Yohana 12 - Ala Ya Salatikan Kula Kitabu

Mɔyamu ka Isa sen mamun tulu sumadiyanin ne teme

¹ Timinkunna Selilon tɛɛ vɛ to tele wɔɔlɔ, wo lɔ, Isa ka taa se Betani ka don Lazali ya bon na, a na min lawulila ka bɔ saya lɔ.

² Ai ka faanali ba lɔbɛn Isa yɛ. Maata le tɛɛ dɔnnifen siila ai kɛɛna, ado Lazali gbu tɛɛ dɔnnikɛya lɔ Isa fɛ je.

³ Ai ka to dɔnnila, Mɔyamu ka na tulu sumadiyanin daagbɛlɛn ne, ai y'a fɔla min ma ko naladu, a tɛɛ litili tala jate bɔle. A do ka wo mun damina Isa sen ma, k'a matɛ a kunsi le. Wo suma ka jɛzɛn fan bɛ lɔ bon na.

⁴ Kɛɛ Isa kɔbiladen min tɔɔ tɛɛ ko Judasi Isakaliyɔti, min tɛɛ a janva boloma, wo vɛɛ:

⁵ «Mindɛ lɔ tulu min ma fele wɔligbɛ gbana kɛmɛ sawa (300) la, ka wɔli wo kɛ bolokolonnu madɛmɛlifen ne?»

⁶ Kɛɛ a do ma wo fɔ bolokolonnu hena ma, mafɔ son ne tɛɛ a le, ani a deinin tɛɛ a bolo donna aiya wɔlibilabɔlɔ lɔ min tɛɛ a bolo.

⁷ Kɛɛ Isa do vɛɛ a yɛ: «Moso min to je. A na tulu min ladalola ka bɛn ǹ sudoon lon ne ma.

⁸ Bolokolonnu totɔ ài tɛma waate bɛ, kɛɛ ǹe do tɛnala tola ài tɛma kudein.»

Ɲamɔɔlu ka janva lasii Lazali ma teme

⁹ Jahudiyalu k'a mɛn mingɛ ko Isa vɛ taa Betani, ai siyama vɛ taala je. Ale kelen ya ko tɛɛ tɛ, mafɔ Lazali ya ko fana, a na min lawulila ka bɔ saya lɔ.

¹⁰ Wo lɔ, salakalase kuntiibalu ka Lazali faako jatesii fana,

¹¹ kamasɔlɔn Jahudiya siyama tɛɛ bɔla ai kɔ ka limaniya Isa ma ka bɛn Lazali ya ko ma.

Isa ka don Jelusalɛmu mɔɔbaya boloma teme

¹² Wo kɛnɛbɔlon, jama ba minu nanin tɛɛ selibɔya lɔ, wolu k'a mɛn ko Isa yi nala Jelusalɛmu.

¹³ Wo lɔ, ai vɛ taala tamalo bululu le a labɛnya lɔ, k'ai kan labɔ, ai vɛɛ: «Hozana! Duwawu yi wo le yɛ min yi nala mɔ Tii tɔɔ lɔ! Duwawu yi Isilan masakɛ yɛ!»

¹⁴ Isa ka sofalini bolan dɔ ye ka jɛlɛ wo kɔkan, k'a kɛ iwo a sɛvɛnin kitabu kɔnɔ teme, ko:

¹⁵ «Ziyɔn sodennu, ài kà siyan! Ài y'a ye, àiya masakɛ yi nala ài ma, a do siinin sofalini bolan kɔkan.»

¹⁶ Isa kɔbiladennu tɛɛ ma ko wolu ɲaye kunfɔlɔ le, kɛɛ a ka magbiliyali sɔlɔn waate min nɔ, ai hangili ka bila a lɔ ko, ko minu sɛvɛnin kitabu kɔnɔ ka bɛn a ma, wo bɛ le kɛnin a yɛ.

¹⁷ Jama min ka Isa ye Lazali kilila ka bɔ kabulu lɔ, wolu ka to seleya dila ka bɛn wo ma.

¹⁸ Wo le k'a kɛ, jama ka na a labɛnya lɔ, kamasɔlɔn ai ka mɛn ko ale le na kawananko wo kɛla.

¹⁹ Wo lɔ, Falisilu k'a fɔ i ɲɔɔ yɛ, ai vɛɛ: «Ài y'a ye, ài tɛ se foi ɲiala butu, kamasɔlɔn dunuɲa bɛ vɛ bila a kɔ!»

Isa ka aa sayako fɔ teme

²⁰ Wo k'a talan, Gɛlɛkika dɔlu tɛɛ batokɛbalu tɛma minu taanin tɛɛ Jelusalɛmu selibɔya lɔ.

²¹ Wolu k'i madon Filipe la, ale min bɔnin tɛɛ Betisaida so kɔnɔ Galile koovi lɔ. Ai do vɛɛ a yɛ: «Kuntii, m'a fɛ ka Isa ye.»

²² Filipe ka taa wo fɔ Andele yɛ, ado ai mɔɔ fila ka taa wo fɔ Isa yɛ.

²³ Wo lɔ, Isa k'ai javi, a vɛɛ: «Mɔɔnivin Tanin ya magbiliyali waate vɛ se.

²⁴ Ǹ'i tuɲa fɔ ài yɛ, ni malo kama kelen ma sɛnɛ duu lɔ ka tunun, ale kelen ne totɔ. Kɛɛ ni a ka tunun duu lɔ, a yi fɛlɛnne ka sawati bɛlɛbɛlɛ kɛ.

²⁵ Wo le y'a ma, ni mɔɔ min ka aa niimaya ladiyaɲɛ, wo tii bɔnɔtɔle a la. Kɛɛ do, ni mɔɔ min ka aa dunuɲalɔtɛɛ lagbeyaɲɛ, wo tii ya niimaya la yi kanale kudein.

²⁶ Ni mɔɔ min y'a fɛ ka baale kɛ ǹ yɛ, fɔ wo tii yi bila ǹ kɔ, ado m̀'ɛ kɛla tɛɛminja, ǹa bɔiden fana kɛtɔ je le. Ni mɔɔ min ka baale kɛ ǹ yɛ, ǹ Fa kɛtɔ wo tii buɲala.»

²⁷ «Ǹ joso tɔlɔyine. Wo lɔ, ǹ'i mindɛ fɔ? Jalasa ǹ'a fɔle, ǹ ko: ‹Ǹ Fa, i yi m̀ matanga tɔlɔya waate min ma›? Wo tɛ bɛn, kamasɔlɔn ǹ nakun ne wo le.

²⁸ Ǹ Fa, i tɔɔ ma yi gbiliya!» Wo fɔ Isa bolo, kumakan dɔ ka bɔ sanma k'a fɔ, a vɛɛ: «M̀'ɛ a magbiliya. Ǹe do kɛtɔ a magbiliyala kɔtunun.»

²⁹ Jama min tɛɛ lɔnin je, wolu ka wo mɛn mingɛ, a dɔlu vɛɛ: «Sankulukan ne.» A dɔgbɛlɛlu vɛɛ: «Mɛlɛka dɔ le na kumala a fɛ.»

³⁰ Kɛɛ Isa k'ai javi, a vɛɛ: «Kumakan min ma bɔ ǹa ko lɔ, mafɔ àiya ko.

³¹ Tandainɔ yi ne, dunuɲa kititɛɛ waate vɛ se, ado dunuɲa kuntii gbɛntɔle butu.

³² Ǹe koni la vɛ jɛlɛla ka bɔ duukolo kɔkan, ǹ kɛtɔ adamaden bɛ masamana k'ai lana m̀ ma.»

³³ Isa na min fɔla a faako ɲa jiyako le lɔ.

³⁴ Wo lɔ, jama vɛɛ a yɛ: «Mɔ n'a mɛnna ko a sɛvɛnin seliya kitabu kɔnɔ ko Masa Tɔɔmasenin totɔ niimaya le lɔ kudein. Wo ma yi ne, mindɛ y'a kɛla vɛ i y'a fɔla ko Mɔɔnivin Tanin la ka kan ka jɛlɛ ka bɔ duukolo kɔkan? I kan yi Mɔɔnivin Tanin min ma, jene yi wo tii le?»

³⁵ A do ka jama javi, a vɛɛ: «Kɛnɛya kɛtɔ waateni kɛla ài tɛma bene. Damanda kɛnɛya y'ài tɛma, ài yi to taamana alako divi kana bala ài lɔ. Mɔɔ min yi taamana divi lɔ, wo tii ma a taaya lɔn.

³⁶ Damanda kɛnɛya y'ài tɛma, ài yi limaniya kɛnɛya ma, fɔsa ài yi kɛ kɛnɛyalɔmɔɔlu le.» Isa wɔlinin ko wolu fɔla, a ka bɔ je ka t'i doon ai ma.

Mɔɔlu ya limaniyabaliya

³⁷ Hali Isa tɛɛ vɛ kawananko siyama minu bɛ kɛ ai ɲakɔlɔ, ai do ma limaniya a ma,

³⁸ fɔsa Nabi Ezayi ya kelayakuma ma yi fa teme, ko: «Mɔ Tii, jene vɛ la mɔ kumakan na? Mɔ Tii ya foniseleya la vɛ nkɛnɛmaya jene yɛ?»

³⁹ Wo le n'a kɛla, ai ma se limaniyala, kamasɔlɔn Nabi Ezayi k'a fɔ kɔtunun, a vɛɛ:

⁴⁰ «Ala vɛ ai ɲa gbɛ ani k'ai josokun ja, alako ai ɲa kana yeni kɛ, ani ai josokun kana koɲaye, kamasɔlɔn ai t'a fɛ k'ai jɛlɛ lasei Ala ma, fɔsa a tɛɛ ai lakisi.»

⁴¹ Nabi Ezayi na wo fɔla, baa a tɛɛ vɛ Isa ya magbiliyali ye ka kuma ka bɛn a ma.

⁴² Wo bɛ n'a kɛ, hali Jahudiya kuntii siyama limaniyanin tɛɛ Isa ma, kɛɛ ai ma ai lɔ wo la bala lɔ, kamasɔlɔn ai tɛɛ siyanna Falisilu le ɲa, fɔsa ai kana ai gbɛn Aladalibon na.

⁴³ Kamasɔlɔn adamadennu ya magbiliyali le diyanin tɛɛ ai yɛ ka timin Ala ta la.

Isa ni a Kelaba

⁴⁴ Isa do k'a kan labɔ, a vɛɛ: «Ni mɔɔ min ka limaniya m̀ ma, wo tii ma limaniya ǹe kelen ma, mafɔ ǹ kelaba fana.

⁴⁵ Ni do mɔɔ min ka ǹ ye, wo tii vɛ ǹ kelaba fana ye.

⁴⁶ Ǹ nanin dunuɲa iwo kɛnɛya, fɔsa m̀ malimaniyamɔɔlu kana to divi lɔ butu.

⁴⁷ Ni mɔɔ min ka ǹ kumakan mɛn, a do m'a labato, ǹ tɛnala wo tii kitila. Kamasɔlɔn m̀ ma na dunuɲa kitiko lɔ, fɔ k'a lakisi.

⁴⁸ Ni mɔɔ min k'i ban ǹ nɔ, a do m'a bolo sii ǹ kumakan kɔlɔ, ko yi je min kɛtɔ a kitila, wo le ǹ kumakan ne, ǹ na min fɔla. Wo gbugbu le kɛtɔ a kitila dunuɲa laban lon.

⁴⁹ Kamasɔlɔn m̀ ma kuma ǹe gbu ya seetiiya lɔ, kɛɛ ǹ Fa min na ǹ kelayala, wo gbu le na ǹ jamalila kuma minu fɔko lɔ.

⁵⁰ Ado ǹ k'a lɔn niimaya banbali yi sɔlɔnna aa jamali le sabu la. Wo lɔ, ǹ'i ko minu lasena iwo ǹ Fa n'a fɔla ǹ yɛ teme.»