Yohana 4 - Ala Ya Salatikan Kula Kitabu

Isa ni Samaliyaka moso

¹ Isa ka kɛ a kalama mingɛ ko Falisilu v'a mɛn ko ale tɛɛ kɔbiladen siyama sɔlɔnna ka timin Yaya la k'ai mako kɔɔ kɔlɔ

² (k'a talan ale gbu tɛɛ tɛ mɔɔlu makola, mafɔ a kɔbiladennu),

³ wo le k'a kɛ, a ka bɔ Jude koovi lɔ ka seikɔ Galile.

⁴ Kɛɛ jani a tɛɛ se Galile, fɔ a tɛɛ Samaliya duu le lɔtimin.

⁵ Wo ma, a ka se Samaliyakalu ya so dɔ la, ai y'a fɔla min ma ko Sikali. Sedina Janguba ka gbɛkɛnɛ min di a den Jusufu ma, so wo tɛɛ woja dafɛ le.

⁶ Sedina Janguba ya kɔlɔn tɛɛ je le. Wo lɔ, Isa k'i sii kɔlɔn wo dafɛ, kamasɔlɔn a tɛɛ vɛ sɛyɛ taama bolo. Telelatelen waate le tɛɛ.

⁷ Ado Samaliyaka moso dɔ ka na jitaya lɔ je. Isa vɛɛ a yɛ: «Ǹ sɔ ji la, ǹ'i m̀ min.»

⁸ (Wo k'a talan a kɔbiladennu tɛɛ vɛ taa dɔnnifen sanya lɔ so kɔnɔ.)

⁹ Moso ka Isa javi, a vɛɛ: «Ile min yi Jahudiya le, mindɛ kɛnin i yi ǹ dalila minji la, k'a talan Samaliyaka moso le ǹ ne?» (Kamasɔlɔn Jahudiyalu tɛɛ tɛ sena Samaliyakalu ma ko suu suu lɔ.)

¹⁰ Isa do k'a javi, a vɛɛ: «Ni i tɛɛ vɛ Ala ya sɔli lɔnna ani mɔɔ min i dalila minji la, fɔ ile tɛɛ ale dali ji la, a do tɛɛ i sɔle niimaya ji la.»

¹¹ Moso vɛɛ: «Ǹ Kuntii, jitafen t'i bolo, kɔlɔn do lɔjiinin. I kɛtɔ niimaya ji wo sɔlɔnna mineja?

¹² Mɔ bema Janguba le na kɔlɔn min senna k'a to mɔ bolo. Ale ni a dennu ni aa kolofennu tɛɛ ji wo le minna. Jalasa i fisayayine mɔ bema Janguba le?»

¹³ Isa ka moso javi, a vɛɛ: «Ni mɔɔ mɔɔ ka ji min dɔ min, minkɛlɔɔ kɛtɔ wo tii minala kɔtunun.

¹⁴ Kɛɛ ǹ'i ji min dila, mɔɔ mɔɔ vɛ wo dɔ minna, minkɛlɔɔ tɛnala wo tii minala butu tuun. Wo kɛtɔle a kɔnɔlɔ iwo kɔɔkun min yi woyola ka niimaya banbali di a ma.»

¹⁵ Moso do vɛɛ: «Ǹ Kuntii, i yi ǹ sɔ ji wo dɔ la, fɔsa minkɛlɔɔ kana m̀ mina butu, ani ǹ kana to nala jan jitaya lɔ.»

¹⁶ Wo fɔ, Isa vɛɛ a yɛ: «Taa, i yi kɛ́ kili, ài yi na jan.»

¹⁷ Moso do k'a javi, a vɛɛ: «Kɛ́ tɛ m̀ bolo.» Isa do vɛɛ: «I tuɲa k'a fɔ ko kɛ́ t'i bolo,

¹⁸ kamasɔlɔn i v'i sii kɛ́ loolu le kun, ado i yi min bolo yi ne, wo t'i fulukɛ le. Wo lɔ, i na tuɲa le fɔla.»

¹⁹ Moso do vɛɛ: «Ǹ Kuntii, m̀'ɛ a ɲaye butu ko kela le i le.

²⁰ Mɔ bemanu tɛɛ Ala batola tini min ne kɔkan jan, kɛɛ àilu Jahudiyalu vɛɛ ko mɔɔlu ka kan ka Ala bato Jelusalɛmu le.»

²¹ Isa k'a javi, a vɛɛ: «Ile moso, i yi la ǹ na ko lon dɔ natɔ, ài tɛnala mɔ Fa Ala batola tini min kɔkan, niwotɛ Jelusalɛmu.

²² Àilu Samaliyakalu m'a lɔn ài yi min batola. Kɛɛ ǹu yi min batola, mɔ ka wo lɔn kamasɔlɔn kisiko ma yi sɔlɔnna ǹu Jahudiyalu le fɛ.

²³ Waate dɔ sentɔ, a do vɛ se butu, Ala Nii Sɛnɛyanin kɛtɔ mɔɔlu madɛmɛnna ka a bato iwo a yi teme bɛlɛbɛlɛ kɛ, kamasɔlɔn Mɔ Fa Ala yi batokɛba wo suulu le ɲininna.

²⁴ Ala yi Nii le le, ado minu y'a batola, fɔ ai y'a bato a Nii Sɛnɛyanin ya dɛmɛli sabu la iwo a yi teme bɛlɛbɛlɛ kɛ.»

²⁵ Moso vɛɛ a yɛ: «Ǹ k'a lɔn Alimasihu natɔ, ai y'a fɔla min ma ko Masa Tɔɔmasenin. Wo vɛ nala, a kɛtɔ ko bɛ ɲafɔla mɔ yɛ.»

²⁶ Isa k'a javi, a vɛɛ: «Ǹe le wo le, min yi kumala i fɛ yi ne.»

²⁷ Wo waate kelen nɔ, a kɔbiladennu ka seikɔ. Ai do ka kawakoya, kamasɔlɔn ai ka Isa ni moso talan balola, kɛɛ ai suu suu ma moso wo maɲininga k'a fɔ: «I yi mindɛ kɔ?», niwotɛ k'a fɔ Isa yɛ ko: «Mindɛ kɛnin i yi balola moso wo fɛ?»

²⁸ Wo kɛ, moso k'aa jitafen to je ka taa so kɔnɔ k'a fɔ mɔɔlu yɛ, a vɛɛ:

²⁹ «Ài yi na, ài yi kɛ́ dɔ ye min na ǹ kɛkolu bɛ fɔla ǹ yɛ. Jalasa ale le tɛ Masa Tɔɔmasenin ne?»

³⁰ Wo fɔ, ai vɛ bɔla so kɔnɔ ka na Isa fɛlɔ.

³¹ Wo waate lɔ, a kɔbiladennu tɛɛ a madiyala, ai vɛɛ: «Kalanmɔɔ, na m'i dɔnni kɛ.»

³² A do vɛɛ ai yɛ: «Dɔnnifen yi m̀ bolo k'a dɔn, ài tɛ min kalama.»

³³ Wo fɔ Isa bolo, a kɔbiladennu v'i ɲɔɔ maɲiningala, ai vɛɛ: «Jalasa mɔɔ dɔ le nanin dɔnnifen ne a fɛ?»

³⁴ Isa do vɛɛ ai yɛ: «Ǹ dɔnnifen yi min ne, wo le ka ǹ kelaba sawo kɛ ani ka aa baale dafa.

³⁵ Ài y'a fɔla ko: ‹A vɛ to kalo naani, malo kali waate yi se›, kɛlɛ? Kɛɛ ǹ'a fɔ ài yɛ, ài y'ài ɲa lawuli ka sɛnɛlu lasaa. Malo vɛ mɔn, a do kali waate le ne.

³⁶ Mɔɔ min yi malo kalila, wo tii y'a sala sɔlɔnna butu. A do yi malo ladɛnna ka bɛn niimaya banbali le ma, fɔsa malo sɛnɛba ni a kaliba yi sawa i ɲɔɔ fɛ.

³⁷ Sana min yi tuɲa le le, ko: ‹Dɔ yi malo sɛnɛna, dɔ y'a kalila.›

³⁸ Ài ma sɛnɛ min kɛ, m̀'ɛ ài lɔ wo kalila. Mɔɔ dɔgbɛlɛlu le na baalela je, àilu do yi wo tɔnɔ le sɔlɔnna yi ne.»

³⁹ Samaliyaka siyama ka limaniya Isa ma so wo kɔnɔ ka bɛn moso wo ya seleyakan ma, a vɛɛ: «A na ǹ kɛkolu bɛ fɔla ǹ yɛ.»

⁴⁰ Wo le k'a kɛ, Samaliyakalu ka na Isa ma, k'a madiya ko a yi to ai fɛlɔ. A do ka tele fila kɛ je.

⁴¹ Mɔɔ siyama gbɛlɛlu ka limaniya a ma ka bɛn a kumakan ma.

⁴² Ai k'a fɔ moso yɛ, ai vɛɛ: «Tandainɔ yi ne, mɔ ma limaniya ka bɛn i kumakan ma, kɛɛ ǹu gbu v'a kumakan mɛn yi ne, ado mɔ v'a lɔn feu ko ale le dunuɲa bɛ Lakisiba le.»

Isa ka ɲamɔɔ dɔ denkɛ lakɛnɛya teme

⁴³ Tele fila timinnin, Isa ka siya mina ka taa Galile.

⁴⁴ (Kamasɔlɔn ale gbu tɛɛ vɛ seleya di ko kela tɛ buɲa sɔlɔnna a fɛso.)

⁴⁵ A senin Galile, je mɔɔlu k'ai bolo sii a kɔlɔ, kamasɔlɔn ailu fana tɛɛ vɛ taa Timinkunna selibɔya lɔ Jelusalɛmu, ka Isa kɛkolu bɛ ye.

⁴⁶ Isa k'a kɔsei Kana so kɔnɔ, Galile koovi lɔ, a na ji jɛlɛmana ka kɛ lɛzɛnji le tɛɛminja. Jamana ɲamɔɔ dɔ tɛɛ Kapɛlɛnamu so kɔnɔ min denkɛ tɛɛ man kɛnɛ.

⁴⁷ Ɲamɔɔ wo k'a mɛn mingɛ ko Isa vɛ na Galile ka bɔ Jude, a ka taa a ma k'a madiya ko a yi diɲa ka taa a denkɛ lakɛnɛya, kamasɔlɔn wo tɛɛ sa bolo le ma.

⁴⁸ Isa do vɛɛ a yɛ: «Ni ài ma kawanankolu ni ko babalu ye ài ɲa la, ài tɛnala limaniyala m̀ ma tuun.»

⁴⁹ Ɲamɔɔ k'a javi, a vɛɛ: «Ǹ Kuntii, i jaani, ndaa vɛ ǹ fɛlɔ jani ǹ denkɛ yi sa.»

⁵⁰ Isa do vɛɛ a yɛ: «Taa vɛ. I denkɛ vɛ kisi.» Ɲamɔɔ wo ka limaniya Isa kumakan ma ka taa.

⁵¹ A taatɔla aa luu ma, aa bɔidennu k'a labɛn k'a fɔ a yɛ ko a denkɛ vɛ kɛnɛya.

⁵² A do k'ai maɲininga, a vɛɛ: «A na kɛnɛyala waate mindɛ?» Ai vɛɛ: «A fali na sumala telelatelen waate le lɔ kunun.»

⁵³ Den fa k'a lɔn wo le lɔ ko wo waate kelen ne tɛɛ, Isa k'a fɔ a yɛ, a vɛɛ: «I denkɛ vɛ kisi.» Ale ni aa bonnamɔɔlu bɛ ka limaniya Isa ma wo lɔ.

⁵⁴ Isa ya kawananko filana le tɛɛ wo le, a kɔsei mingɛnin Galile ka bɔ Jude koovi lɔ.