Yohana 7 - Ala Ya Salatikan Kula Kitabu

Isa ni a dɔɔkɛlu

¹ Wo kɔ, Isa tɛɛ Galile koovi lɔtaamana. A tɛɛ tɛ a fɛ ka taa ni sei kɛ Jude koovi lɔ, kamasɔlɔn Jahudiya kuntiilu tɛɛ a faako ɲaɲininna.

² Wo k'a talan, Jahudiyalu ya Gbaakɔlɔsii Selilon ma tɛɛ vɛ sulunya.

³ Wo lɔ, Isa dɔɔkɛlu vɛɛ a yɛ: «Bɔ jan, i yi taa Jude koovi lɔ, fɔsa i kɔbilabalu fana y'i kɛkolu ye je.

⁴ Kamasɔlɔn ni mɔɔ y'a fɛ a mangutu yi bɔ, i tɛ kolu kɛla doon nɔ. Komi i yi ko minu kɛla yi ne, wo lɔ, i yi taa i jɛlɛ jiya dunuɲa bɛ la!»

⁵ (Hali a dɔɔkɛlu gbu tɛɛ ma limaniya a ma.)

⁶ Isa do k'ai javi, a vɛɛ: «Ǹa waate ma se ba bene. Kɛɛ àilu koni, waate suu suu bɛnyine ài ma.

⁷ Ài tɛ se gbeyala dunuɲa yɛ, kɛɛ ǹe do gbeyayine a yɛ, kamasɔlɔn ǹ'i seleya dila ka bɛn a ma ko a kɛkolu kɛwonyanin.

⁸ Wo le y'a ma, àilu yi taa selibɔya lɔ, kɛɛ ǹe do tɛ taala, kamasɔlɔn ǹa waate ma se ba.»

⁹ Isa wɔlinin wo fɔla, a ka to Galile.

Isa ka taa selibɔya lɔ Jelusalɛmu teme

¹⁰ A dɔɔkɛlu taa kɔ selibɔya lɔ, ale fana ka taa. Kɛɛ a ma taa gbɛ la, fɔ doon nɔ.

¹¹ Wo k'a talan Jahudiya kuntiilu tɛɛ a ɲininna selibɔya lɔ, ai vɛɛ: «Kɛ́ wo yi mineja?»

¹² Mɔɔ siyama tɛɛ i ɲɔɔ sɔsɔla kan majii lɔ ka bɛn Isa ma. A dɔlu vɛɛ: «Mɔɔ bɛlɛ le a le.» A dɔgbɛlɛlu vɛɛ: «Wo tɛ, mɔɔlafiliba le.»

¹³ Kɛɛ mɔɔ suu suu ma ko fɔ gbɛ la ka bɛn a ma, kamasɔlɔn ai tɛɛ siyanna Jahudiya kuntiilu ɲa.

¹⁴ Selibɔ tɛmala lɔ, Isa ka don lɔhɔlɔmabonba luu kɔnɔ ka mɔɔlu kalan damina.

¹⁵ Jahudiya kuntiilu ka kawakoya, ai vɛɛ: «Kɛ́ min na lɔnni min sɔlɔnna min ne, k'a talan a ma kalan foi kɛ?»

¹⁶ Isa k'ai javi, a vɛɛ: «Ǹa kalan ma bɔ ǹe gbu lɔ, fɔ ǹ kelaba.

¹⁷ Ni mɔɔ min y'a fɛ ka Ala sawo kɛ, wo tii kɛtɔ a lɔnna ni ǹa kalan bɔnin Ala le lɔ, niwotɛ ni ǹ'i kumala ǹ jɛlɛkanu ya seetiiya le lɔ.

¹⁸ Mɔɔ min yi kumala a jɛlɛkanu ya seetiiya lɔ, wo tii yi mɔɔlu ya buɲali le kɔ. Kɛɛ mɔɔ min y'a kelaba ya buɲali kɔ, wo tii le tuɲande le, a do tɛ faɲa suu suu fɔla.

¹⁹ Nabi Musa le na Ala ya seliya dila ài ma, kɛlɛ? Kɛɛ ài suu suu tɛ seliya wo labatola yi ne. Mindɛ lɔ ài yi ǹ faako ɲaɲininna?»

²⁰ Jama k'a javi, ai vɛɛ: «Jinatɔ le i le. Jene i faako ɲaɲininna?»

²¹ Isa do k'ai javi, a vɛɛ: «Ǹ na baale kelen ne kɛla, wo do n'ài bɛ kawakoyala.

²² Nabi Musa na kɛnɛkɛko jamali dila ài ma, k'a talan mɔ bemanu le na kɛnɛkɛko daminala, Nabi Musa tɛ. Wo le n'a kɛla, hali Nɔningɛlon gbu, ài y'ài denkɛlu makɛnɛkɛla.

²³ Ni ài y'ài denkɛlu makɛnɛkɛla Nɔningɛlon fɔsa Nabi Musa ya seliya kana tiɲa, a yi di vɛ ài mɔnɛnin m̀ ma kamasɔlɔn m̀'ɛ mɔɔ falikolo lakunnin lakɛnɛya Nɔningɛlon?

²⁴ Ài kà ko ye ài ɲa la dein k'a kiti tɛɛ wo ma, mafɔ ài yi kiti tɛɛ telenmandeya bolo le ma.»

Jalasa Isa le Masa Tɔɔmasenin ne?

²⁵ Wo le k'a kɛ, Jelusalɛmuka dɔlu k'a fɔ i ɲɔɔ yɛ, ai vɛɛ: «Jalasa ai tɛ kɛ́ min ne ɲininna a faako lɔ?

²⁶ Ài y'a ye! A yi kumala bala lɔ, kɛɛ ai do tɛ foi fɔla a yɛ. Jalasa maa kuntiilu v'a lɔn bɛlɛbɛlɛ kɛ k'a fɔ ko ale le Masa Tɔɔmasenin ne?

²⁷ Ni wo le, ǹu koni ka kɛ́ min bɔya lɔn. Kɛɛ ni Masa Tɔɔmasenin ka na, mɔɔ suu suu tɛnala a bɔya lɔnna.»

²⁸ Isa ka to mɔɔlu kalanna lɔhɔlɔmabonba luu kɔnɔ, a k'a kan labɔ, a vɛɛ: «Tuɲa le, ài ka ǹ lɔn, ani m̀ bɔya! Kɛɛ ǹ nanin tɛ ǹ jɛlɛkanu ya seetiiya lɔ. Min na ǹ kelayala, wo le tuɲande le, àilu do ma wo lɔn.

²⁹ Kɛɛ ǹe do ka a lɔn kamasɔlɔn m̀ bɔnin ale le fɛlɔ, ale le do na ǹ kelayala.»

³⁰ Wo fɔ Isa bolo, ai tɛɛ a fɛ ka a mina, kɛɛ mɔɔ suu suu bolo ma se a ma, kamasɔlɔn aa waate tɛɛ ma se ba.

³¹ Wo bɛ n'a kɛ, mɔɔ siyama ka limaniya a ma jama lɔ, ai vɛɛ: «Ni Masa Tɔɔmasenin ka na, jalasa a kɛtɔ kawanankolu kɛla ka timin kɛ́ min ta la?»

Jahudiya kuntiilu ka lakanalibalu lataa Isa minaya lɔ teme

³² Jama tɛɛ ko minu fɔla kan majii lɔ ka bɛn Isa ma, Falisilu ka wolu mɛn. Wo lɔ, ailu ni salakalase kuntiibalu ka lakanaliba dɔlu lataa a minaya lɔ.

³³ Isa do k'a fɔ jama yɛ, a vɛɛ: «Ǹ kɛtɔ waateni kɛla ài fɛ bene, wo kɔ, ǹ kɛtɔ taala ǹ kelaba ma.

³⁴ Ài kɛtɔ ǹ ɲininna, kɛɛ ài do tɛnala ǹ yena, kamasɔlɔn ǹ kɛtɔ tɛɛminja, ài tɛnala sena taala woja.»

³⁵ Jahudiya kuntiilu k'a fɔ i ɲɔɔ yɛ, ai vɛɛ: «Kɛ́ min taatɔ min ne, k'a fɔ ko mɔ tɛnala a yena? Jalasa a a fɛ ka taa maa mɔɔlu ma minu siinin Gɛlɛki solu la, ka Gɛlɛkikalu kalan?

³⁶ A vɛɛ ko mɔ kɛtɔ a ɲininna, kɛɛ mɔ tɛnala a yena. A vɛɛ fana ko a kɛtɔ tɛɛminja, mɔ tɛnala sena taala woja. Wo kɔlɔ yi mindɛ le?»

Niimaya ji

³⁷ Selibɔ laban lon na, min tɛɛ lonba le, Isa k'i lɔ k'a kan labɔ, a vɛɛ: «Ni minkɛlɔɔ vɛ kɛla mɔɔ min na, wo tii yi na m̀ ma k'i min.

³⁸ Ni do mɔɔ min ka limaniya m̀ ma, a kɛtɔle iwo a sɛvɛnin kitabu kɔnɔ teme, ko: ‹Niimaya ji woyotɔle a josokun nɔ iwo kɔɔkun.› »

³⁹ Isa kan tɛɛ Nii Sɛnɛyanin ne ma, min ditɔ a malimaniyamɔɔlu ma. Wo waate lɔ, Nii Sɛnɛyanin tɛɛ ma di ba bene, kamasɔlɔn Isa tɛɛ ma magbiliyali sɔlɔn ba bene.

Jama lɔ ka tala teme ka bɛn Isa ma

⁴⁰ Jama ka kuma wolu mɛn mingɛ, a dɔlu vɛɛ: «Kelaba min ka kan ka na, ale le min ne jɔ!»

⁴¹ A dɔgbɛlɛlu vɛɛ: «Masa Tɔɔmasenin ne a le le.» Kɛɛ a dɔlu vɛɛ: «Ɛnɛn, Masa Tɔɔmasenin kɛtɔ bɔla Galile di?

⁴² Jalasa a sɛvɛnin tɛ kitabu kɔnɔ ko Masa Tɔɔmasenin kɛtɔ Nabi Dawuda bɔzɔn ne le, ka bɔ Dawuda fɛso Bɛtilɛhɛmu?»

⁴³ Wo lɔ, jama lɔ ka tala ka bɛn Isa ma.

⁴⁴ A dɔlu tɛɛ a fɛ ka a mina, kɛɛ mɔɔ suu suu bolo ma se a ma.

Jahudiya kuntiilu ya limaniyabaliya

⁴⁵ Lakanaliba minu tɛɛ vɛ na Isa minaya lɔ, wolu ka seikɔ salakalase kuntiibalu ni Falisilu fɛlɔ. Ai do ka lakanalibalu maɲininga, ai vɛɛ: «Mindɛ kɛnin ài ma na a le?»

⁴⁶ Lakanalibalu k'ai javi, ai vɛɛ: «Mɔɔ foi ma kuma ba bene iwo kɛ́ min yi kumala teme!»

⁴⁷ Falisilu k'ai javi, ai vɛɛ: «A vɛ àilu fana lafili?

⁴⁸ Kuntii kelen, niwotɛ Falisi kelen ma limaniya ba a ma, kɛlɛ?

⁴⁹ Kɛɛ mɔɔ lɔkolon jama min ma foi lɔn ka bɛn Nabi Musa ya seliya ma. Wo le y'a ma, ai bɛ yi Ala ya daan ne kɔlɔ!»

⁵⁰ Ai lɔ kelen min tɔɔ tɛɛ ko Nikodɛmu, min tɛɛ vɛ taa Isa ma kɔlɔman ne, wo k'a fɔ dɔ kuntiilu yɛ, a vɛɛ:

⁵¹ «Ka bɛn maa seliya ma, mɔ tɛ se kiti benna mɔɔ kɔkan, fɔ m'a lamɛn bene k'a lɔn a na min kɛla, kɛlɛ?»

⁵² Ai k'a javi, ai vɛɛ: «Ile fana yi Galileka le le? Ni i ka kitabulu kalan kobɛn, i kɛtɔ a yena ko kela foi tɛnala bɔla Galile.»

⁵³ Wo kɔ, ai bɛ ka taa aiya luulu ma.