2 Timotì 1 - Ikan feg

Ichaʼri

¹ À ya mo Pɔl ŋwàʼri àŋwàʼrì azo̰. Ŋwiye ya ghì gha mə̀ yaʼ wə̀dtɔm Kristo icheg ne məd kə̀bi. Ŋwiye ya chà amə gha mə̀ chete anug imbə̀ʼ ìtḛ̀ we ne wì ya kàʼi ni nàʼ ina icheg ne tì yaʼi ane ifɔti tì Yeso Kristo.

² Mə ŋwàʼri anìŋ ine àghò Timotì ìmə ŋwan ne mə̀ taŋ kɔ̀ŋ. Ŋwiye ne yaʼi Mbaʼ fɔrɔ Yeso Kristo, ìwa Anɔŋisəg ghiyə ìchɔ̀mì ine bə̀ chwi àsɔ̀mnəfiŋ igun ine bə̀ ghì àghò chughi ane àbɔrɔ̀bɔd.

Pɔl nàʼ məyakà abə Ŋwiye

³ Mə we nàʼà məyakà abə Ŋwiye we ne mə fàʼà ibo, ane fìŋ zḛ zḛ icheg ne ìmbum mə̀mbaʼ ya fàʼi. Ighəm ijìm ne mə chàʼrà Ŋwiye tisi fɔrɔ tizimi, mə we wènde awe.

⁴ Mə ya mə̀ kɔ̀ndi icheg ne àghò we dèghè, mə̀ ya se kə̀bə̀ ni ywìri bàd awe ni ghì gha mə̀ ywiri taŋ gyèndi.

⁵ Mə wèndi icheg ne ìwe ibḛfiŋ yaʼi kwàʼ ìwi tesiʼ. À ya iku ibḛfiŋ ne ìwe ngɔb kyen Loyìs fɔrɔ ìwe ngɔb Unìs ya bèri. Mə kyèri kwàʼ tesiʼ gha à ya bə̀ kwàʼ iku ibḛfiŋ we ne àghò bèri.

⁶ À ya aton ne mə kə̀bə̀ gha àghò nɔmbɔ ineʼi we ne Ŋwiye ya nàʼi ine anyumə̀ ne mə̀ ya nɔŋi ìmbum ibo igun ine chàʼra Ŋwiye. Nɔmbɔ ghì we kweg.

⁷ Azwighi ze ne Ŋwiye nàʼi ina kayi àze ne ghìyə̀ tì bɔ ni ghàm. À ya Azwighi ne nàʼà ika ina bə̀ ghìyə̀ tì kɔ̀ŋɔ̀ bəd bə̀ kyère icheg ni nyimbi nyɔd.

⁸ Ane, imbə̀ʼ àghò bere awe tìnìrètog ni ghàm imbə̀ʼ anug ìwa Anɔŋisəg kə̀ imbə̀ʼ amə, mo ne yaʼi wə̀d ndəŋ imbə̀ʼ aməd. Àghò chuʼri ìwe nyɔd ni ya zə̰ ngəʼ imbə̀ʼ anug ni chètì ikən chɔm imbə̀ʼ Kristo icheg inum. À ya Ŋwiye we nàʼà ika ina.

⁹ Ŋwiye fə pumni awa bə̀ kàrì awa gha tì chughi inga ìzḛzḛ. Kayi wì kàri awa imbə̀ʼ anug mɔ̀ʼɔ ne tì ya fàʼi. À ya anjìm ìchɔ̀mì məd fɔrɔ anjìm icheg ne wì ya fə chùʼri nɔ̀ŋì. Ìchɔ̀mì gho̰ ya Ŋwiye ya ghi ina anjìm Yeso Kristo bɔŋ wì ya se tànga isəg.

¹⁰ Ìchɔ̀mì gho̰ ya Ŋwiye fə chwi ina icheg ne Yeso Kristo ne pumni awa fə yeʼe. Məd ya chìkì ika we ne iwu beri igun bəd, si ghì bəd jəg ìtḛ̀ fɔrɔ anug ni chughi izɔm ane ighə̀m imɔʼ. Ŋwiye chè anjìm ikən chɔm imbə̀ʼ Yeso fàʼ inug mbo̰.

¹¹ Ŋwiye ya chɔʼ amə ane wə̀dtɔm gha mə̀ che imbìghè ghò ghà ikən chɔm gho̰ bə̀ chwìti inug imbə̀ʼ Kristo abə bəd.

¹² À ya aton ne mə zə̰ ngəʼ anìŋ. Si ya gha, chəyi mə̀ bèrè tìnìrètog imbə̀ʼ icheg ne mə kyèri wə̀d ne mə̀ zì ìmə ibḛfiŋ igun məd. Mə bə̀ taŋ kyèri gha məd bèrì ika ni nɔ̀ŋì aghi ze ne məd zì inum ikye abo ghò pè ane aneg ìnwḭ.

¹³ Àghò nyimi inug mbe ne àghò zùghi inum icheg aməgrì ni ya chwìte inug chɔm abə bəd. Àghò chwiti inug mbo̰ abə bəd bə̀ bèrì ibḛfiŋ igun Ŋwiye bə̀ ya kɔ̀ŋɔ̀ bəd icheg tì yaʼi ane ifɔti tì Yeso Kristo.

¹⁴ Àghò taŋ nyìmi ineʼi chɔm we ne Ŋwiye ya nàʼi ine. Azwighi Ŋwiye ze ne chùghə inga ina biri wètì awe gha àghò nyimi ineʼi we.

¹⁵ Àghò kyeri gha bəd Kristo məjìm inga aba aben ze a Esìyà fə waʼ amə. Fìgelùs tì Hèmògenès fə bə̀ waʼ amə.

¹⁶ Anɔŋisəg Yeso bere àsɔ̀mnəfiŋ igun bəd mbe ne yaʼi inga nəb ìzi Ònèsìforùs imbə̀ʼ icheg ne məd ya nəri amə. Chəyi məd ya beri tìnìrètog imbə̀ʼ amə icheg ne mə̀ yaʼi inga nəb ndəŋ .

¹⁷ Anyumə̀ ne wì ya yeʼe a Rom, wì ya kə̀b amə anene, bàd.

¹⁸ Anɔŋisəg Yeso wete aməd bə̀ chwi àzi àsɔ̀mnəfiŋ ibo ane aneg ze ne Anɔŋisəg biri ywiri yeʼe. Àghò kyèri awe icheg ne wì ya wèti amə a Efesùs.