1 Kɔrèn 10 - Ikan feg

Pɔl pàti bəd gha imbə̀ʼ mbi ghumni awɔb mə̀ŋwiye

¹ Ìmbum məfi fɔrɔ ìtum njàbi, mə kə̀b gha mbə̀ wendi anug ze ne ya du abə ìmba mə̀mbaʼ mbe aneg ne yaya bène abɔ̀ʼ Muse. Pàʼ yaya kyèʼrè awɔb. Mbɔb ya bə̀ bàni igyi tìbà.

² Icheg ne mbɔb yaya yḛ̀ aton pàʼ bə̀ bàni igyi tìbà, ze chwi gha, mbɔb ya niŋ mənib si yaʼ bəd ne bène abɔ̀ʼ Muse.

³ Mbɔb mə̀jìm ya jəg iku ighijəg ifibì ne Ŋwiye ya nàʼi inɔb.

⁴ Mbɔb mə̀jìm ya bə̀ no iku mənib ifibì ne Ŋwiye ya bə nàʼ inɔb. Mbɔb məjìm ya no mənib ne yaya dùwə̀ inga igho we ne Ŋwiye ya nàʼi inɔb. Igho we yaya yḛ̀ tì inɔb. Igho we ya yaʼ Kristo.

⁵ Si ya gha, chəyi Ŋwiye ya kɔ̀ŋi ikuchèg bəd nɔʼ nɔʼ abɔ̀ʼ inɔb. Ane, mbi ya ku, ìmbɔb iwu sàkà inga tìbad zɔbi.

⁶ Inug mbo̰ ya ni pati awa tèchɔ̀ŋ gha imbə̀ʼ tì nɔ̀ʼ zì ìta fìŋ igun inug tibɔ̀ŋ icheg ne mbɔb ya zi.

⁷ Imbə̀ʼ mbə̰ ghumni awən mə̀ŋwiye icheg bəd mɔ̀ʼɔ abɔ̀ʼ inɔb ya ghumni. Mbe ŋwàʼrì inga Àŋwàʼrì Ŋwiye gha, “Bəd mbe ya chughi aseg ane iteri, jəg, no, nɔ̀ʼ ko se ghìyə̀ ifanì inug abu abu.”

⁸ Imbə̀ʼ tì nyi awa inga ifanì inug icheg ne bəd mɔ̀ʼɔ abɔ̀ʼ inɔb ya nyi. Kwàʼ məyi ane aneg afibì, bəd chuʼ ìghum ibe chɔ̀b itad ya ku.

⁹ Imbə̀ʼ tì kwàʼra awa Anɔŋisəg icheg ne bəd mɔ̀ʼɔ abɔ̀ʼ inɔb ya kwàʼri, Ŋwiye ghi jo zwèti awɔb.

¹⁰ Imbə̀ʼ tì ghamba awa Ŋwiye icheg ne bəd mɔ̀ʼɔ abɔ̀ʼ inɔb ya ghàmbi, Ŋwiye cha angirə̀ gha wì gho zwèti awɔb.

¹¹ Inug mbo̰ ya dù igun inɔb icheg aneni ina. Ane, mbi ya ŋwàʼrì inug mbo̰ ni kə awa mba mbe ne yaʼi inga nyùmə̀ isəg gho̰ ne se zàmbi nwìyḛ̀.

¹² Ane, wə̀d we ne kɔ̀ndɔ gha zìye təm kà, wì we yi imbə̀ʼ wì nɔ̀ʼ gùg.

¹³ Chəyi anug mɔ̀ʼɔ ne kwàʼrà awən ne chəyi ze kweʼì kwàʼrì bəd ndəŋ. Ŋwiye we fàʼà anug ze ne wì kàʼi. Ane, chəyi wì biri sàŋì gha àkwàʼrì ne ka chè awən ze nyi igun inən. Anyumə̀ ne mbi kwaʼri awən, wì biri chwi inɔnjì inən ne mbə̀ biri nyìʼ fìŋ anene dù inga àkwàʼrì ze.

¹⁴ Icheg ne ze yaʼ ane, ìmbum mə̀sə̀ʼ ne mə̀ taŋ kɔ̀ŋ, mbə̀ to̰ awən anug ni ghumni mə̀ŋwiye.

¹⁵ Mə ya ghàmà inən icheg bəd ne beri iwe. Mbə̀ niŋ anug ne mə̀ gha inən se fàʼà igun.

¹⁶ Toʼ ze ne te no inga anyumə̀ ne te jə̀ghə itari, ne te bə̀ nàʼà məyakà abə Ŋwiye bɔŋ no inga toʼ ze, à ya anəm Kristo ne te no. Ngə̀ŋ ze ne te bə̀ʼrə bə̀ jə̀ghə ya nyàmnyɔd Kristo ne te bə̀ kùrə.

¹⁷ Ka tì jiʼì nɔʼ, à ya məyi chiŋ ngə̀ŋ imɔʼ ne te jə̀ghə ni chwi gha mba ya nyàmnyɔd imɔʼ.

¹⁸ Mbə̀ nḛ mə̀Izre, imbə̀ʼ bəd ne jə̀ghə ighi àfàtì fə yaʼ ane ifɔti tì bəd ne nàʼà ighi àfàtì mbe abə Ŋwiye?

¹⁹ Mə kə anìŋ ghà gha? Mbə̀ kə kɔ̀ndɔ gha mə̀ ya ghà gha tijəg te ne mbe jə mə̀ŋwiye ya bè aghi mɔ̀ʼɔ? Kə̀ bì gha mə̀ŋwiye ya bè aghi mɔ̀ʼɔ?

²⁰ Indèʼ! Kayi ane ka! Ighi àfàtì mbe ya mbɔb ya nàʼà abə izwighi tibɔ̀ŋ kayi abə Ŋwiye. Ane, chəyi mə̀ kə̀bi gha mbə̰ ya jə̀grə tì izwighi tibɔ̀ŋ ka.

²¹ Chəyi tì mbə̰ no inga toʼ Anɔŋisəg ywìrì no inga toʼ izwighi tibɔ̀ŋ. Chəyi tì mbə̰ bə̀ jəg igun fiŋaŋi Anɔŋisəg ywìrì jəg igun fiŋaŋi izwighi tibɔ̀ŋ.

²² Tì kə kə̀bə̀ gha Anɔŋisəg gaŋ? Tè wa bèrì ika chè aməd?

Mbə̀ ghiyə inug ijìm ni ghùmnə Ŋwiye

²³ Bəd mɔ̀ʼɔ mbe gha, “Tì we tì tì ghi inug ijìm.” Si ya gha, kayi inug mbe ijìm ne biri wètì awa. “Tì we tì tì ghi inug ijìm,” si ya gha, kayi inug ijìm mbe ghìyə̀ ibḛfiŋ wə̀d tə̀mə kà.

²⁴ Imbə̀ʼ mbə̰ ziye awən atog ni nèn məyi inug ne biri bɔ̀ŋ inən. Mbə ziye atog ni nèn fɔrɔ inug ne biri bɔ̀ŋ abə bəd ndəŋ.

²⁵ Mbə̰ mbe tì mbə̰ kud tiku nyam ijìm ne mbe fḛ̀ iywin. Si ya gha, imbə̀ʼ mbə̰ biri awən inug mɔ̀ʼɔ ne biri ghì ìtən fìŋ se sàʼa awən inga.

²⁶ A ze inga Àŋwàʼrì Ŋwiye gha, “isəg ijìm fɔrɔ ighi ijìm ne yaʼi inga ya Anɔŋisəg bèri.”

²⁷ Wə̀d ne chəyi wì bḛ Ŋwiye, wì mə kàʼ awən ane anug, nàʼ tijəg inən, mbə̀ jəg. Imbə̀ʼ mbə̰ biri awən inug mɔ̀ʼɔ ne biri ghì ìtən fìŋ se sàʼa awən inga.

²⁸ Wə̀d mɔ̀ʼɔ mə̀ ghà inən gha, “Tijəg ìto̰ ya aghi àfàtì abə mə̀ŋwiye.” Mbə̀ to̰ awən tijəg te ni ghì gha imbə̀ʼ fìŋ abə wə̀d we ne gha anug ze inən si ya sàʼa yi məd inga.

²⁹ Mə ya ghà fìŋ wə̀d we ne kàʼi awən, kayi mə ghàmà imbə̀ʼ ìtən fìŋ. Aton ne fìŋ wə̀d ndəŋ biri se sàʼa aməd ane aghi ne mə jə̀ghə kə̀ ane aghi ne chəyi mə̀ jə̀ghə àkə gha?

³⁰ Mə kə mə̀ jəg tijəg te nàʼ məyakà abə Ŋwiye, ze wa bə? Aton ne mbe ghàmbà amə àkə gha, ne mə jə̀ghə tijəg te nàʼà məyakà abə Ŋwiye?

³¹ Ane, kə̀ mbə kə ghìyə̀ anug mɔ̀ʼɔ, kə̀ jə̀ghə kə̀ no, mbə̀ ya ghìyə̀ inug ijìm ni nàʼ ighumni abə Ŋwiye.

³² Imbə̀ʼ mbə̰ ghiyə awən gha wə̀d ne yaʼi wə̀d inga ifeti bəd Ŋwiye wì gughə anug; kə̀ àkə Ju kə̀ wə̀d ne kayi Ju.

³³ Mə ya kə̀bə̀ iku icheg ijìm ni ghì inug ane icheg ne koʼi abə bəd məjìm. Kayi mə ghìyə̀ məyi anug ne bɔŋi inum. Mə ya ghìyə̀ yaʼ anug ne biri bɔ̀ŋ fɔrɔ abə mə̀mbin, ni ghì gha mbe pum.