Yohana 18 - Ala Ya Salatikan Kula Kitabu

Isa minako

¹ Isa wɔlinin wo fɔla, ale ni a kɔbiladennu ka bɔ je ka taa Kedɔlɔn folon kɔma. Gbele dɔ tɛɛ woja, ai do ka taa gbele wo lɔ.

² A janvaba Judasi fana tɛɛ ka woja lɔn ne, kamasɔlɔn Isa ni a kɔbiladennu deinin tɛɛ ai ladɛnna je.

³ Wo lɔ, Judasi ka sɔdasi jama ta, ani lakanaliba dɔlu minu lataanin tɛɛ salakalase kuntiibalu ni Falisilu bolo. Ai do ka taa je fitinalu ni kalamɛnɛnnu ni kɛlɛkɛfennu le.

⁴ Isa do tɛɛ k'a lɔn ko minu kɛtɔ kɛla a la. Wo ma, a k'i dɔɔni madon k'a fɔ ai yɛ, a vɛɛ: «Ài yi jene kɔ?»

⁵ Ai vɛɛ: «Isa Nazalɛtika.» Isa do vɛɛ ai yɛ: «Ǹe le.» A janvaba Judasi lɔnin tɛɛ ai fɛ je.

⁶ Isa k'a fɔ ai yɛ mingɛ: «Ǹe le,» ai do ka taa ai kɔma k'i ben duu ma.

⁷ A do k'ai maɲininga kɔtunun, a vɛɛ: «Ài yi jene kɔ?» Ai do vɛɛ: «Isa Nazalɛtika.»

⁸ Isa do k'ai javi, a vɛɛ: «M̀'ɛ ban a fɔla ai yɛ, ǹ ko, ǹe le. Ni ài yi ǹe le kɔ, ài yi dɔ minu to je, wolu yi taa.»

⁹ A ka wo fɔ fɔsa a ka kuma min fɔ, wo ma yi fa teme, ko: «I na mɔɔ minu dila m̀ ma, ai lɔ mɔɔ kelen gbu ma tunun».

¹⁰ Wo lɔ, Simɔn Piyɛli, siyamifan tɛɛ min bolo, wo ka wo labɔ aa ɲaa lɔ ka salakalase kuntiiba ya jɔn gbasi, k'a bolokini tolo tɛɛ a la. Jɔn wo tɔɔ le tɛɛ ko Malakuse.

¹¹ Isa do vɛɛ Piyɛli yɛ: «I iya siyamifan don a ɲaa lɔ! Ǹ Fa na jiyafɛ min latɛɛla m̀ ma, ǹ'i m̀ ban m̀ minna wo lɔ?»

Ai ka taa Isa le Anasi fɛlɔ teme

¹² Wo kɔ, sɔdasilu ni ai kuntii ani Jahudiya kuntiilu ya lakanalibalu, ai bɛ ka Isa mina k'a bolo sili.

¹³ Ai do ka taa a le Anasi fɛlɔ kunfɔlɔ le. Kayife min tɛɛ salakalase kuntiibaya la wo san na, Anasi tɛɛ wo bilankɛ le le.

¹⁴ Kayife le tɛɛ vɛ Jahudiya kuntiilu lali ko a fisayayine mɔɔ kelen yi faa mɔɔlu bɛ ya ko lɔ.

Piyɛli k'i ban Isa lɔ teme

¹⁵ Ai taatɔla Isa le, Simɔn Piyɛli ni kɔbiladen dɔgbɛlɛ ka bila jama kɔ. Komi lɔnbaya tɛɛ kɔbiladen wo ni salakalase kuntiiba wotɛ, wo lɔ, jama senin salakalase kuntiiba ya luu ma, a ka don Isa fɛ je.

¹⁶ Kɛɛ Piyɛli ka to luu da la je. Wo lɔ, Isa kɔbiladen min tɛɛ ka salakalase kuntiiba lɔn, wo ka bɔ luu ma ka kuma bɔidenmoso yɛ, min tɛɛ da lakanala. Wo kɛ, a do ka Piyɛli ladon.

¹⁷ Bɔidenmoso min tɛɛ luu donda kunmafɛlɛnna, wo ka Piyɛli maɲininga, a vɛɛ: «Jalasa ile fana tɛ kɛ́ min kɔbiladen dɔ le le?» Piyɛli do vɛɛ: «Ɛnɛn, ǹe tɛ wo le.»

¹⁸ Bɔidennu ni lakanalibalu ka taa bila kimi la, ai v'ai lɔla k'ai ja wo dafɛ, kamasɔlɔn nɛnɛ tɛɛ bɔla. Piyɛli fana lɔnin tɛɛ ai fɛ je, a v'i jala.

Salakalase kuntiiba ka Isa maɲininga teme

¹⁹ Wo waate kelen nɔ, salakalase kuntiiba tɛɛ Isa maɲiningala ka bɛn a kɔbiladennu ma ani aa kalan.

²⁰ Isa do k'a javi, a vɛɛ: «Ǹ na kumala mɔɔ bɛ yɛ bala le lɔ. Waate bɛ, ǹ tɛɛ mɔɔlu kalanna Aladalibonnu la ani lɔhɔlɔmabonba la, Jahudiyalu y'ai ladɛnna dingila minu lɔ. Ǹe do ma ko ko si fɔ doon nɔ.

²¹ A yi di vɛ i yi ǹe maɲiningala? Mɔɔ minu na ǹ kumakan mɛnna, i yi wolu le maɲininga. Ài k'a lɔn ǹ na min fɔla.»

²² Wo fɔ Isa bolo, lakanaliba dɔ ka to je ka Isa tolo te. A do vɛɛ a yɛ: «I yi salakalase kuntiiba javila ten ne?»

²³ Isa do k'a javi, a vɛɛ: «Ni ǹ na koyon ne fɔla, i yi wo le jiya. Kɛɛ ni ǹ jo le, a kɛnin di vɛ i na m̀ gbasila?»

²⁴ Wo kɔ, Anasi ka Isa silinin lataa salakalase kuntiiba Kayife ma.

Piyɛli k'a fɔ kɔtunun ko a ma Isa lɔn

²⁵ Wo ka Simɔn Piyɛli lɔnin talan taa dafɛ, a v'i jala. Wo lɔ, mɔɔ dɔlu vɛɛ a yɛ: «Ile fana tɛ kɛ́ min kɔbiladen dɔ le le?» Piyɛli do k'i ban a ma, a vɛɛ: «Ɛnɛn, ǹe tɛ wo le dɛ!»

²⁶ Salakalase kuntiiba ya jɔn dɔ k'a fɔ Piyɛli yɛ, a vɛɛ: «Ǹ na ile ni Isa yena gbele lɔ, kɛlɛ?» Piyɛli ka kɛ́ min tolo tɛɛ a la, wo badenmakɛ dɔ le tɛɛ.

²⁷ Piyɛli do k'i ban a ma kɔtunun. Wo kɛ, donon ka kumun telemanin.

Ai ka taa Isa le Pilati fɛlɔ teme

²⁸ Sɔɔmadanina, Jahudiya kuntiilu ka bɔ Kayife ya luu ma, ka taa Isa le Lɔmu jamanatii ya luu ma. Kɛɛ ailu gbu ma don bon na, kamasɔlɔn ai tɛɛ tɛ a fɛ k'ai jɛlɛ lakɔsɔ, fɔsa ai tɛɛ se Timinkunna Selilon dɔnni kɛla.

²⁹ Wo lɔ, Pilati ka taa ai fɛlɔ kɛnɛma k'ai maɲininga, a vɛɛ: «Ài yi kɛ́ min jalakila mindɛ lɔ?»

³⁰ Ai k'a javi, ai vɛɛ: «Ni kɛ́ min tɛɛ ma kɛ koyonkɛba le, mɔ tɛɛ tɛ a don i bolo.»

³¹ Pilati do vɛɛ ai yɛ: «Àilu gbu yi taa a le ka aa kiti tɛɛ ka bɛn àiya seliya ma.» Wo fɔ, Jahudiya kuntiilu k'a javi, ai vɛɛ: «Mɔɔfaako see tɛ mɔ yɛ ka bɛn àiya seliya ma.»

³² Wo ka kɛ fɔsa Isa kumakan ma tɛɛ fa teme, a na min fɔla ka bɛn a faaɲa ma.

³³ Wo lɔ, Pilati ka don bon na kɔtunun ka Isa kili k'a maɲininga, a vɛɛ: «Ile le Jahudiyalu ya masakɛ le?»

³⁴ Isa k'a javi, a vɛɛ: «Ile gbu miliya le wo le, baa mɔɔ gbɛlɛ le na wo fɔla i yɛ ka bɛn m̀ ma?»

³⁵ Pilati do k'a javi, a vɛɛ: «A y'i kɔnɔ Jahudiya le ǹ ne? I jɛlɛkanu sibolomaɲɔɔlu ni salakalase kuntiibalu le na i donna m̀ bolo. I na mindɛ kɛla?»

³⁶ Isa do vɛɛ a yɛ wo lɔ: «Ǹa masaya tɛ dunuɲa ta le. Niwotɛ, ǹa bɔidennu tɛɛ Jahudiya kuntiilu kɛlɛle, ai do tɛɛ tɛnala sena m̀ minala. Kɛɛ ǹa masaya ma bɔ dunuɲa min nɔ.»

³⁷ Wo fɔ Isa bolo, Pilati vɛɛ a yɛ: «Jalasa i yi masakɛ le le wo lɔ?» Isa do vɛɛ a yɛ: «Ile gbu v'a fɔ ko ǹ'i masakɛ le le. Ǹ sɔlɔnnin ka na dunuɲa dailu min na, wo le, ka seleyakan lase ka bɛn tuɲa ma. Mɔɔ min yi tuɲa ta le, wo tii le y'a tolomalɔla ǹ na.»

³⁸ Pilati do vɛɛ a yɛ: «Mindɛ gbu yi tuɲa le?» Wo fɔ Pilati bolo, a ka taa Jahudiyalu fɛlɔ kɛnɛma kɔtunun. A do vɛɛ ai yɛ: «M̀ ma kɛ́ min faa kun ye a la.

Jahudiyalu ka Isa faako jatesii teme

³⁹ Kɛɛ ka bɛn àiya laana ma, ǹ deinin kasoden kelen ne bilala ài yɛ Timinkunna Selilon. Wo lɔ saa, ài y'a fɛ ǹ'i Jahudiyalu ya masakɛ le bila?»

⁴⁰ Wo fɔ Pilati bolo, jama do vɛ gbanɔla kɔtunun, ai vɛɛ: «Ɛnɛn, kɛ́ wo tɛ, kɛɛ Balabasi le!» Balabasi do tɛɛ benkannikɛba le le.