1 Timotì 1 - Ikan feg

¹ À ya mo Pɔl ŋwàʼri àŋwàʼrì azo̰. Mə ya ŋwàʼrà anìŋ icheg wə̀dtɔm Kristo ne Ŋwiye ne yaʼi ìwa Mbaʼ ne pùmnə awa tì Yeso Kristo ne tì nɔŋi ìwa ikɔndi igun, mbi chɔʼi amə.

² Mə ŋwàʼrì anìŋ ine àghò Timotì ìmə ŋwan chɔm icheg ne tì nɔŋi ibḛfiŋ igun Kristo. Ŋwiye ne yaʼi Mbaʼ fɔrɔ Yeso Kristo ìwa Anɔŋisəg ghiyə ìchɔ̀mì ine, bə̀ chwi àsɔ̀mnəfiŋ ine, bə̀ ghì àghò chughi ane àbɔrɔ̀bɔd.

Wə̀d pata yi imbə̀ʼ bəd ne chwìte inug ako

³ Mə ya ghà ine anyumə̀ ne mə̀ yaya ghò a Màsèdonìyà gha àghò chughi a Efesùs ni ghì gha imbə̀ʼ bəd mɔ̀ʼɔ ywiri chwiti awɔb tikə tibɔ̀ŋ abə bəd.

⁴ Gha inɔb gha imbə̀ʼ mbi ziye awɔb atog igun tìmùghì ako fɔrɔ igun inug imbə̀ʼ tiwaŋ inəbi ne chəyi ìnwḭ. Inug mbo̰ ya zìyè yaʼ àbùrì inga bəd. Chəyi iku inug mbo̰ mbe ghìyə̀ gha bəd kyeri inug mbe ne Ŋwiye kə̀bi. À ya məyi anjìm ibḛfiŋ ne bəd biri kyeri inug mbe ne Ŋwiye kə̀bi.

⁵ Aton ne mə ghà inug mbo̰ ya ni ghì gha bəd Kristo chughi ane àkɔ̀ŋì. Àkɔ̀ŋì ze bèrì ni ya dùwə̀ inga fìŋ chɔm tì fìŋ ne zḛ fɔrɔ inga fìŋ ne bḛ Ŋwiye kwàʼ icheg chɔm.

⁶ Bəd mɔ̀ʼɔ fə waʼ inug mbe ne mbi koʼi ni ya chètè, se chètè yaʼ tìngam ako ne chəyi aton.

⁷ Mbɔb ya kə̀bə̀ ni yaʼ bəd ne chwìte mə̀nɔ̀ʼɔ̀ Muse. Si ya gha, chəyi mbɔb kyeri anug ne mə̀nɔ̀ʼɔ̀ mbe ghà, kə̀ bì kyèri anug ne mə̀nɔ̀ʼɔ̀ kə̀bi gha bəd kyeri.

⁸ Tè kyèri gha mə̀nɔ̀ʼɔ̀ Muse bɔ̀ŋ anyumə̀ ne tì nyimi ane icheg ne koʼi.

⁹ Tè bə̀ kyèri gha chəyi mə̀nɔ̀ʼɔ̀ ya yaʼi abə bəd mbe ne təmi kòʼ. Mbi ya yaʼ abə bəd mbe ne gùghə̀ mə̀nɔ̀ʼɔ̀, bəd ne ghìyə̀ tìzughə̀, bəd ne chəyi mbe ghùmnə Ŋwiye, bəd ne ghìyə̀ inug tibɔ̀ŋ, bəd ne chəyi mbi zḛ, fɔrɔ abə bəd ne chəyi awɔb ane anug Ŋwiye. Mə̀nɔ̀ʼɔ̀ ya abə bəd ne zwète ìmbɔb mə̀mbaʼ fɔrɔ ìmbɔb mbì ngɔb, fɔrɔ abə bəd mbe ne zwète bəd.

¹⁰ Mə̀nɔ̀ʼɔ̀ ya bə̀ yaʼ abə bəd ne ghìyə̀ ifanì inug tì izṵ inug tì bəd ne fèndè bəd tì bəd ne ghàmà inug ako, tì bəd ne zɔ̀mɔ̀ nyɔd kiri gha anug ako, fɔrɔ bəd ne ghìyə̀ tiku inug ndəŋ ne chəyi mbi koʼi tì tikə Ŋwiye.

¹¹ Tì we tì tì bàd tikə Ŋwiye ìto̰ inga ikən chɔm we ne Ŋwiye zi inum ikye abo. Məd ya Ŋwiye we ne bəd mbe yète bə̀ ghùmnə.

Pɔl nàʼ məyakà abə Yeso Kristo

¹² Mə nàʼ məyakà abə Yeso Kristo, ìwa Anɔŋisəg ne nàʼi ika inum. Wì ya niŋ gha mə kòʼ, chɔʼ amə gha mə̀ faʼa ibo.

¹³ Ka mə yaya chɔ̀ʼɔ ibɔʼì ighog abə bəd Kristo, bə̀ kaʼa inug ako zìyè igun inɔb, bə̀ kìghə̀ inug, Ŋwiye ya chwi àsɔ̀mnəfiŋ inum. Aton ya gha, mə yaya ghìyə̀ inug mbe abəŋ fɔrɔ imbə̀ʼ icheg ne chəyi mə̀ ya nɔŋi ibḛfiŋ igun Kristo.

¹⁴ Ìwa Anɔŋisəg Yeso ya taŋ ghì ìchɔ̀mì inum bə̀ ghì mə bèrì ibḛfiŋ igun Ŋwiye bə̀ ghì mə se kɔ̀ŋɔ̀ ìmba məfi ne tì yaʼi ane ifɔti tì məd.

¹⁵ Ajiʼi anug ne wə̀d ijìm kòʼi ni niŋ ya gha; Yeso Kristo ya yeʼe igun isəg ni pumni bəd inug tibɔ̀ŋ. Inga bəd inug tibɔ̀ŋ məjìm, mo ya wə̀d ne bə chè.

¹⁶ Ŋwiye ya chwi àsɔ̀mnəfiŋ inum, mo wə̀d inug tibɔ̀ŋ ne bə chè, ni ghì gha Yeso Kristo chwi ìwi inyimbifiŋ ne chəyi wì beri ìnwḭ. Àzo̰ biri chwi aneni abə bəd mbe ne biri bḛ Yeso, jəg ìtḛ̀ ighə̀m imɔʼ.

¹⁷ Bəd ghumni Ŋwiye imɔʼ ne yaʼi Ifɔn ane ighə̀m imɔʼ, ne chəyi mbe bàrà aməd, ne chəyi wì biri nɔʼ ku. Tè ghumni Ŋwiye we imɔʼ kwàʼ ane ighə̀m imɔʼ. À ya ane.

¹⁸ Mə nàʼ tikə ìto̰ ine àghò Timotì, ìmə ŋwan icheg ne Azwighi Ŋwiye ya nàʼi ika abə bəd Kristo mbi ghàm inug mbo̰ imbə̀ʼ awe. Àghò mə ghì inug mbo̰, àghò we tì àghò zɔŋ chè, təm kà ane ìwe ibḛfiŋ igun Kristo.

¹⁹ Nyimi ìwe ibḛfiŋ bə̀ bèrì fìŋ ne zḛ. Bəd mɔ̀ʼɔ fə waʼ anug ni nɔ̀ŋì ìtɔb fìŋ gha ti ya zḛ, ane chìkì ìwɔb ibḛfiŋ.

²⁰ Bəd mɔ̀ʼɔ abɔ̀ʼ inɔb ya Hemenùs tì Àlèzandà. Mə fə sàŋì awɔb ikye abo abə Sàtàn gha wì chwi inɔb gha chəyi ze bɔŋi ni ghàm inug tibɔ̀ŋ imbə̀ʼ Ŋwiye.