Fìlipì 3 - Ikan feg

Icheg ne tì ibḛfiŋ ghì bəd təm kòʼ

¹ Ìmbum məfi fɔrɔ ìtum njàbi, bɔŋ mə̀ se nwḭ̀yḛ̀, mə biri ghà inən gha, mbə̀ ya gyènde icheg ne mbə̀ yaʼi ane ifɔti tì Anɔŋisəg. Chəyi ze yaʼi anug mɔ̀ʼɔ inum ni ywìrì ŋwàʼrì inug mbe ne mə̀ ya bi ŋwàʼrì inən. Mə ya ghìyə̀ anìŋ ni ghì gha imbə̀ʼ mbə̰ nɔ̀ʼ nyi inga ngəʼ.

² Mbə̀ we awən imbə̀ʼ bəd mbe ne ghìyə̀ inug tibɔ̀ŋ kwàʼ icheg bog. À ya mbɔb mbe ghà gha, mbi ya mənyìʼ ŋwed wə̀d bɔŋ Ŋwiye se pùmnə aməd.

³ Mba ya bəd mbe ne Ŋwiye fə ŋweri awa kwàʼ icheg tesiʼ ghì tì si bəd məd. À ya Azwighi Ŋwiye ze wètè awa gha tì ghumnə Ŋwiye. Tì we kɔ̀mɔ̀ igo icheg ne tì yaʼi ane ifɔti tì Yeso Kristo ne chəyi tì nɔŋi fìŋ igun ikuchèg aben we ne bəd-aku mbe chwìte.

⁴ Mo ya wə̀d ne tì mə nɔŋi fìŋ igun inug mbe. Tesiʼ ya gha, wə̀d mɔ̀ʼɔ mə̀ kə̀ kɔ̀ndi gha zìye bèrì aton mɔ̀ʼɔ ni nɔŋi fìŋ igun ikuchèg aben we, nji mə bèrì aton chè tengàŋ.

⁵ Mə bèrì aton chè aməd imbə̀ʼ icheg ne mbi ya ŋwed amə igun aneg ne pè ane ìfàmi. Mo ya wə̀d a Izre inga inəbi Benjàmen. Ane, mo ya kwàʼ wə̀d Hibrù. Kə̀ àkə ane anug ni nɔ̀ŋì mə̀nɔ̀ʼɔ̀, mo ya Farìsi.

⁶ Kə̀ àkə ane anug ni zì atog ane anug, mo yaya zìyè atog ni chɔʼ ibɔʼì ighog abə bəd Kristo. Kə̀ àkə ane anug ni təm kòʼ anjìm mə̀nɔ̀ʼɔ̀ Muse, mo ya wə̀d ne nɔ̀ŋɔ̀ mə̀nɔ̀ʼɔ̀ məjìm ne chəyi tì wə̀d zì isaʼi igun inum.

⁷ Ka mə̀ ya bèrì chùd ane inug mbo̰ anyumə̀ we, amad anìŋ ne Kristo fə ghi ìchɔ̀mì inum, chəyi inug mbo̰ ywìrì bèrì aton mɔ̀ʼɔ inum.

⁸ Kayi məyi inug mbo̰. Icheg ne Kristo fə ghi ìchɔ̀mì inum, chəyi ighi ijìm ywìrì bèrì aton inum. Anug kyen ne yaʼi inga inug mbo̰ ijìm ya icheg we ne Ŋwiye ghì ìchɔ̀mì kyen inum mə kyeri Yeso Kristo, àmə Anɔŋisəg. À ya imbə̀ʼ Kristo ne mə waʼi ighi ijìm. Mə fə niŋ gha ighi mbe ijìm ya inyɔrì ighi imbə̀ʼ yaʼ amə ane ifɔti tì Kristo.

⁹ Mə ya bə̀ ane anug amɔʼ tì məd. Chəyi mə̀ təmi kòʼ imbìghè abə Ŋwiye anjìm icheg ne mə ghi inug mbe ne mə̀nɔ̀ʼɔ̀ Muse gha. À ya Ŋwiye ghi mə təm kòʼ anjìm icheg ne mə zi ìmə ibḛfiŋ igun Kristo. Mə təm kòʼ imbìghè abə Ŋwiye yaʼ anjìm ibḛfiŋ igun Kristo.

¹⁰ Anug ne mə̀ kə̀bi ya ni kyeri Kristo bə̀ taŋ kyèri ika we ne Ŋwiye ya zwemni aməd ane iwu. Mə kə̀b ni bə zə̰ ngəʼ icheg ne məd ya bə zə̰ ngəʼ. Mə bə̀ kə̀b ni ku kwàʼ icheg ne məd ya bə ku.

¹¹ Mə ya ghìyə̀ ane nè nɔ̀ŋɔ̀ ikɔndi gha, tì mə bə̀ kòʼ ni zweme ane iwu icheg ne məd ya zweme ane iwu.

Anug ni nɔ̀ŋì fìŋ igun ineʼi we ne yaʼi imbìghè

¹² Kayi mə gha, mə fə bèrì ighi mbo̰ ijìm, kə̀ gha mə fə bɔ̀ŋ mànì. Tesiʼ ya gha, mə we kìrə ika ni chè imbìghè imbə̀ʼ bèrì ighi ijìm mbe ne Yeso Kristo ya ghi gha mə yaʼ wə̀d məd imbə̀ʼ bèrì.

¹³ Ìmbum məfi fɔrɔ ìtum njàbi, chəyi mə̀ kiri niŋi àmə nyɔd icheg wə̀d ne fə beri ighi mbo̰. Aghi afibì ne mə ghìyə̀ ya ni nèbì inug mbe ne fə che, se nɔ̀ŋɔ̀ ìmə fìŋ yaʼ igun inug mbe ne kiri yeʼe.

¹⁴ Mə we kìrə ika ni chè imbìghè ni zən gha mə beri ineʼi we ne yaʼi imbìghè ne Ŋwiye ya kàʼi inum gha mə biri bèrì ikaŋ àbɔ̀ŋɔ icheg ne mə̀ yaʼi ane ifɔti tì Yeso Kristo.

¹⁵ Mba bəd Kristo məjìm mbe ne fə təmi kà, tì beri ikɔndi imɔʼ imbə̀ʼ inug mbo̰. Wə̀d mɔ̀ʼɔ mə̀ bèrì yaʼ ikɔndi ndəŋ, Ŋwiye biri ghì atog məd zen.

¹⁶ Anug kyen ne tì koʼi ni ghì ya ni nyimi yaʼ inug mbe ne tì fə nani.

¹⁷ Ìmbum məfi fɔrɔ ìtum njàbi, mbə̀ niŋ ìmə ikuchèg kwàʼ mbə̰ məjìm. Mbə̀ ya nàna inug abə bəd mbe ne ghìyə̀ inug mbe ne tì ya chwiti inən.

¹⁸ Icheg ne mə̀ yaya ghà inən, mə̀ ya anìŋ ywìrè ghà tì məsi inum inga aghə gha, bəd nɔʼ nɔʼ abɔ̀ʼ inən mbe ghìyə̀ inug icheg bəd ìpàb Kristo. Àze chwi gha chəyi mbɔb kə̀bi ni niŋ aton ze ne wì ya ku igun azed abaʼri ane anug.

¹⁹ Asiŋi ne tiku bəd te biri nwḭ̀yḛ̀ inga ya iywid ighə̀m imɔʼ. Ìwɔb ŋwiye ya ighi mbe ne mbɔb mbe ghə̀ʼrə̀. Mbɔb ya kɔ̀mɔ̀ igo ane inug mbe ne nji mbɔb kə̀ bèrì yaʼ tìnìrètog. Mbɔb nɔ̀ŋì ìwɔb ikɔndi igun ighi igun isəg.

²⁰ Àsi awa, mba ya bəd ikaŋ àbɔ̀ŋɔ. Ane, tì ya nɔ̀ŋɔ̀ fìŋ yaʼ ni ghɔ̀m Anɔŋisəg Yeso Kristo gha wì yeʼe tikaŋ àbɔ̀ŋɔ. Məd ya wə̀d ne pùmnə awa.

²¹ Anyumə̀ ne wì biri yeʼe, wì biri niŋ ìta nyàmnyɔd ìto̰ ne tì tì ku bə̀ŋì ti si yaʼ icheg nyàmnyɔd ze ne məd ya beri anyumə̀ ne Ŋwiye ya zwemni aməd ane iwu. Wì biri ghì ane anjìm ika we ne wì beri ni tùmbì ighi ijìm.