Yohana 9 - Ala Ya Salatikan Kula Kitabu

Isa ka ɲagbɛ kɛ́ dɔ ɲa laka teme

¹ Isa timintɔla, a ka kɛ́ dɔ ye min sɔlɔnnin tɛɛ ɲagbɛtɔya lɔ.

² A kɔbiladennu k'a maɲininga wo lɔ, ai vɛɛ: «Kalanmɔɔ, jene ya julumbu kɛnin sabu le kɛ́ min sɔlɔnnin ɲagbɛtɔya lɔ? A jɛlɛkanu ta, baa a sɔlɔnbalu?»

³ Isa k'ai javi, a vɛɛ: «A tɛ k'a fɔ kɛ́ min na julumbu le tala, niwotɛ a sɔlɔnbalu. Min kɛyine fɔsa Ala kɛkolu la yi nkɛnɛmaya a fɛ.

⁴ Damanda tele yi bɔla, fɔ m'i kɛ ǹ kelaba ya baale le la. Su kotɔle, mɔɔ tɛ se baale kɛla waate min nɔ.

⁵ Damanda ǹ'i dunuɲa kɔnɔ yi ne, ǹe le dunuɲa kɛnɛya le.»

⁶ Wo fɔ Isa bolo, a k'a daji bɔn duu ma ka wo kɛ bɔɔ le, ka ban k'a sisa kɛ́ ɲa kɔkan.

⁷ A do vɛɛ a yɛ: «Taa i ɲa lako Silowe dala lɔ.» (Silowe kɔlɔ le ko Min Kelayanin). Wo fɔ, kɛ́ ka taa a ɲa lako ka seikɔ luu ma, a vɛ yeni kɛla.

⁸ A siiɲɔɔlu ni mɔɔ minu deinin tɛɛ a siinin yena dailila, wolu vɛɛ: «Kɛ́ min siinin tɛɛ dailila, wo le ne?»

⁹ A dɔlu vɛɛ: «Wo le kɛ.» A dɔgbɛlɛlu vɛɛ: «Ale tɛ, kɛɛ a bɔnin a la.» Kɛɛ ale gbu tɛɛ a fɔla k'a magbeleya, a vɛɛ: «Ǹe le jɔ!»

¹⁰ Ai k'a maɲininga, ai vɛɛ: «I ɲa la na kala di wo lɔ?»

¹¹ A k'ai javi, a vɛɛ: «Kɛ́ min tɔɔ yi ko Isa, wo le na bɔɔ ladanna k'a sisa ǹ ɲa kɔkan, ko ǹ'i taa ǹ ɲa lako Silowe dala lɔ. Ǹ na taala ǹ ɲa lakola mingɛ, ǹ ɲa la ka ka.»

¹² Ai k'a maɲininga, ai vɛɛ: «Kɛ́ wo yi min ne?» A do vɛɛ: «M̀ m'a dingila lɔn.»

Falisilu ka ɲagbɛtɔ kɔlɔ maɲininga teme

¹³ Wo kɔ, ai ka taa ɲagbɛtɔ kɔlɔ wo le Falisilu fɛ.

¹⁴ Isa na bɔɔ ladanna ka kɛ́ wo ɲa laka lon min na, wo taanin kɛla Nɔningɛlon ne le.

¹⁵ Wo lɔ, Falisilu fana ka kɛ́ maɲininga a ɲa lakako ma, ai vɛɛ: «I ɲa la na kala di?» A k'ai javi, a vɛɛ: «A na bɔɔ le sisala ǹ ɲa kɔkan. Wo kɔ, ǹ ka taa ǹ ɲa lako, ǹe do yi yeni kɛla yi ne.»

¹⁶ Falisi dɔlu vɛɛ: «Kɛ́ min ma bɔ Ala fɛlɔ, kamasɔlɔn a tɛ Nɔningɛlon buɲala.» Kɛɛ a dɔlu vɛɛ: «Ni a ka kɛ julumbutɔ le, a yi se kawananko suu minu kɛla di?» Wo lɔ, ai ka falan a ma.

¹⁷ Ai ka ɲagbɛtɔ kɔlɔ maɲininga kɔtunun, ai vɛɛ: «I yi mindɛ fɔla ka bɛn a ma, kamasɔlɔn ale le na i ɲa lakala?» A k'ai javi, a vɛɛ: «Kela le a le.»

¹⁸ Kɛɛ Jahudiya kuntiilu tɛɛ ma la a la feu ko kɛ́ min yi yeni kɛla yi ne, wo sɔlɔnnin tɛɛ ɲagbɛtɔya le lɔ. Wo le k'a kɛ, ai k'a sɔlɔnbalu kili

¹⁹ k'ai maɲininga, ai vɛɛ: «Ài den ne min ne, ài n'a fɔla min ma ko a sɔlɔnnin ɲagbɛtɔya le lɔ? A do yi yeni kɛla di vɛ butu?»

²⁰ Kɛ́ sɔlɔnbalu k'ai javi, ai vɛɛ: «Mɔ k'a lɔn mɔ den ne min ne, a sɔlɔnnin ɲagbɛtɔya le lɔ.

²¹ Kɛɛ ko min n'a kɛla a yi yeni kɛla butu, mɔ ma wo lɔn, kumatɛ mɔɔ min na a ɲa lakala. Ài yi ale gbu maɲininga, denni tɛ a le. A yi sene kumala a jɛlɛ yɛ!»

²² A sɔlɔnbalu na wo fɔla kamasɔlɔn ai tɛɛ siyanna Jahudiya kuntiilu ɲa, kamasɔlɔn wolu tɛɛ vɛ bɛn a ma ko ni mɔɔ mɔɔ k'i lɔ a la k'a fɔ ko Isa le Masa Tɔɔmasenin ne, ai kɛtɔ wo tii gbɛnna Aladalibon na.

²³ Wo le n'a kɛla, kɛ́ sɔlɔnbalu n'a fɔla, ai vɛɛ: «Ài yi ale gbu maɲininga, denni tɛ a le.»

²⁴ Kɛ́ min sɔlɔnnin tɛɛ ɲagbɛtɔya lɔ, Falisilu k'a kili a siɲa filana lɔ k'a fɔ a yɛ, ai vɛɛ: «Magbiliyali di Ala ma! Mɔ k'a lɔn ne ko kɛ́ wo yi julumbutɔ le le.»

²⁵ Kɛ́ do k'ai javi, a vɛɛ: «A ka kɛ julumbutɔ le o, a ma kɛ julumbutɔ le o, m̀ ma wo lɔn. Kɛɛ ǹ ka ko kelen ne lɔn. Ɲagbɛ le tɛɛ ǹ ne, kɛɛ tandainɔ ǹ'i yeni kɛla.»

²⁶ Ai k'a maɲininga, ai vɛɛ: «A na mindɛ le kɛla i la? A n'i ɲa lakala di?»

²⁷ A do k'ai javi, a vɛɛ: «M̀'ɛ ban wo fɔla ài yɛ, kɛɛ ài do ma ài tolomalɔ ǹ na. Mindɛ lɔ ài y'a fɛ ka wo mɛn kɔtunun? A yi di? Àilu gbu y'a fɛ ka kɛ a kɔbiladen ne?»

²⁸ Wo fɔ a bolo, ai v'a jɛvɛla, ai vɛɛ: «Ile le kɛ́ wo kɔbiladen ne, kɛɛ ǹu do yi Nabi Musa kɔbiladen ne le.

²⁹ Mɔ k'a lɔn Ala na kumala Nabi Musa yɛ. Kɛ́ wo koni, hali mɔ ma a bɔya gbu lɔn!»

³⁰ Kɛ́ do vɛɛ: «Ko makawanin ba le min ne! Ài ma a bɔya lɔn, kɛɛ ale le na ǹ ɲa lakala.

³¹ Mɔ k'a lɔn Ala tɛ julumbutɔ ya madailikan minala, kɛɛ mɔɔ mɔɔ vɛ Ala buɲala k'a sawo kɛ, a yi wo tii ya madailikan ne minala.

³² Ka ta dunuɲa dan ma, mɔɔ m'a mɛn ba bene ko mɔɔ dɔ vɛ ɲagbɛ ɲa laka, min sɔlɔnnin tɛɛ ɲagbɛtɔya lɔ.

³³ Ni kɛ́ min tɛɛ ma bɔ Ala fɛlɔ, a tɛɛ tɛ se foi kɛla.»

³⁴ Falisilu vɛɛ a yɛ: «Ile min yi julumbutɔ ba le ka damina i sɔlɔn waate ma, ile le y'a fɛ ka mɔ kalan yi ne?» Ai do ka a gbɛn Aladalibon na.

Falisilu ya ɲagbɛya

³⁵ Isa k'a mɛn mingɛ ko ai vɛ kɛ́ wo gbɛn, a do ka taa a ɲinin k'a maɲininga, a vɛɛ: «I limaniyanin Mɔɔnivin Tanin ma?»

³⁶ A do ka Isa javi, a vɛɛ: «Ǹ Kuntii, jene wo le? I y'a jiya ǹ na fɔsa ǹ'i limaniya a ma.»

³⁷ Isa vɛɛ a yɛ: «I ɲa vɛ la a kan. Ale le yi kumala i fɛ yi ne.»

³⁸ Kɛ́ do vɛɛ: «Ǹ Kuntii, m̀'ɛ limaniya.» A do k'i majii Isa kɔlɔ ka a bato.

³⁹ Isa do vɛɛ: «Ǹ nanin dunuɲa kititɛɛko le lɔ, fɔsa ɲagbɛlu ɲa la yi ka ani yenikɛbalu ɲa yi gbɛ.»

⁴⁰ Falisi dɔlu ka to Isa dafɛ ka kuma wo mɛn. Ai do vɛɛ a yɛ: «A yi di? Ǹu fana yi ɲagbɛ le le?»

⁴¹ Isa k'ai javi, a vɛɛ: «Ni ài tɛɛ vɛ kɛla ɲagbɛ le, julumbu tɛɛ tɛnala kɛla ài ma. Kɛɛ komi ài vɛɛ ko ài yi yeni kɛla, wo le n'a kɛla, julumbu tonin ài ma.»