Fìlipì 1 - Ikan feg

Pɔl tì Timotì chàʼrì bəd Kristo mbe a Fìlipì

¹ À ya mo Pɔl tì Timotì, bəd àfàʼì Yeso Kristo ŋwàʼri àŋwàʼrì azo̰. Tì ŋwàʼrì anìŋ inən mbə̰ bəd Ŋwiye məjìm mbe a Filipì ne yaʼi ane ifɔti tì Yeso Kristo. Tì bə̀ ŋwàʼrì anìŋ inən mbə̰ mbe ne yaʼi itog bəd igun ifeti bəd Kristo fɔrɔ inən mbə̰ mbe ne fàʼà abə bəd Ŋwiye.

² Ŋwiye ne yaʼi ìwa Mbaʼ fɔrɔ Anɔŋisəg Yeso Kristo ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Pɔl ya chàʼrà Ŋwiye bə̀ nàʼà məyakà ibo mà nyumə̀ ijìm

³ Mà nyumə̀ ijìm ne mə kɔ̀ndɔ awən, mə ya nàʼà məyakà abə ìmə Ŋwiye.

⁴ Mà nyumə̀ ijìm ne mə chàʼrà Ŋwiye inən mbə̰ məjìm, mə ya chàʼrà tì igyendi inum inga fìŋ.

⁵ Mə ya gyènde imbə̀ʼ icheg ne mbə̀ fɔti abo abɔ̀ʼ inum ni chètì ikən chɔm imbə̀ʼ Yeso Kristo nɔ̀ʼ ane aneg mbègtog ne mbə̀ ya bḛ Kristo pè tèchɔ̀ŋ.

⁶ Mə kyèri kwàʼ tesiʼ gha, Ŋwiye we ne ya ko àfàʼì chɔm azo̰ ni fàʼ inga ìwən ìtḛ̀, wì biri chè imbìghè ni fàʼ ajìm ghò pè ane aneg ze ne Yeso Kristo biri ywiri yeʼe.

⁷ Ze kòʼ inum ni ya kɔ̀ndɔ inug mbo̰ anìŋ imbə̀ʼ awən mbə̰ məjìm imbə̀ʼ icheg ne mə̀ kɔ̀ŋ awən ane ìmə fìŋ ijìm. Ŋwiye we ghìyə̀ ìchɔ̀mì ina mba məjìm icheg ne te fàʼà ibo. Məd we bə̀ ghìyə̀ ìchɔ̀mì inum ka ya anyumə̀ ne mə̀ yaʼi inga nəb ndəŋ, kə̀ anyumə̀ ne mə chètè ikən chɔm, tòʼrò inug tesiʼ mbe ne yaʼi inga bə̀ ghìyə̀ bəd bḛ.

⁸ Ŋwiye kyèri gha mə kɔ̀ŋ awən bə̀ kyèri icheg ne mə̀ kə̀bə̀ ni bàd awən mbə̰ məjìm. Ŋwiye bə̀ kyèri gha, mə kɔ̀ŋ awən kwàʼ icheg ne Yeso Kristo kɔ̀ŋ awən.

⁹ Mə ya chàʼrà Ŋwiye inən gha, mbə̀ che imbìghè ni kɔ̀ŋ ìmbən məfi fɔrɔ ìtən njàbi, bə̀ chè imbìghè ni kyeri tesiʼ imbə̀ʼ Ŋwiye. Mə ya bə̀ chàʼrà Ŋwiye inən gha, mbə̀ kyeri inug ne yaʼi inug chɔm bə̀ kyèri inug ne yaʼi inug tibɔ̀ŋ.

¹⁰ Mbə̀ ghiyə ane imbə̀ʼ kyeri icheg ni də̀b anug ne taŋ bɔ̀ŋ. Ane, mbə biri chughi inga ìzḛzḛ anene ghò pè ane aneg ze ne Yeso Kristo biri ywiri yeʼe, ne chəyi tì wì bàd anug tibɔ̀ŋ mɔ̀ʼɔ inga ìwən ìtḛ̀.

¹¹ Mə we bə̀ chàʼrà Ŋwiye inən gha Yeso Kristo ghiyə mbə̀ beri ikuchèg we ne təmi kòʼ ni ghì gha bəd taŋ ghùmnə Ŋwiye.

Pɔl nyi ndəŋ, ikən chɔm kiri gho gho imbìghè

¹² Ìmbum məfi fɔrɔ ìtum njàbi, mə kə̀b gha mbə̀ kyeri gha, anug ne du igun inum ze wèti ni ghì gha ikən chɔm imbə̀ʼ Kristo gho gho imbìghè.

¹³ Anug ze fə ghì gha mə̀sogyì məjìm mbe ne kyèʼè ìtɔʼ, fɔrɔ bəd ndəŋ məjìm ne yaʼi inga ìtɔʼ, mbe kyeri gha mə ya anìŋ inga nəb ndəŋ imbə̀ʼ Kristo.

¹⁴ Anug azo̰ ne mbi zi amə inga nəb ndəŋ fə ghì gha atog ndàn bəd mbe ne bḛ Anɔŋisəg, mbe taŋ bèrì fìŋ ni ghàm Ìngam Ŋwiye gho gho imbìghè ne chəyi mbe bɔ wə̀d mɔ̀ʼɔ ka.

¹⁵ À ya tesiʼ gha, bəd mɔ̀ʼɔ mbe ghàmà ikən chɔm imbə̀ʼ Kristo anjìm àdeg fɔrɔ anjìm icheg ne mbe zɔ̀ŋɔ̀ ati. Si ya gha, bəd mɔ̀ʼɔ mbe ghàmà ikən chɔm we ane fìŋ chɔm.

¹⁶ Bəd mbe ne ghàmà ane fìŋ chɔm ya bəd ne kɔŋi amə imbə̀ʼ icheg ne mbɔb kyèri gha mbe zì amə inga nəb ndəŋ anjìm icheg ne mə ghàmà ane fìŋ ijìm gha ikən chɔm imbə̀ʼ Kristo ya tesiʼ.

¹⁷ Chəyi bəd mbe ne ghìyə̀ àdeg mbe ghàmà ikən chɔm imbə̀ʼ Kristo ane fìŋ ne zḛ. Mbɔb ya kə̀bə̀ məyi icheg ni ghì gha bəd bene abɔ̀ʼ inɔb. Mbɔb ya ghìyə̀ ane nè kɔ̀ndɔ gha, inug mbe ne mbɔb mbe ghìyə̀ biri yètì ngəʼ igun inum inga nəb ndəŋ.

¹⁸ Si ya gha, àze ya kayi anug mɔ̀ʼɔ inum. Anug kyen ne angu ya gha, kə̀ àkə ane fìŋ chɔm kə̀ ane fìŋ tibɔ̀ŋ, anug ne mbe fàʼà ya ni chètì ikən chɔm imbə̀ʼ Kristo. À ya aton ze ne mə gyènde. Ane, mə biri chè imbìghè ni ya taŋ gyènde.

¹⁹ Mə biri ya gyènde imbə̀ʼ icheg ne mə̀ kyèri gha, inga inug mbo̰ ijìm, mə biri dù inga ngəʼ. Mə kyèri ane imbə̀ʼ icheg ne mbə̰ mbe chàʼrà Ŋwiye inum, Azwighi Yeso Kristo ze bə̀ wètè amə.

²⁰ Anug ne mə taŋ kə̀bə̀, ne mə bə̀ taŋ nɔ̀ŋɔ̀ ikɔndi igun ya gha, imbə̀ʼ ze nɔ̀ʼ chwi gha mə beri tìnìrètog. Mə kə̀b ni bèrì fìŋ ka ka ni gha, inga ìmbum inug ijìm, kə̀ àkə iwu kə̀ ìtḛ̀, mə biri ya ghùmnə Kristo mà nyumə̀ ijìm fɔrɔ amad anìŋ ne mə̀ yaʼi inga nəb ndəŋ .

²¹ Mə ya ghàmà anìŋ imbə̀ʼ icheg ne, inum, ni yaʼ izɔm ya ni ghumni Kristo. Àsi ni ku ya anug ne bɔŋi chè icheg ni yaʼ igun isəg.

²² Si ya gha, mə mə̀ chè imbìghè ni yaʼ izɔm, mə we tì mə fàʼ àfàʼì ne biri wètì bəd nɔʼ nɔʼ, mbi bḛ Kristo. Kə̀ àkə iwu kə̀ àkə ìtḛ̀ bɔŋi inum amad anìŋ jiʼ, chəyi mə̀ kiri kyeri àze ni də̀b.

²³ Inug mbo̰ ibe yaʼ inum inga fìŋ. Mə kɔ̀ŋ ni ku amə, ghò abɔ̀ʼ Kristo ne yaʼi anug ne bɔŋi chè.

²⁴ Anug ne mə̀ kyeri ya gha, ze bɔ̀ŋ gha mə chughi izɔm imbə̀ʼ wètì awən.

²⁵ Mə kyèri kwàʼ tesiʼ gha, ze bɔ̀ŋ inum ni chughi izɔm imbə̀ʼ chè imbìghè ni wètì awən mbə̰ məjìm ni ghì gha ìwən ibḛfiŋ chè imbìghè ni kweg, mbə̀ bə chè imbìghè ni ya gyènde icheg ne mbə̀ bḛ Kristo.

²⁶ Ane, mə mə̀ ywìrì yèʼe chughi tì inən, igyendi icheg ne mbə̀ yaʼi ane ifɔti tì Yeso Kristo biri taŋ sweg inga ìtən fìŋ se gwètè imbə̀ʼ àfàʼì ze ne mə fàʼà.

²⁷ Anug kyen ne angu ya gha, mbə̀ bere ikuchèg we ne ikən chɔm imbə̀ʼ Kristo we chwìte. Ane, kə̀ mə yèʼe bàd awən kə̀ chəyi, mə biri zug gha mbə̰ təm kà ane ibḛfiŋ imɔʼ. Mə biri bə zug gha mbə̰ mbe se ane anug amɔʼ bə̀ bèrì ikɔndi imɔʼ. Mə biri bə zug gha mbə̰ mbe se kìrə ika ni ghì gha bəd nɔŋɔ fìŋ igun Kristo icheg ne ikən chɔm we chwìte.

²⁸ Imbə̀ʼ mbə̰ bɔ awən bəd ìpàb mbe ne zɔ̀ŋɔ̀ ni chìkì ìwən ibḛfiŋ. Mbə̰ mə̀ chəyi mbə̀ bɔ awɔb, ze biri yaʼ aneni inɔb ne chwìte gha Ŋwiye biri ghum nimni awɔb. Àsi inən, à ya aneni ne chwìte gha Ŋwiye biri ghum pumni awən.

²⁹ Ŋwiye fə nàʼ apan inən ni yaʼ bəd Kristo. Apan ze ya kayi məyi ni bḛ aməd. À ya bə̀ ni zən ngəʼ imbə̀ʼ aməd.

³⁰ Tesiʼ ya gha, mbə̰ mbe zə̰ ngəʼ amad anìŋ kwàʼ icheg ne mbə̀ ya bàri ne mə zən ngəʼ. Mbə̰ mbe bə̀ kiri zùghə gha mə we bə̀ kiri zə̰ ngəʼ.