1 Kɔrèn 1 - Ikan feg

Pɔl chàʼrì bəd Kristo mbe a Kɔrèn

¹ À ya mo Pɔl tì Sostenès ne yaʼi ìwa ifi icheg ne tì yaʼi ane anug amɔʼ tì Yeso Kristo ŋwàʼri àŋwàʼrì azo̰. Ŋwiye ya chɔʼ amə icheg ne məd kə̀bi gha mə yaʼ wə̀dtɔm Kristo.

² Tì ya ŋwàʼrà anìŋ abə ifeti bəd Ŋwiye we ne yaʼi a Kɔrèn. Ŋwiye ghì mbi zen icheg ne mbi yaʼi ane ifɔti tì Kristo. Ŋwiye ya bə̀ kàrì awɔb ni gha mbe yaʼ ìmbi bəd. Tì ya bə̀ ŋwàʼrà anìŋ abə bəd məjìm ne ghùmnə Anɔŋisəg Yeso Kristo inga isəg ijìm. Məd ya Anɔŋisəg inɔb fɔrɔ ina.

³ Ŋwiye we ne yaʼi ìwa Mbaʼ tì Anɔŋisəg Yeso Kristo ghiyə ìchɔ̀mì inən bə̀ ghì mbə̀ chughi ane àbɔrɔ̀bɔd.

Pɔl nàʼ məyakà abə Ŋwiye

⁴ Mə ya nàʼà məyakà abə Ŋwiye mà nyumə̀ ijìm ane ìchɔ̀mì we ne məd che anjìm Yeso Kristo ghì inən.

⁵ Məd fə nàʼ tineʼi inən ane inɔnjì ijìm icheg ne mbə̀ yaʼi ane ifɔti tì Kristo. Məd fə ghì anìŋ ni gha mbə̀ gha inug ijìm mbe ne məd kə̀bi gha mbə̀ gha. Məd bə̀ ghì gha mbə̀ kyeri inug ijìm mbe ne məd kə̀bi gha mbə̀ kyeri.

⁶ Anìŋ ya ni chwi gha inug ijìm mbe ne mə̀ ya gha inən imbə̀ʼ Kristo, mbə fə zug bə̀ bḛ kwàʼ icheg chɔm.

⁷ Chəyi ineʼi mɔ̀ʼɔ ne Azwighi Ŋwiye ze nàʼà ne chəyi mbə̀ beri, icheg ne mbə̀ taŋ zì atog ni ghɔ̀m gha Anɔŋisəg Yeso Kristo ywirì yèʼe.

⁸ Məd biri bə ghì gha mbə̀ təm kà ghò pè ane ìnwḭ ni gha chəyi bəd biri gha mbə̰ gùg anug ane aneg ze ne Anɔŋisəg Yeso Kristo ywirì yèʼe.

⁹ Ŋwiye we ne kàri awən gha mbə̀ chughi ane ifɔti tì Ŋwan məd, ìwa Anɔŋisəg Yeso Kristo, məd we fàʼà anug ne wì ya kàʼi.

Àghàpì ze ne yaʼi inga ifeti bəd Kristo

¹⁰ Ìmbum məfi fɔrɔ ìtum njàbi, mə boʼ ibo inən ane ikum ìwa Anɔŋisəg Yeso Kristo gha mbə̀ chughi ane anug amɔʼ ni ghì gha imbə̀ʼ àghàpì yaʼi inga inən. Ane, mbə̀ nɔŋɔ ìtən fìŋ ane ìti imɔʼ bə̀ nɔ̀ŋì ìwən ikɔndi ane ìwi imɔʼ.

¹¹ Ìmbum məfi fɔrɔ ìtum njàbi, mə ya ghàmà anìŋ imbə̀ʼ icheg ne bəd mɔ̀ʼɔ inga nəb Kluwè fə ghà inum gha, mbə̰ mbe chɔ̀bɔ.

¹² Anug ne mə ghà ya gha, mbə̰ mbe sìmnè nyɔd. Wə̀d imɔʼ we gha, “Mə ya bène abɔ̀ʼ Pɔl.” Ìywin we gha, “Mə ya bène abɔ̀ʼ Àpolòs.” Ìwi ndəŋ we bə̀ gha, “Mə ya bène abɔ̀ʼ Pità.” Wə̀d ndəŋ we bə̀ gha, “Mə ya bène abɔ̀ʼ Kristo.”

¹³ Mbi wa fə ghàpì Kristo? Wə̀d we ne mbi ya kɔ̀mbi igun azed abaʼri wa kə Pɔl? À wa kə inga ikum ìwi Pɔl ne mbə̀ ya niŋi mənib?

¹⁴ Mə nàʼ məyakà abə Ŋwiye imbə̀ʼ icheg ne chəyi mə̀ ya nàʼi mənib abə wə̀d mɔ̀ʼɔ abɔ̀ʼ inən chèyi ane Krispòs tì Gayòs.

¹⁵ Ane, chəyi wə̀d mɔ̀ʼɔ abɔ̀ʼ inən ne tì wì gha mbə̰ ya niŋ mənib ni beni abɔ̀ʼ inum, mo Pɔl.

¹⁶ Mə kyèri gha mə ya bə̀ nàʼ mənib abə Stèfanàs fɔrɔ inəbi məd. Chəyi wə̀d mɔ̀ʼɔ ndəŋ ne mə̀ kɔndi gha mə ya nàʼ mənib ibo.

¹⁷ Chəyi Kristo ya chà amə gha mə naʼa mənib. Wì ya chà amə gha mə̀ chete ikən chɔm. Àkə aghi ne mə̀ ya chèti ikən chɔm inən ane iwe wə̀d-aku fɔrɔ ane ìngam nəmi nəmi, nji chəyi anug ze ne te ghà imbə̀ʼ iwu Kristo igun azed abaʼri ywirì bèrì ika.

Ŋwiye chè anjìm Yeso Kristo chwi ìwi iwe fɔrɔ ìwi ika

¹⁸ Ikən imbə̀ʼ icheg ne Yeso Kristo ya ku igun azed abaʼri ya anug anen abə bəd mbe ne nìme. Àsi ina, mba mbe ne pùmə, tì niŋ gha à ya anug ne chwìye ika Ŋwiye.

¹⁹ Mbe ŋwàʼrì inga Àŋwàʼrì Ŋwiye gha, “Mə biri chìkì tikɔndi bəd mɔ̀ʼɔ mbe ne kɔ̀ndɔ gha mbɔb fə bèrì iwe. Mə biri chwi abə bəd mbe ne kɔ̀ndɔ gha mbɔb kyèri anug gha chəyi mbɔb kyeri anug mɔ̀ʼɔ ka.”

²⁰ Ane, bəd mbe ne ghà gha mbɔb bèrì iwe, tì bəd mbe ne ghà gha mbɔb kyèri àŋwàʼrì kə̀ mbɔb kyèri icheg ni tàŋì anug, chəyi mbɔb ywirì bèrì ati? Ŋwiye fə chwi gha iwe we ne bəd mbe ne yaʼi inga nyùmə̀ isəg gho̰ mbe ghà gha mbɔb bèrì ya kwàʼ iwe anen.

²¹ Ŋwiye fə ghì ane ìwi iwe gha, imbə̀ʼ bəd kyeri awɔb məd ane ìwɔb tì iwe. Ŋwiye we pùmnə bəd mbe ne bḛ ikən we ne bəd mɔ̀ʼɔ mbe nìŋə ane anug anen.

²² Mə̀Ju yaya kə̀bə̀ ni bàd inug yeti yeti. Àsi mə̀Grig yaya kə̀bə̀ ni zug yaʼ inug ne beri iwe.

²³ Si ya gha, tì ya ghàmà imbə̀ʼ Kristo we ne mbi ya kɔ̀mbi igun azed abaʼri, ne chəyi mə̀Ju mɔ̀ʼɔ ya kɔ̀ŋi ni zug. Bəd ne kayi mə̀Ju ya nìŋə ane anug ne chəyi iwe inga.

²⁴ Àsi bəd mbe ne bḛ ikən we, à ya mbɔb ne Ŋwiye chɔ̀ʼi awɔb ane ìmbi bəd. Kə̀ àkə mə̀Ju kə̀ bəd ne kayi mə̀Ju, Ŋwiye chwi ìwi iwe fɔrɔ ìwi ika inɔb anjìm Kristo.

²⁵ Inug ne Ŋwiye we ghìyə̀ ne bəd mbe nìŋə gha à ya inug anen, à ya inug ne beri iwe chè iwe wə̀d-aku. Inug mbe ne Ŋwiye we fàʼà ne bəd mbe nìŋə ane inug ne bɔri, à ya inug ne beri ika chè ika wə̀d-aku.

²⁶ Ìmbum məfi fɔrɔ ìtum njàbi, mbə̀ kɔndi icheg ne mbə̀ ya bi yaʼ anyumə̀ ne Ŋwiye ya kàri awən ane ìmbi bəd. Chəyi bəd nɔʼ nɔʼ abɔ̀ʼ inən ya bi bèrì iwe icheg ne bəd inga isəg mbe nḛ̀ bəd iwe. Chəyi bəd nɔʼ nɔʼ abɔ̀ʼ inən ya bə̀ yaʼ bəd kyen kyen inga aben. Chəyi mbi ya bə gwi bəd nɔʼ nɔʼ abɔ̀ʼ inən inga inəbi ne beri ikum kyen.

²⁷ Si ya gha, Ŋwiye ya chɔʼ bəd mbe ne bəd igun isəg mbe nḛ̀ gha chəyi mbi beri iwe, ni ghì gha bəd mbe ne kɔ̀ndɔ gha mbɔb bèrì iwe, mbi si bèrì tìnìrètog. Ŋwiye ya bə̀ chɔʼ bəd mbe ne bəd igun isəg mbe nḛ̀ gha à ya ighi ako, ni ghì gha bəd mbe ne kɔ̀ndɔ gha mbɔb ya aghi mɔ̀ʼɔ, mbi si bèrì tìnìrètog.

²⁸ Ŋwiye ya chɔʼ bəd mbe ne bəd igun isəg mbe wèghè bə̀ nìŋə gha à ya ighi ako, ni swi bəd mbe ne bəd igun isəg mbe nìŋə gha à ya bəd kyen kyen.

²⁹ Ŋwiye ya ghì ane ni gha chəyi wə̀d mɔ̀ʼɔ ne tì wì kɔ̀m igo ibo imbìghè.

³⁰ Wì ya bə̀ ghì gha mbə̀ yaʼ ane ifɔti tì Yeso Kristo. Kristo ya ìwa iwe ne nɔ̀ʼi abə Ŋwiye. Anjìm Kristo, mba ya si bəd ne təmi kòʼ imbìghè abə Ŋwiye. Mba ya si bəd ne bə təm zen imbìghè abə Ŋwiye. Mba ya bəd ne Ŋwiye fə bə zèri awa chì ane inug tibɔ̀ŋ.

³¹ Mbe ŋwàʼrì inga Àŋwàʼrì Ŋwiye gha, “Wə̀d mə kə̀b ni kɔ̀m igo, tengàŋ kɔmɔ igo imbə̀ʼ àfàʼì ne Anɔŋisəg ghi.”