3 Jɔn 1 - Ikan feg

Ichaʼri

¹ À ya mo ne yaʼi atog wə̀d igun ifeti bəd Kristo, ŋwàʼri àŋwàʼrì azo̰. Mə ya ŋwàʼrà anìŋ ine àghò Gayòs, ìmə ìsə̀ʼ ne mə̀ taŋ kɔ̀ŋ.

² Ìmə ìsə̀ʼ ne mə̀ taŋ kɔ̀ŋ, mə we chàʼrà Ŋwiye gha inug ijìm yḛ̀ tì ine kwàʼ icheg chɔm. Mə we bə̀ chàʼrà Ŋwiye gha ìwe nyɔd yaʼ icheg chɔm icheg ne àghò bə nyìmi anug Ŋwiye kwàʼ icheg chɔm.

³ Mə ya taŋ gyen ane nyùmə̀ ne məfi mɔ̀ʼɔ ya yeʼe pè ghà inug inum imbə̀ʼ icheg ne àghò we bène abɔ̀ʼ tesiʼ. Mə kyèri gha àghò we taŋ bène abɔ̀ʼ tesiʼ we aghəm ajìm.

⁴ Chəyi igyendi ndəŋ inga ìmə fìŋ ne che we ne mə̀ beri icheg ne mə̀ ya zughi gha ìmbe bɔn mbe bə̀ bène abɔ̀ʼ tesiʼ.

⁵ Ìmə ifi ne mə̀ taŋ kɔ̀ŋ, àghò we taŋ fàʼà ane ìze fìŋ ijìm icheg ne àghò we taŋ ghìyə̀ inug chɔm abə bəd Kristo fɔrɔ abə mbe ne chəyi àghò bi kyèri awɔb.

⁶ Mbi fə mə̀tì icheg ne àghò we kɔ̀ŋɔ̀ bəd abə ifeti bəd Kristo we ne yaʼi aŋa. Mə boʼ ibo ine, àghò wete awɔb, chà awɔb mbe gho ane ikuchèg ne Ŋwiye biri kɔ̀ŋ.

⁷ Mbɔb ya yḛ̀ ane ikuchèg ne Anɔŋisəg cha awɔb. Chəyi mbɔb mbe nìŋə àwètì mɔ̀ʼɔ abə bəd mbe ne chəyi mbi bḛ Yeso Kristo.

⁸ À ya mba bəd Kristo mənyìʼ wètì awɔb nàʼ ighi inɔb. Tì mə ghì ane, ze chwi gha tè fɔ̀ti tì inɔb bə̀ fàʼ àza tì àfàʼì ni chètì tesiʼ.

Inug imbə̀ʼ Dìyotrefès tì Dèmitrùs

⁹ Mə ya chà àŋwàʼrì mɔ̀ʼɔ abə ifeti bəd Kristo, si ya gha, Dìyotrefès ne kɔ̀ŋɔ̀ ni nɔ̀ nyɔd, chəyi wì kə̀bi ni bḛ anug ne mə ghà.

¹⁰ Anyumə̀ ne mə̀ biri yeʼe, mə biri mə̀tì inug tibɔ̀ŋ mbe ne məd we ghìyə̀ bə̀ mə̀tì tìngam tibɔ̀ŋ te ne məd we ghàmà imbə̀ʼ awa. Icheg ni gha chəyi inug tibɔ̀ŋ məd kiri koʼi, məd we to̰ yi ni niŋ məfi mbin ne yḛ̀ nè ghàmà Ìngam Ŋwiye inga ifeti bəd Kristo. Mə biri bə mə̀tì icheg ne məd we bə̀ ghà abə bəd ndəŋ gha imbə̀ʼ mbi niŋ awɔb bəd mbe. Məd fə bə̀ kamni bəd Kristo mbe ne kə̀bə̀ ni niŋ bəd mbe, chì inga ifeti bəd Kristo.

¹¹ Ìmə ìsə̀ʼ ne mə̀ taŋ kɔ̀ŋ, imbə̀ʼ àghò niŋ awe ikuchèg tibɔ̀ŋ we. Àghò ya ghìyə̀ yaʼ inug chɔm. Àghò wendi gha, mbi ya kyere wə̀d Ŋwiye chɔm ane inug chɔm ne we ghìyə̀. Àghò bə wèndi gha, bəd ne ghìyə̀ inug tibɔ̀ŋ, ze ya chwìye gha chəyi mbɔb yaʼi ane anug amɔʼ tì Ŋwiye.

¹² Si ya gha, bəd Kristo məjìm mbe ghà inug chɔm imbə̀ʼ Dèmitrùs. Məd we ghìyə̀ inug kwàʼ icheg ne Àŋwàʼrì Ŋwiye chwi. Mə kyèri gha məd ya wə̀d inug chɔm. Mbə̰ inən bə̀ kyèri gha, anug ne mba mbe ghà imbə̀ʼ aməd ya tesiʼ.

Inug ne si nwḭ̀yḛ̀

¹³ Mə bèrì inug nɔʼ nɔʼ ne nji mə ghà ine, si ya gha, chəyi mə̀ kəbi ni chà yaʼ àŋwàʼrì.

¹⁴ Aton ya gha, mə we kɔ̀ndɔ ni yeʼe mùg awe. Anyumə̀ ne mə̀ biri yeʼe tì biri fɔti mùg inug nɔʼ nɔʼ.

¹⁵ Ŋwiye ziye àbɔrɔ̀bɔd igun ine. Ìmbe mə̀sə̀ʼ mbe ne yaʼi aŋa mbe chàʼrà awe. Mbə̀ bə chàʼrì ìmba mə̀sə̀ʼ mbe ne yaʼi aghɔ imɔʼ imɔʼ.