Tite 3 - Ala Ya Salatikan Kula Kitabu

Limaniyamɔɔlu taamaɲa

¹ I iya mɔɔlu hangili bila ko ai y'ai fanmajii kuntiilu ni fangatiilu yɛ, k'ai kumakan labato, ani k'ai lɔbɛn koɲumakɛko lɔ waate bɛ.

² Ai do kà koyon fɔ mɔɔ suu suu ma, mafɔ ai yi kɛ mɔɔ josolajiininnu le, ani mɔɔ sɔniyaninnu, ka duuma fan ta bɛ yɛ.

³ Kamasɔlɔn waate lɔ, ǹu gbu tɛɛ hangilindan ne le, ani kolobali, ani mɔɔ filinin, ado mɔ tɛɛ jɔnya le lɔ niikanuko kaijakaijalu bolo ani jɛlɛdiyabɔ. Mɔ do tɛɛ maa dunuɲalɔtɛɛ kɛla kɔnɔlɔgbeya ni ɲangbeya le lɔ. Mɔ gbeyayine tɛɛ dɔlu yɛ, ailu fana gbeyayine tɛɛ mɔ yɛ.

⁴ Kɛɛ mɔ Lakisiba Ala ya ɲumaya ni aa kanundeya ka bɔ gbɛ la waate min nɔ,

⁵ a ka mɔ lakisi. Wo do ma kɛ ka bɛn mɔ kɛko telenninu ma, mafɔ aa henandeya, ani Nii Sɛnɛyanin ya makoli, min na mɔ ladan kula kɛla ka niimaya kula di mɔ ma.

⁶ Ala ka mɔ sɔ Nii Sɛnɛyanin sɔ bɛlɛbɛlɛ kɛ mɔ Lakisiba Masa Tɔɔmasenin Isa sabu la,

⁷ fɔsa m'i kɛ telenmande le Ala ɲakɔlɔ ka bɛn aa nɛɛma ma, ka mɔ fɛ bila niimaya banbali sɔlɔnko la, m'i mɔ jeisii le.

⁸ Kuma min yi tuɲa le le. Ǹ'a fɛ i yi ko minu magbeleya fɔsa Ala malimaniyamɔɔlu y'ai gbaladon koɲumakɛko ma, minu keinyanin, ani nafa yi minu la mɔɔ bɛ yɛ.

⁹ Kɛɛ i k'i fɛ bila sɔsɔyali fuunnu la, ani jilijaa ɲafɔkolu, ani ko minu yi mɔɔlu falanna i ɲɔɔ ma, ani kɛlɛkɛkolu ka bɛn Nabi Musa ya seliya ma. Kamasɔlɔn nafa tɛ kofuun wo suu suu la.

¹⁰ Ni mɔɔ dɔ ka kɛ je min yi falanɲɔɔya ladonna mɔɔlu wotɛ, i yi wo tii lali siɲa fila le, wo kɔ, i i mataa a la.

¹¹ I yi gbɛ a ma ko mɔɔ suu wolu kɔnɔlɔgbeyayine, ai do ya julumbulu y'ai jobaliyala.

Lailikan ni folikan labannu

¹² Ni ǹ ka Alitimasi lataa i ma waate min nɔ, niwotɛ Tisiki, i yi senko bɛ kɛ ka na m̀ ma Nikopolisi so kɔnɔ, kamasɔlɔn m̀'ɛ a latɛɛ, ǹ ko, ǹ kɛtɔ nɛnɛbɔ waate kɛla je le.

¹³ I i senko bɛ kɛ ka Zenasi seliya lɔnba ni Apolosi madɛmɛn aiya taamanko lɔ, fɔsa ai kana dɛsɛ foi la.

¹⁴ Ado maa mɔɔlu fana ka kan k'ai jɛlɛ dein kobɛlɛkɛko la, fɔsa ai yi se dɔlu bɔla ko gbɛlɛnnu lɔ, ai do kà kɛ mɔɔ fofo le.

¹⁵ Mɔɔ minu yi ǹ dafɛ jan, wolu bɛ y'i fola. Mɔɔ minu yi mɔ kanula maa limaniya lɔ, i yi wolu fo ǹ yɛ. Ala ya nɛɛma yi kɛ ài bɛ yɛ.