Gàlesìyà 2 - Ikan feg

Bədtɔm mbin bḛ gha Pɔl ya bə̀ wə̀dtɔm Kristo

¹ Ane tituʼ ìghum chɔ̀b ikwè ya fə che, mə̀ ya bə̀ ywìrì kɔʼ ghò a Jèrusalèm. Mə ya ghò tì Bànabàs ane gho̰ tì ighəm. Mə ya bə̀ niŋ Tayitùs tì fɔrɔ ghò inɔn.

² Mə ya ghò imbə̀ʼ icheg ne, à ya Ŋwiye ya ghàmi inum gha mə gho angu. Mə ya pè angu, tòʼrì ikən chɔm we ne mə̀ yaya chètè abə bəd mbe ne kayi mə̀Ju. Mə ya tòʼrì məyi abə itog bəd inga ifeti bəd Kristo we a Jèrusalèm. Mə ya ghì ane ni gha itog bəd Kristo mbe bara gha, àfàʼì ze ne mə̀ fə fàʼi tì àfàʼì ze ne mə fàʼà, chəyi ze biri chè ako.

³ Ka bèyi Tayitùs ne ya wə̀d a Gris ne ya yaʼi abɔ̀ʼ inum, chəyi mbi ya bi gha mbi mənyìʼ ŋwed aməd.

⁴ Anug ni ŋwed bəd ya ko imbə̀ʼ icheg ne məfi mɔ̀ʼɔ ne yaʼi bəd inug ako ya nyaʼ nyi abɔ̀ʼ ina. Mbi yaya kə̀bə̀ ni kyeri icheg ne ìwa ifɔti tì Yeso Kristo chi awa ane mə̀nɔ̀ʼɔ̀ Muse. Mbi yaya kə̀bə̀ ni kyeri ane si ywìrì chè ane mə̀nɔ̀ʼɔ̀ mbe ghì tì yaʼ icheg ìbòʼì ne fàʼà aton mə̀nɔ̀ʼɔ̀ Muse.

⁵ Chəyi tì ya bḛ anug ze ne mbɔb yaya ghà ka bèyi iki piʼì, ni ghì gha mbə̀ che imbìghè ni nyimi ikən chɔm tesiʼ we ne tì ya gha inən.

⁶ Chəyi bəd mbo̰ ne bəd mbe nìŋə ane bəd kyen ya yèti aghi mɔ̀ʼɔ ane ikən chɔm we ne mo we ghà. (Kə̀ bəd mbo̰ kə̀ tiku bəd kyen ne yaʼi iye njiʼ, àze ya kayi anug mɔ̀ʼɔ inum. Anug ne mə̀ kyeri ya gha, chəyi Ŋwiye we nḛ̀ bəd yaʼ igun ife.)

⁷ Mbɔb ya bàd yaʼ gha, Ŋwiye ya zì anug ni chètì ikən chɔm inum ikye abo, chà amə abə bəd ne kayi mə̀Ju, bə̀ kwàʼ icheg ne wì ya zi anug ni chètì ikən chɔm ikye abo abə Pità, chà aməd abə mə̀Ju.

⁸ Aton ya gha, Ŋwiye we ne ya nàʼi ika abə Pità chà aməd gha wì yaʼ wə̀dtɔm abə mə̀Ju, à ya məd bə nàʼ ika inum bə̀ chà amə gha mə yaʼ wə̀dtɔm abə bəd mbe ne kayi mə̀Ju.

⁹ Ane, anyumə̀ ne Jem tì Pità fɔrɔ Jɔn ne yaʼi bəd kyen kyen ne nyìme ifeti bəd Kristo ya bàri ìchɔ̀mì ne Ŋwiye ghi inum, mbi ya te abo ina, mo tì Bànabàs, ni chwi gha tì we ane anug amɔʼ tì inɔb. Mbɔb ya bḛ gha tì gho abə bəd mbe ne kayi mə̀Ju, mbɔb si ghò abə mə̀Ju.

¹⁰ Anug ne mbɔb ya gha ina məyi gha, tì ya kɔ̀ndɔ anug ni wètì bəd ifum. Aŋa ya anug ne mə̀ yaya bè kə̀bə̀ ni fàʼ ane ìmə fìŋ ijìm.

Pɔl ghàm kyen abə Pità a Antìyɔ̀g

¹¹ Anyumə̀ ne Pità ya yeʼe a Antìyɔ̀g, mə̀ ya ghàm ibo, kyen məd kwàʼ imbìghè abə bəd məjìm. Mə ya ghàm kyen məd ane imbə̀ʼ icheg ne məd ya ghì anug ne chəyi ze koʼi.

¹² Anug ze ya gha, bɔŋ bəd mɔ̀ʼɔ ne Jem ya tɔmi awɔb ya se yèʼe, Pità yaya jə̀ghə tì bəd ne kayi mə̀Ju. Àsi anyumə̀ ne mbi yeʼe, wì ko se sùngə̀ yi anjìm bə̀ se chìyè ìwi nyɔd ane bəd mbe ne kayi mə̀Ju. Wì yaya ghìyə̀ ane imbə̀ʼ icheg ne wì yaya bɔ bəd mbe ne yaya gha mbe ŋwed bəd məjìm mbe ne zi ibḛfiŋ igun Kristo icheg ne ikuchèg aben mə̀Ju yaʼi.

¹³ Anyumə̀ ne Pità ya fùbri inug ane, mə̀Ju ndəŋ ne ya zi ibḛfiŋ igun Kristo ya bə̀ bène abɔ̀ʼ məd se fùbrə̀ inug. Ka bèyi Bànabàs, wì ya bə̀ bène abɔ̀ʼ inɔb fùbrì inug, ane fèbè.

¹⁴ Anyumə̀ ne mə̀ ya bàri gha chəyi mbɔb mbe bène abɔ̀ʼ tesiʼ we ne yaʼi inga ikən chɔm, mə̀ ya ghàm kyen abə Pità kwàʼ imbìghè abə bəd məjìm. Mə ya kyen ibo gha, “Àghò ya Ju, si ya gha, chəyi àghò we ghìyə̀ inug icheg Ju. Àghò ya ghìyə̀ inug yaʼ icheg wə̀d ne kayi Ju. Àghò kə se ghìyə̀ gha bəd mbe ne kayi mə̀Ju mənyìʼ ghì inug ane ikuchèg aben mə̀Ju iye?”

Mə̀Ju fɔrɔ bəd ne kayi mə̀Ju ya pùmə anjìm icheg ne mbi zi ibḛfiŋ igun Kristo

¹⁵ Mo Pɔl, mə̀ ya chè imbìghè ghà abə Pità gha, “Chəyi tì ya kwàʼ bɔn tɔb-ìseg mə̀Ju. Mba kayi ‹Bəd ne kayi mə̀Ju ne chəyi mbi kyeri mə̀nɔ̀ʼɔ̀ Ŋwiye.›

¹⁶ Tè kyèri àza aghi kwàʼ tesiʼ gha, chəyi tì wə̀d təm kòʼ imbìghè abə Ŋwiye anjìm icheg ne wì nɔŋi mə̀nɔ̀ʼɔ̀ Muse. Wə̀d ne təmi kòʼ imbìghè abə Ŋwiye ya wə̀d ne nɔŋi ìwi ibḛfiŋ igun Yeso Kristo. Ane, mba mə̀Ju fə bə̀ nɔ̀ŋì ibḛfiŋ igun Yeso Kristo ni ghì gha tè təm kòʼ. Tè təm kòʼ anjìm ìwa ibḛfiŋ igun Kristo, kayi anjìm icheg ne tì nɔŋi anug ne mə̀nɔ̀ʼɔ̀ Muse mbe kə̀bə̀. Chəyi tì wə̀d təm kòʼ anjìm icheg ne wì nɔŋi mə̀nɔ̀ʼɔ̀ Muse.

¹⁷ Tì mə̀ ya kə̀bə̀ ni təm kòʼ icheg ne tì yaʼi ane ifɔti tì Kristo, ze bə̀ ywìrì chwi gha tì we ywìrè ghìyə̀ inug tibɔ̀ŋ, Kristo we wa ghìyə̀ gha bəd se ghìyə̀ inug tibɔ̀ŋ? Indèʼ ka!

¹⁸ Mo mə̀ ya ywìrè chètè gha bəd nyimi mə̀nɔ̀ʼɔ̀ Muse ne mə̀ ya fə sàŋi, nji mo ya wə̀d ne gùghə̀ mə̀nɔ̀ʼɔ̀.

¹⁹ Anug mə̀ yaʼ àze ne zi mə̀nɔ̀ʼɔ̀ Muse, mo ya icheg awu wə̀d, awu wə̀d ne à ya mə̀nɔ̀ʼɔ̀ Muse zweti. Ane ya ni ghì gha mə̀ si yaʼ izɔm se fàʼà abə Ŋwiye.

²⁰ Mo ya wə̀d ne fə ku igun azed abaʼri tì Kristo. Ane, kayi mo yaʼi izɔm. Wə̀d we ne yaʼi izɔm ya Kristo we ne yaʼi inga inum. Ìtḛ̀ we ne mə beri amad anìŋ ya imbə̀ʼ ibḛfiŋ we ne mə̀ zi igun Ŋwan Ŋwiye we ne ya kɔ̀ŋi amə, nàʼ àzi atog ane aghi àfàtì imbə̀ʼ amə.

²¹ Chəyi tì mə wèg ìchɔ̀mì we ne Ŋwiye ghi inum. Wə̀d mə̀ bèrì ni təm kòʼ imbìghè abə Ŋwiye anjìm icheg ne wì nɔŋi mə̀nɔ̀ʼɔ̀ Muse, ane ya gha, iwu Kristo ya ati ako.”