Ɨnû 15 - Ikan feg

Anatì njə̀m imbə̀ʼ mbè angirə̀ ìsàmbe tì ngəʼ ka ka ìsàmbe

¹ Mə ya bàd aneni anug kyen ndəŋ ne chè ibo ikaŋ àbɔ̀ŋɔ. Aneni anug azo̰ yaya chwìye mbè angirə̀ ìsàmbe ne ya nyimi ngəʼ ka ka ìsàmbe. Ngəʼ ìto̰ ya yaʼ ngəʼ ka ka ne si nwḭ̀yḛ̀ imbə̀ʼ icheg ne tì mə̀ chè, ze chwi gha agaŋ Ŋwiye fə mèg.

² Mə ya bàd aghi mɔ̀ʼɔ inga igyi tìbà ne yaya ŋwàŋnà icheg manə̀m tì iywid. Bəd mbe ne ya màʼi ibid chè nyam kyen tɔ tɔ ze ya təm iban igyi tìbà we. À ya mbɔb mbe ne chəyi mbi ya ghumni nyam kyen ze kə̀ aghi-ŋwiye məd. Chəyi mbi ya bə niŋ aneni ane ikum məd. Mbɔb ya nyimi mənɔnjì ne Ŋwiye ya nàʼi inɔb.

³ Mbɔb yaya zə̀ʼə̀ ikyeg we ne Muse, wə̀d àfàʼì Ŋwiye ya zə̀ʼi. À ya ikyeg ne Ŋwan njə̀g ya bə zə̀ʼ. Ikyeg we ya gha, “Àghò we fàʼà iyeti inug kyen kyen. Àghò ya Anɔŋisəg, Ŋwiyekɔʼ. Ìmbe mənɔnjì təm kòʼ bə̀ yaʼ mənɔnjì tesiʼ. Àghò ya ifɔn igun bəd məjìm inga iben ijìm.

⁴ O Anɔŋisəg! Àkə we ne chəyi wì biri bɔ awe? Àkə we ne chəyi wì biri ghumni awe? À ya məyi àghò tèzìʼì ne zḛ. Bəd inga iben ijìm biri yeʼe se ghùmnə awe ine imbìghè imbə̀ʼ icheg ne àghò fə ghì wə̀d ijìm bàd ìmbe ìfàʼì ne təm kòʼ.”

⁵ Àzo̰ tì anug ya chè, mə ywìrì nèn ikaŋ àbɔ̀ŋɔ bàd mbàn Ŋwiye ifìʼi. Azuŋ Ŋwiye ze ne mbi ya nɔŋi mə̀nɔ̀ʼɔ̀ Muse inga ya yaʼ inga mbàn Ŋwiye ze.

⁶ Mbè angirə̀ mbe ìsàmbe ya dù inga mbàn Ŋwiye tì ngəʼ ka ka ìsàmbe inɔb ikye ibo. Mbɔb ya zì ndwi linèn ne yaya zḛ njə̀ngi njəngi. Mbi ya bə̀ tim ìkɔ̀bì gol inɔb igun igo.

⁷ Ane, aghi azɔm mɔ̀ʼɔ abɔ̀ʼ ighi izɔm mbe ikwè ya nàʼ ikaŋ gol ìsàmbe abə mbè angirə̀ mbe ìsàmbe. Aghi ne ya sweghi inga ikaŋ mbe ya agaŋ Ŋwiye we ne yaʼi izɔm kwàʼ ane ighə̀m imɔʼ.

⁸ Ndiʼ ya sweg inga mbàn Ŋwiye. Ndiʼ ze yaya dùwə̀ ane ìzḛzḛ Ŋwiye bə fɔrɔ ane ika Ŋwiye. Ane, chəyi wə̀d ya yaʼi ne tì wì nyi inga mbàn Ŋwiye ze anene ngəʼ ka ka te ìsàmbe tijìm ne mbè angirə̀ ìsàmbe mbe ya kwebi ti mèg.