1 Timotì 6 - Ikan feg

Tikə imbə̀ʼ ìbòʼì ne bḛ Kristo

¹ Bəd Kristo mbe ne yaʼi ìbòʼì bèrì ni ya taŋ ghùmnə ìmbɔb mə̀mbaʼ àfàʼì ni ghì gha imbə̀ʼ bəd mbe ne chəyi mbi bḛ Kristo si nɔ̀ʼ bèrì anug tibɔ̀ŋ mɔ̀ʼɔ ni ghàm imbə̀ʼ Ŋwiye fɔrɔ imbə̀ʼ ikən chɔm we ne te chwìte.

² Imbə̀ʼ ìbòʼì mbe ne beri mə̀mbaʼ àfàʼì ne bḛ Kristo si wèghè awɔb mə̀mbaʼ àfàʼì mbe imbə̀ʼ icheg ne mbɔb tì inɔb ya bəd Kristo. Mbɔb bèrì ni fàʼ inɔb kwàʼ icheg chɔm, chè icheg ne tì mbi fàʼ abə mə̀mbaʼ àfàʼì mbe ne chəyi mbi bḛ Kristo. Mbɔb bèrì ni ghì ane imbə̀ʼ icheg ne bəd mbe ne jə̀ghə chùd ane àzɔb àfàʼì ya bəd ne bḛ Kristo bə̀ yaʼ bəd ne mbɔb taŋ kɔ̀ŋ. Aŋa ya inug ne àghò beri ni taŋ zì atog ni chwiti abə bəd gha mbe ya fàʼà.

Ipati imbə̀ʼ bəd ne chwìte inug ako

³ Wə̀d mɔ̀ʼɔ mə̀ ya chwìte inug ne kɔpɔ igun mbo̰, ne chəyi wì bḛ ìngam tesiʼ we ne Anɔŋisəg Yeso Kristo ya gha, ne chəyi wì bə bḛ inug mbe ne mba mbe chwìte imbə̀ʼ icheg ne bəd Kristo koʼi ni chughi,

⁴ tengàŋ ya wə̀d ne nɔ̀ nyɔd ne chəyi wì kyèri anug mɔ̀ʼɔ. Tengàŋ bèrì fìŋ tibɔ̀ŋ. Fìŋ tibɔ̀ŋ ze ya ghìyə̀ gha wì ya chɔ̀bɔ bə̀ tàŋa aton ane tìngam ako mɔ̀ʼɔ. Achɔb tì inug mbe ne mbɔb mbe tàŋà ya yèʼe tì àdeg fɔrɔ àzɔ̀ŋì, bə̀ yèʼe tì anug ni ghàm inug tibɔ̀ŋ igun bəd ndəŋ fɔrɔ anug ni ya kɔ̀ndɔ inug tibɔ̀ŋ imbə̀ʼ bəd ndəŋ.

⁵ Inug mbe ya ghìyə̀ gha achɔb ya zàmbà dùwə̀ inga bəd ne chəyi mbi beri fìŋ chɔm fɔrɔ inga bəd mbe ne chəyi mbe ghà inug tesiʼ. Bəd inug ako mbo̰ ya kɔ̀ndɔ gha anug Ŋwiye ya inɔnjì ne tì mbi chè angu bèrì ikab.

⁶ Chùd kyen ya anyumə̀ ne wə̀d nɔŋi fiŋ ane anug Ŋwiye bə̀ niŋ gha ighi mbe ne zìye beri mbe kòʼ yi ini.

⁷ À ya ane imbə̀ʼ icheg ne chəyi tì ya yeʼe igun isəg aŋa tì aghi mɔ̀ʼɔ, chəyi tì biri bə niŋ aghi mɔ̀ʼɔ ghò tì àzewən .

⁸ Ane, tì mə bèrì tijəg fɔrɔ ndwi, mbe kòʼ yi ina.

⁹ Tesiʼ ya gha, bəd mbe ne kə̀bə̀ ni bèrì ikab nɔʼ nɔʼ ya nyḭ̀yḛ inga ìkwàʼrì bə̀ fḛ inga atam ne ghìyə̀ gha mbɔb se ghìyə̀ inug anen nɔʼ nɔʼ bə̀ ghìyə̀ inug tibɔ̀ŋ mbe ne mbɔb mbe ghə̀ʼrə̀. Inug mbe ya chìkə̀ awɔb bə̀ nìmne awɔb.

¹⁰ À ya ane imbə̀ʼ icheg ne anug ni taŋ kɔ̀ŋ ikab ya aghi ne ghìyə̀ bəd fàʼà tiku inug tibɔ̀ŋ ijìm. À ya anug ni noto abɔ̀ʼ ikab ze ghìyə̀ gha bəd nɔʼ nɔʼ waʼ ìwɔb ibḛfiŋ, se zə̰ aku ngəʼ ndan ndàn ne zìyè ibəʼ inɔb inga fìŋ.

Pɔl kə Timotì

¹¹ Àsi awe, àghò wə̀d àfàʼì Ŋwiye, àghò fə chìye ìfe ifeg ane inug mbo̰ ijìm. Àghò ghiyə yaʼ inug mbe ne koʼi bə̀ ghì yaʼ inug mbe ne Ŋwiye kə̀bi. Àghò nɔŋɔ fìŋ igun Kristo, ya kɔ̀ŋɔ̀ bəd, ya nyìʼè inug bə̀ ya bɔ̀tɔ ane fìŋ.

¹² Àghò taŋ zɔ̀ŋ icheg chɔm ni tàŋì ibḛfiŋ we ne àghò nɔŋi igun Kristo imbə̀ʼ jəg ìtḛ̀ ighə̀m imɔʼ. Ŋwiye ya kàrì awe gha àghò jəg ìtḛ̀ we anyumə̀ ne àghò ya gha imbìghè abə bəd nɔʼ nɔʼ gha àghò bḛ Kristo.

¹³ Mə ya anìŋ ghàmà ine imbìghè abə Ŋwiye we ne nàʼà ìtḛ̀ abə ighi ijìm fɔrɔ imbìghè abə Yeso Kristo we ne ya gha tesiʼ imbìghè abə Pɔntiyos Payilèd. Anug ne mə ghà ine ya gha,

¹⁴ àghò ya ghìyə̀ inug ijìm mbe ne Ŋwiye kə̀bi ghò pè ane aneg ne Anɔŋisəg Yeso Kristo biri ywiri yeʼe. Àghò mə ghì ane, chəyi wə̀d mɔ̀ʼɔ biri bèrì anug tibɔ̀ŋ mɔ̀ʼɔ ni ghà imbə̀ʼ awe, kə̀ bə̀ zì anug mɔ̀ʼɔ igun ine.

¹⁵ Nyùmə̀ mə kòʼ, Ŋwiye we ne bəd mbe ghùmnə biri ghì Kristo yèʼe. À ya məyi məd yaʼi Atumbisəg ne yaʼi Ifɔn abə məfɔn bə̀ yaʼ Anɔŋisəg abə itog bəd ijìm.

¹⁶ À ya məyi məd we imɔʼ ne chəyi wì biri nɔʼ ku. Məd ya chùghə inga ìzḛzḛ we ne chəyi aneg ne tì wə̀d tìndi iban. Chəyi wə̀d mɔ̀ʼɔ kweʼì bàd aməd. Chəyi wə̀d mɔ̀ʼɔ biri nɔʼ bàd aməd. Bəd igun isəg ijìm ghumni aməd, məd bə tùmbì isəg ane ika we ne yaʼi ane ighə̀m imɔʼ. À ya ane.

¹⁷ Àsi abə bəd ikab mbe ne yaʼi igun isəg gho̰, ghà inɔb gha, imbə̀ʼ mbi nɔ awɔb nyɔd, kə̀ bì nɔ̀ŋì ìwɔb ikɔndi igun ikab we ne chè yi che. Mbe nɔŋɔ ikɔndi yaʼ igun Ŋwiye we ne nàʼà ighi ina abu abu. Məd ya nàʼà ighi ina ni gha tì chughi icheg chɔm.

¹⁸ Àghò gha inɔb gha mbɔb ya ghìyə̀ ìchɔ̀mì abə bəd, sàŋna tì bəd, bə̀ nàʼà ighi abə bəd ne chəyi àzɔb.

¹⁹ Mbɔb mə̀ ya ghìyə̀ inug mbo̰, nji mbɔb fə zèg ati nəb ne ka ane ighi mbe ne mbɔb biri bèrì inga nyùmə̀ isəg we ne yèʼe. Mbɔb biri bə jəg ìtḛ̀ we ne yaʼi ìtḛ̀ tesiʼ.

²⁰ Àghò Timotì, taŋ nyìmi inug mbe ne Ŋwiye zi inga ìte tikye abo. Imbə̀ʼ àghò ziye awe atog ane tìngam te ne chəyi ti beri anug ni ghì tì Ŋwiye. Imbə̀ʼ àghò ziye awe atog igun tìngam mɔ̀ʼɔ te ne bəd mbe ne kɔ̀ŋɔ̀ ni ya tàŋà inug mbe ghà gha à ya inug iwe ne kayi inug iwe.

²¹ Bəd mɔ̀ʼɔ mbe ghà gha mbɔb bèrì iwe. Ikuchèg we fə ghì gha mbɔb wàʼ ibḛfiŋ we ne mbɔb ya bì bèrì. Ŋwiye ghiyə ìchɔ̀mì inən mbə̰ məjìm.