1 Timotì 3 - Ikan feg

Itog bəd inga ifeti bəd Kristo

¹ Ajiʼi anug ne tì beri ni niŋ ya gha: Wə̀d ne kə̀bi ni yaʼ atog wə̀d igun bəd Kristo, tengàŋ nɔ̀ŋì fìŋ ane àfàʼì ne beri ighumni.

² Ane, atog wə̀d igun bəd Kristo bèrì ni yaʼ wə̀d ne chəyi bəd mbe ghàmbà aməd. Tengàŋ bèrì ni nam məyi àyi imɔ̀ʼ. Wì bèrì ni yaʼ wə̀d ne kɔ̀ŋɔ̀ gha bəd ya chùghə ane àbɔrɔ̀bɔd. Wì bèrì ni kyeri icheg ni nyimbi nyɔd. Wì bèrì ni ya ghùmnə ìwi nyɔd. Wì bèrì ni yaʼ wə̀d ne kɔ̀ŋɔ̀ anug ni niŋ bəd tìsɔ̀ʼ ibo inga nəb. Wì bə̀ bèrì ni kyeri icheg ni chwiti inug abə bəd.

³ Imbə̀ʼ tengàŋ yaʼ yi wə̀d ne no mənoʼ be. Imbə̀ʼ wì yaʼ yi wə̀d ne kɔ̀ŋɔ̀ àzɔ̀ŋì. Wì bèrì ni yaʼ wə̀d ne bɔ̀tɔ, kayi wə̀d ne kɔ̀ŋɔ̀ ni tàŋ inug tì bəd. Imbə̀ʼ wì yaʼ yi wə̀d ne beri adɔʼ ikab.

⁴ Wì bèrì ni kyeri icheg ni nyimi bəd məjìm mbe ne chùghə ibo inga nəb. Wì bèrì ni ghì gha bɔn məd ya zùgrə aməd bə̀ ghùmnə aməd ane inug ijìm.

⁵ Àkə mə̀ chəyi wə̀d kyèri icheg ni nyimi bəd ne chùghə ibo inga nəb, wì kə si kyèri icheg ni nyimi ifeti bəd Ŋwiye iye?

⁶ Imbə̀ʼ tengàŋ yaʼ yi wə̀d ne cherè bḛ Kristo, nji wì biri se nɔ̀ nyɔd. Ane, Ŋwiye biri chə aməd icheg ne wì ya bə chə Debrə̀.

⁷ Məd bèrì ni yaʼ wə̀d ne bəd mbe ne kayi bəd Kristo mbe ghà inug chɔm imbə̀ʼ aməd. Ane, chəyi wì biri ya bèrè tìnìrètog. Chəyi wì biri bə fen inga atam Debrə̀.

Bəd ne wètè àfàʼì inga ifeti bəd Kristo

⁸ Bəd mbe ne wètè àfàʼì inga ifeti bəd Kristo bèrì ni yaʼ bəd ne bəd ndəŋ mbe bə̀ ghùmnə awɔb. Mbɔb bèrì ni yaʼ bəd ne tə̀mə igun tesiʼ. Imbə̀ʼ mbɔb yaʼ awɔb bəd ne ghàmà tìngam ibe ibe. Imbə̀ʼ mbɔb yaʼ awɔb bəd ne zìyè atog ane anug mənoʼ. Imbə̀ʼ mbɔb yaʼ awɔb bəd ne zìyè adɔʼ ane anug ikab.

⁹ Mbɔb bèrì ni nyimi tesiʼ we ne Ŋwiye ghi bəd məjìm kyeri. Mbɔb mənyìʼ ya ghìyə̀ ane tì fìŋ zḛ zḛ.

¹⁰ Bəd mbe ne ya fə bḛ Kristo mənyìʼ zwèʼri awɔb. Mbə̰ mə̀ zwèʼri awɔb zən gha chəyi anug tibɔ̀ŋ mɔ̀ʼɔ inga inɔb, mbə sàŋì mbi wètì àfàʼì inga ifeti bəd Kristo.

¹¹ À ya bə̀ ane ne, ìmbɔb mə̀yi bèrì ni yaʼ mə̀yi ne bəd mbe ghùmnə. Kayi mə̀yi ne chìkə̀ tikum bəd. Ìmbɔb mə̀yi bèrì ni yaʼ mə̀yi ne kɔ̀ŋɔ̀ ni ghì gha bəd chughi ane àbɔrɔ̀bɔd. Ìmbɔb mə̀yi bèrì ni bə yaʼ mə̀yi ne tì bəd nɔ̀ŋì fìŋ igun inɔb ane inug ijìm.

¹² Mbaŋà ze ne wètè àfàʼì inga ifeti bəd Kristo mənyìʼ bèrì àyi məyi imɔʼ bə̀ kyèri icheg ni nyimi ìmbi bɔn bə̀ nyìmi bəd mbe ne chùghə ibo inga nəb.

¹³ Bəd ne fàʼà inga ifeti bəd Kristo mə fàʼ icheg chɔm, bəd biri ya ghùmnə awɔb. Mbɔb biri ya ghàmà inug imbə̀ʼ ìwɔb ibḛfiŋ igun Yeso Kristo ne chəyi mbɔb mbe bɔ.

Aton ne Pɔl ŋwàʼri àŋwàʼrì azo̰

¹⁴ Ka mə we jiʼè kɔ̀ndɔ ni zàmbì yeʼe zə̰ awe, mə ya kiri ŋwàʼrà inug mbo̰ ine.

¹⁵ Mə ya ŋwàʼrà ni gha mə mə̀ tàn ni yeʼe, àghò biri kyeri icheg ne bəd Kristo beri ni fàʼ inug inga ifeti bəd Ŋwiye. Ifeti gho̰ ya ifeti bəd Ŋwiye we ne yaʼi izɔm. Mbɔb nyimi tesiʼ kwàʼ icheg ne ìte fɔrɔ ati nəb mbe bə̀ nyìme nəb.

¹⁶ Ze fə dù zen gha anug ne ya yaʼi inə̀mbi, azo̰ Ŋwiye fə ghi tì kyèri. À ya kwàʼ anug ne faŋi. Anug ze ya gha: Yeso ya yeʼe igun isəg icheg wə̀d-aku. Azwighi Ŋwiye ya gha məd we ghìyə̀ inug ne təmi kòʼ. Mbè angirə̀ ya bàd aməd. Bəd ya chètì inug imbə̀ʼ aməd inga iben ijìm. Bəd inga iben ijìm igun isəg ya nɔ̀ŋì ibḛfiŋ igun məd. Ŋwiye ya niŋ aməd ikaŋ nàʼ ighumni ibo.