Yohana 2 - Ala Ya Salatikan Kula Kitabu

Kɔɲɛmalɔ tolon min ka kɛ Kana so kɔnɔ

¹ Tele fila a sawana, kɔɲɛmalɔ tolon dɔ ka kɛ Kana so kɔnɔ, Galile koovi lɔ. Ado Isa ba tɛɛ je.

² Isa ni a kɔbiladennu fana kilinin tɛɛ je.

³ Lɛzɛnji ka ban mingɛ, Isa ba k'a fɔ a yɛ, a vɛɛ: «Aiya lɛzɛnji vɛ ban.»

⁴ Isa do vɛɛ a yɛ: «M̀ ba, ǹa ko tɛ wo le. Ǹa waate ma se ba bene.»

⁵ A ba k'a fɔ bɔidennu yɛ, a vɛɛ: «A vɛ ko ko si fɔla ài yɛ, ài yi wo kɛ.»

⁶ Wo k'a talan kawa daa wɔɔlɔ tɛɛ je, Jahudiyalu tɛɛ ai jɛlɛ lasɛnɛyala wo ji le le ka bɛn aiya laana ma, ado litili bisein (80) niwotɛ litili kɛmɛ (100) jate tɛɛ sene kɛla daa wo kelenkelenna bɛ kɔnɔ.

⁷ Isa k'a fɔ bɔidennu yɛ, a vɛɛ: «Ài yi daalu lafa ji la.» Bɔidennu do ka daa bɛ lafa kpekpe.

⁸ Wo kɛ, Isa vɛɛ ai yɛ: «Ài yi ji dɔɔni soi butu ka taa a le tolon kuntii fɛ.» Ai do ka wo kɛ.

⁹ Tolon kuntii ka ji dɔɔni mafɛlɛn min jɛlɛmanin lɛzɛnji le, a tɛɛ ma lɛzɛnji bɔya lɔn, k'a talan bɔiden minu na ji wo soila ka na a le, wolu tɛɛ k'a lɔn. Wo ma, tolon kuntii ka kɔɲɛfa kili,

¹⁰ k'a fɔ a yɛ, a vɛɛ: «Mɔɔ bɛ deinin lɛzɛnji diyanin ne dila kunfɔlɔ le, mɔɔlu vɛ wo minna ka bɔkɛ ai le bɛlɛbɛlɛ kɛ, kɔfɛ butu, ai yi na a kumunnin ne. Kɛɛ ile vɛ lɛzɛnji diyanin ladalo haan fɔɔ waate min!»

¹¹ Isa ka aa kawananko kunfɔlɔ min kɛ Kana so le kɔnɔ, Galile koovi lɔ, ka aa magbiliyali lankɛnɛmaya boloɲa min ma. A do kɔbiladennu ka limaniya a ma.

¹² Wo timinnin kɔ, Isa ni a ba ni a dɔɔnilu ni a kɔbiladennu bɛ ka taa Kapɛlɛnamu so kɔnɔ ka tele dana kɛ je.

Isa ka julalu gbɛn lɔhɔlɔmabonba luu kɔnɔ teme

¹³ Ka talan Jahudiyalu ya Timinkunna Selilon ma tɛɛ vɛ sulunya, Isa ka taa Jelusalɛmu.

¹⁴ A do ka don lɔhɔlɔmabonba luu kɔnɔ ka julalu ye minu tɛɛ nisi ni saa ni bilinilu felela, ani ka wɔlifalinbalu siinin ye aiya tabalilu la.

¹⁵ Wo le k'a kɛ, a ka julu dɔlu kɛ gbusan ne, k'ai bɛ gbɛn lɔhɔlɔmabonba luu kɔnɔ, ani saa ni nisilu. A do ka wɔlifalinbalu ya wɔli jɛzɛn k'aiya tabalilu labenben.

¹⁶ A k'a fɔ bilini felebalu yɛ, a vɛɛ: «Ài yi fen minu labɔ jan. Ài kà ǹ Fa ya bon kɛ julayakɛya le.»

¹⁷ Isa kɔbiladennu hangili ka bila a lɔ ko a sɛvɛnin kitabu kɔnɔ, ko: «Ǹ sɔnjanin iya bon ya ko le iwo taa le yi ǹ josokun ɲɛninna.»

¹⁸ Jahudiya kuntiilu ka Isa maɲininga, ai vɛɛ: «I yi se kawananko suu mindɛ le kɛla, k'a jiya mɔ la ko jo y'i fɛ ko minu kɛko lɔ?»

¹⁹ Isa k'ai javi, a vɛɛ: «Ài yi lɔhɔlɔmabonba min te, ǹe do kɛtɔ a lɔla kɔtunun tele sawa kɔlɔ.»

²⁰ Wo fɔ, Jahudiya kuntiilu do vɛɛ: «San binaani ni wɔɔlɔ (46) le kɛnin lɔhɔlɔmabonba min lɔla. Ile do kɛtɔ a lɔla kɔtunun tele sawa kɔlɔ?»

²¹ Kɛɛ Isa kan tɛɛ lɔhɔlɔmabonba min ma, wo tɛɛ a falikolo le le.

²² A wuli kɔ ka bɔ saya lɔ, a kɔbiladennu hangili ka bila a kumakan wo lɔ. Wo le k'a kɛ, ai ka limaniya kitabu kɔnɔ kumalu ma, ani Isa kumakan.

Isa ka adamadennu kɔnɔlɔko lɔn

²³ Isa ka to Jelusalɛmu Timinkunna selibɔya lɔ, mɔɔ siyama ka limaniya a ma, kamasɔlɔn ai ka aa kawananko kɛninnu ye ai ɲa la.

²⁴ Kɛɛ Isa do ma aa lanaya la ai lɔ, kamasɔlɔn a tɛɛ k'ai bɛ josokun lɔn.

²⁵ A mako tɛɛ tɛ mɔɔ ya seleyakan na ka bɛn adamadennu ya ko ma, kamasɔlɔn a tɛɛ adamadennu kɔnɔlɔko lɔnna.