1 Jɔn 1 - Ikan feg

Ngam we ne ghìyə̀ bəd jəghə ìtḛ̀

¹ Tì ya ŋwàʼrà àŋwàʼrì azo̰ inən anìŋ ni ghà inug imbə̀ʼ Ìngam we ne ghìyə̀ bəd jəghə ìtḛ̀. À ya Ìngam we ne ya yaʼi bɔŋ Ŋwiye ya se tànga isəg. Tì ya zug inug kwàʼ ibo ichug anyumə̀ ne wì yaya ghàmà ina. Tì ya bàd aməd kwàʼ mba mba. Tì ya taŋ nèn aməd. Tì ya bə̀ bètì aməd kwàʼ ane ìmba ibo.

² Anyumə̀ ne ìtḛ̀ we ya chwi ìwi nyɔd kwàʼ asaŋ asaŋ, tì ya bàd aməd. Ane, tì ya anìŋ ghà tesiʼ inən imbə̀ʼ aməd. Tì ya anìŋ bə̀ ghà inən gha məd ya ìtḛ̀ ighə̀m imɔʼ we ne ya yaʼi tì Mbaʼ ne Mbaʼ ghi tì kyèri.

³ Inug mbe ne tì ya zughi bə̀ bàd, à ya mbo̰ ne te ghà inən anìŋ, ni ghì gha mbə yaʼ ane ifɔti tì ina. Ìwa ifɔti ya tì Mbaʼ bə̀ fɔrɔ tì Ŋwan məd Yeso Kristo.

⁴ Tì ya ŋwàʼrà inug mbo̰ anìŋ ni ghì gha mba məjìm se taŋ gyènde.

Ŋwiye ya ìzḛzḛ

⁵ Ikən we ne tì ya zughi imbə̀ʼ Ŋwan Ŋwiye ne te bə̀ ghà inən ya gha: Ŋwiye ya ìzḛzḛ, chəyi inug afub mɔ̀ʼɔ yaʼi inga məd ka.

⁶ Ane, tì mə̀ gha tì we ane ifɔti tì məd bə̀ kiri ya ghìyə̀ inug afub, tì kyeri gha tì ya gha yaʼ inug ako, chəyi tì kyeri tesiʼ.

⁷ Tì mə̀ yaʼ inga ìzḛzḛ icheg ne məd bə̀ yaʼ inga ìzḛzḛ, nji tì biri yaʼ ane ifɔti mba mba, anəm Yeso Ŋwan Ŋwiye bə̀ sò ìmba inug tibɔ̀ŋ ijìm.

⁸ Tì mə̀ gha chəyi tì beri anug tibɔ̀ŋ inga ina, nji tì ya tàmba ìwa nyɔd. Chəyi tesiʼ yaʼi inga inug mbe ne te ghà.

⁹ Tì mə bḛ ìmba inug tibɔ̀ŋ, Ŋwiye biri waʼ ìmba inug tibɔ̀ŋ bə̀ sò awa chì ane ìmba inug tibɔ̀ŋ ijìm. Məd ya Ŋwiye ne fàʼà anug ne wì kàʼi bə̀ ghìyə̀ inug ne koʼi.

¹⁰ Tì mə gha chəyi tì kweʼì ghì anug tibɔ̀ŋ, ane ya gha tì ya kàrà Ŋwiye ane wə̀d inug ako. Ane, chəyi tì bə̀ bḛ ìngam məd ne ya tesiʼ.