2 Jɔn 1 - Ikan feg

¹ À ya mo Jɔn, ne yaʼi atog wə̀d igun ifeti bəd Kristo ŋwàʼri àŋwàʼrì azo̰. Mə ya ŋwàʼrà anìŋ ine àghò àyi kyen we ne Ŋwiye ya chɔʼi fɔrɔ abə ìmbe bɔn. Mə taŋ kɔ̀ŋ awən kwàʼ tesiʼ. Kayi məyi mo kɔ̀ŋi awən. Bəd məjìm ne kyeri tesiʼ imbə̀ʼ Ŋwiye bə̀ kɔ̀ŋ awən.

² Mə kɔ̀ŋ awən ane imbə̀ʼ icheg ne tesiʼ imbə̀ʼ Ŋwiye we inga ina. Tesiʼ we biri bə yaʼ tì ina ane ighə̀m imɔʼ.

³ Ŋwiye we ne yaʼi Mbaʼ fɔrɔ Yeso Kristo we ne yaʼi Ŋwan məd, wì ghiyə ìchɔ̀mì inən, bə̀ bèrì àsɔ̀mnəfiŋ igun inən, bə̀ zì àbɔrɔ̀bɔd igun inən. Inug mbo̰ biri yaʼ ìmba ane tì chughi inga tesiʼ bə̀ chùghi ane àkɔ̀ŋì.

Tesiʼ tì Àkɔ̀ŋì

⁴ Mə ya taŋ gyen anyumə̀ ne mə̀ ya bàri gha bəd mɔ̀ʼɔ abɔ̀ʼ ìmbe bɔn mbe bène abɔ̀ʼ tesiʼ kwàʼ icheg ne Ŋwiye ne yaʼi Mbaʼ ya nàʼi ikə ina.

⁵ Amad anìŋ, mə ya ŋwàʼrà anìŋ ine, àghò àyi kyen ne mə̀ taŋ kɔ̀ŋ. Kayi ikə feg ne mə ŋwàʼrà. À ya ikə ne mbi ya nàʼi ina kwàʼ ane nyùmə̀ ne tì ya bḛ Yeso Kristo. Ikə gho̰ ya gha, tì ya kɔ̀ŋɔ̀ wə̀d imɔʼ imɔʼ ne yaʼi abɔ̀ʼ ina.

⁶ Àkɔ̀ŋì azo̰ ne mə ghà ya gha: tì zugri tikə Ŋwiye. Ikə məd ya ni chughi ane àkɔ̀ŋì icheg ne mbə̀ ya fə zughi kwàʼ anyumə̀ ne mbə̰ ya bḛ Kristo.

⁷ Bəd nɔʼ nɔʼ ne tàmba bəd fə sàkà igun isəg. Chəyi mbɔb mbe bḛ gha Yeso Kristo ya yeʼe igun isəg icheg wə̀d-aku. Tiku bəd te ya bəd mbe ne tàmba bəd. Mbɔb ya bəd ìpàb Kristo.

⁸ Mbə̀ niŋ nyumə̀ imbə̀ʼ mbə̰ nɔ̀ʼ sam aghi ze ne mbə̀ fə fàʼi. Mbə̀ kirə ika ni bèrì yaʼ chùd ane àfàʼì ze kwàʼ ijìm.

⁹ Wə̀d ne chəyi wì chè imbìghè ni ghì inug mbe ne Kristo chwìti, chəyi tengàŋ yaʼi ane anug amɔʼ tì Ŋwiye. Wə̀d ne chè imbìghè ni ghì inug mbe ne Kristo chwìti, ya wə̀d ne yaʼi ane anug amɔʼ tì Ŋwiye fɔrɔ Ŋwan Ŋwiye.

¹⁰ Ane, wə̀d mɔ̀ʼɔ mə̀ yèʼe inən ne chəyi we chwìte inug mbo̰, imbə̀ʼ mbə̰ niŋ awən məd inga ìmbən ichan kə̀ bì chàʼrì aməd.

¹¹ Wə̀d ne chàʼri iku wə̀d we, tengàŋ fə bə̀ fɔ̀ti abɔ̀ʼ məd ane inug izəg məd.

Anug ne si nwḭ̀yḛ̀

¹² Mə bèrì inug nɔʼ nɔʼ ni ghà inən, si ya gha, chəyi mə̀ kə̀bi ni zì inga àŋwàʼrì. Anug ne mə̀ kəbi ya ni yeʼe abɔ̀ʼ inən imbə̀ʼ tì ya mùghə̀ nḛ̀ tìfe. Àze biri ghì tì se taŋ gyènde.

¹³ Bɔn ìmbi ìze njàbi ze ne Ŋwiye chɔ̀ʼi mbe chàʼrà awe.