Efesùs 4 - Ikan feg

Bəd Kristo ya anug imɔʼ

¹ Mo ne yaʼi wə̀d ndəŋ imbə̀ʼ icheg ne mə fàʼà abə Anɔŋisəg, mə we bòʼo ibo inən gha mbə̀ chughi kwàʼ ane ikuchèg ne koʼi. À ya ikuchèg ne Ŋwiye ya kàri awən gha mbə̀ chughi angu.

² Mbə̀ ya swìye ìwən nyɔd aseg. Mbə̀ chughi ane àbɔrɔ̀bɔd. Mbə̀ ya nyìmbe fìŋ tì mə̀mbin. Àze biri ya chwìye gha mbə̰ mbe kɔ̀ŋɔ̀ bəd məjìm.

³ Mbə̀ kirə ika ni chughi ane àbɔrɔ̀bɔd imbə̀ʼ nyimi ifɔti we ne Azwighi Ŋwiye nàʼi inən.

⁴ Nyàmnyɔd ya məyi imɔʼ. Azwighi ya bə̀ məyi amɔʼ. Anug ni nɔ̀ŋì ikɔndi ghɔ̀m icheg ne Ŋwiye ya kàri awən ya bə̀ məyi amɔʼ.

⁵ Anɔŋisəg ya məyi imɔʼ. Ibḛfiŋ ya məyi imɔʼ. Anug ni niŋ mənib ya bə̀ məyi amɔʼ.

⁶ Ŋwiye ya məyi imɔʼ bə̀ yaʼ Mbaʼ abə bəd məjìm. À ya məyi məd we imɔʼ ne tùmbə̀ bəd məjìm bə̀ chè inga bəd ni fàʼ inug ijìm bə̀ ywìrì yaʼ inga bəd ijìm.

⁷ Kristo ghì ìchɔ̀mì ina nàʼ tineʼi ina icheg ne məd kə̀bi. Ane, wə̀d imɔʼ imɔʼ bèrì ìwi ineʼi ne koʼi ibo.

⁸ Àzo̰ ya kwàʼ anug ze ne Ìngam Ŋwiye gha gha, “Anyumə̀ ne wì ya kɔʼi ikaŋ àbɔ̀ŋɔ, wì ya niŋ bəd mbe ne wì ya zeri awɔb chì ane anug àbòʼì ghò tì inɔb; bə̀ nàʼ tineʼi abə ìmbi bəd.”

⁹ Anug ze ne gha, “Wì ya kɔʼ ikaŋ” kə chwìye gha? Ze ya chwìye gha məd ya bì swìʼi ghò kwàʼ aton ìseg.

¹⁰ Ane, wə̀d we ne ya swiʼi aseg, à ya məd ya bə kɔʼ ghò ikaŋ àbɔ̀ŋɔ ni si yaʼ inga ighi ijìm isiŋi ijìm.

¹¹ À ya məd ya nàʼi tineʼi abə bəd. Wì ya ghì bəd mɔ̀ʼɔ yaʼ bədtɔm, ghì mə̀mbin yaʼ bədkə̀n, ghì bəd mɔ̀ʼɔ yaʼ bəd ne chètè ikən chɔm, ghì mə̀mbin yaʼ bəd ne kyèʼrè bəd Ŋwiye bə̀ ghì mə̀mbin yaʼ bəd ne chwìte inug abə bəd Ŋwiye.

¹² Wì ya ghì ane ni gha mbɔb se chwìye ikuchèg abə bəd Ŋwiye, mbi se fàʼà ibo ni ghì gha ifeti bəd Kristo kweg kòʼ.

¹³ Ane, mba məjìm biri fɔti ane ibḛfiŋ we imɔʼ, taŋ kyèri Ŋwan Ŋwiye bə̀ kweg kòʼ si yaʼ icheg Kristo.

¹⁴ Ane, chəyi tì biri ywiri yaʼ icheg bɔn kwa ne bḛ inug ijìm ne bəd inug ako mbe chwìte. Bəd inug ako mbo̰ ya chwìte inug ako tàmba bəd ni ghì gha mbe febe.

¹⁵ Àsi mba ne ghà tesiʼ imbə̀ʼ icheg ne tì kɔ̀ŋi bəd, tè bèrì ni kweg ane tiku inɔnjì ijìm si yaʼ icheg Kristo ne yaʼi atog.

¹⁶ Kristo ghì isiŋi nyɔd ijìm fɔtɔ si yaʼ nyàmnyɔd imɔʼ. Tinḭ ka ka nyìmi isiŋi nyɔd ijìm fɔ̀ti. Asiŋi nyɔd amɔʼ mə̀ ya fàʼà icheg chɔm bə̀ kɔ̀ŋɔ̀ mbin tì isiŋi nyɔd, isiŋi nyɔd ijìm biri se kwèghe ghò imbìghè.

Ni yaʼ ane ifɔti tì Kristo ya Ìtḛ̀ feg

¹⁷ Mə ya anìŋ ghà inən ywìrè bèʼre ane ikum Anɔŋisəg gha imbə̀ʼ mbə̰ ya chùghə awən icheg bəd mbe ne kayi mə̀Ju. Ìtɔb tikɔndi ya kwàʼ ati ako.

¹⁸ Mbɔb mbe kiri inga afub. Mbɔb mbe ghìyə̀ tìzughə̀ imbə̀ʼ icheg ne chəyi mbi kyere tesiʼ. Chəyi mbɔb bə kə̀b ni kyeri. Ane, Chəyi mbɔb biri jəg ìtḛ̀ we ne Ŋwiye we nàʼà.

¹⁹ Icheg ne ìtɔb fìŋ fə tu ne chəyi tìnìrètog we ywìrè gwìyè awɔb, mbɔb fə nàʼ ìwɔb nyɔd ane inug tibɔ̀ŋ. Mbi ya ghə̀ʼrə̀ tiku izṵ inug ijìm.

²⁰ Kayi anug ne mbə̀ ya nani imbə̀ʼ Kristo aze!

²¹ Tesiʼ ya gha, mbə̰ fə zug anug imbə̀ʼ Yeso bə̀ bḛ anug məd. Mbe fə bə̀ chwìti tesiʼ imbə̀ʼ Yeso inən.

²² Mbə̀ waʼ ìwən ikuchèg anun we ne yaya ghìyə̀ mbə se gùghə̀ inug. Ikuchèg we yaya chìkə̀ awən ghìyə̀ mbə se kɔ̀ŋɔ̀ yaʼ inug mbe ne ghìyə̀ mbə fèbrè.

²³ Ane, Ŋwiye biri bə̀ŋì ìtən fìŋ fɔrɔ ìtən tikɔndi ghì ti si yaʼ ìti feg.

²⁴ Ane, mbə̀ se chùghə inga ikuchèg feg we ne Ŋwiye tàngi awən gha mbə̀ yaʼ icheg məd ni ghì inug tesiʼ ne təmi kòʼ fɔrɔ inug ni təmi zen.

²⁵ Wə̀d imɔʼ imɔʼ abɔ̀ʼ inən waʼ inug ako se ghàmà məyi tesiʼ imbə̀ʼ mə̀mbin imbə̀ʼ icheg ne tì fə si bəd imɔʼ anjìm Kristo.

²⁶ Imbə̀ʼ wə̀d mɔ̀ʼɔ saŋa yi gha agaŋ ghiyə wì gughə anug. Imbə̀ʼ wə̀d gaŋ yi nèʼre.

²⁷ Imbə̀ʼ wə̀d nàʼ yi apan abə Debrə̀.

²⁸ Wə̀d ne jìye, imbə̀ʼ wì ywiri jiye yi. Wì se fàʼà kwàʼ ane ìmbi ibo imbə̀ʼ bèrì ighi ne tì wì nàʼ mbi mɔ̀ʼɔ abə bəd ne chəyi àzɔb.

²⁹ Imbə̀ʼ mbə̰ ghama awən ìngam tibɔ̀ŋ. Mbə̀ ghama yaʼ tìngam chɔm ne biri ghì mbə kweg, bəd ndəŋ ne biri zug tìngam te bə̀ kweg.

³⁰ Imbə̀ʼ mbə̰ ghiyə awən gha Azwighi Ŋwiye ya sɔ̀mnɔ̀ imbə̀ʼ icheg ne Azwighi ze ya aneni ne chwìye gha à ya Ŋwiye beri awən. À ya Azwighi Ŋwiye ze bə̀ chwìye gha aneg ze yèʼe ne Ŋwiye biri zeri ìmbi bəd.

³¹ Mbə̀ waʼ agaŋ, bə̀ waʼ achɔb bə̀ waʼ iswḛ, bə̀ waʼ anug ni swèg ìsɔm, bə̀ waʼ ikuchèg we ne ghìyə̀ bəd bà̰ mə̀mbin. Mbə̀ bə waʼ anug ni chàpì tikum bəd. Mbə̀ bə wàʼ tiku inug tibɔ̀ŋ ndəŋ ijìm.

³² Mbə̀ ya ghìyə̀ inug chɔm bə̀ bèrè àsɔ̀mnəfiŋ igun mə̀mbin bə̀ waʼ inug tibɔ̀ŋ bəd kwàʼ icheg ne Ŋwiye che anjìm Kristo waʼ ìmbən tì inug tibɔ̀ŋ.