Yohana 20 - Ala Ya Salatikan Kula Kitabu

Isa k'i wuli ka bɔ saya lɔ teme

¹ Lailon subanima, Mɔyamu Magidalaka ka taa kabulu dala ka kawakulun ba bɔnin ye kabulu da la.

² A do vɛ bɔlila ka taa a fɔ Simɔn Piyɛli ni Isa diyanan kɔbiladen yɛ, a vɛɛ: «Ai na mɔ Kuntii fuleni labɔla kabulu lɔ, mɔ do ma a bilaya lɔn!»

³ Piyɛli ni dɔ kɔbiladen wo ka wo mɛn mingɛ, ai ka bɔ je ka taa kabulu dala.

⁴ Ai mɔɔ fila le tɛɛ bɔlila i ɲɔɔ fɛ, kɛɛ dɔ kɔbiladen wo ka Piyɛli to ka se a ɲa kabulu dala.

⁵ Wo kɛ, a k'a kun majii k'a ɲa kaa kabulu lɔ. A do ka kasange lanin ye je, kɛɛ a do ma don kabulu kɔnɔ.

⁶ Wo kɛ, Simɔn Piyɛli min tɛɛ a salanna, wo ka na ka don kabulu kɔnɔ, ka kasange lanin ye je.

⁷ Isa kun masilinin tɛɛ faani min nɔ, a ka wo fana mamɔlɔmɔlɔnin ye a ta fan.

⁸ Wo kɛ, kɔbiladen min ka se kabulu dala kunfɔlɔ le, wo fana ka don. A do ka wo bɛ ye ka limaniya.

⁹ Wo bɛ lɔ, ai tɛɛ ma kitabu kɔnɔ kuma ɲaye ba bene, min y'a fɔla ko Isa ka kan k'i wuli ka bɔ saya lɔ.

¹⁰ Wo kɔ, kɔbiladen wolu ka seikɔ aiya luulu ma.

Isa k'a jɛlɛ jiya Mɔyamu Magidalaka la teme

¹¹ Wo waate lɔ, Mɔyamu tɛɛ lɔnin kabulu dala, a vɛ kasila. A do ka to kasila k'a kun majii k'a ɲa kaa kabulu kɔnɔ.

¹² A do ka mɛlɛka fila siinin ye Isa fuleni laya lɔ, faani gbɛ pepe tɛɛ ai kanna, kelen tɛɛ a kun laya lɔ, dɔ tɛɛ a sen laya lɔ.

¹³ Mɛlɛkalu do vɛɛ a yɛ: «Moso, mindɛ kɛnin i yi kasila?» Mɔyamu vɛɛ ai yɛ: «Ai vɛ ǹ Kuntii fuleni ta. M̀ m'a lɔn ai na a bilala tɛɛminja.»

¹⁴ Wo fɔ a bolo, a k'i ɲa tilimin ka Isa lɔnin ye, kɛɛ a ka fili a ma.

¹⁵ Isa do vɛɛ a yɛ: «Moso, mindɛ kɛnin i yi kasila? I yi jene ɲininna?» A tɛɛ Mɔyamu kɔnɔ ko gbelekunnasiiba le. Wo le k'a kɛ, a k'a javi, a vɛɛ: «Ǹ Kuntii, ni ile le na a fuleni tala, i y'a bilaya jiya ǹ na, ǹ'a ta.»

¹⁶ Isa do vɛɛ a yɛ: «Mɔyamu!» Wo fɔ Isa bolo, Mɔyamu k'i ɲa tilimin k'a fɔ a yɛ Hebulukan nɔ, a vɛɛ: «Laboni!» (Wo kɔlɔ le ko Kalanmɔɔ.)

¹⁷ Isa do vɛɛ a yɛ: «I k'i fasa m̀ ma, kamasɔlɔn m̀ ma jɛlɛ ba bene ka taa ǹ Fa fɛlɔ. Kɛɛ fɔ i yi taa a fɔ m̀ badenmalu yɛ ko ǹ jɛlɛtɔle ka taa ǹe ni ailu Fa fɛlɔ, min taanin kɛla ǹe ni ailu Tii le.»

¹⁸ Wo fɔ, Mɔyamu Magidalaka ka taa a fɔ Isa kɔbiladennu yɛ, a vɛɛ: «M̀'ɛ mɔ Kuntii ye!» A do ka Isa kumakan lase ai ma, wo na min fɔla a yɛ.

Isa k'a jɛlɛ jiya a kɔbiladennu la teme

¹⁹ Wo lon kelen wula fɛ, min tɛɛ Lailon ne, Isa kɔbiladennu k'ai ladɛn bon dɔ la ka dalu sɔɔ, kamasɔlɔn ai tɛɛ siyanna Jahudiya kuntiilu ɲa. Wo kɛ, Isa ka na k'i lɔ ai tɛma k'a fɔ ai yɛ, a vɛɛ: «Hɛlɛ yi kɛ ài yɛ.»

²⁰ Wo fɔ a bolo, a k'a bololu ni a fulu jiya ai la. Ai do ka sawa bubale mɔ Kuntii yenko lɔ.

²¹ Isa do vɛɛ ai yɛ kɔtunun: «Hɛlɛ yi kɛ ài yɛ. Ǹ Fa na ǹ kelayala teme, ǹe fana y'ài kelayala ten ne.»

²² Wo fɔ, a k'a dafɔɲɛ kɛ ai kan k'a fɔ ai yɛ, a vɛɛ: «Ài yi Nii Sɛnɛyanin sɔlɔn.

²³ Ni ài ka mɔɔ min ya julumbulu lɔkoto, wolu lɔ yi kotole. Kɛɛ ni ài do ma mɔɔ min ya julumbulu lɔkoto, wolu lɔ tɛ koto.»

Isa k'a jɛlɛ jiya Tomasi la teme

²⁴ Isa ya keladen mɔɔ tan ni fila (12) dɔ, min tɔɔ tɛɛ ko Tomasi, ai tɛɛ a fɔla min ma ko Mɔɔfila, wo tɛɛ tɛ ai fɛ Isa nanin waate min nɔ.

²⁵ Wo lɔ, ai k'a fɔ a yɛ, ai vɛɛ: «Mɔ na mɔ Kuntii yena!» Kɛɛ a do vɛɛ ai yɛ: «Ǹ tɛnala lala wo la tuun, fɔ m̀'ɛ pɔnde nɔ yena a bololu ma ka m̀ bolokɔni ladon a lɔ, ani ka m̀ bolo ladon tama nɔ lɔ a fulu fɛ.»

²⁶ Lɔɔtɛ kelen timinnin kɔ, Isa kɔbiladennu ladɛnnin ka to bon na kɔtunun, ado Tomasi fana tɛɛ je. Hali dalu sɔɔnin tɛɛ, kɛɛ Isa ka na k'i lɔ ai tɛma k'a fɔ ai yɛ, a vɛɛ: «Hɛlɛ yi kɛ ài yɛ.»

²⁷ Wo fɔ, a k'a fɔ Tomasi yɛ, a vɛɛ: «I bolokɔni lɔ jan, i yi m̀ bololu lasaa, ani i bolo lɔsama, i y'a ladon ǹ fulu fɛ. I kà sika, fɔ ka limaniya.»

²⁸ Tomasi k'a javi, a vɛɛ: «Ǹ Kuntii, ani ǹ Tii!»

²⁹ Isa do vɛɛ a yɛ: «Jalasa i vɛ limaniya ka bɛn ǹ yenko ma? Duwawuden ne mɔɔ wolu le, minu vɛ limaniya k'a talan ai ma ǹ ye.»

Yohana ya kitabu sɛvɛ kun

³⁰ Isa ka kawananko siyama kɛ a kɔbiladennu ɲakɔlɔ, minu bɛ ma sɛvɛ kitabu min nɔ.

³¹ Kɛɛ ko minu sɛvɛnin fɔsa ài yi limaniya k'a fɔ ko Isa le Masa Tɔɔmasenin ne ani Ala Denkɛ. Ài do vɛ limaniyala a ma, ài kɛtɔ niimaya sɔlɔnna a tɔɔ fɛ.