amad anìŋ, ne ya bi yaʼ, icheg ne àghò we sàʼa bəd we taŋ kòʼ.

⁶ Bəd tibɔ̀ŋ ya tùti anəm ìmbe bəd fɔrɔ àzi ìmbe bədkə̀n. Ane, àghò fə nàʼ anəm inɔb gha mbe no. À ya aghi ne kòʼi ni nàʼ inɔb!”

⁷ Mə ya zug gì ne yaya kyḛ inga ikwijə̀ŋ àfàtì. Zì yaya kyḛ ghà gha, “E, Anɔŋisəg Ŋwiyekɔʼ, icheg ne àghò we sàʼa bəd we taŋ kòʼ bə̀ yaʼ ikuchèg tesiʼ!”

⁸ Angirə̀ we ne pè ane ikwè ya kwebi agaŋ ze ne ya yaʼi inga akaŋ məd igun nyùmə̀. Anyumə̀ ne wì ya kwebi ane, Ŋwiye ya sàŋì gha nyùmə̀ tɔ̰ bəd ane azuʼ ka ka.

⁹ Azuʼ ka ka ze ya tɔ̀n bəd mbe. Ane, mbi ya zɔ̀mbì ikum Ŋwiye we ne beri ika igun ngəʼ ka ka te. Si ya gha, chəyi mbi ya bə̀ŋi ìtɔb fìŋ ni se ghùmnə Ŋwiye.

¹⁰ Angirə̀ we ne pè ane ità̰ ya kwebi agaŋ ze ne ya yaʼi inga akaŋ məd igun atən ifɔn àzi nyam kyen ze. Anyumə̀ ne wì ya kwebi ane, isiŋi ya fin inga asiŋi ze ne nyam kyen ze yaya tùmbə̀. Bəd yaya se kùrə asɔŋ imbə̀ʼ icheg ne mbɔb yaya zə̰ ngəʼ.

¹¹ Ane, mbi ya zɔ̀mbì Ŋwiye we ne yaʼi ikaŋ àbɔ̀ŋɔ imbə̀ʼ icheg ne mbi yaya zə̰ ngəʼ bə̀ fɔrɔ imbə̀ʼ ìfìʼì mbe ne ya yaʼi igun inɔb. Si ya gha, chəyi mbi ya bə kiri bəŋi ìtɔb fìŋ chì ane inug tibɔ̀ŋ mbe ne mbi yaya ghìyə̀.

¹² Angirə̀ we ne pè ane tìfughə ya kwebi agaŋ ze ne ya yaʼi inga akaŋ məd igun igyi kyen we ne mbe kàrà ane Ufrèts. Anyumə̀ ne wì ya kwebi ane, igyi kyen we ya zɔm. Wì ya zɔm ane imbə̀ʼ tangi inɔnjì abə məfɔn mbe aba ze ne nyùmə̀ we dùwə̀.

¹³ Mə ya bàd izwighi tibɔ̀ŋ itad ne yaʼi icheg ìsɔn. Mbi ya dù inga ichug abə tìsɔ̀ʼ jo ze, dù inga ichug abə nyam kyen ze bə̀ dù fɔrɔ inga ichug abə wə̀dkə̀n ne ghà inug ako.

¹⁴ Izwighi mbo̰ ya izwighi tibɔ̀ŋ mbe ne ghìyə̀ inug yeti yeti. Mbi ya dù ghò abɔ̀ʼ məfɔn məjìm igun isəg, imbə̀ʼ feti awɔb ane imɔʼ gha mbe fɔti màʼ ibid igun aneg kyen ze ne Ŋwiyekɔʼ biri saʼ isəg.

¹⁵ Anɔŋisəg Yeso gha, “Mbə̀ nḛ, mə biri yeʼe icheg iji! Ŋwiye ziye àbɔrɔ̀bɔd igun wə̀d ne chughi ikyèʼi bə̀ tàngi ìti ndwi nɔ̀ŋì ni gha imbə̀ʼ wì nɔʼ yèn tì ìkyèrikye si bèrì tìnìrètog inga bəd!”

¹⁶ Izwighi mbe ya feti məfɔn mbe ane asiŋi ze ne mbe kàrà ane ìngam Hibrù gha Àmagedɔ̀n.

¹⁷ Angirə̀ we ne pè ane ìsàmbe ya kwebi agaŋ ze ne ya yaʼi inga akaŋ məd inga ifə. Anyumə̀ ne wì ya kwebi ane, gì ka ka ya dù inga atən ifɔn ze ne yaʼi inga mbàn Ŋwiye. Zì ya gha, “Inug ijìm fə mèg!”

¹⁸ Iteg mbə̀ŋ ya ŋwàŋ, gì si ghàm, mbə̀ŋ kùm, isəg ghùd kwàʼ ane ika kwàʼ ane icheg ne chəyi wi kweʼì ghùd nɔ̀ʼ ane nyumə̀ ne bəd yaʼi igun isəg. Ìseg ya ghùd chè icheg ne zì ya kweʼì bì ghùd.

¹⁹ Asiŋi kyen ze ya sanda iba itad. Iben kyen ijìm inga isəg ya buʼə. Ŋwiye ya kɔndi Babilɔ̀n kyen we, ane si nàʼ toʼ mənoʼ ibo. Mənoʼ mbe ya chwìye gha Ŋwiye ya fə taŋ.

²⁰ Ikəmi isiŋi ìseg ijìm mbe ne igyi che kad ya nim. Tiwum tijìm ya bə̀ nim.

²¹ Awḛ kyen ne akəmi amɔʼ ya nìrè icheg mə̀kirè ìghum ita̰ ya nɔ̀ʼ ikaŋ fèndi igun bəd. Anyumə̀ ne awḛ we ya fendi ane, mbi ya zɔ̀mbì Ŋwiye imbə̀ʼ ngəʼ ze ne awḛ we ya zi igun bəd imbə̀ʼ icheg ne ngəʼ ze ya chè ibo.