Yohana 15 - Ala Ya Salatikan Kula Kitabu

Isa le lɛzɛnju bɛlɛbɛlɛ le

¹ Isa vɛɛ: «Ǹe le lɛzɛnju bɛlɛbɛlɛ le, ǹ Fa le do yi gbelekunnasiiba le.

² Ni m̀ bolo min tɛ a dɛnna, ǹ Fa yi wo tɛɛle a la k'a lafili. Kɛɛ do, ni m̀ bolo min vɛ kɛla a denna, a yi wo kun latɛɛle, fɔsa a a den siyama kɛ ka timin a kunfɔlɔ ta la.

³ Àilu la vɛ sɛnɛya butu ka bɛn ǹ kumakan ma, ǹ na min fɔla ài yɛ.

⁴ Ài kafonnin yi to ǹ kan, iwo ǹe gbu kafonnin ài kan teme. Iwo jili bolo tɛ se a denna a jɛlɛ ma teme ni a kafonnin ma to a ju kan, wo boloɲa kelen ma, àilu fana tɛ se ai denna ai jɛlɛ ma ni ài kafonnin ma to ǹ kan.

⁵ «Ǹe le lɛzɛnju le, àilu le do y'a bolo le. Ni mɔɔ min kafonnin ka to ǹ kan ani ǹe fana kafonnin ka to a kan, wo tii le kɛtɔ a denna kosɛvɛ, kamasɔlɔn ni ǹe tɛ ài fɛ, ài tɛ se foi kɛla.

⁶ Ni mɔɔ min kafonnin ma to ǹ kan, wo tii kɛyine iwo jili bolo tɛɛnin, min la yi filila, a yi ja. Jili bolo suu wolu la yi dɛnna k'ai ɲɛnin taa la.

⁷ Ni ài kafonnin ka to ǹ kan, ani ǹ kumakannu ka sawati ài josokun nɔ bɛlɛbɛlɛ kɛ, ài vɛ ko ko si dalila, wo yi kɛle ài yɛ.

⁸ Ài vɛ den siyama kɛla k'a lagbɛ ko ǹ kɔbiladen ne ài le, ǹ Fa yi magbiliyali sɔlɔnne wo lɔ.

⁹ Ǹ Fa na ǹ kanula teme, m̀'ɛ ài kanu ten. Wo ma, ài yi to ǹa kanundeya lɔ.

¹⁰ Ni ài ka kɛ ǹa jamalilu labatola, ài yi tole ǹa kanundeya lɔ iwo ǹ na ǹ Fa ya jamalilu labatola teme ka to aa kanundeya lɔ.

¹¹ «Ǹ na kuma min bɛ fɔla ài yɛ, fɔsa ǹa kɔnɔlɔdiya ɲɔɔzii yi kɛ ài yɛ, ani àiya kɔnɔlɔdiya da yi fa.

¹² Ǹa jamali le ne: Ài i ɲɔɔ kanu iwo ǹ n'ài kanula teme.

¹³ Ni mɔɔ dɔ v'a nii dila a tɔvalu ya ko lɔ, kanundeya suu suu tɛ timin wo la.

¹⁴ Ài yi ǹ tɔva le le, ni ài ka ǹa jamalilu labato.

¹⁵ Ǹ tɛnala a fɔla ài ma butu bɔidennu, kamasɔlɔn bɔiden m'a lɔn aa kuntii yi min na. Kɛɛ ǹ'a fɔla ài ma ǹ tɔvalu, kamasɔlɔn ǹ Fa na minu fɔla ǹ yɛ, m̀'ɛ wo bɛ lase ài ma.

¹⁶ Àilu ma ǹe ta, kɛɛ ǹe le n'ài tala ka ài kelaya, fɔsa ài yi taa ài den siyama kɛ minu yi mɛnna. Wo vɛ kɛla, ni ài ka ǹ Fa dali ko ko si la ǹ tɔɔ lɔ, a kɛtɔ wo dila ài ma.

¹⁷ Ǹ'ài jamalila min na, wo le ài ɲɔɔ kanu.

Isa kɔbiladennu gbeyatɔ dunuɲa yɛ

¹⁸ «Ni ài ka gbeya dunuɲa yɛ, ài y'a lɔn ko ǹe le gbeyanin a yɛ kunfɔlɔ le.

¹⁹ Ni do ài tɛɛ kɛ dunuɲa ta le, a tɛɛ ài kanule iwo a ta. Kɛɛ ài tɛ dunuɲa ta le, kamasɔlɔn ǹ n'ài tala k'ài bɔ a bolo. Wo le n'a kɛla, àiya ko gbeyanin dunuɲa yɛ.

²⁰ Ǹ na min fɔla ài yɛ kɔlɔkɔlɔ le, ài hangili yi to wo lɔ, ǹ ko: ‹Jɔn tɛ buɲa sɔlɔnna ka timin aa jɔnfa la.› Ni ai na ǹ jangatala, ai kɛtɔ àilu fana jangatala. Kɛɛ ni ai na ǹ kumakannu labatola, ai kɛtɔ ài kumakannu labatola fana.

²¹ Kɛɛ ai kɛtɔ ko wolu bɛ kɛla ài la ka bɛn ǹa ko le ma, kamasɔlɔn ai ma ǹ kelaba lɔn.

²² Ni ǹ tɛɛ ma na ka kuma ai fɛ, ai kɛkolu tɛɛ tɛ jate julumbu le, kɛɛ tandainɔ yi ne, jo tɛ ai bolo k'ai kumanɔbɔ ka bɛn aiya julumbu tako ma.

²³ Mɔɔ min vɛ ǹ lagbeyaɲɛla, wo tii yi ǹ Fa fana lagbeyaɲɛla.

²⁴ Ni ǹ tɛɛ ma kawanankolu kɛ ai ɲakɔlɔ, mɔɔ suu suu ma min ɲɔɔzii kɛ ba bene, ai kɛkolu tɛɛ tɛ jate julumbu le. Kɛɛ tandainɔ yi ne, ai vɛ ban ǹ kɛkolu yena, wo bɛ lɔ, ai yi ǹe ni ǹ Fa lagbeyaɲɛla.

²⁵ Kɛɛ fɔ kuma wo ma yi fa, min sɛvɛnin aiya seliya kitabu kɔnɔ, ko: ‹Ai ka ǹ lagbeyaɲɛ fuun.›

²⁶ «Ǹ kɛtɔ Dɛmɛliba lanala waate min nɔ ka bɔ ǹ Fa fɛ, Nii Sɛnɛyanin koni min yi tuɲa lankɛnɛmayala, wo le kɛtɔ seleya dila ka bɛn m̀ ma.

²⁷ Àilu gbu kɛtɔ m̀ masele le, kamasɔlɔn ài vɛ to ǹ fɛ ka ta a damina ma.»