Yohana 11 - Ala Ya Salatikan Kula Kitabu

Lazali ya saya

¹ Kɛ́ dɔ tɛɛ je min tɔɔ tɛɛ ko Lazali, min tɛɛ jangalo lɔ. A do siinin tɛɛ Betani so la, Mɔyamu ni a kɔlɔmoso Maata fɛso.

² Mɔyamu min na tulu sumadiyanin munna mɔ Kuntii sen ma k'a matɛ a kunsi la, wo dɔɔkɛ Lazali le tɛɛ jangalola.

³ Wo lɔ, a kɔlɔmoso fila ka samakan lataa Isa ma, ai vɛɛ: «Mɔ Kuntii, i diyananmɔɔ vɛ jangalo.»

⁴ Isa ka wo mɛn mingɛ, a do vɛɛ: «Jangalo min laban tɛnala kɛla saya le. A kɛtɔ Ala magbiliyako le le, fɔsa Ala Denkɛ fana yi magbiliyali sɔlɔn ka bɛn a ma.»

⁵ Wo k'a talan, Maata ni a dɔɔmoso ni Lazali diyanin tɛɛ Isa yɛ.

⁶ Kɛɛ a ka Lazali ya jangalo ko mɛn mingɛ, a tɛɛ tɛɛminja, a ka to je ka tele fila kɛ.

⁷ Wo kɔ, a k'a fɔ a kɔbiladennu yɛ, a vɛɛ: «Ài m'i seikɔ Jude koovi lɔ.»

⁸ A kɔbiladennu do vɛɛ a yɛ: «Kalanmɔɔ, a lɔ ma mɛn ba bene Jahudiya kuntiilu tɛɛ a fɛ k'i bon kawakulun na je. I taatɔ je le kɔtunun?»

⁹ Isa do vɛɛ ai yɛ: «Jaa lɛlɛ tan ni fila (12) le tele kɔlɔ, kɛlɛ? Ni mɔɔ min vɛ kɛla taamana tele lɔ, wo tii sen tɛ tuu, kamasɔlɔn a yi dunuɲa kɛnɛya yena.

¹⁰ Kɛɛ do, mɔɔ min vɛ kɛla taamana divi lɔ, wo tii sen yi tuule, kamasɔlɔn kɛnɛya t'a bolo.»

¹¹ Wo fɔ Isa bolo, a do vɛɛ ai yɛ kɔtunun: «Mɔ tɔva Lazali vɛ sunɔɔ, kɛɛ ǹ taatɔ a lakununna.»

¹² A kɔbiladennu k'a javi wo lɔ, ai vɛɛ: «Mɔ Kuntii, ni a yi sunɔɔ le lɔ, a yi kisile.»

¹³ Isa tɛɛ Lazali ya sayako le fɔla ai yɛ, kɛɛ ai do m'a ɲaye. A tɛɛ ai kɔnɔ ko a kan tɛɛ sunɔɔ jɛlɛla le ma.

¹⁴ Wo lɔ, a k'a fɔ ai yɛ k'a lagbɛ, a vɛɛ: «Lazali vɛ sa.

¹⁵ Ǹ sawanin ài ta fan ne lɔ k'a fɔ ǹ tɛɛ tɛ je, fɔsa ài yi limaniya. Ài ndaa a fɛlɔ.»

¹⁶ A kɔbiladen min tɔɔ tɛɛ ko Tomasi, ai y'a fɔla min ma ko Mɔɔfila, wo vɛɛ a kɔbilaɲɔɔlu yɛ: «Ài m'i taa kalanmɔɔ malɔ, fɔsa m'i sa a fɛ.»

Isa le fulenilu lawuliba le

¹⁷ Isa senin Betani, a k'a talan Lazali fuleni tɛɛ vɛ tele naani kɛ kabulu lɔ.

¹⁸ Komi Betani ni Jelusalɛmu wotɛ ma kilo sawa bɔ,

¹⁹ wo lɔ, Jahudiya siyama tɛɛ vɛ na Maata ni Mɔyamu fɛlɔ ai dɔɔkɛ sayafoliya lɔ.

²⁰ Maata k'a mɛn mingɛ ko Isa yi nala, a ka taa a labɛnya lɔ telemanin, kɛɛ Mɔyamu siinin ka to bon na.

²¹ Maata do vɛɛ Isa yɛ: «Ǹ Kuntii, ni i tɛɛ vɛ kɛla jan, ǹ dɔɔkɛ tɛɛ tɛnala sala.

²² Kɛɛ ǹ k'a lɔn ko hali tandainɔ, ni i ka Ala dali ko ko si la, a kɛtɔ wo le kɛla i yɛ.»

²³ Isa k'a javi, a vɛɛ: «I dɔɔkɛ wulitɔ kɔtunun.»

²⁴ Maata do vɛɛ a yɛ: «Ǹ k'a lɔn ǹ dɔɔkɛ wulitɔ kɔtunun Fulenilu Lawulilon, dunuɲa laban lon.»

²⁵ Isa do vɛɛ a yɛ: «Ǹe le fulenilu lawuliba le, ani niimayadiba. Ni mɔɔ mɔɔ si ka limaniya m̀ ma, wo tii totɔ niimaya le lɔ hali ni a ka sa.

²⁶ Ni mɔɔ min do ka to a nii la ka limaniya m̀ ma, wo tii tɛnala sala. I limaniyanin wo ma?»

²⁷ Maata do k'a javi, a vɛɛ: «Aan, ǹ Kuntii. M̀'ɛ limaniya k'a fɔ ile le Masa Tɔɔmasenin ne ani Ala Denkɛ, min ka kan ka na dunuɲa.»

Isa ka kasi teme

²⁸ Maata wɔlinin wo fɔla, a ka bɔ je ka taa a fɔ a dɔɔmoso Mɔyamu yɛ doon nɔ, a vɛɛ: «Kalanmɔɔ vɛ na, a y'i kilila.»

²⁹ Wo mɛn Mɔyamu bolo, a v'i wulila ka taa Isa fɛlɔ telemanin.

³⁰ Wo k'a talan Isa tɛɛ ma don ba so kɔnɔ bene. Maata k'a labɛn tɛɛminja, a tɛɛ wo le ja bene.

³¹ Jahudiya minu tɛɛ Mɔyamu dafɛ bon na sayafolikɛya lɔ, wolu k'a ye mingɛ ko a v'i wuli telemanin ka bɔ, ai ka bila a kɔ, kamasɔlɔn a tɛɛ ai kɔnɔ ko Mɔyamu taatɔ kasikɛya le lɔ kabulu dala.

³² Mɔyamu senin je ka Isa ye, a k'i bilin a sen kɔlɔ k'a fɔ a yɛ, a vɛɛ: «Ǹ Kuntii, ni i tɛɛ vɛ kɛla jan, ǹ dɔɔkɛ tɛɛ tɛnala sala.»

³³ Isa ka Mɔyamu kasitɔla ye mingɛ, ani Jahudiya minu nanin tɛɛ a fɛ, a niila ka fin k'a tɔlɔya.

³⁴ A do k'ai maɲininga, a vɛɛ: «Ài na a sudoonna mineja?» Ai do vɛɛ: «Mɔ Kuntii, na i yi je ye.»

³⁵ Isa ka kasi.

³⁶ Wo lɔ, Jahudiyalu vɛɛ: «Ai y'a ye, kɛ́ min diyayine tɛɛ a yɛ bubale!»

³⁷ Kɛɛ a dɔlu vɛɛ: «Ale min na ɲagbɛ ɲa lakala, a tɛɛ tɛ se Lazali matangala saya ma?»

Isa ka Lazali lawuli ka bɔ saya lɔ teme

³⁸ Isa se kabulu ma, a niila ka fin bubale kɔtunun. Kawawoo le tɛɛ, min da tuunnin tɛɛ kawakulun ba le.

³⁹ Wo lɔ, Isa vɛɛ: «Ài yi kawakulun bɔ kabulu da la.» Lazali min sanin, wo kɔlɔmoso Maata vɛɛ a yɛ: «Ǹ Kuntii, a suma yi kɛ bɔ yi la butu, kamasɔlɔn a tele naanina le bi le kabulu kɔnɔ.»

⁴⁰ Isa do k'a javi, a vɛɛ: «M̀ m'a fɔ i yɛ, ni i ka limaniya, i kɛtɔ Ala ya magbiliyali yena?»

⁴¹ Wo fɔ, ai ka kawakulun makulukulu k'a bɔ kabulu da la. Isa k'a ɲa lajɛlɛ sanma k'a fɔ, a vɛɛ: «Ǹ Fa, ǹ'i balika bɔla i yɛ kamasɔlɔn i vɛ ǹ kan mɛn.

⁴² Ǹ k'a lɔn ne i yi ǹ kan mɛnna kudein, kɛɛ ǹ na wo fɔla ka bɛn mɔɔ minu yi ǹ laminin nɔ, fɔsa ai yi limaniya k'a fɔ ko ile le na ǹ kelayala.»

⁴³ Wo fɔ Isa bolo, a k'a kan labɔ bakɛ, a vɛɛ: «Lazali, bɔ kɛnɛma!»

⁴⁴ Ado sayabatɔ ka bɔ kabulu lɔ, a bolo ni a sennu ni a ɲakɔlɔla masilinin vɛ kasange la. Wo kɛ, Isa vɛɛ ai yɛ: «Ài yi kasange bɔ a ma, a yi taa.»

Jahudiya kuntiilu ka janva lasii Isa ma teme

⁴⁵ Jahudiya minu tɛɛ vɛ na Mɔyamu fɛlɔ ka Isa kɛko ye, wolu siyama ka limaniya a ma.

⁴⁶ Kɛɛ a dɔlu ka bɔ je ka Isa kɛko wo dandɛɛli kɛ Falisilu yɛ.

⁴⁷ Wo lɔ, Falisilu ni salakalase kuntiibalu ka kititɛɛjama ladɛn. Ai do vɛɛ: «M'a kɛ di vɛ? Kamasɔlɔn kɛ́ min yi kawananko siyama le kɛla.

⁴⁸ Ni mɔ k'a to je, a v'a kɛko wolu kɛla, bɛ yi limaniyale a ma. Wo vɛ kɛla, Lɔmukalu natɔ maa lɔhɔlɔmabonba ni mɔ siboloma halakila!»

⁴⁹ Kɛɛ ai lɔ mɔɔ kelen min tɔɔ tɛɛ ko Kayife, min tɛɛ salakalase kuntiibaya la san wo la, wo do vɛɛ ai yɛ: «Ài tɛ foi ɲayena!

⁵⁰ Ài m'a lɔn ko a bɛnyine ài ma mɔɔ kelen yi sa jama ya ko lɔ, jani mɔ siboloma bɛ yi halaki?»

⁵¹ Komi Kayife le tɛɛ salakalase kuntiibaya la wo san na, a ma kuma wo fɔ a jɛlɛkanu sabu la, mafɔ a na kelaya le kɛla ko Isa kɛtɔ sala ai siboloma ya ko lɔ.

⁵² A do tɛnala sala Jahudiyalu ya ko lɔ dein, mafɔ ka Ala ya mɔɔ jɛzɛnninu bɛ ladɛn k'ai kɛ falikolo kelen ne.

⁵³ Ka ta wo lon ma, ai tɛɛ Isa faako jatesiila.

⁵⁴ Wo le k'a kɛ, Isa tɛɛ tɛ taamana bala lɔ butu Judekalu tɛma, fɔ ka bɔ je ka taa se Efilaimu so la fuwa fannɔ. Ado ale ni a kɔbiladennu ka waateni kɛ je.

⁵⁵ Wo k'a talan, Jahudiyalu ya Timinkunna Selilon ma tɛɛ vɛ sulunya. Wo lɔ, mɔɔ siyama tɛɛ taala Jelusalɛmu ka bɔ sonilu la jani selilon yi se, fɔsa ai y'ai jɛlɛ lasɛnɛya ka bɛn aiya laana ma.

⁵⁶ Ai ka to lɔnin lɔhɔlɔmabonba luu kɔnɔ ka kɛ Isa ɲininne, ai v'a fɔla i ɲɔɔ yɛ, ai vɛɛ: «Ài miliya yi di? A tɛ nala selibɔya lɔ?»

⁵⁷ Wo k'a talan salakalase kuntiibalu ni Falisilu tɛɛ vɛ jamali di, ko ni mɔɔ min ka Isa dingila lɔn, wo tii y'a fɔ ai yɛ, fɔsa ai y'a mina.