1 Timotì 5 - Ikan feg

Tikə imbə̀ʼ bəd inga ifeti bəd Kristo

¹ Imbə̀ʼ àghò ya ghàmà awe kyen abə mbaŋà ne ya wə̀d kyen ine. Àghò ya nàʼà tikə ibo bɔ̀tɔ ane gì icheg ni gha àghò ya ghàmà abə ìwe mbaʼ. Àghò ya ghìyə̀ inug tì bɔn ijɔŋ icheg ni gha mbɔb ya ìmbe məfi.

² Àghò ya ghìyə̀ inug tì mə̀yi mbe ne yaʼi bəd kyen ine icheg ni gha mbɔb ya ìmbe mbì ngɔb. Àghò ya bə̀ ghìyə̀ inug inga ìzḛzḛ tì bɔn àyi icheg ni gha mbɔb ya ìte njàbi.

Tikə imbə̀ʼ məku àyi

³ Àghò ya ghùmnə məku àyi mbe ne chəyi wə̀d ne nə̀ngə awɔb.

⁴ Si ya gha, iku-àyi mə̀ bèrì bɔn kə̀ wì mə bèrì bɔn ane bɔn, bɔn mbe kə̀ bɔn ane bɔn mbe bèrì ni bi nani ni ghì anug abə ìwɔb inəbi ane icheg ne Ŋwiye kə̀bi. Ane, mbɔb biri ywìtì ìchɔ̀mì abə ìmbɔb mə̀mbaʼ fɔrɔ abə ìmbɔb mə̀mbaʼ kyen. Mbɔb ya ghìyə̀ ane imbə̀ʼ icheg ne à ya anug ne bɔŋi abə Ŋwiye.

⁵ Iku àyi ne chəyi wə̀d ni nəngi aməd, ne chùghə tèzìʼì, wì fə nɔ̀ŋì ìwi ikɔndi ijìm igun Ŋwiye. Məd ya chè imbìghè ni ya nɔ̰ ìmbi ighi abə Ŋwiye bə̀ chàʼrà Ŋwiye dèghè inug ibo tizimi fɔrɔ tisi.

⁶ Àsi iku-àyi ne jə̀ghə isəg, wì fə ku, ka məd we kiri yi izɔm.

⁷ Chwiti inug mbo̰ abə bəd ni ghì gha imbə̀ʼ wə̀d mɔ̀ʼɔ nɔ̀ʼ bèrì anug tibɔ̀ŋ mɔ̀ʼɔ ni gha igun inɔb.

⁸ Wə̀d mə to̰ yi ni wètì ìmbi ifud, ako ako bəd mbe ne yaʼi inəbi məd, tengàŋ fə waʼ ìwi ibḛfiŋ. Iku wə̀d we bə chè wə̀d ne chəyi wì bḛ Kristo.

⁹ Imbə̀ʼ àghò ŋwaʼra awe ikum iku-àyi abɔ̀ʼ tikum məku àyi mbe ne tì mbi wètì awɔb, kirənde wì fə pè icheg tituʼ ìghum tìfughə. Wì bèrì ne yaʼ iku-àyi ne ya nami məyi inɔm imɔʼ.

¹⁰ Bəd bèrì ni kyeri aməd ane inug chɔm məd. Wì bèrì ni yaʼ àyi ne nḛ ìmbi bɔn icheg chɔm, àyi ne nìŋə bəd ibo inga achan, bə̀ yaʼ àyi ne sò ighog abə bəd Ŋwiye. Wì bèrì ni yaʼ àyi ne wète bəd mbe ne yaʼi inga ngəʼ, bə̀ yaʼ àyi ne nàʼà ìwi nyɔd ane anug ni ghì inug chɔm ane tiku inɔnjì ijìm.

¹¹ Imbə̀ʼ àghò ŋwaʼra awe tikum məku àyi mbe ne chəyi mbi kiri pè icheg tituʼ ìghum tìfughə. À ya ane imbə̀ʼ icheg ne inug mbe ne ìtɔb nyàmnyɔd te ghə̀ʼrə̀ biri ghì gha mbe kə̀bə̀ ni ywìri nam awɔb. Ane, si wàʼ anug ni fàʼ abə Kristo.

¹² Mbi mə̀ to ghì ane, Ŋwiye biri saʼ awɔb imbə̀ʼ icheg ne mbi fə waʼ anug ze ne mbi ya fə bi kàʼ ni fàʼ abə Ŋwiye.

¹³ Kayi məyi aze, mbi biri kwembi anug ni ghì igwed. Mbi biri bə ko ŋa nyìte nəb. Kayi məyi anug ni ghì igwed, mbi biri ko ŋa ghìyə̀ mbinìghe bə̀ ko se zìyè ichug inga inug mbe ne chəyi mbi zi awɔb. Mbi biri bə ko se ghà inug ne chəyi mbi kə beri ni ghà.

¹⁴ Ane, mə we nàʼà ikə abə məku àyi mbe ne chəyi mbi kiri nṵ gha, mbe ywiri nam, gwi bɔn, kyèʼì bəd mbe ne yaʼi inga nəb tì inɔb. Mbe ghiyə ane ni gha imbə̀ʼ bəd ìpàb nɔ̀ʼ bèrì apan ni ghà inug tibɔ̀ŋ igun ina.

¹⁵ Tesiʼ ya gha, məku àyi mɔ̀ʼɔ fə fèbè se bène abɔ̀ʼ Sàtàn.

¹⁶ Àyi we ne bḛ Kristo mə̀ bèrì ìmbi ifud mɔ̀ʼɔ ne yaʼi məku àyi, wì bèrì ni wètì awɔb. Imbə̀ʼ wì sàŋa yi gha ifeti bəd Kristo beʼe mbèʼ ze. Ze yaʼ ane imbə̀ʼ icheg ne ifeti bəd Kristo we wètè yaʼ məku àyi mbe ne chəyi bəd ne tì mbi wètì awɔb.

Tikə imbə̀ʼ itog bəd inga ifeti bəd Kristo

¹⁷ Àghò nḛ gha bəd mbe nàʼà ighumni abə itog bəd mbe ne chà ifeti bəd Kristo bə̀ taŋ nàʼà ìwɔb ichɔʼ àfàʼì inɔb, ako ako ya bəd mbe ne taŋ fàʼà ni ghà Ìngam Ŋwiye bə̀ fɔrɔ ni chwìti inug imbə̀ʼ Kristo abə bəd.

¹⁸ A ze inga Àŋwàʼrì Ŋwiye gha, “Imbə̀ʼ àghò kɔd awe ichug abə nyam gha imbə̀ʼ zì kud yi kyì ane nyùmə̀ ne ze tə̀ʼrə̀ kyì kwètè.” A ze bə̀ inga Àŋwàʼrì Ŋwiye gha, “Mbi beri ni nàʼ chùd abə wə̀d àfàʼì.”

¹⁹ Imbə̀ʼ àghò bḛ awe gha mbe ziye isaʼi igun atog wə̀d mɔ̀ʼɔ abɔ̀ʼ mbe ne chà ifeti, kirənde bəd ndəŋ məbe kə̀ mətad yeʼe tì isaʼi we icheg bəd ne bari ati.

²⁰ Bəd mɔ̀ʼɔ mə̀ ya ghìyə̀ inug tibɔ̀ŋ ne chəyi mbi bḛ ni bə̀ŋì ìtɔb fìŋ, àghò ghama gaŋ inɔb imbìghè abə bəd Kristo məjìm, ni ghì gha àbùʼì bəd bɔ ni ywìri ghì inug tibɔ̀ŋ.

²¹ Mə ya anìŋ ghà ine imbìghè abə Ŋwiye tì imbìghè abə Yeso Kristo fɔrɔ imbìghè abə mbè angirə̀ mbe ne Ŋwiye chɔ̀ʼi gha, àghò nɔŋɔ tikə ìto̰ ne mə̀ nàʼi ine witì ghì ighə, kə̀ ni chwi gha àghò kɔ̀ŋ wə̀d mɔ̀ʼɔ icha chè ìywin.

²² Imbə̀ʼ àghò kə nyə̀ngə awe ni nɔ̀ŋì ìmbe ibo igun bəd ni zɔʼ awɔb ane bəd ne chà ifeti bəd Kristo. Imbə̀ʼ àghò ziye awe abo inga inug tibɔ̀ŋ bəd ndəŋ. Nɔŋɔ ìwe nyɔd gha we chughi inga ìzḛzḛ.

²³ Imbə̀ʼ àghò bə no awe məyi mənib. Àghò ya no mənoʼ iki piʼì imbə̀ʼ ìfe fibum fe ne nḛ kə nàʼà ngəʼ inga fɔrɔ imbə̀ʼ ighɔn ndəŋ mbe ne sàʼà nàʼà ngəʼ ine.

²⁴ Inug tibɔ̀ŋ bəd mɔ̀ʼɔ mbe asaŋ asaŋ ne bəd mbe bàrà. Inug tibɔ̀ŋ mbe fə dù zen chwi gha mbɔb fə gùg isaʼi bɔŋ mbi bi se sàʼa awɔb. Inug tibɔ̀ŋ bəd ndəŋ biri dù asaŋ ane agha to sàrì.

²⁵ À ya bə̀ ane ne bəd mbe bàrà inug chɔm mbe ne bəd mbe ghìyə̀. Ka à ya bèyi inug chɔm mbe ne chəyi bəd mbe bàrà, chəyi tì mbi chughi witì mbi dù asaŋ bəd bàd.