Efesùs 5 - Ikan feg

Anug ni chughi ane ìzḛzḛ

¹ Icheg ne mbə̰ ya bɔn ne Ŋwiye taŋ kɔ̀ŋ, mbə̀ ghiyə ìwən ikuchèg we yaʼ bə̀ kwàʼ icheg ìwi məd.

² Mbə̀ chughi ane àkɔ̀ŋì kwàʼ icheg ne Kristo ya bì kɔ̀ŋ awa nàʼ ìwi ìtḛ̀ igun ìmba itog ane ituti Ŋwiye fɔrɔ ane aghi àfàtì chɔm ne beri ifɔ chɔm chɔm ne Ŋwiye kɔ̀ŋi.

³ Icheg ne mbə̀ yaʼi bɔn Ŋwiye, chəyi ze bɔŋi gha afabi imbə̀ʼ inug tibɔ̀ŋ yaʼ inga ìwən ifeti icheg anug ni nɔ̀kì mə̀yi kə̀ nɔ̀kì mbaŋà abu abu kə̀ àzùnì kə̀ anug ni ghə̀ʼrə̀ ighi. Chəyi ze bɔŋi gha bəd Ŋwiye ya fàʼà tiku inug ìto̰.

⁴ Chəyi ze bɔŋi gha mbə̀ ya ghàmà izṵ inug kə̀ ghìyə̀ tìcheg ane izṵ inug kə̀ ghàmà tìngam anen. Anug ne bɔŋi ya gha mbə̀ ya nàʼà yaʼ məyakà abə Ŋwiye.

⁵ Mbə̀ kyeri gha, bəd mbe ne nɔ̀kɔ̀ mə̀yi kə̀ nɔ̀kɔ̀ mbaŋà abu abu kə̀ zùnə̀, kə̀ bəd mbe ne ghə̀ʼrə̀ ighi, chəyi mbi biri nyi inga anug ìfɔ̀n Kristo tì Ŋwiye. Aton ya gha, wə̀d ne ghə̀ʼrə̀ ighi ya bə̀ icheg wə̀d ne ghùmnə mə̀ŋwiye.

⁶ Imbə̀ʼ mbə̰ bḛ awən gha wə̀d mɔ̀ʼɔ tambi awən tì inug ako ka imbə̀ʼ icheg ne Ŋwiye biri gaŋ abə bəd mbe ne ghìyə̀ tìzughə̀ ibo.

⁷ Icheg ne ze yaʼi ane, mbə̀ taŋ kye awən ane tiku bəd te.

⁸ À ya yaʼ inga nyùmə̀ mɔ̀ʼɔ, mbə̰ yaya ghìyə̀ inug icheg bəd ne yaʼi inga afub. Àsi amad anìŋ ne mbə̰ ya fə si bəd Anɔŋisəg, mbə̀ se ghìyə̀ inug ne chwìye gha mbə̰ fə se inga ìzḛzḛ.

⁹ Aton ya gha, ìzḛzḛ we ya ghìyə̀ wə̀d bere fìŋ chɔm tì ikuchèg ne təmi kòʼ bə̀ kyère tesiʼ.

¹⁰ Mbə̀ kirə ika ni kyeri aghi ne bɔŋi abə Anɔŋisəg bə̀ fàʼ àzewən.

¹¹ Imbə̀ʼ mbə̰ ziye awən abo ane inug ako mɔ̀ʼɔ mbe ne bəd inga isəg mbe ghìyə̀ inə̀mbi. Mbə̀ toʼo inug mbe asaŋ, bəd bara.

¹² À ya kwàʼ tìnìrètog ni zug inug ne bəd tìzughə̀ mbe ghìyə̀ inə̀mbi.

¹³ Bəd biri bàd ighi ijìm anyumə̀ ne ìzḛzḛ zuʼi igun ighi mbe chì gwè asaŋ.

¹⁴ À ya ane imbə̀ʼ icheg ne ighi ijìm ne bəd mbe bàrà ya ighi ne ìzḛzḛ we zùʼə igun. À ya aton ne mbi Ŋwàʼri gha, “Àghò ne gwḛ, nɔ̀ʼɔ angwḛ, zwème, ane, ìzḛzḛ Kristo biri zuʼ igun ine.”

¹⁵ Ane, mbə̀ we awən ane ikuchèg ne mbə̰ mbe chùghə angu. Imbə̀ʼ mbə̰ chùghə awən icheg inen. Mbə̀ chughi icheg bəd ne beri iwe.

¹⁶ Mbə̀ ya fàʼà inug chɔm mà nyumə̀ ijìm ne mbə̀ beri apan imbə̀ʼ icheg ne bəd mbe ghìyə̀ inug tibɔ̀ŋ ne nɔʼi ako inga nyùmə̀ isəg gho̰.

¹⁷ Ane, imbə̀ʼ mbə̰ yaʼ awən icheg inen. Mbə̀ ziye atog ni kyeri anug ne Anɔŋisəg kə̀bi.

¹⁸ Imbə̀ʼ mbə̰ si no awən be imbə̀ʼ icheg ne mbə̰ mə̀ no mənoʼ be, mbə biri nyi inga anug ni nɔ̀kì mə̀yi kə̀ mbaŋà abu abu. Mbə̀ saŋa yaʼ Azwighi Ŋwiye ze sweg inga inən.

¹⁹ Mbə̀ ya zə̀ʼə̀ tikyeg abə wə̀d imɔʼ imɔʼ. Mbə̀ zəʼə mə̀sam tì tikyeg ne ghùmnə Ŋwiye tì tikyeg ne Azwighi Ŋwiye ze nàʼà. Mbə̀ ya zə̀ʼə̀ tikyeg te ghùmnə Anɔŋisəg ane fìŋ ijìm.

²⁰ Mbə̀ ya nàʼà məyakà abə Ŋwiye ne yaʼi ìwa Mbaʼ imbə̀ʼ inug ijìm. Mbə̀ ya ghìyə̀ ane mà nyumə̀ ijìm inga ikum Anɔŋisəg Yeso Kristo.

Mə̀yi tì Mənɔm

²¹ Mbə̀ ya zùgrə wə̀d imɔʼ imɔʼ ni chwi gha mbə̰ ya bəd ne ghùmnə Kristo.

²² Mə̀yi, mbə̀ ya zùgrə ìmbən mənɔm icheg ne mbə̰ mbe zùgrə Anɔŋisəg

²³ imbə̀ʼ icheg ne inɔm ya atog igun ìwi iweg icheg ne Kristo yaʼi atog igun ifeti bəd Kristo. Ifeti we ya nyàmnyɔd məd ze ne wì ghi zì pum.

²⁴ Icheg ne ifeti bəd Kristo we zùgrə Kristo, à ya bə̀ ane ne mə̀yi beri ni ya zùgrə ìmbɔb mənɔm ane inug ijìm.

²⁵ Mbaŋà, wə̀d ya kɔ̀ŋɔ̀ ìwi iweg kwàʼ icheg ne Kristo ya kɔ̀ŋi ifeti bəd Ŋwiye nàʼ àze atog, ku, atog inɔb.

²⁶ Wì ya ghì ane ni sò awɔb gha mbe zen, bə̀ sò awɔb ane Ìngam Ŋwiye icheg ne mbe sò wə̀d ane mənib.

²⁷ Wì ya ghì ane ni gha ifeti we bere ngwèn si təm ibo imbìghè ne wi fə zḛ mànì, ne chəyi wi beri tifiŋi igun, kə̀ gha ìfe nyɔ̀pɔ̀, kə̀ bèrì apabi kə̀ aghi mɔ̀ʼɔ igun. Wì ya ghì gha ifeti we chughi ane ìzḛzḛ ne chəyi anə igun.

²⁸ À ya bə̀ ane ne, mbaŋà beri ni kɔ̀ŋ ìmbɔb mə̀yi icheg ne mbi kɔŋi ìtɔb nyàmnyɔd. Mbaŋà ze ne kɔ̀ŋɔ̀ ìwi iweg ya kɔ̀ŋɔ̀ yaʼ ìwi nyɔd.

²⁹ Chəyi wə̀d mɔ̀ʼɔ kweʼì bàn ìwi nyɔd. Wə̀d ya jə ìwi nyɔd bə̀ kyèʼrè kwàʼ icheg chɔm kwàʼ icheg ne Kristo ghi abə ifeti bəd məd.

³⁰ Mba ya isiŋi nyɔd ane nyàmnyɔd məd.

³¹ A ze inga Àŋwàʼrì Ŋwiye gha, “À ya aton ne mbaŋà biri sàŋì ìwi mbaʼ tì ìwi ngɔb ghò fɔ̀ti tì ìwi iweg, mbɔb mbe məbe si yaʼ nyàmnyɔd imɔʼ.”

³² Aŋa ya anug kyen ne yaʼi inə̀mbi. Ane, mə kyèri gha ze ya ghàmà yaʼ imbə̀ʼ Kristo tì ifeti bəd Kristo.

³³ Ane, wə̀d imɔʼ imɔʼ abɔ̀ʼ inən ya kɔ̀ŋɔ̀ ìwi iweg icheg ne wì kɔ̀ŋi ìwi nyɔd. Àyi bèrì ni ya bə̀ ghùmnə ìwi inɔm.