2 Timotì 4 - Ikan feg

Timotì ghama Ìngam Ŋwiye mà nyumə̀ ijìm

¹ Timotì, mə̀ ya anìŋ ghàmà ine imbìghè abə Ŋwiye fɔrɔ imbìghè abə Yeso Kristo ne biri ghum saʼ bəd mbe ne yaʼi izɔm fɔrɔ bəd mbe ne fə ku. Icheg ne wì biri yeʼe ni tùmbì isəg mə ya anìŋ ghà ine gha:

² Àghò ghama Ìngam Ŋwiye abə bəd. Chuʼri ìwe nyɔd ni gha àghò mənyìʼ ghàm Ìngam Ŋwiye mà nyumə̀ ijìm, kə̀ bəd kɔ̀ŋ ni zug kə̀ chəyi. Àghò ghiyə gha bəd mbe ne ghìyə̀ inug ne chəyi mbi koʼi, mbe kɔpɔ. Àghò ghama gaŋ abə bəd ne ghìyə̀ inug tibɔ̀ŋ. Nyimbi fìŋ ni nəri bəd bə̀ nàʼ tikə inɔb.

³ Nyùmə̀ we yèʼe ne chəyi bəd biri kɔ̀ŋ ni zug tesiʼ we ne yaʼi inga Ìngam Ŋwiye. Mbi biri ya kə̀bə̀ yaʼ inug mbe ne mbɔb kɔ̀ŋi. Ane, mbi biri feti mə̀chwitinùg ane inɔb ne biri ya ghàmà yaʼ inug mbe ne mbɔb kɔŋi ni zug.

⁴ Bəd biri to̰ awɔb ni ya zùghə tesiʼ, si bə̀ŋə̀ ghò se zùghə tìmùghì twaŋi.

⁵ Àsi awe, àghò Timotì, niŋ nyumə̀ inga inug ijìm. Nyimbi fìŋ anyumə̀ ne àghò we chè inga ngəʼ. Faʼa ni chètì ikən chɔm imbə̀ʼ ghì gha bəd yeʼe abə Kristo. Faʼa ìfàʼì ijìm mbe ne Ŋwiye zi ine ikye ibo.

⁶ Àsi mo, mə fə nàʼ ìmə ìtḛ̀ abə Ŋwiye icheg ituti. Nyùmə̀ ne mə̀ biri ku fə tinde.

⁷ Mə fə zɔ̀ŋ àzɔ̀ŋì chɔm ni fàʼ abə Kristo. Mə fə nòtò ghò pè ane ìnwḭ. Mə fə nɔ̀ŋì ìmə ibḛfiŋ igun Kristo ghò pè ane ìnwḭ.

⁸ Ane, igun aneg ze ne Anɔŋisəg Kristo biri yeʼe ni saʼ isəg, məd we ne sàʼa bəd ane icheg ne koʼi biri nàʼ ineʼi inum. À ya ineʼi we ne məd we nàʼà abə bəd ne ghìyə̀ inug ne təmi kòʼ. Chəyi wì biri nàʼ məyi inum. Wì biri nàʼ fɔrɔ abə bəd mbe ne ghɔ̀mɔ̀ gha wì ywirì yèʼe.

Inug ne Pɔl kə̀bi gha Timotì ghiyə ibo

⁹ Àghò kirə ika ijìm ni zàmbì yeʼe zə̰ amə

¹⁰ imbə̀ʼ icheg ne Demàs fə waʼ amə ghò yi a Tèsàlonikà. Məd ghò angu imbə̀ʼ icheg ne wì kɔ̀ŋ inug igun isəg gho̰. Kresèn fə ghò a Gàlesìyà. Tayitùs fə ghò a Dàmatìyà.

¹¹ À ya məyi Lug si yaʼ aŋa abɔ̀ʼ inum. Niŋ Mag yèʼe tì məd imbə̀ʼ icheg ne məd we tì wì wètì amə ane àmə àfàʼì.

¹² Mə chà Tichikùs a Efesùs.

¹³ Anyumə̀ ne àghò we yèʼe, niŋ ndwigun ze ne mə̀ ya sàŋi abə Kapùs a Truwàs yèʼe tì ìziwən. Àghò bə niŋ ìmbum ìŋwàʼrì mbe ne mbe kàri kari yèʼe tì mbiwən. Ako ako ya ìŋwàʼrì mbe ne mbi tangi ane gɔb.

¹⁴ Àlèzandà we ne tànga ighi ane itə̰, wì fàʼ anug tibɔ̀ŋ ne che ibo inum. Anɔŋisəg biri nàʼ chùd ibo ane àfàʼì ze ne wì fàʼi.

¹⁵ Àghò we awe imbə̀ʼ aməd imbə̀ʼ icheg ne məd we zɔ̀ŋɔ̀ kwàʼ ane ika ni nimni ikən we ne te chètè.

¹⁶ Ane, ighəm mbègtog ne mə̀ ya gho təm gha mbe saʼ amə, chəyi wə̀d mɔ̀ʼɔ ne ya yeʼe ni kə̀ŋì amə. Wə̀d ijìm ya waʼ amə. Imbə̀ʼ Ŋwiye niŋ yi inug mbo̰ zì isaʼi igun inɔb.

¹⁷ Mbi ya ghì ane, si ya gha, Anɔŋisəg ya təm abɔ̀ʼ inum, nàʼ ika inum. Ane, Anɔŋisəg ya wètì amə, ghì mə ghàm Ìngam Ŋwiye ijìm abə bəd məjìm mbe ne kayi mə̀Ju, mbi zug. Anɔŋisəg ya bə̀ chì amə ichug iwu imbə̀ʼ icheg ne mbi ya fə nɔ̀ŋì gha mbi biri zweti amə.

¹⁸ Anɔŋisəg biri chì amə inga tiku ngəʼ tibɔ̀ŋ tijìm. Wì biri ghì mə nyi inga anug ìfɔ̀n ikaŋ məd kwàʼ ane àbɔrɔ̀bɔd. Ighumni yaʼ ìwi məd kwàʼ ane ighə̀m imɔʼ. À ya ane.

Ichaʼri ne si nwḭ̀yḛ̀

¹⁹ Àghò chàʼra Priskà tì Àkwilà, bə̀ chàʼrì bəd mbe inga nəb Ònèsìforùs.

²⁰ Èrastùs ya chùghə yi a Kɔrèn. Mə ya bə̀ nɔ̀ʼ sàŋa Tròfimùs a Mìletùs imbə̀ʼ icheg ne wì yaya ghɔ̀ndɔ̀.

²¹ Àghò kirə ika ni pè bɔŋ nyùmə̀ we ne ifə we taŋ ko se kòʼò. Ubulùs bə̀ chàʼrì awe. Pudèns tì Layinùs tì Klodìyà fɔrɔ bəd Kristo məjìm mbe bə̀ chàʼrà awe.

²² Anɔŋisəg yaʼ tì àze azwighi. Ŋwiye bə ghì ìchɔ̀mì inən mbə̰ məjìm.