Yohana 6 - Ala Ya Salatikan Kula Kitabu

Isa ka kɛ́ mɔɔ waa loolu (5 000) balo teme

¹ Wo timinnin kɔ, Isa ka taa Galile kɔɔ kɔma, ai y'a fɔla min ma kɔtunun Tibɛliya kɔɔ.

² Jama ba tɛɛ a kɔ, kamasɔlɔn ai tɛɛ aa kawanankolu yena, a tɛɛ minu kɛla jangalotɔlu yɛ.

³ Isa do ka jɛlɛ tini dɔ kɔkan k'i sii a kɔbiladennu fɛ.

⁴ Wo k'a talan, Jahudiyalu ya Timinkunna Selilon ma tɛɛ vɛ sulunya.

⁵ Isa k'a ɲa lawuli ka jama ba natɔla ye a ma mingɛ, a k'a fɔ Filipe yɛ, a vɛɛ: «M'i bulu san min ne fɔsa mɔɔ minu yi dɔnni kɛ?»

⁶ (A ka wo fɔ Filipe lɔsumanko le lɔ. Niwotɛ, a tɛɛ k'a lɔn a kɛtɔ min kɛla.)

⁷ Filipe k'a javi, a vɛɛ: «Hali ni mɔ ka wɔligbɛ gbana kɛmɛ fila (200) bulu le san, ai bɛ tɛnala a dɔɔni gbu sɔlɔnna a lɔ.»

⁸ Isa kɔbiladen dɔ min tɔɔ tɛɛ ko Andele, Simɔn Piyɛli dɔɔni, wo do vɛɛ Isa yɛ:

⁹ «Kavelen dɔ yi jan, bulukala loolu ni jɛɛni fila y'a bolo. Kɛɛ wo kɛtɔ mindɛ ɲiala jama ba min ma?»

¹⁰ Isa do vɛɛ ai yɛ: «Ài yi mɔɔlu lasii duu ma.» Bin mɛsɛnni walanin tɛɛ woja. Wo lɔ, ai k'i sii. Kɛ́ minu tɛɛ jama lɔ, wolu tɛɛ mɔɔ waa loolu (5 000) jate bɔle.

¹¹ Isa ka bulu wolu ta, ka balika bɔ Ala yɛ, ka ban k'a lɔtala mɔɔ siininnu wotɛ. A ka jɛɛni fila kɛ wo boloɲa kelen ne ma. Mɔɔ bɛ ka bulu ni jɛɛ sɔlɔn fɔɔ k'ai wasa.

¹² Mɔɔlu ka dɔnni kɛ k'i fa mingɛ, Isa vɛɛ a kɔbiladennu yɛ: «Ài yi bulu ni jɛɛ kulunkulun tɔlu ladɛn, fɔsa a dɔ kana tiɲa.»

¹³ Wo ma, bulukala loolu wo tɔ min na bɔla mɔɔlu ya dɔnni kɔ, ai ka wo kulunkulunnilu ladɛn ka gbɔlɔ ɲa tan ni fila (12) lafa.

¹⁴ Jama ka Isa ya kawananko wo ye mingɛ, ai vɛɛ: «Kelaba min ka kan ka na dunuɲa, wo le min ne jɔ!»

¹⁵ Isa tɛɛ k'a lɔn ne ko ai tɛɛ a fɛ k'a mina k'a kɛ aiya masakɛ le le diyanigbeya boloma. Wo le k'a kɛ, a k'a majaanya ai la kɔtunun ka taa tini kɔkan.

Isa ka taama kɔɔ kɔkan teme

¹⁶ Wuladala senin, a kɔbiladennu ka taa kɔɔ kawun na,

¹⁷ ka don kulun kɔnɔ, ka kɔɔ tɛɛ damina Kapɛlɛnamu fannɔ. Su tɛɛ vɛ ko, kɛɛ Isa tɛɛ ma na ba ai ma.

¹⁸ Fɔɲɛ ba vɛ bɔla ka kɔɔ lajaman bubale.

¹⁹ Ai ka kilo loolu niwotɛ wɔɔlɔ jate kɛ kulun bɔlila waate min nɔ, ai ka Isa taamantɔla ye kɔɔ kɔkan, a v'i madonna kulun na. Wo lɔ, ai bɛ ka siyan.

²⁰ Kɛɛ Isa do vɛɛ ai yɛ: «Ài kà siyan, ǹe le.»

²¹ Ai tɛɛ a fɛ k'a ta kulun kɔnɔ, kulun do ka se telemanin ai taaya lɔ.

Niimaya bulu

²² Wo dusagbɛlon, jama min ka to kɔɔ kɔma, wolu k'a ye ko kulun kelen ne tɛɛ je kunun, ani Isa tɛɛ ma taa a kɔbiladennu fɛ kulun kɔnɔ, mafɔ a kɔbiladennu le na taala dein.

²³ Kɛɛ kulun dɔlu ka bɔ Tibɛliya ka se dingila wo dafɛ, ai ka bulu dɔn tɛɛminja mɔ Kuntii ya balikabɔ kɔla Ala yɛ.

²⁴ Jama k'a ye mingɛ ko Isa ni a kɔbiladennu tɛɛ tɛ je butu, ailu gbu vɛ donna kulun wolu kɔnɔ ka taa a ɲininya lɔ Kapɛlɛnamu so kɔnɔ.

²⁵ Mɔɔlu ka Isa ye mingɛ kɔɔ kɔma, ai do vɛɛ a yɛ: «Kalanmɔɔ, i senin jan waate mindɛ lɔ?»

²⁶ Isa k'ai javi, a vɛɛ: «Ǹ'i tuɲa fɔ ài yɛ, ài tɛ ǹ ɲininna ǹa kawananko tɔɔmaselu ɲayenko lɔ, mafɔ ài na bulu min dɔnna mingɛ k'ài fa kpe.

²⁷ Ài kà baale kɛ dɔnnifenko lɔ min yi tolinna, mafɔ min yi mɛnna ka niimaya banbali di, Mɔɔnivin Tanin kɛtɔ min dila ài ma, kamasɔlɔn mɔ Fa Ala vɛ aa seetiiya tɔɔmase bila a kan.»

²⁸ Ai k'a maɲininga, ai vɛɛ: «Mɔ ka kan ka mindɛ le kɛ fɔsa m'i Ala ya baale kɛ?»

²⁹ Isa do k'ai javi, a vɛɛ: «Ala ya baale le min ne: Ka limaniya aa mɔɔ kelayanin ma.»

³⁰ Wo lɔ, ai do vɛɛ a yɛ: «Ni wo le, i kɛtɔ kawananko mindɛ le kɛla fɔsa m'i wo ye ka limaniya i ma? I kɛtɔ mindɛ le kɛla?

³¹ Mɔ bemanu na dɔnnifen suu dɔ dɔnna fuwa lɔ, ai y'a fɔla min ma ko mana, iwo a sɛvɛnin teme kitabu kɔnɔ, ko: ‹A na bulu dila ai ma ka bɔ haijɛnɛ ko ai y'a dɔn.› »

³² Wo fɔ ai bolo, Isa vɛɛ ai yɛ: «Ǹ'i tuɲa fɔ ài yɛ, Nabi Musa ma bulu di ài ma ka bɔ haijɛnɛ, mafɔ ǹ Fa le yi bulu bɛlɛbɛlɛ dila ài ma ka bɔ haijɛnɛ.

³³ Kamasɔlɔn min jiinin ka bɔ haijɛnɛ, ale le Ala ya bulu le, wo le do yi niimaya dila dunuɲa ma.»

³⁴ Ai vɛɛ: «Mɔ Kuntii, i yi to bulu wo dila mɔ ma waate bɛ.»

³⁵ Isa do vɛɛ ai yɛ: «Ǹe le niimaya bulu le. Ni mɔɔ mɔɔ si ka na m̀ ma, kɔɔn tɛnala wo tii minala butu. Ni mɔɔ mɔɔ do ka limaniya m̀ ma, minkɛlɔɔ tɛnala wo tii minala butu.

³⁶ Kɛɛ iwo ǹ n'a fɔla ài yɛ teme, ài na ǹ yena ài ɲa la, kɛɛ ài do ma limaniya m̀ ma.

³⁷ Ǹ Fa vɛ mɔɔ minu dila m̀ ma, wolu bɛ natɔle m̀ ma. Ni mɔɔ mɔɔ do ka na m̀ ma, ǹ tɛnala wo tii gbɛnna feu.

³⁸ Kamasɔlɔn m̀ ma jii ka bɔ haijɛnɛ ǹe gbu sawo kɛko lɔ, mafɔ ǹ kelaba sawo.

³⁹ Ǹ kelaba sawo le min ne, ko a na mɔɔ minu dila m̀ ma, wo suu suu kà tunun m̀ ma, mafɔ ǹ'ai bɛ lawuli ka bɔ saya lɔ dunuɲa laban lon.

⁴⁰ Kamasɔlɔn ǹ Fa sawo le min ne, ko mɔɔ minu bɛ ɲa lɔnin a Denkɛ lɔ ka limaniya a ma, wolu bɛ yi niimaya banbali sɔlɔn, ǹe do kɛtɔ ai lawulila ka bɔ saya lɔ dunuɲa laban lon.»

⁴¹ Wo fɔ Isa bolo, Jahudiya kuntiilu ka kunnɔkuma damina ka bɛn Isa ya ko ma, kamasɔlɔn a n'a fɔla, a vɛɛ: «Ǹe le bulu le min jiinin ka bɔ haijɛnɛ.»

⁴² Ai do vɛɛ: «Isa le tɛ min ne, Jusufu denkɛ? Mɔ do ka a fa ni a ba lɔn. Mindɛ kɛnin a a fɔla yi ne ko a jiinin ka bɔ haijɛnɛ le?»

⁴³ Isa do k'ai javi, a vɛɛ: «Ài kunnɔkuma to je i ɲɔɔ wotɛ.

⁴⁴ Mɔɔ suu suu tɛ se nala m̀ ma, ni ǹ Fa min na ǹ kelayala, ni ale ma wo tii masama k'a lana m̀ ma. Ǹe do kɛtɔ wo tii lawulila ka bɔ saya lɔ dunuɲa laban lon.

⁴⁵ A sɛvɛnin kelalu ya kitabulu kɔnɔ, ko: ‹Ala gbu le kɛtɔ ai bɛ kalanna.› Wo le y'a ma, mɔɔ minu bɛ vɛ ai tolomalɔla ǹ Fa kumakan na ani ka diɲa aa kalan ma, wolu bɛ yi nale m̀ ma.

⁴⁶ A tɛ k'a fɔ ko dɔ vɛ ǹ Fa ye. Mɔɔ suu suu ma ǹ Fa ye ba, mafɔ ale min bɔnin a fɛlɔ, wo le vɛ a ye.

⁴⁷ Ǹ'i tuɲa fɔ ài yɛ, ni mɔɔ mɔɔ ka limaniya, niimaya banbali yi wo tii le yɛ.

⁴⁸ Ǹe le niimaya bulu le.

⁴⁹ Ài bemanu ka mana dɔn fuwa lɔ, kɛɛ ai do ka sa.

⁵⁰ Kɛɛ bulu min jiinin ka bɔ haijɛnɛ, wo le ne. Ni mɔɔ min k'a dɔ dɔn, wo tii tɛnala sala.

⁵¹ Ǹe le niimaya bulu le min jiinin ka bɔ haijɛnɛ. Ni mɔɔ min ka bulu min dɔ dɔn, wo tii totɔ niimaya le lɔ kudein. Ado ǹ kɛtɔ bulu min dila fɔsa dunuɲa yi niimaya sɔlɔn, wo le ǹ falikolo le.»

⁵² Wo fɔ Isa bolo, Jahudiya kuntiilu v'i ɲɔɔ sɔsɔla, ai vɛɛ: «Kɛ́ min yi se a falikolo dila mɔ ma di vɛ ko m'a dɔn?»

⁵³ Wo kɛ, Isa vɛɛ ai yɛ: «Ǹ'i tuɲa fɔ ài yɛ, ni ài ma ǹe Mɔɔnivin Tanin falikolo dɔn ani ka ǹ jeli min, ài tɛnala niimaya sɔlɔnna.

⁵⁴ Ni mɔɔ min do ka ǹ falikolo dɔn ani ka ǹ jeli min, niimaya banbali yi wo tii le yɛ, ani ǹ kɛtɔ a lawulila ka bɔ saya lɔ dunuɲa laban lon.

⁵⁵ Kamasɔlɔn ǹ falikolo yi dɔnnifen bɛlɛbɛlɛ le le, ani ǹ jeli yi minnifen bɛlɛbɛlɛ le le.

⁵⁶ Wo le y'a ma, ni mɔɔ min ka ǹ falikolo dɔn ani ka ǹ jeli min, wo tii totɔ ǹa kafonɲɔɔya le lɔ, ǹe fana totɔ kafonɲɔɔya lɔ wo tii fɛ.

⁵⁷ Ǹ kelayanin Ɲɛnɛmayatii Fa bolo ka niimaya sɔlɔn teme a sabu la, ni mɔɔ mɔɔ si ka balo ǹ falikolo la, wo tii kɛtɔ niimaya sɔlɔnna ten ne ǹ sabu la.

⁵⁸ Bulu min jiinin ka bɔ haijɛnɛ, wo le ne. A kɛnin tɛ iwo ài bemanu na bulu min dɔnna ka ban ka sa. Ni mɔɔ mɔɔ si ka bulu min dɔ dɔn, wo tii totɔ niimaya le lɔ kudein.»

⁵⁹ Isa ka kuma wolu fɔ k'a to mɔɔlu kalanna Aladalibon na Kapɛlɛnamu.

Niimaya banbali kumalu

⁶⁰ A kɔbiladen siyama ka ko wolu mɛn mingɛ, ai vɛɛ: «Kuma min gbeleyayine! Jene yi se diɲala wo ma?»

⁶¹ Isa tɛɛ k'a lɔn a miliya lɔ ko a kɔbiladennu yi kunnɔkuma fɔla ka bɛn aa kuma wolu ma. Wo le k'a kɛ, a vɛɛ ai yɛ: «Jalasa kuma min y'ài kunnɔtɛɛ dailu le le?

⁶² Ni ài ka Mɔɔnivin Tanin jɛlɛtɔla ye ka seikɔ a bɔya lɔ do?

⁶³ Nii Sɛnɛyanin ne yi niimaya dila, niwotɛ adamaden fanga tɛ foi ɲia. Ǹ na kuma minu fɔla ài yɛ, wolu bɔnin Nii Sɛnɛyanin ne lɔ, ai do yi niimaya dila.

⁶⁴ Kɛɛ a dɔlu y'ài tɛma, minu limaniyanin tɛ.» (Ka ta a damina ma, Isa tɛɛ k'a lɔn mɔɔ minu limaniyanin tɛ ani mɔɔ min kɛtɔ a janvala.)

⁶⁵ Isa k'a fɔ kɔtunun, a vɛɛ: «Wo le n'a kɛla, ǹ n'a fɔla ài yɛ, ǹ ko, mɔɔ suu suu tɛ se nala m̀ ma, ni ǹ Fa ma wo see di a ma.»

⁶⁶ Ka ta wo lon ma, a kɔbiladen siyama ka seikɔ. Ai do ma diɲa ka bila a kɔ butu.

⁶⁷ Wo lɔ, Isa k'a fɔ aa keladen mɔɔ tan ni fila (12) yɛ, a vɛɛ: «Àilu do? Àilu fana y'a fɛ ka taa?»

⁶⁸ Simɔn Piyɛli k'a javi, a vɛɛ: «Ǹ Kuntii, m'i taa jene kɔ ni ile tɛ? Niimaya banbali kumalu yi ile le bolo.

⁶⁹ Mɔ do vɛ limaniya yi ne, ani k'a lɔn ko ile le Ala ya Mɔɔ Sɛnɛyanin ne.»

⁷⁰ Isa do k'ai javi, a vɛɛ: «Ǹe gbu le n'ài mɔɔ tan ni fila (12) tala, kɛlɛ? Kɛɛ ài lɔ mɔɔ kelen yi Soitana den ne le.»

⁷¹ Isa kan tɛɛ Simɔn Isekaliyɔti denkɛ Judasi le ma. A do tɛɛ Isa ya keladen mɔɔ tan ni fila (12) dɔ le le, min kɛtɔ a janvala.