1 Pità 3 - Ikan feg

Mə̀yi tì ìmbɔb mənɔm

¹ Mə̀yi, mbə̀ swi ìwən nyɔd aseg zùgri ìmbən mənɔm. Àze biri ghì gha ìmbən mənɔm mbe ne chəyi mbi kiri bḛ Ìngam Ŋwiye, mbi biri bḛ anjìm ikuchèg chɔm ne mbə̀ beri.

² Mbi biri bḛ anyumə̀ ne mbi bari icheg ne ìwən ikuchèg zḛ fɔrɔ icheg ne mbə̰ mbe zùgrə awɔb.

³ Imbə̀ʼ mbə̰ ghiyə awən ngwèn məyi igun nyɔd; icheg ni tangi atog kə̀ ni zì ndəŋ fɔrɔ ighi àtɔ̀ŋi gol, kə̀ ni zì ndwi chɔm chɔm.

⁴ Mbə̀ ghiyə ìzən ngwèn zì yaʼ anug ni nɔ̀ŋì ìtən fìŋ te zen bə̀ ya bɔ̀tɔ, bə̀ chùghi inyeʼ. Aŋa ya ikuchèg ne mbə̰ mə fə bèrì bə̀ nyìmi ze biri taŋ bɔ̀ŋ imbìghè abə Ŋwiye.

⁵ Aŋa ya icheg ne mə̀yi mbe ne ya nɔŋi ìwɔb ikɔndi igun Ŋwiye inga ineg mbe te aneg yaya ghìyə̀ ngwèn. Mbi yaya swìye ìwɔb nyɔd aseg zùgrə ìmbɔb mənɔm.

⁶ Mbə̀ yaʼ icheg Sèra, iweg Abràham. Sèra yaya zùgrə ìwi inɔm, se kàrà aməd ane Masà. Mbə̰ mə̀ ghì inug ne koʼi ane icheg ne chəyi mbə̰ mbe bɔ aghi mɔ̀ʼɔ, mbə̰ biri yaʼ bɔn ìmbi Sèra.

⁷ Mbaŋà, à ya bə̀ ane ne mbə̀ beri ni chughi ane ikuchèg ne koʼi tì ìmbən mə̀yi, ya nyìmbe fìŋ tì inɔb. Mbə̀ ya ghìyə̀ ane imbə̀ʼ icheg ne mbə̰ kyeri gha mbɔb bɔd chè awən. Mbə̀ ghumni awɔb imbə̀ʼ icheg ne mbɔb bə̀ bèrì ati abɔ̀ʼ inən ni jəg ìtḛ̀ we ne Ŋwiye ghi ìchɔ̀mì nàʼ. Mbə̀ ya ghìyə̀ ane ni gha imbə̀ʼ anug mɔ̀ʼɔ nɔ̀ʼ kən ìwən ichaʼri Ŋwiye.

Anug ni ghì ìchɔ̀mì zə̰ ngəʼ

⁸ Ni nwḭ̀yḛ̀, mbə̀ məjìm chughi ane anug amɔʼ. Mbə̀ ya bèrè àsɔ̀mnəfiŋ igun mə̀mbin. Mbə̀ ya kɔ̀ŋɔ̀ ìwən nyɔd icheg məfi. Mbə̀ ya swìye nyɔd aseg bə̀ bèrè fìŋ chɔm igun mə̀mbin.

⁹ Imbə̀ʼ mbə̰ si ywìye awən anug tibɔ̀ŋ igun anug tibɔ̀ŋ, kə̀ zɔ̀mbì wə̀d ne zɔmbi awən. Wə̀d mə ghì anug tìbɔŋ inən, mbə̀ ghiyə yaʼ anug chɔm abə tengàŋ. Wə̀d mə zì ndɔ̀n igun inən, mbə̀ ziye yaʼ àbɔrɔ̀bɔd igun tengàŋ. Àbɔrɔ̀bɔd ya aghi ne Ŋwiye ya kàʼi ni nàʼ inən anyumə̀ ne wì ya kàri awən.

¹⁰ A ze inga Àŋwàʼrì Ŋwiye gha, “Wə̀d ne kɔ̀ŋi ni bèrì ìtḛ̀, bə̀ chùghi icheg chɔm, tàndì igun isəg, tengàŋ mənyìʼ chì ìwi ichug ane ìngam tìbɔŋ, bə̀ chì ìwi ichug ane inug ako.

¹¹ Tengàŋ mənyìʼ to̰ inug tìbɔŋ, se fàʼà inug chɔm. Wì mənyìʼ ya kìrə ika ni chughi ane àbɔrɔ̀bɔd tì wə̀d ijìm.

¹² Tesiʼ ya gha, aghə àzi Anɔŋisəg ze chə̀ʼə̀ bəd mbe ne təmi kòʼ. Məd we bə̀ nɔ̀ŋɔ̀ àtɔ̀ŋi ni zug inug ne mbɔb mbe chàʼrà Ŋwiye ghà. Àsi bəd ne ghìyə̀ inug tìbɔŋ, Anɔŋisəg ya gàŋa tì inɔb”.

¹³ Wə̀d ne biri zì anə igun ine ne àghò we zìyè atog ni ghì inug chɔm àkə we?

¹⁴ Ka mbi bì ghì àghò zə̰ ngəʼ anjìm inug chɔm, Ŋwiye biri zì àbɔrɔ̀bɔd igun ine. A ze inga Àŋwàʼrì Ŋwiye gha, “Imbə̀ʼ mbə̰ bɔ awən wə̀d ne sìbè awən. Imbə̀ʼ mbə̰ binde awən ka.”

¹⁵ Si ya gha, mbə̀ ghumni Kristo ane fìŋ ifibì. Məd ya Anɔŋisəg. Mbə̀ chuʼri ìwən nyɔd kyèri gha, mà nyumə̀ ijìm ne mbi biri aton ane ikɔndi we ne mbə̀ beri imbə̀ʼ isu, mbə̰ biri bèrì iywitichùg ni nàʼ.

¹⁶ Anug ne angu ya gha, mbə̀ ywite ichug ane àbɔrɔ̀bɔd tì ighumni. Mbə̀ ghiyə ìtən fìŋ yaʼ ti zḛ zḛ ni gha bəd mbe ne ghàmbà awən imbə̀ʼ ìwən ikuchèg chɔm icheg ne mbə̀ yaʼi ane ifɔti tì Kristo, mbi biri si bèrì tìnìrètog.

¹⁷ Àmə yaʼ aghi ne Ŋwiye kə̀bi, nji ze bɔ̀ŋ ni zən ngəʼ imbə̀ʼ anug chɔm, chè ni zən ngəʼ imbə̀ʼ anug tìbɔŋ ne àghò ghi.

¹⁸ Yeso ya fə zə̰ ngəʼ ane ighə̀m imɔʼ imbə̀ʼ inug tìbɔŋ bəd. Məd ya wə̀d ne təmi kòʼ, si ya gha, wì ya zə̰ ngəʼ atog abə bəd inug tibɔ̀ŋ məjìm. Wì ya ghì ane ni niŋ awən ghò imbìghè abə Ŋwiye. Mbi ya zweti aməd, Azwighi Ŋwiye ghì wì ywirì zwème ane iwu.

¹⁹ À ya Azwighi Ŋwiye ya ghi wì ghò ghàm Ìngam Ŋwiye abə izwighi mbe ne ya yaʼi inga ndəŋ.

²⁰ À ya izwighi bəd mbe te aneg, ne yaya ghìyə̀ tìzughə̀ abə Ŋwiye anyumə̀ ne Ŋwiye yaya nyìme fìŋ ghɔ̀mɔ̀ ne Nwa̰ yaya kɔ̀rɔ abaŋ. Bəd mbe ne Ŋwiye ya pumni awɔb ya məyi bəd ìfàmi mbe ne ya nyi inga abaŋ, nəŋ igun mənib.

²¹ Mənib mbe ya si yaʼ icheg mənib mbo̰ ne mbə̰ mbe nìŋə amad anìŋ ni chwi gha mbə̰ fə pum. Anyumə̀ ne mbə̰ mbe nìŋə mənib, à ya kayi ni sò tifiŋi inən igun nyɔd. À ya anug ni chwi gha mbə̰ bḛ Ŋwiye ane fìŋ zḛ zḛ. Ane, mbə̰ fə pum anjìm icheg ne Yeso Kristo ya zweme ane iwu.

²² Məd fə kɔʼ ghò ikaŋ àbɔ̀ŋɔ, chùghi aba abo jəghi Ŋwiye. Məd we se tùmbə̀ mbè angirə̀ fɔrɔ tika tijìm ikaŋ àbɔ̀ŋɔ fɔrɔ igun isəg.