Gàlesìyà 5 - Ikan feg

Yeso Kristo fə chì awa ane anug àbòʼì abə mə̀nɔ̀ʼɔ̀

¹ Mbə̀ kyeri gha, Yeso Kristo fə chì awa ane anug àbòʼì. Imbə̀ʼ tì si ywìrì chùghə awa icheg məfeg. Ane, mbə̀ təm kà. Imbə̀ʼ mbə̰ bḛ awən gha wə̀d mɔ̀ʼɔ ghiyə mbə̀ ywirì yaʼ ìbòʼì abə mə̀nɔ̀ʼɔ̀ Muse.

² Mbə̀ zug! À ya mo Pɔl we ghà inən gha, mbə̰ mə̀ ya kɔndɔ gha anug ni ŋwed wə̀d biri ghì mbə təm kòʼ, nji mbə̀ kyeri gha anug ze ne Kristo fə fàʼi inən fə chè ako.

³ Mə ya anìŋ ywìrè ghà kɔ̀mbɔ̀ abə wə̀d ne bḛ gha mbe ŋwed aməd gha, tengàŋ mənyìʼ nɔ̀ŋì mə̀nɔ̀ʼɔ̀ Muse kwàʼ məjìm.

⁴ Wə̀d ne kə̀bə̀ gha mə̀nɔ̀ʼɔ̀ ghiyə wì təm kòʼ imbìghè abə Ŋwiye, tengàŋ kyeri gha chəyi ywìrè məd ane anug amɔʼ tì Kristo. Tengàŋ kyeri gha wì fə bə̀ to̰ yi ìchɔ̀mì we ne Ŋwiye ghi ina.

⁵ Mba mbe ne zi ibḛfiŋ igun Kristo, tì we ghɔ̀mɔ̀ ane fìŋ ijìm gha Ŋwiye ghiyə tì təm kòʼ. À ya Azwighi Ŋwiye ze ghìyə̀ gha tì nɔŋi fìŋ igun Ŋwiye.

⁶ Ane, icheg ne tì yaʼi ane ifɔti tì Yeso Kristo, kə̀ mbe ŋwed wə̀d kə̀ chəyi, chəyi àze ywirì bèrì anug mɔ̀ʼɔ ni ghì ka. Anug kyen ne angu ya ibḛfiŋ we ne tì nɔŋi igun Kristo. À ya ibḛfiŋ we ghìyə̀ tì se kɔ̀ŋɔ̀ ìmba məfi fɔrɔ ìta njabi.

⁷ Mbə̰ yaya ghìyə̀ inug kwàʼ icheg chɔm. Wə̀d ne si bùrì ìmbən itog ghì gha mbə̀ waʼ ikuchèg tesiʼ gho̰ àkə we?

⁸ Ŋwiye we ne ya kàri awən, chəyi tì wì ghi gha mbə̰ waʼ ikuchèg tesiʼ gho̰.

⁹ Bəd kyen ya tùmə ìngam gha, “À ya məyi iki àfòrì ze ghìyə̀ aburi ngə̀ŋ kɔʼɔ̀ ajìm.”

¹⁰ Mə kyèri kwàʼ icheg chɔm gha, icheg ne tì yaʼi ane ifɔti tì Anɔŋisəg, chəyi mbə̀ biri niŋ ikɔndi ndəŋ chèyi ane we ne mə̀ ya nàʼi inən. Ŋwiye biri chə wə̀d we ne zìyè àbùrì inga ìmbən itog. Kə̀ tengàŋ kə we njiʼ.

¹¹ Ìmbum məfi fɔrɔ ìtum njàbi, mə mə̀ ya kiri gha gha mbe ŋwed bəd, nji aton ne mbe kiri chɔʼɔ̀ ìmbum ibɔʼì ighog àkə gha? Mə mə̀ ya ghà ane, nji chəyi anug ze ne mə ghà imbə̀ʼ icheg ne Kristo ya ku igun azed abaʼri ze ywìrì bèrì aton.

¹² Anug ne mə̀ kəbi imbə̀ʼ bəd mbe ne sa̰ iwu ane anug ni ŋwed bəd ya gha, mbe che imbìghè zaʼ ìwɔb nyɔd kwàʼ mbɔb mbɔb.

¹³ Àsi awən, ìmbum məfi fɔrɔ ìtum njàbi, Ŋwiye ya kàrì awən chì ane anug ìbòʼì abə mə̀nɔ̀ʼɔ̀ Muse. Si ya gha, imbə̀ʼ mbə̰ si niŋə awən icheg ne chəyi mbə̀ ywiri yaʼ ìbòʼì abə mə̀nɔ̀ʼɔ̀ Muse se ghìyə̀ inug tibɔ̀ŋ mbe ne ìtən nyàmnyɔd te ghə̀ʼrə̀. Mbə̰ ya se fàʼà yaʼ abə mə̀mbin ane àkɔ̀ŋì,

¹⁴ imbə̀ʼ icheg ne mə̀nɔ̀ʼɔ̀ məjìm fə fɔtɔ ane anug amɔʼ: Anug ze ya gha, “Àghò kɔŋɔ wə̀d ne yaʼi iban ine icheg ne àghò kɔ̀ŋi ìwe nyɔd.”

¹⁵ Mbə̰ mə̀ ya ghìyə̀ inug yaʼ icheg nyam tɔ tɔ ne nɔ̀mbɔ ìtin zwète, nji mbə biri nimni awən mbə̰ mbə̰.

Ikuchèg ne Azwighi Ŋwiye ze kə̀bə̀ tì ikuchèg ne nyàmnyɔd ze kə̀bə̀

¹⁶ Anug ne mə ghà inən ya gha, mbə̀ chughi icheg ne Azwighi Ŋwiye ze kə̀bə̀. Mbə̰ mə̀ chùghi ane, nji chəyi mbə̀ biri ya ghìyə̀ inug tibɔ̀ŋ mbe ne ìtən nyàmnyɔd te kə̀bə̀.

¹⁷ Aton ya gha, nyàmnyɔd ya kə̀bə̀ yaʼ inug mbe ne chəyi Azwighi Ŋwiye ze kə̀bə̀. Azwighi Ŋwiye ya bə̀ kə̀bə̀ yaʼ inug mbe ne chəyi nyàmnyɔd ze kə̀bə̀. Chəyi tì mbɔb mbo̰ məbe yaʼ ane anug amɔʼ. Ane, chəyi tì mbə̰ ghì inug ne mbə̰ mbe kə̀bə̀.

¹⁸ Si ya gha, mbə̰ mə̀ ya chùghə icheg ne Azwighi Ŋwiye ze kə̀bə̀, ane ya gha, chəyi mə̀nɔ̀ʼɔ̀ Muse ywirì bèrì ika igun inən.

¹⁹ Wə̀d ijìm kyèri yi inug mbe ne nyàmnyɔd ze ghə̀ʼrə̀. Inug mbe ya: anug ni nɔ̀kì mə̀yi kə̀ nɔ̀kì mbaŋà abu abu, anug ni ghì izṵ inug, anug ni səpi bəd zì inga àfànì,

²⁰ anug ni ghumni mə̀ŋwiye, anug izəg, ìpàb, anug ni kaʼ àzɔ̀ŋì inga bəd, àdeg, agaŋ ka ka, isi, anug ni zi àghàpì inga bəd ghì bəd se chùghə akoʼi akoʼi,

²¹ anug ni ghə̀ʼrì ighi, anug ni no be, anug ni ya no be bə̀ se ghìyə̀ izṵ inug, fɔrɔ tiku inug ndəŋ ndəŋ ne yaʼi icheg ìto̰. Mə ya anìŋ ywìrè pàta awən icheg ne mə̀ ya fə pati gha, chəyi bəd mbe ne ghìyə̀ tiku inug ìto̰, biri nɔ̀ʼ jəg anug ìfɔ̀n Ŋwiye.

²² Àsi inug mbe ne Azwighi Ŋwiye ze kə̀bə̀ ya: àkɔ̀ŋì, igyendi, àbɔrɔ̀bɔd, inyimbifiŋ, anug ni ghì inug chɔm, anug ni bèrì fìŋ chɔm, anug ni bḛ anug fàʼ,

²³ anug ni ya bɔ̀tɔ, anug ni ya nyìmbe nyɔd. Wə̀d ne ghìyə̀ tiku inug to̰, chəyi nɔ̀ʼɔ̀ mɔ̀ʼɔ angu ne to̰ inug mbo̰.

²⁴ Bəd mbe ne yaʼi bəd Yeso Kristo, mbɔb ya chùghə icheg bəd ne ìtɔb nyàmnyɔd fə ku ane inug tibɔ̀ŋ mbe ne nyàmnyɔd wə̀d ze ghə̀ʼrə̀.

²⁵ Icheg ne à ya Azwighi Ŋwiye ze nàʼà ika ina, tì ya ghìyə̀ inug mbe ne Azwighi Ŋwiye ze kə̀bə̀.

²⁶ Ane, imbə̀ʼ tì ya nɔ̀ awa nyɔd. Imbə̀ʼ tì ya ghìyə̀ awa gha bəd gaŋ. Imbə̀ʼ tì ya bə̀ ghə̀ʼrə̀ awa ighi bəd.