Yohana 1 - Ala Ya Salatikan Kula Kitabu

Ala Kumakan

¹ A damina lɔ, Kumakan tɛɛ je. Kumakan wo tɛɛ Ala fɛ, ado Kumakan wo yi Ala le le.

² Kumakan do tɛɛ Ala fɛ a damina lɔ.

³ Fen bɛ la ka dan ale le sabu la, hali fen kelen gbu ma dan a kɔ.

⁴ Niimaya yi sɔlɔnna ale le fɛ, ado niimaya wo na kɛla kɛnɛya le adamadennu yɛ.

⁵ Kɛnɛya wo yi mɛnɛnna divi lɔ, divi do ma see sɔlɔn a ma.

⁶ Ala ka kɛ́ dɔ kelaya, min tɔɔ tɛɛ ko Yaya.

⁷ A do ka na ka kɛ kɛnɛya wo masele le, fɔsa bɛ yi limaniya a sabu la.

⁸ Ale gbu tɛɛ tɛ kɛnɛya wo le, mafɔ a ka na ka kɛ sele le kɛnɛya wo ma.

⁹ Kɛnɛya bɛlɛbɛlɛ min yi kɛnɛya dila bɛ ma, wo tɛɛ nala dunuɲa.

¹⁰ A tɛɛ dunuɲa kɔnɔ, dunuɲa do la ka dan ale le sabu la, kɛɛ dunuɲa tɛɛ ma a lɔn.

¹¹ A ka na a jɛlɛkanu mɔɔlu fɛlɔ, kɛɛ a jɛlɛkanu mɔɔlu ma ai bolo sii a kɔlɔ.

¹² Kɛɛ mɔɔ minu k'ai bolo sii a kɔlɔ ka limaniya a ma, a ka see di wolu bɛ ma k'ai kɛ Ala den ne.

¹³ Ai ma kɛ Ala den ne iwo adamadennu yi den sɔlɔnna teme. Ai do ma sɔlɔn ka bɛn mɔɔlu sawo ma, mafɔ Ala sawo.

¹⁴ Kumakan ka kɛ adamaden ne k'i sii mɔ tɛma. Mɔ do na aa magbiliyali yena, ale Denkɛ kelenpesa min Fa na a lanala aa magbiliyali lɔ, nɛɛma ni tuɲandeya dafanin min nɔ.

¹⁵ Yaya tɛɛ seleya dila ka bɛn a ma. A do k'a kan labɔ, a vɛɛ: «Ǹ kan tɛɛ min ma, ale le ne, ǹ ko: ‹Mɔɔ dɔ natɔ ǹ kɔ min buɲanin ǹ ne, kamasɔlɔn jani ǹ tɛɛ sɔlɔn, ale tɛɛ je.› »

¹⁶ Mɔ bɛ v'a dɔ sɔlɔn aa nɛɛma dafanin nɔ, ka nɛɛma dɔ kafon a dɔ kɔkan.

¹⁷ Kamasɔlɔn seliya dinin Nabi Musa le sabu la, kɛɛ nɛɛma ni tuɲandeya nanin Masa Tɔɔmasenin Isa le sabu la.

¹⁸ Mɔɔ suu suu ma Ala ye ba a ɲa la bene. Kɛɛ ale kelenpesa min ni Ala yi kelen ne, min siinin mɔ Fa Ala tɔɔfɛ, wo vɛ mɔ lalɔnni Ala ya ko la.

Yaya ya seleyakan

¹⁹ Yaya ya seleyakan le ne, Jahudiya kuntiilu ka salakalasebalu ni Levi kabiladen dɔlu kelaya a ma waate min nɔ ka bɔ Jelusalɛmu. Ai do ka taa ka Yaya maɲininga, ai vɛɛ: «Jene i le le?»

²⁰ A do m'i ban ai javila, mafɔ k'a lagbɛ, a vɛɛ: «Ǹ tɛ Masa Tɔɔmasenin ne.»

²¹ Ai do k'a maɲininga, ai vɛɛ: «Jene i le le wo lɔ? Nabi Iliya le i le le?» A do vɛɛ: «Ɛnɛn, ǹe tɛ wo le.» Ai k'a maɲininga kɔtunun, ai vɛɛ: «A yi di wo lɔ? Ile le Kelaba le min ka kan ka na?» A vɛɛ: «Ɛnɛn.»

²² Wo fɔ a bolo, ai do vɛɛ a yɛ: «Jene i le le wo lɔ? Javili di mɔ ma, fɔsa m'i taa wo fɔ mɔ kelabalu yɛ. I y'a fɔla di i jɛlɛ ma?»

²³ Wo lɔ, Yaya k'ai javi Nabi Ezayi ya kuma le le, a vɛɛ: «Mɔɔ min yi gbanɔla fuwa lɔ ko: ‹Ài yi siya latelen mɔ Tii yɛ!› Ǹe le wo tii le.»

²⁴ Falisilu na mɔɔ minu kelayala,

²⁵ wolu ka Yaya maɲininga, ai vɛɛ: «Mindɛ lɔ i yi mɔɔlu makola k'a talan i tɛ Masa Tɔɔmasenin ne, niwotɛ Nabi Iliya, niwotɛ Kelaba?»

²⁶ Yaya k'ai javi, a vɛɛ: «Ǹ'i makoli kɛla ji le le, kɛɛ mɔɔ dɔ y'ài tɛma, ài ma min lɔn.

²⁷ Ale le natɔ ǹ kɔ, kɛɛ hali ka aa samala julu fɔlin a yɛ, ǹe dɔɔyayine wo ma.»

²⁸ Ko wolu bɛ ka timin Betani so le dafɛ Julidɛn kɔɔ kɔma, Yaya tɛɛ mɔɔlu makola tɛɛminja.

Ala ya Saa Bolan

²⁹ Wo kɛnɛbɔlon, Yaya ka Isa natɔla ye a ma k'a fɔ, a vɛɛ: «Ài ɲa kaa! Ala ya Saa Bolan ne ve le, min yi julumbu bɔla dunuɲamɔɔlu ma.

³⁰ Ǹ kan tɛɛ min ma, ale le ne, ǹ ko: ‹Mɔɔ dɔ natɔ ǹ kɔ min buɲanin ǹ ne, kamasɔlɔn jani ǹ tɛɛ sɔlɔn, ale tɛɛ je.›

³¹ Ǹe koni tɛɛ m'a lɔn kunfɔlɔ le, kɛɛ ǹ nanin mɔɔlu makola ji le le, fɔsa a la yi nkɛnɛmaya Bani Isilankalu yɛ.»

³² Yaya ka seleya min di, a vɛɛ: «Ǹ na Nii Sɛnɛyanin jiitɔla yena ka bɔ sangbolo lɔ iwo poponi, a do ka to a fɛ.

³³ Ǹe koni tɛɛ m'a lɔn kunfɔlɔ le, kɛɛ min na ǹ kelayala ka mɔɔlu mako ji le, wo tii le n'a fɔla ǹ yɛ, a vɛɛ: ‹I vɛ Nii Sɛnɛyanin jiitɔla yena ka to mɔɔ min fɛ, wo tii le kɛtɔ mɔɔlu makola Nii Sɛnɛyanin ne.›

³⁴ Ǹ na wo kɛnin yena, ani m̀'ɛ seleya di ko Ala Denkɛ le a le.»

Isa ka a kɔbiladen kunfɔlɔlu kili teme

³⁵ Wo kɛnɛbɔlon, Yaya ni a kɔbiladen fila tɛɛ lɔnin je kɔtunun.

³⁶ A do ka Isa timintɔla ye k'a fɔ, a vɛɛ: «Ài ɲa kaa! Ala ya Saa Bolan ne ve le!»

³⁷ Yaya kɔbiladen mɔɔ fila ka aa kuma wo mɛn mingɛ, ai do vɛ bilala Isa kɔ.

³⁸ Isa k'i ɲa tilimin mingɛ k'ai ye a kɔ, a k'ai maɲininga, a vɛɛ: «Ài yi mindɛ kɔ?» Ai do vɛɛ a yɛ: «Labi, i jiya yi min ne?» (Labi kɔlɔ le ko Kalanmɔɔ).

³⁹ Isa k'ai javi, a vɛɛ: «Ài yi na, ài kɛtɔ je yena.» Wo lɔ, ai ka taa ka a makɛya ye ka tele tɔ kɛ je, kamasɔlɔn tele ma tɛɛ vɛ jii.

⁴⁰ Mɔɔ fila minu ka Yaya kumakan mɛn ka bila Isa kɔ, wo kelen tɔɔ le tɛɛ ko Andele, min yi Simɔn Piyɛli dɔɔni le.

⁴¹ Ale le ka taa kunfɔlɔ le ka a kɔlɔkɛ Simɔn talan k'a fɔ a yɛ, a vɛɛ: «Mɔ na Alimasihu yena!» (Alimasihu kɔlɔ le ko Masa Tɔɔmasenin.)

⁴² Wo ma, Andele ka taa Simɔn ne Isa fɛ. Isa do k'i ɲa kaa a lɔ k'a fɔ a yɛ, a vɛɛ: «Yohana denkɛ Simɔn ne i le le, ai do kɛtɔ a fɔla i ma ko Sefasi.» (Sefasi ni Piyɛli yi tɔɔ kelen ne le. Ai kɔlɔ le ko Kawa.)

Filipe ni Nataniyɛli ka bila Isa kɔ teme

⁴³ Wo dusagbɛlon, Isa ka miliya ta ko a yi taa Galile koovi lɔ. A do ka Filipe ye k'a fɔ a yɛ, a vɛɛ: «Na, i yi bila ǹ kɔ.»

⁴⁴ Filipe bɔnin tɛɛ Betisaida so le la, Andele ni Piyɛli ya so.

⁴⁵ Filipe ka Nataniyɛli ye mingɛ, a do vɛɛ a yɛ: «Mɔɔ min ya ko sɛvɛnin Nabi Musa ya Taulati ni kela dɔgbɛlɛlu ya kitabulu kɔnɔ, mɔ na wo tii yena. Nazalɛtika Isa le, Jusufu denkɛ.»

⁴⁶ Nataniyɛli do vɛɛ a yɛ: «Jalasa kokein yi sene bɔla Nazalɛti?» Filipe k'a javi, a vɛɛ: «Na, i y'a ye.»

⁴⁷ Isa ka Nataniyɛli natɔla ye a ma mingɛ, a ka kuma ka bɛn a ma, a vɛɛ: «Bani Isilanka gbugbu le min ne, min joso lɔgbɛnin.»

⁴⁸ Wo lɔ, Nataniyɛli k'a maɲininga, a vɛɛ: «I na ǹ lɔnna di?» Isa k'a javi, a vɛɛ: «Ǹ na i siinin yena toloju kɔlɔ jani Filipe tɛɛ i kili.»

⁴⁹ Nataniyɛli k'a javi, a vɛɛ: «Kalanmɔɔ, Ala Denkɛ le i le le, ani Isilan masakɛ!»

⁵⁰ Isa do vɛɛ a yɛ: «Ǹ n'a fɔ mingɛla i yɛ, ǹ ko, ǹ n'i yena toloju kɔlɔ, wo le na i limaniyala m̀ ma? I kɛtɔ ko gbɛlɛlu yena minu buɲanin vɛ wo le!»

⁵¹ A do vɛɛ kɔtunun: «Ǹ'i tuɲa fɔ ài yɛ, ài kɛtɔ sangbolo dalakanin yena ka Ala ya mɛlɛkalu ye jii ni jɛlɛla Mɔɔnivin Tanin kunna.»