Efesùs 6 - Ikan feg

Bɔn tì mə̀mbaʼ

¹ Bɔn, mbə̀ ya zùgrə ìmbən mə̀mbaʼ mbe ne mbə̀ yaʼi ane ifɔti tì Anɔŋisəg imbə̀ʼ icheg ne à ya anug ne koʼi abə Ŋwiye.

² A ze inga Àŋwàʼrì Ŋwiye gha, “Àghò ghumni ìwe mbaʼ tì ìwe ngɔb.” Aŋa ya ikə mbègtog ne beri anug ne Ŋwiye kàʼi.

³ Ŋwiye kàʼ gha, àghò mə̀ ya ghùmnə awɔb, “Àghò biri yaʼ icheg chɔm bə̀ tàndì igun isəg.”

⁴ Mə̀mbaʼ, imbə̀ʼ mbə̰ ghiyə awən gha ìmbən bɔn ya gàŋa. Mbə̀ chwiti inug abə ìmbən bɔn bə̀ də̀n awɔb ane ikuchèg we ne Anɔŋisəg kə̀bi.

Ìbòʼì tì ìmbɔb mə̀mbaʼ àfàʼì

⁵ Ìbòʼì, mbə̀ ya zùgrə ìmbən mə̀mbaʼ àfàʼì igun isəg. Mbə̀ taŋ gùndi aseg ghùmni awɔb ane fìŋ ijìm bə̀ kwàʼ icheg ne mbə̰ mbe ghùmnə Kristo.

⁶ Imbə̀ʼ mbə̰ ghumni awən awɔb məyi anyumə̀ ne mbɔb mbe nḛ̀ awən, ni ghì gha mbɔb ya gyènde tì inən. Mbə̀ ya ghìyə̀ ane ane ìzən fìŋ ijìm icheg ìbòʼì abə Kristo ne ghìyə̀ inug ne Ŋwiye kɔ̀ŋi.

⁷ Mbə̀ ya fàʼà ane ìzən fìŋ ijìm icheg ni gha mbə̰ ya kə̀ fàʼà yaʼ abə Anɔŋisəg kayi abə wə̀d.

⁸ Mbə̀ ya fàʼà ane imbə̀ʼ icheg ne mbə̰ kyèri gha, Anɔŋisəg biri nàʼ chùd abə wə̀d ijìm ane àfàʼì chɔm ne wì fàʼi, kə̀ tengàŋ kə àbòʼì kə̀ chəyi.

⁹ Mə̀mbaʼ àfàʼì, mbə̀ ya bə̀ chùghə tì ìmbən ìbòʼì icheg chɔm. Imbə̀ʼ mbə̰ sìb awən awɔb imbə̀ʼ icheg ne mbə̰ kyèri gha, Mbaʼ àfàʼì we ne beri awɔb fɔrɔ awən we yi ikaŋ àbɔ̀ŋɔ ne chəyi wì ya ghìyə̀ ighə ka.

Ighi ibid Ŋwiye

¹⁰ Ni si nwḭ̀yḛ̀, mbə̀ chughi ane ifɔti tì Anɔŋisəg ni ghì gha ika kyen məd we ne che tika ijìm we ghiyə ìwən ibḛfiŋ taŋ kà.

¹¹ Mbə̀ niŋ ìmbən ighi ibid mbe ne Ŋwiye we nàʼà. Ighi ibid mbe biri ghì mbə kyeri icheg ni təm kà chè tiwe iji ìti Debrə̀.

¹² Chəyi tì ya zɔ̀ŋɔ̀ yaʼ bəd. Tì ya zɔ̀ŋɔ̀ yaʼ izwighi tibɔ̀ŋ fɔrɔ tika afub te ne tùmbə̀ ikaŋ. Tì ya bə̀ zɔ̀ŋɔ̀ yaʼ tika te ne yaʼi inga isəg inug tibɔ̀ŋ gho̰ fɔrɔ tika te ne yaʼi ikaŋ àbɔ̀ŋɔ ne chəyi tì ya bàrà.

¹³ Ane, mbə̀ niŋ ighi ibid mbe ne Ŋwiye we nàʼà kwàʼ ijìm. Àze ya ni ghì gha, anyumə̀ ne inug tibɔ̀ŋ yeʼe, mbə biri kyeri icheg ni zɔ̀ŋ ghò mànì ne ìwən ibḛfiŋ kiri təm kà.

¹⁴ Ane, mbə̀ təm kà, kɔd inug tesiʼ inən ìkyèri icheg ne sogyì we kɔ̀rɔ ìkɔ̀bì. Anug ni təm kòʼ imbìghè abə Ŋwiye ze yaʼ inən ane igo icheg ne atə̰-igo ze yàʼa ane igo abə sogyì.

¹⁵ Mbə̀ bə chùʼri ìwən nyɔd ni ya ghà ikən chɔm we ne ghìyə̀ gha bəd chughi inga àbɔrɔ̀bɔd bə̀ kwàʼ icheg ne sogyì we zìyè itami ni chuʼri ìwi nyɔd ane àzɔ̀ŋì.

¹⁶ Abɔ̀ʼ ighi mbo̰ ijìm, mbə̀ nyimi ibḛfiŋ we ne mbə̀ nɔŋi igun Kristo icheg àgùʼì ibid. À ya ibḛfiŋ gho̰ biri nimni iywid we ne kyètè ane kyed te ne Wə̀d Tibɔ̀ŋ we tùmə.

¹⁷ Mbə̀ niŋ icheg ne Ŋwiye fə pumni awən ze yaʼ icheg aghi atog atə̰ ne kə̀ndə atog. Mbə̀ bə nyìmi Ìngam Ŋwiye icheg ibeg ibid ne Azwighi Ŋwiye ze nàʼà.

¹⁸ Mbə̀ bə ya chàʼrà Ŋwiye icheg ne Azwighi Ŋwiye ze nàʼà ika inən. Mbə̀ ya ghìyə̀ ane mà nyumə̀ ijìm ne mbə̰ mbe chàʼrà Ŋwiye, dèghè inug ibo kə̀ bìre ighi ibo. Ane, mbə̀ chughi ikyeʼi. Imbə̀ʼ mbə̰ bɔrɔ awən ni chàʼra Ŋwiye abə bəd məd məjìm.

¹⁹ Mbə̀ bə chàʼra Ŋwiye inum gha, mà nyumə̀ ijìm ne mə ghàmà, Ŋwiye ziye ìngam inum ichug ne mə̀ biri ghàm ne chəyi mə bɔ. Ane, mə biri ghì bəd kyeri anug ze ne yaʼi inə̀mbi imbə̀ʼ ikən chɔm.

²⁰ À ya imbə̀ʼ icheg ne mə təmi ane ikum Anɔŋisəg ni ghà ikən chɔm gho̰ ne mə̀ yaʼi inga nəb ndəŋ . Mbə̀ chaʼra Ŋwiye inum gha, mə̀ ya ghà ikən chɔm gho̰ kwàʼ icheg ne mə̀ koʼi ni ghà ne chəyi mə bɔ.

Ichaʼri ne si nwḭ̀yḛ̀

²¹ Tichikùs ne yaʼi ìmə ifi ne mə̀ taŋ kɔ̀ŋ, ne bə yaʼ wə̀d ne fàʼà abə Anɔŋisəg ane ìzi fìŋ ifibì biri ghà inug ijìm imbə̀ʼ amə inən ni gha mbə̀ kyeri icheg ne mə̀ yaʼi bə̀ kyèri àfàʼì ne mə fàʼà.

²² Mə ya anìŋ tɔ̀mɔ məd inən imbə̀ʼ anug amɔʼ. Anug ze ya ni ghì gha mbə̀ kyeri icheg ne tì yaʼi. Mə ya bə̀ tɔmɔ məd ni ghì gha wì nəri ìtən fìŋ.

²³ Ŋwiye ni yaʼi ìwa Mbaʼ tì Anɔŋisəg Yeso Kristo, wì ghiyə bəd məjìm mbe ne bḛ Kristo icheg ina mbe chughi ane àbɔrɔ̀bɔd, chùghi ane àkɔ̀ŋì bə̀ nɔ̀ŋì ibḛfiŋ igun məd.

²⁴ Ŋwiye ghiyə ìchɔ̀mì abə bəd məjìm ne kɔŋi Anɔŋisəg Yeso Kristo ane iku àkɔ̀ŋì ze ne chəyi ze biri nɔʼ mèg.