1 Pità 5 - Ikan feg

Tikə abə itog bəd inga nəb Ŋwiye

¹ Mo ne yaʼi atog wə̀d inga ifeti bəd Kristo, mə̀ ya bàd icheg ne Kristo ya zə̰ ngəʼ. Mə biri bə bàd icheg ne Kristo biri ywiri yeʼe inga ighumni məd. Mə ya anìŋ bòʼo ibo abə itog bəd inga ifeti bəd Kristo gha:

² Mbə̀ nəri njə̀g Ŋwiye te ne wì zi inga ìtən tikye abo. Imbə̀ʼ mbə̰ faʼa awən icheg ni gha mbi ya nyə̀mə̀ awən nyəmi. Mbə̀ faʼa tì izən fìŋ ifibì icheg ne Ŋwiye kə̀bi. Mbə̀ faʼa imbə̀ʼ icheg ne mbə̀ kɔŋi ni fàʼ, kayi imbə̀ʼ adɔʼ ikab.

³ Imbə̀ʼ mbə̰ si nyəmə awən bəd mbe ne Ŋwiye zi inga ìtən tikye abo. Mbə̀ bere ikuchèg chɔm ne bəd Kristo biri se mə̀nə̀.

⁴ Anyumə̀ ne Àjənjə̀g kyen biri yeʼe, wì biri nàʼ ichɔʼi àfàʼì njandi njandi ne chəyi wi biri nɔʼ chə̀.

⁵ Ngwàʼ bɔd, mbə̀ ya zùgrə bəd kyen. Mbə̀ swi ìwən nyɔd aseg, fàʼ tì məfi mbin. A ze inga Àŋwàʼrì Ŋwiye gha: Ŋwiye ya to̰ bəd mbe ne nɔ̀ nyɔd, se ghìyə̀ ìchɔ̀mì yaʼ abə bəd mbe ne swìye ìwɔb nyɔd aseg.

⁶ Ane mbə̀ swi ìwən nyɔd aton ika Ŋwiye imbə̀ʼ nyumə̀ mə kòʼ, wì nɔ awən ikaŋ.

⁷ Mbə̀ ziye inug ijìm mbe ne nàʼà ngəʼ inən inga ikye abo Ŋwiye imbə̀ʼ icheg ne à ya məd we nə̀rə awən.

⁸ Mbə̀ ya nyìmbe ìwən nyɔd bə̀ chùghə ikyèʼi. Mbə̀ kyeri gha Debrə̀ ne yaʼi ìwən wə̀d ìpàb we ŋa yḛ̀ icheg àfɔn ne nè kùmə̀, kə̀bə̀ wə̀d ne wì biri sètì anyam anyam.

⁹ Imbə̀ʼ mbə̰ bḛ awən gha ìwən ibḛfiŋ we bɔd. Mbə̀ paŋa ìwən nyɔd ibo ikye abo. Mbə̀ kyeri gha ìmbən məfi fɔrɔ ìtən njàbi inga isəg ijìm ne mbə̀ yaʼ ane ifɔti tì Kristo, mbɔb mbe bə̀ chè inga tiku ngəʼ ìto̰.

¹⁰ Anyumə̀ ne mbə̰ mbe zə̰ ngəʼ anìŋ ane iki nyumə̀ mɔ̀ʼɔ, Ŋwiye we ne ghìyə̀ ìchɔ̀mì abə wə̀d ijìm, wì bìri ywiri tangi inug ijìm inən. Wì biri ghì gha ìwən ibḛfiŋ təm kà bə̀ ghì mbə yaʼ ika ika bə̀ təm kòʼ. À ya məd ya che anjìm Kristo kàrì awən gha mbə̀ yaʼ ane ifɔti tì Kristo inga ìzḛzḛ məd we ne biri yaʼ ane ighə̀m imɔʼ.

¹¹ Ika ijìm yaʼ ìwi məd kwàʼ ane ighə̀m imɔʼ. À ya ane.

Ichaʼri ne si nwìyḛ̀

¹² À ya Sayilàs wèti amə ni ŋwàʼrì iki ìngam gho̰ ne mo we chà inən. Məd ya kwàʼ ìwa ifi ne taŋ zì ibḛfiŋ igun Kristo. Àŋwàʼrì azo̰ ya ni nəri awən bə̀ bḛ gha aŋa ya kwàʼ ìchɔ̀mì tesiʼ ne Ŋwiye ghi inən. Mbə̀ təm kà inga ìchɔ̀mì we.

¹³ Ifeti bəd Kristo we a Babilɔ̀n we chàʼrà awən. À ya Ŋwiye ya bə̀ chɔʼ awɔb. Mag ne yaʼi ìmə ŋwan inga anug Kristo we bə̀ chàʼrà awən.

¹⁴ Mbə̀ chaʼra wə̀d imɔʼ imɔʼ kwàʼ icheg chɔm, ane, chwi àkɔ̀ŋì ze ne bəd Kristo beri. Ŋwiye ghiyə mbə̰ məjìm mbe ne yaʼi ane ifɔti tì Kristo mbə̀ chughi ane àbɔrɔ̀bɔd.