1 Kɔrèn 11 - Ikan feg

¹ Mbə̀ gwe ìmbum ibɔʼì ighog icheg ne mə gwe ìmbi Kristo.

Anug ni kɔd atog bɔŋ se ghùmnə Ŋwiye

² Mə we nàʼà məyakà inən imbə̀ʼ icheg ne mbə̰ mbe wènde amə aghəm ajìm. Mbə̰ mbe bə̀ ghìyə̀ inug məyi kwàʼ icheg ne mə̀ ya chwiti inən.

³ Mə kə̀b gha mbə̀ kyeri gha Kristo ya atog abə mbaŋà tijìm. Mbə̀ bə kyèri gha mbaŋà ya atog abə àyi. Ŋwiye ya bə̀ atog abə Kristo.

⁴ Mbaŋà ne zìyè aghi mɔ̀ʼɔ kə̀ndə atog anyumə̀ ne wì ya chàʼrà Ŋwiye kə̀ anyumə̀ ne wì ya ghà ikən Ŋwiye, tengàŋ we wèghè Kristo ne yaʼi atog igun məd.

⁵ Àyi ne chàʼrà Ŋwiye kə̀ ghàmà ikən Ŋwiye ne chəyi wì kə̀ndi atog, wì ya wèghè inɔm məd. Àyi ne ghìyə̀ ane, wì ya icheg àyi ne seri atog.

⁶ Àyi ne chəyi we kə̀ndə àzi atog, wì seri. Àmə yaʼ aghi ne ni seri atog biri zì tìnìrètog igun məd, wì ya kə̀ndə àzi atog.

⁷ Chəyi mbaŋà kòʼi ni kəndi àzi atog imbə̀ʼ icheg ne məd ya icheg Ŋwiye. Məd we bə̀ chwìye ighumni we ne Ŋwiye bèri. Àsi àyi, wì ya chwìye ighumni we ne mbaŋà bèri.

⁸ Chəyi Ŋwiye ya chi asiŋi nyɔd ane àyi tàngi mbaŋà angu. À ya ane mbaŋà ne Ŋwiye ya chi asiŋi nyɔd tàngi àyi angu.

⁹ Chəyi Ŋwiye ya bə tàngi mbaŋà abə àyi. Wì ya tangi àyi abə mbaŋà.

¹⁰ Aton ne àyi beri ni kəndi àzi atog ya ni chwi gha zìye we aton ìwi inɔm fɔrɔ imbə̀ʼ icheg ne mbè angirə̀ mbe bàrà inug ijìm ne chè.

¹¹ Si ya gha, icheg ne tì yaʼi ane ifɔti tì Anɔŋisəg, chəyi àyi yaʼi ane ìwi ighəm ne chəyi mbaŋà. Chəyi mbaŋà bə̀ yaʼ ane ìwi ighəm ne chəyi àyi.

¹² Icheg ne Ŋwiye ya niŋi mbaŋà tàngi àyi, à ya bə̀ ane ne à ya àyi we gwìye mbaŋà. Inug mbo̰ ijìm nɔ̀ʼ abə Ŋwiye.

¹³ Mbə̀ taŋ kɔ̀ndi kwàʼ mbə̰ mbə̰ gha ze bɔ̀ŋ abə àyi ni chàʼra Ŋwiye ne chəyi wì kə̀ndi atog?

¹⁴ Imbə̀ʼ ighi igun isəg ne Ŋwiye tàngi mbe chwìye gha à ya tìnìrètog abə mbaŋà ni nɔ̀ŋì nyɔ̀ŋì ti taŋ sà.

¹⁵ Imbə̀ʼ ze bə̀ chwi gha àyi mə̀ nɔ̀ŋì nyɔ̀ŋì atog ti sà, imbə̀ʼ à ya ngwèn məd? Aton ya gha, Ŋwiye ya fə nàʼ nyɔ̀ŋì atog ne sa abə àyi ane aghi ne kə̀ndə atog məd.

¹⁶ Wə̀d mə kə̀b ni tàŋì anug azo̰, wì kyeri gha chəyi mba kə̀ tifeti bəd Ŋwiye beri ikuchèg ndəŋ ni ghumni Ŋwiye angu.

Anug ni jəg Itari

¹⁷ Inga tikə te ne bène, chəyi mə̀ biri bḛ gha mbə̰ mbe ghìyə̀ inug ne koʼi imbə̀ʼ icheg ne anyumə̀ ne mbə̀ nyime ifeti ni ghumni Ŋwiye, mbə̰ ya ghìyə̀ yaʼ inug ne zìyè awən inga ngəʼ, kayi inug chɔm.

¹⁸ Anug mbègtog ya gha, mə fə zug gha, mbə̰ ya mə̀ fète aseg icheg bəd Kristo, àghàpì ze yàʼa inga inən. Mə we tì mə bḛ gha à ya anug tesiʼ.

¹⁹ Chəyi mə̀ jə̀mə̀. Mə kyèri gha àghàpì kòʼ ni nyi inga inən imbə̀ʼ ghì gha mbe kyeri bəd Kristo tesiʼ.

²⁰ Anyumə̀ ne mbə̀ fete aseg, kayi itari ne mbə̰ mbe jə̀ghə.

²¹ Kayi itari ne mbə̰ mbe jə̀ghə imbə̀ʼ icheg ne wə̀d imɔʼ imɔʼ ya chè imbìghè se jə̀ghə ne chəyi we ghɔ̀mɔ̀ mə̀mbin. Ane, mbə̰ ya mə̀ nyi ifeti, bəd mɔ̀ʼɔ tḛ̀ witì jəg, ne mə̀mbin fə no be.

²² Àkə chəyi mbə̀ beri ichan ne tì mbə̰ jəg bə̀ no inga ìmbən ichan? Kə̀ mbə̰ kə wèghè yaʼ ifeti bəd Ŋwiye bə̀ zìyè tìnìrètog igun bəd ne chəyi mbi beri ighi? Mbə kə kə̀bə̀ gha mə gha inən gha? Mə̀ wa naʼa məyakà inən ane inug mbo̰? Chəyi tì mə bḛ iku anug gho̰ ka.

²³ Anug ze ne mə̀ ya zughi abə Anɔŋisəg, à ya àzewən ne mə̀ ya chwiti inən. Anug ze ya gha, izimi we ne mbi ya fḛ Anɔŋisəg, wì ya niŋ ngə̀ŋ,

²⁴ nàʼ məyakà abə Ŋwiye, si bə̀ʼri ghà gha, “Aŋa ya ìmə nyàmnyɔd ne mə nàʼà imbə̀ʼ awən. Mbə̀ ya ghìyə̀ anìŋ ni ya wènde amə.”

²⁵ À ya bə̀ ane ne, anyumə̀ ne mbi ya fə jəghi mànì, wì ya bə̀ niŋ toʼ mənoʼ ghà gha, “Toʼ mənoʼ ìzo̰ ya àmə anəm ne mə̀ wàri ikan feg inga. Mbə̀ ya no anìŋ mà nyumə̀ ijìm ni ya wènde amə.”

²⁶ Anìŋ ya chwìye gha, mà nyumə̀ ijìm ne mbə̰ mbe jə̀ghə ngə̀ŋ ìzo̰ bə̀ no toʼ izo̰, mbə̰ ya ghà anug imbə̀ʼ iwu Anɔŋisəg. Mbə̰ biri ya ghà anene pè ane nyumə̀ ne wì biri ywiri yeʼe.

²⁷ Ane, wə̀d ne jə̀ghə ngə̀ŋ ìzo̰ kə̀ no inga toʼ ìzo̰ ane icheg ne chəyi we nàʼà ighumni abə Ŋwiye, tengàŋ fə gùg anug abə Anɔŋisəg. Wì fə bə̀ gùg anug abə nyàmnyɔd Anɔŋisəg fɔrɔ abə anəm məd.

²⁸ Wə̀d imɔʼ imɔʼ kòʼ ni taŋ saʼ ìwi nyɔd fɔrɔ ìwi ikuchèg bɔŋ se jə̀ghə̀ ngə̀ŋ ze bə̀ no inga toʼ ze.

²⁹ Aton ya gha, wə̀d ne jəghi bə̀ no ne chəyi wì taŋ saʼ ìwi nyɔd kyèri gha zìye ya jə̀ghə nyàmnyɔd Anɔŋisəg bə̀ no anəm məd, wì biri jəg bə̀ no ane zì yaʼ ndɔ̀n igun àzi atog.

³⁰ À ya aghi ne ghìyə̀ bəd nɔʼ nɔʼ abɔ̀ʼ inən ya bɔ̀rɔ bə̀ ghɔ̀ndɔ̀. Mbi mɔ̀ʼɔ nɔʼ nɔʼ fə ku.

³¹ Si ya gha, tì mə taŋ saʼ ìwa ikuchèg, chəyi Ŋwiye biri zì isaʼi kə̀ ngəʼ kə̀ ndɔ̀n igun ina.

³² Anyumə̀ ne Anɔŋisəg we sàʼa awa kə̀ bə̀ chə awa, à ya ni ghì gha tì təm kà, ni gha chəyi məd biri zì isaʼi igun ina anyumə̀ ne wì biri saʼ bəd məjìm igun isəg.

³³ Ane, ìmbum məfi fɔrɔ ìtum njàbi, mbə̰ mə̀ fète aseg ni jəg itari, mbə̀ ghɔmɔ mə̀mbin.

³⁴ Njèg mə̀ ya zàŋa wə̀d, wì fə jəg yi ibo inga nəb. Wì fə jəg yi ibo achan ni gha anyumə̀ ne mbə̀ fete ni jəg itari, chəyi Ŋwiye biri zì isaʼi igun məd. Anyumə̀ ne mə̀ yeʼe, mə biri si sèmbì mbin tì inug ne buʼi.