Yohana 3 - Ala Ya Salatikan Kula Kitabu

Isa ni Nikodɛmu

¹ Kɛ́ dɔ tɛɛ je, min tɔɔ tɛɛ ko Nikodɛmu. A tɛɛ Jahudiyalu ya jama ɲamɔɔ dɔ le le, ai y'a fɔla minu ma ko Falisilu.

² Lon dɔ, a ka taa Isa fɛlɔ su lɔ k'a fɔ a yɛ, a vɛɛ: «Kalanmɔɔ, mɔ k'a lɔn Ala le n'i kelayala mɔɔlu kalanko lɔ, kamasɔlɔn mɔɔ foi tɛ se iya kawananko minu ɲɔɔzii kɛla, ni Ala ma kɛ mɔɔ min fɛ.»

³ Isa k'a javi, a vɛɛ: «Ǹ'i tuɲa fɔ i yɛ, ni mɔɔ min ma sɔlɔn kula kɛ, wo tii tɛ se Ala ya masaya yena.»

⁴ Nikodɛmu vɛɛ: «Mɔɔ vɛ kɔlɔyala, a yi se sɔlɔnna kula kɛ di? Jalasa a yi sene seikɔla a ba kɔnɔlɔ ka sɔlɔn kula kɛ?»

⁵ Isa k'a javi, a vɛɛ: «Ǹ'i tuɲa fɔ i yɛ, ni mɔɔ ma sɔlɔn kula kɛ ji ni Nii Sɛnɛyanin sabu la, a tɛ se donna Ala ya masaya lɔ.

⁶ Falikolo yi falikolo le sɔlɔnna, kɛɛ mɔɔlu yi niimaya kula le sɔlɔnna Nii Sɛnɛyanin sabu la.

⁷ Ǹ n'a fɔ mingɛla i yɛ: ‹Fɔ ài bɛ yi sɔlɔn kula kɛ›, wo k'i kawakoya.

⁸ Fan min vɛ diyala fɔɲɛ yɛ, a yi bɔla wo le ja. I y'a mangan le mɛnna, kɛɛ i ma a bɔya lɔn, niwotɛ a taaya. Mɔɔ minu sɔlɔnnin Nii Sɛnɛyanin sabu la, wolu kɛnin ten ne.»

⁹ Nikodɛmu do k'a maɲininga, a vɛɛ: «Ko wolu yi se kɛla di?»

¹⁰ Isa k'a javi, a vɛɛ: «Ile min yi Bani Isilankalu ya kalanmɔɔ ba le, i ma ko minu lɔn?

¹¹ Ǹ'i tuɲa fɔ i yɛ, mɔ ka min lɔn, m'i wo le fɔla. Mɔ do na min yena, m'i wo le seleya dila. Kɛɛ ài tɛ ài bolo siila maa seleyakan kɔlɔ.

¹² Ǹ na dunuɲakolu fɔla ài yɛ, ài do ma limaniya wolu ma. Ni ǹ ka haijɛnɛkolu fɔ ài yɛ do, ài yi limaniyale wolu ma?

¹³ Mɔɔ mɔɔ ma jɛlɛ ba bene ka taa haijɛnɛ fɔ Mɔɔnivin Tanin min jiinin ka bɔ je.

¹⁴ Ado Nabi Musa na sa sawula lajɛlɛla kɔlɔman ma fuwa lɔ teme, fɔ Mɔɔnivin Tanin fana la yi jɛlɛ ten ne,

¹⁵ fɔsa ni mɔɔ mɔɔ ka limaniya a ma, wo tii yi niimaya banbali sɔlɔn.

¹⁶ Kamasɔlɔn Ala na dunuɲa kanula boloɲa min ne ma: A na a Denkɛ kelenpesa dila, fɔsa ni mɔɔ mɔɔ ka limaniya a ma, wo tii kana halaki, kɛɛ wo tii yi niimaya banbali sɔlɔn.

¹⁷ Kamasɔlɔn Ala ma a Denkɛ kelaya dunuɲa kɔnɔ dunuɲa jobaliyako lɔ. Kɛɛ a na a kelayala dunuɲa lakisiko le lɔ a fɛ.

¹⁸ «Ni mɔɔ min ka limaniya a ma, wo tii tɛ jobaliyala butu. Kɛɛ ni mɔɔ min do ma limaniya a ma, wo tii vɛ ban jobaliyala, kamasɔlɔn a ma limaniya Ala Denkɛ kelenpesa ma.

¹⁹ Jobaliya wo kun ne min ne: Kɛnɛya vɛ na dunuɲa, kɛɛ divi le diyanin adamadennu yɛ ka timin kɛnɛya la, kamasɔlɔn ai kɛkolu le kɛwonyanin.

²⁰ Kamasɔlɔn mɔɔ min yi koyon kɛla, kɛnɛya le gbeyanin wo tii yɛ. A do tɛ diɲa ka na kɛnɛya lɔ, fɔsa a kɛkolu kana bɔ gbɛ la.

²¹ Kɛɛ mɔɔ min do yi taamana tuɲandeya lɔ, wo tii yi diɲale ka na kɛnɛya lɔ, fɔsa a la yi gbɛ ko a a kɛkolu kɛla Ala ya kafonɲɔɔya le lɔ.»

Yaya ka seliya di ka bɛn Isa ma teme

²² Wo kɔ, Isa ni a kɔbiladennu ka taa Jude koovi lɔ ka waate dana kɛ ai fɛ, a vɛ mɔɔlu makola kɔɔ kɔlɔ.

²³ Yaya fana tɛɛ mɔɔlu makola Enɔn, Salim so dafɛ, kamasɔlɔn ji ba tɛɛ wo le ja. Mɔɔlu tɛɛ nala Yaya ma ko a ai mako.

²⁴ Wo k'a talan, ai tɛɛ ma Yaya bila ba kaso la bene.

²⁵ Lon dɔ, sɔsɔyali dɔ k'a wuli Yaya kɔbiladen dɔlu ni Jahudiya kɛ́ dɔ wotɛ ka bɛn diina ya sɛnɛya laana ma.

²⁶ Ai do ka taa Yaya fɛlɔ k'a fɔ a yɛ, ai vɛɛ: «Kalanmɔɔ, ile ni kɛ́ min tɛɛ i ɲɔɔ fɛ Julidɛn kɔɔ kɔma, i na seleya dila ka bɛn min ma, wo le yi mɔɔlu makola yi ne, bɛ do yi taala a kɔ.»

²⁷ Yaya k'ai javi, a vɛɛ: «Mɔɔ tɛ se foi sɔlɔnna ni Ala ma min di i ma.

²⁸ Ǹ tɛɛ a fɔ mingɛla ko: ‹Ǹe tɛ Masa Tɔɔmasenin ne, kɛɛ ǹ kelayayine a ɲa›, àilu gbu le m̀ masele le ka bɛn wo ma.

²⁹ Kɔɲɛmoso yi kɔɲɛfa ta le le. Kɔɲɛfa tɔva y'i lɔla a dafɛ, a tolomalɔnin vɛ a la, a vɛ kɔɲɛfa kan mɛnna, a kɔnɔlɔ yi diyala kosɛvɛ. Wo sawa ɲɔɔzii le yi ǹ na, a do da vɛ fa.

³⁰ Fɔ aa buɲa ma yi kafon, ǹe ta yi dɔɔya.»

Mɔɔ min bɔnin haijɛnɛ

³¹ Mɔɔ min bɔnin Ala fɛlɔ, wo tii le yi fen bɛ kunna. Kɛɛ mɔɔ min sɔlɔnnin dunuɲa, wo tii yi dunuɲa ta le le, a do yi dunuɲakolu le fɔla. Min do bɔnin haijɛnɛ, wo tii le yi fen bɛ kunna.

³² A na min yena ani k'a mɛn, a yi wo le seleya dila, kɛɛ mɔɔ foi tɛ a bolo siila aa seleyakan kɔlɔ.

³³ Ni mɔɔ min do k'a bolo sii aa seleyakan kɔlɔ, wo tii v'a jiya ko Ala le tuɲande le.

³⁴ Ala na mɔɔ min kelayala, wo le yi Ala kumakannu lasena, kamasɔlɔn Ala yi Nii Sɛnɛyanin dila a ma bɛlɛbɛlɛ kɛ.

³⁵ Fa y'a Denkɛ kanula. A do vɛ fen bɛ bila a fanga kɔlɔ.

³⁶ Mɔɔ min vɛ limaniyala a Denkɛ ma, niimaya banbali yi wo tii le yɛ. Kɛɛ ni mɔɔ min k'i ban a Denkɛ lɔ, wo tii tɛnala niimaya sɔlɔnna, mafɔ a yi tole Ala ya mɔnɛya kɔlɔ kudein.