2 Kɔrèn 1 - Ikan feg

Ichaʼri

¹ À ya mo Pɔl, wə̀dtɔm Kristo icheg ne Ŋwiye kə̀bi, tì Timotì, ìwa ifi ne tì yaʼi ane ifɔti tì Yeso Kristo, tì ŋwàʼri àŋwàʼrì azo̰. Tì ŋwàʼrì anìŋ abə ifeti bəd Ŋwiye we ne yaʼi a Kɔrèn fɔrɔ abə bəd Ŋwiye məjìm mbe ne yaʼi aba aben ze a Akìyà.

² Ŋwiye ne yaʼi ìwa Mbaʼ tì Anɔŋisəg Yeso Kristo ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Pɔl nàʼ məyakà abə Ŋwiye

³ Tì ghumni Ŋwiye. Məd ya Mbaʼ abə ìwa Anɔŋisəg Yeso Kristo. Məd ya Mbaʼ ne bèrè àsɔ̀mnəfiŋ igun bəd məjìm, bə̀ yaʼ Ŋwiye ne nə̀rə fìŋ abə bəd məjìm.

⁴ Məd we nə̀rə ìta fìŋ anyumə̀ ne tì yaʼi inga aku ngəʼ ajìm. Ane ya ni ghì gha, tì ya bə̀ nə̀rə fìŋ abə mə̀mbin anyumə̀ ne mbɔb bə yaʼ inga aku ngəʼ ajìm icheg ne Ŋwiye we bə̀ nə̀rə ìta fìŋ.

⁵ Icheg ne Kristo ya taŋ zə̰ ngəʼ imbə̀ʼ awa, à ya bə̀ ane ne mba ina biri bə zə̰ ngəʼ imbə̀ʼ aməd. Ŋwiye biri taŋ nəri ìta fìŋ anjìm Kristo.

⁶ Tì mə̀ ya zə̰ ngəʼ, nji tì ya zə̰ ngəʼ ze imbə̀ʼ awən, ni ghì gha Ŋwiye nəri ìtən fìŋ bə̀ chì awən inga ngəʼ. Ŋwiye mə̀ ya nə̀rə ìta fìŋ, nji wì biri bə nəri ìtən fìŋ bə̀ ghì mbə bèrì ika ni nyìʼ anyumə̀ ne mbə chè inga aku ngəʼ ajìm ne mba mbe bə̀ chè inga.

⁷ Tè kyèri kwàʼ tesiʼ gha, mbə̰ mə̀ bə̀ zə̰ iku ngəʼ we ne mba mbe zə̰, Ŋwiye biri nəri ìtən fìŋ kwàʼ icheg ne we bə̀ nə̀rə ìta.

⁸ Ìmba məfi fɔrɔ ìta njàbi, tì kə̀b gha mbə̀ wendi iku ngəʼ ne tì ya zə̰ inga aba aben ze a Esìyà. Ngəʼ ne tì ya zə̰ ya nìd ako ne chəyi tì ya ywirì kyèri gha tì biri nyìʼ. Tì ya kɔndi gha chəyi tì biri chughi izɔm.

⁹ Tesiʼ ya gha, tì ya fə se ghɔ̀mɔ̀ iwu. Inug ya yaʼ ane ni gha imbə̀ʼ tì ywirì nḛ awa igun ìwa ika ni dù inga ngəʼ. Tì ya se nḛ̀ məyi igun Ŋwiye we ne tì wì zwèmni bəd ane iwu.

¹⁰ Ka tì yaya si ichug iwu, Ŋwiye ya pumni awa. Tì mə yaʼ inga ngəʼ, wì biri chì awa. Tè nɔ̀ŋì ìwa ikɔndi igun Ŋwiye gha wì biri chè imbìghè ni chì awa inga ngəʼ.

¹¹ Wì biri chì awa icheg ne mbə ya chàʼrà Ŋwiye ina. Àze biri ghì gha bəd nɔʼ nɔʼ biri fɔti ichug ni chàʼra Ŋwiye ina. Ane, Bəd ndan ndàn biri se nàʼà məyakà abə Ŋwiye icheg ne wì zughi ìwɔb ichaʼri, ghì tì chùghi ane àbɔrɔ̀bɔd.

Pɔl kṵ̀ igha̰ ni ghò a Kɔrèn

¹² Tì ya taŋ tə̀rə̀ awa imbə̀ʼ icheg ne tè kyèri gha tì ya fàʼà inug ijìm ane fìŋ ifibì bə̀ fɔrɔ ane icheg ne zḛ. Tì ya nḛ̀ məyi igun ìchɔ̀mì Ŋwiye mà nyumə̀ ijìm, kayi igun iwe bəd igun isəg. À ya ikuchèg ne te fàʼà inug abə bəd məjìm fɔrɔ inən.

¹³ Inug mbo̰ ne tì ŋwaʼri inən ya inug ne mbə̀ biri kàrì kyèri. Ìmə ikɔndi ya gha, ìmbən itog biri zen kwàʼ icheg chɔm.

¹⁴ Icheg ne mbə̀ kweʼì kyèri inug mɔ̀ʼɔ imbə̀ʼ awa, mə bèrì ibḛfiŋ gha mbə biri taŋ kyeri awa anyumə̀ ne Anɔŋisəg Yeso biri ywiri yeʼe. Mbə̰ biri se tə̀rə̀ awən imbə̀ʼ awa bə̀ kwàʼ icheg ne tì biri bə se tə̀rə̀ awa imbə̀ʼ awən.

¹⁵ Mə ya fə taŋ kyèri gha à ya icheg ne ze yaʼi. À ya aton ne mə̀ ya kàʼi ni bi yeʼe inən, ni gha Ŋwiye ziye àbɔrɔ̀bɔd igun inən ane ighəm ne pè ane ibe.

¹⁶ Mə ya chuʼri nyɔd gha, mə biri chè mùg awən anyumə̀ ne mə̀ ghò a aba aben ze Màsèdonìyà bə̀ ywìrì chè mùg awən anyumə̀ ne mə̀ kùrə imbə̀ʼ mbə̀ naʼa àwètì inum ni ghò a Jùdeyà.

¹⁷ Mbə̰ mɔ̀ʼɔ mbe bìre gha, kə̀ àkə aghə ghi mə̀ kṵ̀ igha̰ gho̰? Kə̀ chəyi mə̀ ya taŋ chùʼri nyɔd? Kə̀ mə kə icheg bəd inga isəg ne ghàmà tichug tibe tibe? Mbi ya mə̀ gha, “E!” ywìrì nɔ̀ʼ gha “Indèʼ!”

¹⁸ Ŋwiye we ne ghà anug bə̀ fàʼà kyèri gha mo kayi iku wə̀d we. Mə mə̀ gha “Indèʼ!”, à ya ane, mə mə̀ gha “E!” à ya bə̀ ane.

¹⁹ À ya ane ne Yeso Kristo bə yaʼ. Məd ya Ŋwan Ŋwiye we ne mo tì Sìvanòs fɔrɔ Timotì ya ghàmi inən imbə̀ʼ aməd. Chəyi məd we gha “E” ywìrì nɔ̀ʼ gha “Indèʼ.” Məd ya fàʼà inug ijìm ne Ŋwiye kàʼi.

²⁰ Yeso Kristo fə ghì gha inug ijìm mbe ne Ŋwiye kàʼi mbe duwə ane tesiʼ. À ya anjìm məd ne te gha, “À ya ane” anyumə̀ ne te nàʼà ighumni abə Ŋwiye.

²¹ À ya Ŋwiye ghi gha mba tì inən tè təm kà icheg ne tì yaʼi ane ifɔti tì Kristo. À ya məd zɔ̀ʼi awa,

²² bə̀ zì àzi Azwighi inga ina ni chwi gha mba ya bəd məd. Azwighi azo̰ ya aneni ni chwi gha ighi mbe ne Ŋwiye kàʼi ina, wì biri nàʼ ijìm.

²³ Ŋwiye kyèri ìmə fìŋ gha mə̀ ya ghà tesiʼ gha, chəyi mə̀ ya ywirì yèʼe a Kɔrèn icheg ne mə̀ ya kàʼi imbə̀ʼ icheg ne chəyi mə̀ ya kə̀bi ni pè ghàm gaŋ inən, ighəm mɔ̀ʼɔ chìkì ìtən fìŋ.

²⁴ Chəyi azo̰ chwi gha, tì ya nyə̀ŋə̀ awən gha mbə̰ mənyìʼ bḛ inug mɔ̀ʼɔ. Tì ya kə̀bə̀ ni fɔti fàʼ tì inən ni gha ìwən ibḛfiŋ təm kà. Tì mə ghì ane, mbə̰ biri ya taŋ gyènde.