Yohana 13 - Ala Ya Salatikan Kula Kitabu

Isa k'a kɔbiladennu sen mako teme

¹ Jani Timinkunna Selilon tɛɛ se, Isa tɛɛ k'a lɔn ko a taa waate ma vɛ sulunya ka bɔ dunuɲa ka taa a Fa fɛlɔ. Aa mɔɔ minu tɛɛ dunuɲa, a tɛɛ wolu le kanula kudein. A do ka to ai kanula haan fɔɔ a laban nɔ.

² Isa ni a kɔbiladennu tɛɛ wulala dɔnna, k'a talan Soitana tɛɛ v'a janva miliya don Simɔn denkɛ Judasi Isekaliyɔti josokun nɔ.

³ Isa tɛɛ k'a lɔn ko a Fa vɛ fen bɛ bila a fanga kɔlɔ, ani ko a bɔnin Ala le fɛlɔ, a do kɔseitɔ Ala le fɛlɔ.

⁴ Wo lɔ, a k'i wuli tabali kunna ka aa faaniba bɔ a kanna, k'a tɛ sili faani dɔ le.

⁵ Wo kɛ, a ka ji dɔ kɛ tasa lɔ k'a kɔbiladennu sennu mako damina, k'ai matɛ faani wo la, a tɛ silinin tɛɛ min ne.

⁶ A ka se Simɔn Piyɛli ma mingɛ, wo do vɛɛ a yɛ: «Ǹ Kuntii, ile le kɛtɔ ǹ sen makola?»

⁷ Isa k'a javi, a vɛɛ: «Ǹ'i min na yi ne, i tɛnala wo kɔlɔ lɔnna bi. Kɛɛ i kɛtɔ a lɔnna kɔfɛ.»

⁸ Piyɛli do vɛɛ a yɛ: «Ǹ tɛ diɲa i yi ǹ sen mako feu!» Wo lɔ, Isa k'a javi, a vɛɛ: «Ni m̀ ma i sen mako, i fɛ tɛnala kɛla ǹ na.»

⁹ Wo fɔ a bolo, Simɔn Piyɛli vɛɛ a yɛ: «Ǹ Kuntii, ni wo le, i kà dan ǹ sen ma dein. I yi m̀ bolo ni ǹ kun fana mako.»

¹⁰ Isa do k'a fɔ a yɛ, a vɛɛ: «Mɔɔ konin mako tɛ koli gbɛlɛ la butu, fɔ a a sen ne mako dein, kamasɔlɔn a sɛnɛyayine feu. Wo lɔ, ài sɛnɛyayine, kɛɛ ài bɛ tɛ dɛ!»

¹¹ (Kamasɔlɔn Isa tɛɛ k'a lɔn mɔɔ min kɛtɔ a janvala, wo le n'a kɛla, a n'a fɔla ko ai bɛ sɛnɛyanin tɛ.)

¹² Isa wɔlinin ai sennu makola, a ka aa faaniba bila a kanna k'i sii a siiya lɔ. A do vɛɛ ai yɛ: «Ǹ na min kɛla ài la yi ne, ài ka wo kɔlɔ lɔn ne?

¹³ Ài y'a fɔla m̀ ma ko Kalanmɔɔ ani Kuntii. Wo bɛnyine, kamasɔlɔn wo le ǹ ne.

¹⁴ Ni ǹe min y'ài Kuntii ni ài Kalanmɔɔ le, m̀'ɛ ài sen mako, wo lɔ, àilu fana ka kan k'i ɲɔɔ sen mako.

¹⁵ M̀'ɛ wo misali di ài ma fɔsa ài y'a kɛ iwo ǹ n'a kɛla teme.

¹⁶ Ǹ'i tuɲa fɔ ài yɛ, jɔn tɛ buɲa sɔlɔnna ka timin aa jɔnfa la. Keladen fana tɛ buɲa sɔlɔnna ka timin a kelaba la.

¹⁷ Ni ài ka ko minu lɔn ani k'ai kɛ, ài kɛtɔ duwawuden ne le.

¹⁸ «Ǹ kan tɛ ài bɛ ma dɛ! Ǹ na mɔɔ minu tala, ǹ ka wolu lɔn. Kɛɛ min sɛvɛnin kitabu kɔnɔ, fɔ wo ma yi fa, ko: ‹Ǹe ni mɔɔ min na dɔnni kɛla tasa kelen nɔ, wo v'a jɛlɛ kɛ ǹ juu le.›

¹⁹ Ǹ'i ko min fɔla ài yɛ yi ne jani a yi kɛ, fɔsa a vɛ kɛla, ài yi limaniya k'a fɔ ‹ǹe le wo le, Min yi je›.

²⁰ Ǹ'i tuɲa fɔ ài yɛ, ni mɔɔ mɔɔ k'a bolo sii ǹa keladen dɔ kɔlɔ, wo tii v'a bolo sii ǹ kɔlɔ. Ado ni mɔɔ min k'a bolo sii ǹ kɔlɔ, wo tii v'a bolo sii ǹ kelaba fana kɔlɔ.»

Isa ka a janvako fɔ teme

²¹ Isa wɔlinin wo fɔla, a joso ka tɔlɔya. A do k'a fɔ ai yɛ k'a lagbɛ, a vɛɛ: «Ǹ'i tuɲa fɔ ài yɛ, ài lɔ mɔɔ kelen kɛtɔ ǹ janvala.»

²² Wo lɔ, a kɔbiladennu v'i ɲɔɔ lasaala, kɛɛ ai tɛɛ m'a lɔn a kan tɛɛ mɔɔ min ma.

²³ Ai lɔ mɔɔ kelen, a diyanan kɔbiladen koni, wo siinin tɛɛ a tɔɔfɛ.

²⁴ Wo lɔ, Simɔn Piyɛli k'a bolo jatesii wo tii yɛ, fɔsa a yi Isa maɲininga ko a kan yi jene ma.

²⁵ A kɔbiladen wo k'i madon Isa la k'a fɔ a yɛ, a vɛɛ: «Ǹ Kuntii, i kan yi jene ma?»

²⁶ Isa do k'a javi, a vɛɛ: «M̀'ɛ bulu kulun sunna mafen nɔ k'a di mɔɔ min ma, wo le.» Wo fɔ Isa bolo, a ka bulu sun mafen nɔ k'a di Judasi ma, Simɔn Isekaliyɔti denkɛ.

²⁷ Judasi ka bulu mina mingɛ, Soitana ka don a josokun nɔ telemanin. Isa do vɛɛ a yɛ: «I yi min kɛko lɔ, i yi wo kɛ telemanin.»

²⁸ Kɛɛ mɔɔ minu tɛɛ dɔnnikɛya lɔ, ai suu suu m'a ɲaye a na wo fɔla Judasi yɛ dailu min na.

²⁹ Komi wɔlibilabɔlɔ tɛɛ Judasi le bolo, a tɛɛ a dɔlu kɔnɔ ko Isa n'a lɔla fen dɔ le sanko lɔ selibɔko lɔ, niwotɛ bolokolonnu sɔko.

³⁰ Wo lɔ, Judasi ka bulu kulun wo mina mingɛ feeya, a k'i wuli ka bɔ je. Wo k'a talan, su tɛɛ vɛ ko.

Jamali kula

³¹ Judasi bɔ kɔ, Isa k'a fɔ ai yɛ, a vɛɛ: «Mɔɔnivin Tanin ya magbiliyali la vɛ nkɛnɛmaya butu, ado Ala fana vɛ aa magbiliyali lankɛnɛmaya ale le fɛ.

³² Ni do Ala vɛ aa magbiliyali lankɛnɛmaya ale fɛ, wo vɛ kɛla, Ala gbu le kɛtɔ aa magbiliyali lankɛnɛmayala tandainɔ yi ne.

³³ Ǹ dennu, ǹ'ài fɛ waateni kɔlɔ bene. M̀'ɛ taala, ài kɛtɔ ǹ ɲininna, kɛɛ iwo ǹ n'a fɔla teme Jahudiya kuntiilu yɛ wo lon, ǹ'i wo suu le fɔla ài yɛ kɔtunun, ǹ ko, ǹ taatɔ tɛɛminja, ài tɛ se taala woja.

³⁴ Ǹ'i jamali kula le dila ài ma yi ne, ǹ ko, ài ɲɔɔ kanu. Ǹ n'ài kanula teme, fɔ àilu fana y'i ɲɔɔ kanu ten ne.

³⁵ Ni kanundeya vɛ kɛla ài wotɛ, mɔɔ bɛ kɛtɔ a lɔnna wo le ma k'a fɔ ko ǹ kɔbiladen ne ài le.»

Isa k'a fɔ ko Piyɛli kɛtɔ i banna a lɔ

³⁶ Simɔn Piyɛli do ka Isa maɲininga, a vɛɛ: «Ǹ Kuntii, i taatɔ min ne?» Isa k'a javi, a vɛɛ: «Ǹ taatɔ tɛɛminja, i tɛ se bilala ǹ kɔ ka taa woja tandainɔ yi ne. Kɛɛ lon dɔ, i kɛtɔ ǹ kɔsalanna.»

³⁷ Piyɛli do vɛɛ a yɛ: «Ǹ Kuntii, mindɛ lɔ ǹ tɛ bila i kɔ tandainɔ ka taa? Ǹ lɔbɛnnin hali ka ǹ nii di iya ko lɔ.»

³⁸ Isa do k'a javi, a vɛɛ: «I lɔbɛnyine k'i nii di ǹa ko lɔ, kɛlɛ? Ǹ'i tuɲa fɔ i yɛ, donon tɛnala kumunna ni i m'a fɔ siɲa sawa le ko i ma ǹ lɔn.»